លោកអាន់វ៉ានិងមហាធៀមេដឹកនាំសមាជិកសភាបក្សប្រឆាំងត្រូវប៉ូលិសហាមមិនឱ្យហែរក្បួនទៅសភា
27-March-2024 / ព័ត៌មានអន្តរជាតិ
ម៉ាឡេស៊ី ៖ សមាជិកសភាគណបក្សប្រឆាំងនៅម៉ាឡេស៊ីដឹកនាំដោយលោកអាន់វ៉ាអ៊ីប្រាហ៊ីមនិងលោកមហាម៉ាតមហាធាកាលពីថ្ងៃចន្ទទី២ សីហាបានអំពាវនាវជាថ្មីម្តងទៀតឱ្យនាយករដ្ឋមន្ត្រីមូហ៊ីដឌីន យ៉ាសស៊ីន លាលែងពីតំណែងនិងរិះគន់រដ្ឋាភិបាលរបស់លោកចំពោះការលើកពេលថ្ងៃចុងក្រោយនៃកិច្ចប្រជុំពិសេសរបស់សភា។
ក្រុមអ្នកតាក់តែងច្បាប់ទាំងនេះនិយាយថាពួកគេនឹងចូលរួមសភានៅថ្ងៃចន្ទនេះ បើទោះបីជាមានការពន្យារពេលក៏ដោយប៉ុន្តែត្រូវបានរារាំងមិនឱ្យធ្វើដូច្នេះបន្ទាប់ពីប៉ូលិសបានបិទផ្លូវចូលទៅកាន់អគារសភា។បន្ទាប់ពីប្រមូលផ្តុំគ្នានៅទីលានមឺដេកានៅក្បែរនោះ កាសែត The Starបានរាយការណ៍ថា ពួកគេបានដើរក្បួនឆ្ពោះទៅសភា ប៉ុន្តែត្រូវបានរារាំងដោយប៉ូលិស។ មេដឹកនាំគណបក្សប្រឆាំងលោកអាន់វ៉ា អ៊ីប្រាហ៊ីមបានព្យាយាមចរចាជាមួយប៉ូលិសដើម្បីអនុញ្ញាតឱ្យពួកគេបន្តដំណើរ ខណៈតំណាងរាស្ត្រគណបក្សប្រឆាំងជាច្រើនរូបបានស្រែកពាក្យស្លោកថា “ជយោប្រជាជន ជយោព្រះមហាក្សត្រ”។
ក្រោយមក លោកអាន់វ៉ាបានថ្លែងសុន្ទរកថាខ្លីមួយមុនពេលក្រុមនេះបំបែកគ្នាដោយសន្តិវិធី។ “ប្រជាពលរដ្ឋថ្កោលទោសហើយ នៅតែមិនបដិសេធមិនចុះចេញពីតំណែងទៀត” ! នេះជាប្រសាសន៍របស់លោកមហាធៀរ។ ចំណែកលោកអានវ៉ាវិញបានប្រកាសថា “រដ្ឋាភិបាលបច្ចុប្បន្ន បាត់ភាពជាអ្នកដឹកនាំប្រទេសស្របច្បាប់ទៀតហើយ ព្រោះពុំមានសំឡេងគាំទ្រភាគច្រើននៅក្នុងសភាទៀតទេ”។
រដ្ឋបាលរបស់លោកមូហ៊ីដឌីនបានលើកពេលប្រជុំសភានៅថ្ងៃចន្ទនេះ ដោយលើកឡើងពីករណីកូវីដ១៩រកឃើញនៅក្នុងអគារសភា។ក្រុមប្រឆាំងនិងក្រុមប្រជែង បានចោទលោកនាយករដ្ឋមន្ត្រីម៉ូយីដឌីន យ៉ាស៊ីន ថាកំពុងប្រើកូវីដជាលេស ដើម្បីកុំឱ្យសភាបោះឆ្នោតដកទំនុកចិត្តពីរដ្ឋាភិបាលលោកទាន់។
រឿងនេះកើតឡើងចំពេលមានជម្លោះដោយបើកចំហរវាងនាយករដ្ឋមន្ត្រីនិងព្រះបរមរាជវាំង។គណបក្សប្រឆាំងបានចាត់ទុកការលើកប្រជុំសភារហូតដល់កាលបរិច្ឆេទដែលមិនបានបញ្ជាក់ថាជា “រឿងគួរឱ្យអស់សំណើច”។
នៅក្នុងសារបង្ហោះនៅលើបណ្តាញសង្គម Twitter សមាជិកសភារបស់បក្សឡេមបាផាន់ទីលោក ហ្វាមី ហ្វាដហ្ស៊ីល បាននិយាយថា ការផ្អាកប្រជុំសភារយៈពេលពីរសប្តាហ៍ដោយសារតែកូវីដ១៩ “មិនមែនជាហេតុផលល្អទេ”។គាត់បានសរសេរថា “ការពិនិត្យមនុស្សជាង ១.០០០ នាក់ត្រូវបានធ្វើឡើងនៅក្នុងសភាកាលពីថ្ងៃព្រហស្បតិ៍ ហើយអត្រាវិជ្ជមានមានត្រឹមតែ ១ ភាគរយប៉ុណ្ណោះដូច្នេះមិនមែនជាហេតុផលល្អគ្រប់គ្រាន់ដើម្បីបិទសភារយៈពេលពីរសប្តាហ៍នោះទេ”។
សូមបញ្ជាក់ថា រដ្ឋាភិបាលម៉ាឡេស៊ីដឹកនាំដោយលោកនាយករដ្ឋមន្ត្រី ម៉ូយីដឌីន យ៉ាស៊ីន រងសម្ពាធកាន់តែខ្លាំងឡើងៗ។ បន្ទាប់ពីរងការស្តីបន្ទោសពីព្រះមហាក្សត្រថាបានបន្លំសភា ប្រជាពលរដ្ឋម៉ាឡេស៊ីជាច្រើនបានចុះធ្វើបាតុកម្មទាមទារឱ្យនាយករដ្ឋមន្ត្រីចុះចេញពីតំណែង។ បាតុកម្មកាលពីថ្ងៃសៅរ៍ទី ៣១កក្កដា ជាករណីដ៏កម្រមួយស្រាប់ទៅហើយ ហើយការដែរអតីតនាយករដ្ឋមន្ត្រី មហាធៀរនិងលោកអានវ៉ា កាន់ដៃគ្នាចូលធ្វើបាតុកម្ម និងគាំទ្របាតុកម្មដែរ ជារឿងគួរឱ្យភ្ញាក់ផ្អើលមួយទៀត ព្រោះបុរសខ្លាំងទាំងពីរធ្លាប់ជាគូប្រជែងនយោបាយតាំងតឹងនឹងគ្នាខ្លាំងណាស់។
នៅឆ្នាំ១៩៩០ ក្នុងអាណត្តិជានាយករដ្ឋមន្ត្រីជាលើកដំបូង លោកមហាធៀរ មហាម៉ាត់ ធ្លាប់បានដកលោកអានវ៉ា ពីរដ្ឋាភិបាល ព្រមទាំងបានចាប់ទៅឃុំឃាំង ពីបទប្រព្រឹត្តអំពើអនាចារផ្លូវភេទជាមួយបុរស និងចោទប្រកាន់ថាបានរំលោភអំណាចទៀត។ បុរសខ្លាំងទាំងពីរបានចងសម្ព័ន្ធភាពគ្នាវិញ រហូតបានទទួលជោគជ័យជាប្រវត្តិសាស្ត្រក្នុងសម័យបោះឆ្នោតសភា នៅឆ្នាំ២០១៨។ឈ្នះឆ្នោតរួចក៏ឈ្លោះគ្នាទៀត។អ្នកនយោបាយចឹងគ្មានមិត្តឬគ្មានសត្រូវមួយជីវីតទេ!៕
