បាលខេត្តពោធិ៍សាត់ ចេញសេចក្តីបំភ្លឺព័ត៌មាន ទាក់ទងរឿងឈ្មួញឈើតាហយ បំផ្លាញព្រៃឈើដ៏ធំធេងហើយកាសែតរិះគន់មន្ត្រីឧទ្យាននិងប្រធានមន្ទីរបរិស្ថាន
21-September-2026 / ព័ត៌មានជាតិ
ពោធិ៍សាត់៖ រដ្ឋបាលខេត្តពោធិ៍សាត់ នាថ្ងៃទី២៤ ខែមិថុនា ឆ្នាំ២០២៤ បានចេញសេចក្តីបំភ្លឺព័ត៌មាន ទាក់ទងនឹងការចុះផ្សាយតាមបណ្តាញព័ត៌មានសង្គម ដែលលើកឡើងថា មានការបែកធ្លាយរឿងប្រធានឧទ្យានជាតិភ្នំក្រវាញ ខេត្តពោធិ៍សាត់ និងឈ្មួញឈើតាហយ បំផ្លាញព្រៃឈើដ៏ធំធេង។ក្នុងសេចក្តីបំភ្លឺព័ត៌មាន ដែលបណ្ដាញព័ត៌មានទទួលបាន ឲ្យដឹងថា កាលពីពេលថ្មីៗនេះ មានការចុះផ្សព្វផ្សាយតាមបណ្តាញព័ត៌មានសង្គម របស់គណនីហ្វេសបុកផេក ផែនដីថ្មី PDT-news ដែលមានខ្លឹមសារថា៖ បែកធ្លាយរឿងប្រធានឧទ្យានជាតិភ្នំក្រវាញ ខេត្តពោធិ៍សាត់ និងឈ្មួញឈើតាហយ បំផ្លាញព្រៃឈើដ៏ធំធេង រដ្ឋមន្ត្រីក្រសួងបរិស្ថាន ក្រសួងពាក់ព័ន្ធ ចាត់វិធានការផង។
ពាក់ព័ន្ធករណីនេះ រដ្ឋបាលខេត្តពោធិ៍សាត់ បានជម្រាបជូនដល់សាធារណជន និងបណ្តាញផ្សព្វផ្សាយព័ត៌មានទាំងអស់ឲ្យបានជ្រាបថា៖ទី១៖ កាលពីប៉ុន្មានថ្ងៃមុននេះ កម្លាំងចម្រុះរបស់គណៈបញ្ជាការឯកភាពរដ្ឋបាលខេត្ត ក្រោមការដឹកនាំរបស់លោក ខូយ រីដា អភិបាលខេត្តពោធិ៍សាត់ ក្នុងឋានៈជាប្រធានគណៈបញ្ជាការឯកភាព រដ្ឋបាលខេត្ត និងដោយមានការសម្របសម្រួល ពីតំណាងអយ្យការអមសាលាដំបូងខេត្ត បានចុះពិនិត្យ ឆែកឆេរទីតាំង៣កន្លែង នៅឃុំឈើតុំ ស្រុកក្រគរ ដោយរកឃើញឈើចម្រុះប្រភេទ និងមធ្យោបាយ ប្រព្រឹត្តបទល្មើសមួយចំនួន នៅទីតាំងរបស់ឈ្មោះ កោះ សំភី (ហៅតាហយ) ដែលបានរត់គេចខ្លួនបាត់ ហើយបច្ចុប្បន្ន ជំនាញមានសមត្ថកិច្ចកំពុងបន្តនីតិវិធីយ៉ាងយកចិត្តទុកដាក់ជាទីបំផុត ដើម្បីស្វែងរកចាប់ខ្លួនឈ្មោះ កោះ សំភី (ហៅតាហយ) និងបក្ខពួក ព្រមទាំងអ្នកពាក់ព័ន្ធឱ្យខាងតែបាន។
