អនាគតប្រធានាធិបតីឥណ្ឌូណេស៊ីលោក Prabowo ទៅចិនបើទោះបីជាបេក្ខភាពចាញ់ឆ្នោត ស្នើតុលាការលុបចោលជ័យជម្នះ ក៏ដោយ
10-April-2024 / ព័ត៌មានអន្តរជាតិ
ឥណ្ឌូណេស៊ី៖ អនាគតប្រធានាធិបតីទើបជាប់ឆ្នោតរបស់ប្រទេសឥណ្ឌូណេស៊ី និងជាប្រធានគណបក្សចលនាឥណ្ឌូណេស៊ីដ៏រុងរឿង (Gerindra Party) លោក ប្រាបូវ៉ូ ស៊ូប៊ីអានតូ (Prabowo Subianto) ស្ថិតនៅក្នុងដំណើរបំពេញទស្សនកិច្ចក្រៅប្រទេសជាលើកដំបូងទៅកាន់រដ្ឋធានីប៉េកាំងប្រទេសចិនកាលពីថ្ងៃអាទិត្យ ក្រោយបានទទួលជ័យជម្នះក្នុងការបោះឆ្នោតជាតិកាលពីខែកុម្ភៈកន្លងទៅ ។ដំណើរទស្សនកិច្ចមានរយៈពេល៣ថ្ងៃរបស់លោក ប្រាបូវ៉ូ បានធើ្វឡើងតបតាមការអញ្ជើញរបស់ប្រធានធិបតីចិន លោកស៊ីជីងពីង ។
ក្រសួងការបរទេសចិនបានឱ្យដឹងថា លោកប្រាបូវ៉ូ គ្រោងនឹងជួបពិភាក្សាជាមួយលោកប្រធានាធិបតីស៊ីជីងពីង និងនាយករដ្ឋមន្ត្រីចិន លោកលីឈៀង ក្នុងកិច្ចប្រជុំដាច់ដោយឡែក ដើម្បីផ្លាស់ប្តូរទស្សនៈគ្នាអំពីកិច្ចពង្រឹងទំនាក់ទំនងទ្វេភាគី និងបញ្ហាផលប្រយោជន៍សំខាន់ៗរវាងប្រទេសទាំងពីរ។ទោះបីមានទំនាក់ទំនងល្អជាមួយអាមេរិកក៏ដោយក៏ដំណើរទស្សនកិច្ចរបស់លោក ប្រាបូវ៉ូ នៅពេលនេះត្រូវបានចាត់ទុក ថាជាសក្ខីកម្មនៃទំនាក់ទំនងចិន-ឥណ្ឌូណេស៊ីយ៉ាងរឹងមាំ និងជាឱកាសដ៏ល្អមួយក្នុងការពង្រឹងបន្ថែមនូវចំណងមិត្តភាពជាប្រវត្តិសាស្ត្ររវាងប្រជាជាតិទាំងពីរ និងបង្កើនកិច្ចសហប្រតិបត្តិការលើវិស័យជាយុទ្ធសាស្ត្រឱ្យកាន់តែស៊ីជម្រៅ សម្រាប់ជំរុញដល់ការអភិវឌ្ឍន៍ប្រទេសឱ្យកាន់តែប្រសើរឡើងនៅថ្ងៃខាងមុខ។
សូមបញ្ជាក់ថាសារព័ត៌មាន Reuters កាលពីថ្ងៃពុធ ទី២៧ ខែមីនា ឆ្នាំ២០២៤ បានឲ្យដឹងថា៖បេក្ខជនប្រធានាធិបតីដែលចាញ់ឆ្នោត នៅប្រទេសឥណ្ឌូណេស៉ី លោក Anies Baswedan បាននិយាយនៅចំពោះមុខតុលាការ ក្នុងសំណុំរឿងតវ៉ាលទ្ធផលបោះឆ្នោតកាលពីខែកុម្ភៈ ចោទប្រកាន់ថា មានការជ្រៀតជ្រែកពីរដ្ឋាភិបាល និងបានទទូចឱ្យតុលាការលុបចោល ជ័យជម្នះរបស់លោក Prabowo Subianto។លោក Anies បាននិយាយថា ជ័យជម្នះលើសលប់របស់លោក Prabowo បានមកពីការជួយជ្រោមជ្រែង តាមរយៈការដាក់សម្ពាធរបស់រដ្ឋាភិបាល ទៅលើអាជ្ញាធរតាមតំបន់ និងការប្រើប្រាស់ជំនួយសង្គមជាឧបករណ៍ទិញទឹកចិត្ត ដើម្បីធានាថា ការបោះឆ្នោតនឹងមានលទ្ធផលតែមួយគត់។
លោក Anies បានបន្តថា ការបោះឆ្នោតជ្រើសរើស ប្រធានាធិបតីឥណ្ឌូណេស៊ី កាលពីខែមុន បានបង្ហាញថា ប្រទេសប្រជាធិបតេយ្យធំជាងគេទី៣ លើពិភពលោកមួយនេះ កំពុងប្រឈមហានិភ័យនៃការដើរថយក្រោយ ឆ្ពោះទៅរករបបផ្តាច់ការនាអតីតកាល។ លោក Anies បានប្រាប់តុលាការធម្មនុញ្ញឥណ្ឌូណេស៉ីថា ប្រសិនបើគ្មានការកែតម្រូវនាពេលនេះទេនោះ វានឹងក្លាយជារឿងធម្មតា ពោលគឺទៅជាទម្លាប់មួយ សម្រាប់ការបោះឆ្នោតក្រោយៗទៀត និងគ្រប់ថ្នាក់ទាំងអស់។តែ រដ្ឋាភិបាលរបស់ប្រធានាធិបតីឥណ្ឌូណេស៉ីផុតអាណត្តិ លោក Joko Widodo បានច្រានចោល ការចោទប្រកាន់ដែលថា ខ្លួនបានលូកលាន់ ក្នុងដំណើរការបោះឆ្នោត។ លោក Prabowo ទទួលបានសំឡេងឆ្នោតគាំទ្រដល់ទៅជិត៦០ភាគរយ ខណៈលោក Anies ទទួលបាន២៥ភាគរយ ហើយបេក្ខជនឈរនៅលេខរៀងទី៣ គឺលោក Ganjar Pranowo ទទួលបាន១៦ភាគរយ។ លោក Ganjar ក៏នឹងត្រូវឡើងនិយាយនៅក្នុងតុលាការ ពាក់ព័ន្ធការតវ៉ារបស់លោក ចំពោះលទ្ធផលឆ្នោត ក្នុងថ្ងៃដដែលនេះផងដែរ។
ក្រុមមេធាវីរបស់លោក Anies បានប្រាប់តុលាការថា ក្នុងនាមជាអ្នកទទួលផលប្រយោជន៍ ពីការប្រព្រឹត្តដែលគ្មានយុត្តិធម៌ លោក Prabowo គួរត្រូវលុបឈ្មោះចេញពីសន្លឹកឆ្នោត។ លោក Prabowo បានរក្សាជំហរថា រូបលោកបានទទួលជ័យជម្នះយ៉ាងជាក់ច្បាស់ និងដោយស្មើភាព។ ក្រុមមេធាវីរបស់លោក Prabowo បាននិយាយថា ការចោទប្រកាន់របស់លោក Anies ផ្អែកទៅលើការសន្និដ្ឋាន និងគ្មានភស្តុតាងគ្រប់គ្រាន់។ ក្រុមមេធាវីរបស់លោក Ganjar បានអំពាវនាវឱ្យ តុលាការធម្មនុញ្ញ ចេញបញ្ជាឱ្យរៀបចំការបោះឆ្នោតសាឡើងវិញតែម្តង យូរបំផុតនៅត្រឹមថ្ងៃទី២៦ ខែមិថុនា ដែលមិនត្រូវមានវត្តមានកូនប្រុសលោក Joko Widodo គឺលោក Gibran Rakabuming Raka ឡើយ ក្រោមហេតុផលថា ការកែប្រែច្បាប់បោះឆ្នោតដើម្បីឱ្យរូបលោក អាចឈរឈ្មោះជា បេក្ខជនអនុប្រធានាធិបតី អមលោក Prabowo បានជះឥទ្ធិពលដោយមិនស្មើភាព ចំពោះលទ្ធផលបោះឆ្នោត។ការតវ៉ាចំពោះលទ្ធផលបោះឆ្នោត ត្រូវបានមើលឃើញថា ជារឿងទូទៅមួយនៅក្នុងប្រទេសឥណ្ឌូណេស៉ី ហើយតុលាការត្រូវគេរំពឹងថា នឹងឈានដល់ការសម្រេចចិត្តរបស់ខ្លួន នៅថ្ងៃទី២២ ខែមេសា ខាងមុខ។
ក្រុមមេធាវីរបស់ប្រធានាធិបតីជាប់ឆ្នោតឥណ្ឌូណេស៉ី លោក Prabowo Subianto បាននិយាយនៅថ្ងៃ២៨មិនាថា ការណ៍ដែលបេក្ខជនបាញ់ឆ្នោត ព្យាយាមដាក់ពាក្យតវ៉ាប្រឆាំងលទ្ធផលបោះឆ្នោត ទៅកាន់តុលាការធម្មនុញ្ញ ដើម្បីទាមទារលុបចោលជ័យជម្នះរបស់លោក គឺនឹងធ្វើឱ្យសិទ្ធិបោះឆ្នោតរបស់ប្រជាជនឥណ្ឌូណេស៉ី ក្លាយជារឿងឥតបានការ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី២៨ ខែមីនា ឆ្នាំ២០២៤។លោក Otto Hasibuan ដែលស្ថិតក្នុងក្រុមមេធាវីរបស់លោក Prabowo បាននិយាយនៅតុលាការធម្មនុញ្ញថា គ្មានការបំពានណាមួយឡើយ អំឡុងការបោះឆ្នោតកាលពីខែមុន ហើយលោកបានលើកឡើងថា ពាក្យបណ្តឹងផ្នែករដ្ឋបាល គួរតែត្រូវដោះស្រាយដោយទីភ្នាក់ងារឃ្លាំមើលដំណើរការបោះឆ្នោត ជាជាងតុលាការធម្មនុញ្ញ។គួរបញ្ជាក់ថា លោក Prabowo និងដៃគូឈរឈ្មោះជាអនុប្រធានាធិបតីរបស់លោក គឺលោក Gibran Rakabuming Raka ដែលជាកូនប្រុសច្បងរបស់លោក Jokowi ត្រូវបានគណៈកម្មការបោះឆ្នោតឥណ្ឌូណេស៉ី ប្រកាសជាផ្លូវការកាលពីសប្តាហ៍មុនថា ជាអ្នកទទួលជ័យជម្នះក្នុងការបោះឆ្នោត។
