សម្ដេចតេជោ ហ៊ុន សែន ទម្លាយព័ត៌មានសម្ងាត់ថា ក្រុមជ្រុលនិយមកំពុងផ្ដួចផ្ដើមបង្កើតរដ្ឋាភិបាលនិរទេសនៅបរទេសនិងព្រមានកម្ចាត់បក្សដែលធ្វើជាដៃជើង
21-September-2026 / ផ្សេងៗ
ភ្នំពេញ៖ថ្លែងយ៉ាងដូច្នេះក្នុងឱកាសប្រារព្ធមិទ្ទិញអបអរសាទរខួប៧៣ឆ្នាំ ថ្ងៃកំណើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២៤)។ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានទម្លាយព័ត៌មានសម្ងាត់មួយថា ក្រុមជ្រុលនិយមកំពុងផ្ដួចផ្ដើមបង្កើតរដ្ឋាភិបាលនិរទេសមួយនៅឯបរទេស ដើម្បីប្រឆាំងនឹងរាជរដ្ឋាភិបាលស្របច្បាប់ បំផ្លាញសន្តិភាព និងភាពសុខសាន្តរបស់ប្រជាពលរដ្ឋកម្ពុជា ដូច្នេះដើម្បីធានាការពារសុខសន្តិភាពនិងប្រជាជន សូមប្រជាពលរដ្ឋនិងរាជរដ្ឋាភិបាលរួមគ្នាកម្ចាត់គណបក្សនយោបាយដែលធ្វើជាដៃជើង ឬមានទំនាក់ទំនងជាមួយរដ្ឋាភិបាលខុសច្បាប់នោះ ពិសេសត្រូវដាក់ទោសឱ្យធ្ងន់ចំពោះក្រុមជ្រុលនិយមនេះ។
សម្តេចតេជោ ហ៊ុន សែន បានលើកឡើងថា នៅប្រទេសបារាំង ប្រធានាធិបតី ម៉ាក្រុង ទើបតែបានថ្លែងថា សម្រាប់ការបោះឆ្នោតសកលនាពេលខាងមុខ ប្រសិនបើគណបក្សស្ដាំនិយមជ្រុល ឬគណបក្សឆ្វេងនិយមជ្រុលឈ្នះឆ្នោត លទ្ធភាពនៃការកើតសង្គ្រាមស៊ីវិលនឹងអាចកើតមាននៅប្រទេសបារាំង ដូច្នេះកម្ពុជាច្បាស់ជាមានហេតុផលនិយាយដូចគ្នាដែរថា ប្រសិនបើក្រុមជ្រុលនិយមនៅបន្តសកម្មភាព ប្រទេសជាតិក៏អាចឆ្លងកាត់នូវការលំបាក ដែលធ្វើឱ្យប្រជាជនហូរឈាមសាជាថ្មីម្ដងទៀត។
សម្ដេចតេជោប្រធានគណបក្សបានបង្ហើបព័ត៌មានសម្ងាត់ថា «ការផ្តួចផ្តើមគំនិតដើម្បីបង្កើតរដ្ឋាភិបាលនិរទេសបានចាប់ផ្តើមហើយ ខ្ញុំសូមយកព័ត៌មានសម្ងាត់នេះបញ្ជាក់ជូនអ្នកនៅក្នុងប្រទេសថា បក្សណាក៏ដោយដែលមានទំនាក់ទំនងជាមួយរដ្ឋាភិបាលនិរទេសនៅឯបរទេសនោះ យើងត្រូវតែកម្ចាត់ចោលភ្លាម រំសាយចោលភ្លាមនូវអង្គការចាត់តាំងបក្សណាក៏ដោយដែលនៅក្នុងប្រទេស នេះគឺជារឿងចាំបាច់ដើម្បីធានាការពារ»។
សម្ដេចតេជោក្នុងនាមប្រធានព្រឹទ្ធសភាបានឱ្យដឹងថា កម្ពុជាមិនអាចឱ្យពួកគេមានក្បាលម៉ាស៊ីរដ្ឋាភិបាលនៅក្រៅប្រទេស ហើយមានសមាជិកធ្វើសកម្មភាពនៅក្នុងប្រទេសបានទេ ដូច្នេះសម្ដេចតេជោក៏បានអំពាវនាវចំពោះរាជរដ្ឋាភិបាលពិនិត្យពិចារណាលើរឿងនេះ ពិសេសគួរតែធ្វើវិសោធនកម្មលើច្បាប់ស្ដីពីគណបក្រនយោបាយ ឬច្បាប់ដទៃទៀត ប្រសិនបើពួកគេចូលរួមបង្កើតរដ្ឋាភិបាកនិរទេស ត្រូវតែដាក់ទោសឱ្យធ្ងន់បំផុតចំពោះក្រុមជ្រុលនិយមនេះ។សម្ដេចតេជោ ហ៊ុន សែន បានបន្តទៀតថា យើងត្រូវហ៊ានធ្វើអ្វីៗ ដើម្បីការពារនូវសន្តិភាពសម្រាប់ប្រជាជនកម្ពុជា គ្រប់គ្នាត្រូវរួមគ្នាបន្តការពារសន្តិភាពនេះឱ្យខាងតែបាន ទោះក្នុងតម្លៃណាក៏ដោយ ដើម្បីទប់ស្កាត់នូវចរន្តជ្រុលនិយមដែលអាចនាំគ្រោះថ្នាក់ដល់ប្រទេសជាតិ។