ទី២៖ តាមការស្រាវជ្រាវ ស៊ើបអង្កេតរបស់ស្ថាប័នជំនាញ លោក រី ភារម្យ ប្រធានការិយាល័យឧទ្យានជាតិ និងជានាយកឧទ្យានជាតិជួរភ្នំក្រវាញ ពុំមានឈ្មោះជាប់ពាក់ព័ន្ធដូចការចុះផ្សាយនោះឡើយ។
*ទី៣៖ មកទល់ពេលនេះ លោក គង់ ពុទ្ធីរ៉ា ប្រធានមន្ទីរបរិស្ថានខេត្ត បាននិងកំពុងបំពេញតួនាទី ភារកិច្ច របស់ខ្លួនយ៉ាងសកម្ម ពុំមានការដកតួថនាទី ភារកិច្ចពីប្រធានមន្ទីរ ដើម្បីដាក់លោក រី ភារម្យ ជាបេក្ខភាព ជំនួសដូចការចោទប្រកានរបស់គណនីហ្វេសបុកផេក ផែនដីថ្មី PDT-news ចុះផ្សាយឡើយ។ទី៤៖ តាំងពីការចូលកាន់តំណែងជាអភិបាលខេត្ត លោក ខូយ រីដា បានចាត់ទុកការបម្រើប្រជាពលរដ្ឋ និងការបង្ការទប់ស្កាត់ បង្ក្រាបបទល្មើសជាកិច្ចការអាទិភាពបំផុត និងបានចាត់វិធានការផ្លូវច្បាប់ ចំពោះជនល្មើសជាបន្តបន្ទាប់។
ផ្អែកលើមូលដ្ឋានខាងលើនេះ រដ្ឋបាលខេត្តពោធិ៍សាត់ សូមធ្វើការបដិសេធចំពោះការចុះផ្សាយរបស់គណនី ហ្វេសបុកផេក ផែនដីថ្មី PDT-news ដែលជាការចុះផ្សាយមានលក្ខណៈញុះញង់ បំបែកបំបាក់ផ្ទៃក្នុងអង្គភាព ផ្សាយបំភ្លើសពីការពិត មូលបង្កាច់ និងធ្វើការវាយតម្លៃថ្នាក់ដឹកនាំដោយគ្មានមូលដ្ឋានត្រឹមត្រូវ ដើម្បីកេងយកចំណេញ ប្រយោជន៍អ្វីមួយក្នុងវិជ្ជាជីវៈរបស់ខ្លួនប្រាស់ចាកពីក្រមសីលធម៌ជាអ្នកសារព័ត៌មាន។រដ្ឋបាលខេត្តសូមស្នើឱ្យគណនីហ្វេសបុកផេក ផែនដីថ្មី PDT-news ធ្វើការកែតម្រូវអំពីការចុះផ្សាយបំភ្លើស ការពិតរបស់ខ្លួនឡើងវិញជាបន្ទាន់។
សូមបញ្ជាក់ដែរថាទាក់ទងបញ្ហានេះដែរលោកតាន់គឺមសួរសកម្មជនហ្វេសប៊ុកខាងការពារព្រៃឈើដែលចូលរួមការបង្ក្រាបនេះបានបង្ហោះសារតាមហ្វេសប៊ុកថា៖សួស្ដីលោករី ភារម្យ!អត់ទោស លោកគឺជាប្រធានការិយាល័យឧទ្យានជាតិភ្នំក្រវ៉ាញ់ និងជាបេក្ខភាពប្រធានមន្ទីរបរិស្ថានខេត្តពោធិ៍សាត់មែនដែរឬទេ? ហេតុអ្វីបានជារក្សាភាពស្ងាត់ស្ងៀមបានម្ល៉េស ធ្វើដូចគ្មានរឿងអ្វីកើតឡើងបន្តិចទាល់តែសោះ។ តើលោកមានដឹងអំពីករណីតាហ៊យដែលត្រូវបានចុះបង្ក្រាបថ្មីៗនេះនៅតំបន់របស់លោកដែរឬទេ? ។
ខ្ញុំជឿជាក់ថាលោកមិនត្រឹមតែដឹងអំពីការចុះបង្ក្រាបនោះទេ តែលោកថែមទាំងដឹងច្បាស់អំពីក្រដាសតាស្រម៉ូមរបស់តាហ៊យទៅទៀត មិនអ៉ីចឹងអី? តិចឆ្លើយថាលោកមិនមានការពាក់ព័ន្ធជាមួយនឹងករណីរបស់តាហ៊យ និងករណីបទល្មើសជាច្រើនពាន់ករណីដែលកំពុងតែមានកើតមាននៅតំបន់ដែលលោកគ្រប់គ្រងចុះ បើមិនមានការពាក់ព័ន្ធមែន មានតែលោកជាមេដែលគ្មានសមត្ថភាព ឬគ្មានដឹងខ្យល់ស្អីទាល់តែសោះ ដេកចាំស៉ីប្រាក់ខែរដ្ឋ បានជាតាហ៊យអាចធ្វើព្យុះធ្វើភ្លៀងបំផ្លាញជិតអស់ព្រៃនៅតំបន់ដែលលោកកាន់កាប់ដោយសេរីបែបនេះ។
តើលោកស័ក្ដិសមជាបេក្ខភាពជាប្រធានបរិស្ថានខេត្តដែរឬទេ បើសូម្បីតែតំបន់តូចមួយលោកគ្មានសមត្ថភាពក្នុងការគ្រប់គ្រងផង ចុះទម្រាំខេត្តទាំងមូល? តើមហាជននឹងយល់ឃើញយ៉ាងណាដែរ បើលោកក្លាយជាមេបរិស្ថានខេត្ត? ខ្ញុំពិតជាមិនហ៊ានស្រមៃទេថានឹងបន្តមានវិនាសកម្មភាពឈើកាន់តែធ្ងន់ធ្ងរកម្រិតណាទៀត នៅពេលដែលមន្ត្រីដែលគ្មានសមត្ថភាពដូចលោកត្រូវបានជ្រើសតាំងមេបរិស្ថានខេត្តនោះ។ឃើញទេភាពស្ងៀមស្ងាត់របស់លោកមិនអាចឲ្យលោកគេចផុតទេ។ មហាជន និងច្បាប់មិនអនុញ្ញាតឲ្យលោករួចខ្លួនដាច់ខាត។ បើខ្ញុំជាលោកវិញ ខ្ញុំសុំលាលែងពីតំណែងបាត់ទៅហើយ។
ជាចុងក្រោយក្នុងនាមខ្ញុំជាប្រជានសមាគមយុវជនស្រលាញ់ធម្មជាតិ សូមគោរពស្នើសុំទៅឯកឧត្ដមបណ្ឌិត អ៊ាង សុផល្លែត រដ្ឋមន្ត្រីនៃក្រសួងបរិស្ថាន និងឯកឧត្ដមខូយ រីដាអភិបាល នៃគណៈអភិបាលខេត្តពោធិ៍សាត់មេត្តាធ្វើការពិចារណាឡើងវិញអំពីការជ្រើសតាំងលោករី ភារម្យនេះជាបេក្ខភាពប្រធានមន្ទីរបរិស្ថានខេត្តពោធិ៍សាត់ និងបើកការស៊ើបអង្កេតយ៉ាងហ្មត់ចត់អំពីរឿងរ៉ាវមិនប្រក្រតីមួយចំនួនរបស់លោករី ភារម្យនេះសូមឯកឧត្ដមទទួលយកការគោរពដ៏ខ្ពង់ខ្ពស់ពីខ្ញុំបាទ តាន់ គឹមសួរផង។
ករណីយ៍រកឃើញបទល្មើសព្រៃឈើទ្រង់ទ្រាយធំក្នុងអាណាចក្រខេត្តពោធិសាត់នេះសង្ឃឹមថាសមត្តកិច្ចនឹងមិនបញ្ឈប់ត្រឹមការចាប់ជនប្រព្រឹត្តឈ្មោះតាហយនោះទេ។ត្រូវរកឲ្យខើញថាតើមានអ្នកណាឃុបឃឹតបិតបាំងបទល្មើសទ្រង់ទ្រាយធំមួយនេះ?៕