ក្រៅពីណែនាខាងលើ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានអំពាវនាវដល់មន្ត្រីគណបក្សទាំងក្នុង និងក្រៅប្រទេសត្រូវឱ្យបម្រើប្រជាជនដោយស្មោះ ដោយលើកឡើងថា «យើងជាអ្នកបម្រើប្រជាជនមិនមែនជាចៅហ្វាយរបស់ប្រជាជនឡើយ»។សម្តេចតេជោ ហ៊ុន សែន បានលើកឡើងថា ជួរមន្ត្រីគណបក្សនៅគ្រប់ថ្នាក់ប្រកបដោយភាពរឹងមាំ និងស្អាតស្អំ គឺជាកត្តាសំខាន់ជាគន្លឹះនៃជ័យជម្នះ ព្រោះថាមន្ត្រីគណបក្សជាស្ពានតភ្ជាប់រវាងគណបក្សជាមួយប្រជាជន កម្លាំងដឹកនាំ ជាកម្លាំងជំរុញ និងអនុវត្តនូវកម្មវិធីនយោបាយរបស់គណបក្ស។ ដូច្នេះ គណបក្សត្រូវយកចិត្តទុកដាក់ដល់ការហ្វឹកហ្វឺនបណ្តុះបណ្តាល និងបំពាក់បំប៉នជួរមន្ត្រីគណបក្សទាំងសម្រាប់រយៈពេលបច្ចុប្បន្ន និងសម្រាប់រយៈពេលយូរអង្វែង ដើម្បីធានាការលើកកម្ពស់សមត្ថភាពឥតឈប់ឈរទាំងខាងនយោបាយ និងមុខជំនាញ ព្រមទាំងគុណធម៌ អត្តចរិត និងសីលធម៌ ឱ្យទទួលបាននូវការស្រឡាញ់ និងគាំទ្រពីប្រជាជន។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានប្រកាសឱ្យរាំងស្កាត់ឱ្យបានម៉ឺងម៉ាត់ចំពោះភាពអសកម្មរបស់មន្ត្រីដែលបំពានលើគោលការណ៍គណបក្ស និងច្បាប់រដ្ឋ ដែលនាំឱ្យប៉ះពាល់ដល់សិទ្ធិ និងផលប្រយោជន៍របស់ប្រជាជន។ សម្ដេចតេជោ ហ៊ុន សែន បានសង្កត់ធ្ងន់ថា៖ «ក្នុងចំណុចនេះខ្ញុំសូមបញ្ជាក់ជូន ចំពោះអង្គមីទ្ទិញ នៅទីនេះក៏ដូចជាសមាជិក សមាជិកកាទាំងអស់របស់គណបក្សប្រជាជនទាំងក្នុង និងក្រៅប្រទេស ក៏ដូចជាប្រជាជនថា ប្រជាជនកម្ពុជា ត្រូវការដឹកនាំរបស់គណបក្សប្រជាជនគាំទ្រគណបក្សប៉ុន្តែ អ្វីដែលប្រជាជន គឺមិនសប្បាយចិត្ត គឺទង្វើខុសឆ្គងរបស់មន្ត្រីគណបក្សមួយចំនួន ដែលនោះខ្ញុំអំពាវនាវចំពោះមន្ត្រីគណបក្សទាំងអស់ ចូលធ្វើសកម្មភាពបម្រើប្រជាជនដោយស្មោះ យើងគឺ «ជាអ្នកបម្រើដោយស្មោះត្រង់ របស់ប្រជាជនមិនមែនជាចៅហ្វាយរបស់ប្រជាជននោះឡើយ»។
សម្ដេចតេជោ ហ៊ុន សែន បានចាត់ទុកប្រជាជន គឺជាកត្តាសម្រេចនៃជ័យជម្នះរបស់គណបក្សនៅគ្រប់កាលៈទេសៈ ទាំងក្នុងដំណាក់កាលតស៊ូរំដោះជាតិ ក៏ដូចនៅក្នុងដំណាក់កាលនៃការកាន់អំណាចដឹកនាំប្រទេសរបស់គណបក្ស។ បើប្រជាជនមិនគាំទ្រ មិនចូលរួម មិនជឿលើការដឹកនាំរបស់គណបក្ស នោះគឺគ្មានភារកិច្ចណាដែលគណបក្សអាចសម្រេចបានឡើយ។
បន្ថែមពីនេះ សម្ដេចតេជោ ប្រធានគណបក្ស បានណែនាំដល់គ្រប់អង្គការចាត់តាំងគណបក្សនៅគ្រប់ថ្នាក់ ត្រូវតែផ្សារភ្ជាប់ជាមួយប្រជាជន ធ្វើបង្អែកឱ្យប្រជាជន ដើម្បីដោះស្រាយនូវសំណូមពរ និងការលំបាកនានារបស់ប្រជាជនផង និងបំផុសប្រជាជន ចូលរួមអនុវត្តកម្មវិធីនយោបាយរបស់គណបក្សផង។
ក្នុងនាមគណបក្សកាន់អំនាចសម្តេចតេជោ ហ៊ុន សែន បានគូសបញ្ជាក់ថា គណបក្សប្រជាជនកម្ពុជា ក៏បានណែនាំឲ្យរាជរដ្ឋាភិបាលធ្វើការគោះរគាំងទូងស្គបាញ់កាំច្រួចនៅថ្ងៃទី៥សីហាឆ្នា២០២៤ដើម្បីអបអរសារទរការបើកការដ្ឋានជីកព្រែកហ្វូណតេជោផងដែរ៕
