មុននាំកាសែតជួបនាយករដ្ឋមន្ត្រីរដ្ឋមន្ត្រីក្រសួងពត៍មានប្រកាសថាកម្ពុជាមានសេរីភាពសារពត៍មាន
21-September-2026 / ផ្សេងៗ
ភ្នំពេញ៖ក្នុងឱកាសធ្វើសន្និសីទសារព័ត៌មាន ប្រកាសផ្សព្វផ្សាយរបាយការណ៍ស្តីពី «ស្ថានភាពសេរីភាពសារព័ត៌មាននៅកម្ពុជា» នារសៀលថ្ងៃទី៣០ ខែមេសា ឆ្នាំ២០២៤ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានឱ្យដឹងថា ក្រសួងព័ត៌មាន បាននិងកំពុងរៀបចំឡើងវិញច្បាប់ស្តីពីរបបសារព័ត៌មាន ដើម្បីឱ្យស្របតាមការវិវឌ្ឍនៃសង្គម។ការប្រកាសនេះធ្វើឡើង៣ថ្ងៃមុនពេលដែលសម្តេចធិបតីហ៊ុនម៉ាណែតបន្តទទួលជួបអ្នកសារពត៍មាននៅថ្ងៃទី៣ឧសភាដែលត្រូវនិងទិវាសេរីភាពសារពត៍មានពិភពលោក៣ឧសភាផងដែរ។
លោករដ្ឋមន្ត្រី បានបន្តថា ប្រទេសកម្ពុជា ក៏ដូចជាប្រទេសផ្សេងៗទៀតក្នុងតំបន់ បានបោះជំហានចូលដល់ចំណុចរបត់នៃបរិវត្តកម្មឌីជីថល ដែលបច្ចេកវិទ្យាទំនើប និងសម្បូណ៌បែបបានផ្លាស់ប្ដូររបៀបនៃការផ្សព្វផ្សាយ ទទួល និងចែករំលែកព័ត៌មាន ក៏ដូចជាទំនាក់ទំនងក្នុងការរស់នៅប្រចាំថ្ងៃ។ លោក នេត្រ ភក្ត្រា បានថ្លែងថាទិដ្ឋភាពនៃការប្រែប្រួលទាំងនេះចាំបាច់ទាមទារឱ្យភាគីទាំងអស់ក្នុងវិស័យព័ត៌មានអភិវឌ្ឍខ្លួនឱ្យស្របនឹងនិន្នាការវិវត្តបច្ចុប្បន្ន និងឱ្យស៊ីសង្វាក់គ្នាជាមួយដំណើរការនៃការអភិវឌ្ឍវិស័យព័ត៌មានកម្ពុជា ក្នុងការធានាគុណភាពព័ត៌មាន ប្រសិទ្ធភាពផ្សព្វផ្សាយប្រកបដោយភាពប្រកួតប្រជែង គោរពក្រមសីលធម៌វិជ្ជាជីវៈ ព្រមទាំងចូលរួមក្នុងការប្រឆាំងព័ត៌មានក្លែងក្លាយ។
លោកនេត្រភក្ត្រាបានឲ្យដឹងថា៖ក្រសួងព័ត៌មានបានត្រៀមខ្លួនរួចជាស្រេចក្នុងការសហការជាមួយសមាគមសារព័ត៌មាន និងភាគីពាក់ព័ន្ធទាំងអស់ ក្នុងការលើកកម្ពស់គុណភាពវិជ្ជាជីវៈសារព័ត៌មាន និងប្រសិទ្ធភាពនៃប្រព័ន្ធផ្សព្វផ្សាយ តាមរយៈការបន្តពង្រឹងការប្រតិបត្តិក្រមសីលធម៌វិជ្ជាជីវៈ ការគ្រប់គ្រងសន្តិសុខព័ត៌មាន បន្តផ្តល់កិច្ចគាំពារសង្គម និងការការពារផ្នែកច្បាប់ដល់អ្នកសារព័ត៌មានដែលគោរពក្រមសីលធម៌ ការពង្រឹងសមត្ថភាពជំនាញតាមរយៈការបណ្តុះបណ្តាលជំនាញនិពន្ធ ផលិត និងផ្សព្វផ្សាយព័ត៌មានប្រកបដោយគុណភាព ក៏ដូចជាបំពាក់បំប៉នជូនដល់អ្នកសារព័ត៌មាននូវចំណេះដឹងស្តីពីក្រមសីលធម៌ច្បាប់ និងបទដ្ឋានគតិយុត្តក្នុងវិស័យព័ត៌មានឱ្យកាន់តែប្រសើរ។
សម្រាប់ការអះអាងថាកម្ពុជាមានសេរភាពសារពត៍មាន លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកឡើងថា ដោយសារតែប្រទេសកម្ពុជា រងនូវភាពអយុត្តិធម៌ពីរបាយការណ៍អង្គការអន្តរជាតិមួយចំនួន ដែលចេញទាក់ទងទៅនឹងស្ថានភាពសិទ្ធិមនុស្ស សេរីភាពការបញ្ចេញមតិ និងសេរីភាពសារព័ត៌មាន កម្ពុជាចាំបាច់ ត្រូវបានរបាយការណ៍មួយដែលឆ្លុះបញ្ចាំងពីគ្រប់មជ្ឈដ្ឋានទាំងអស់ ដើម្បីបង្ហាញស្ថានភាពសេរីភាពសារព័ត៌មានក្នុងប្រទេសរបស់ខ្លួន។លោក នេត្រ ភក្ត្រា បានឱ្យដឹងថា សម្រាប់របាយការណ៍ស្តីពី «ស្ថានភាពសេរីភាពសារព័ត៌មាននៅកម្ពុជា» ដែលផ្សព្វផ្សាយលើកដំបូង របស់ក្រសួងព័ត៌មាន គឺបានឆ្លុះបញ្ចាំងពីគ្រប់មជ្ឈដ្ឋាននៃអ្នកសារព័ត៌មានទាំងអស់។ នេះជារបាយការណ៍ដែលឆ្លុះបញ្ចាំងទៅគ្រប់និន្នាការអ្នកសារព័ត៌មាន ដែលបានបំពេញការងារនៅក្នុងប្រទេសកម្ពុជា។
លោក នេត្រ ភក្ត្រា បានលើកឡើងយ៉ាងដូច្នេះថា៖ «ព្រោះការអត្ថាធិប្បាយ របស់អង្គការផ្សេងៗនេះជាសិទ្ធិរបស់គាត់ ខ្ញុំលើកឧទាហរណ៍អ្នកយកព័ត៌មានគ្មានព្រំដែន គាត់ក៏មានបញ្ហាខ្លួនគាត់នៅក្នុងប្រទេសបារាំងដូចគ្នា ដូច្នេះការដែលមិនទាន់លាងខ្លួនឯងស្អាត ហើយមកចោទប្រកាន់ទៅលើបណ្តាប្រទេសផ្សេងទៅតាមសំណេររបស់ខ្លួន ឬតាមការវាយតម្លៃតាមអារម្មណ៍ ឬតាមរបៀបវារៈ និន្នាការរបស់ខ្លួន ខ្ញុំយល់ថាវាមិនមែនជាភាពត្រឹមត្រូវនោះទេ។ ដោយសារតែប្រទេសកម្ពុជា រង់នូវភាពអយុត្តិធម៌ពីរបាយការណ៍អង្គការអន្តរជាតិមួយចំនួន ដែលចេញទាក់ទងទៅនឹងសិទ្ធិមនុស្ស សេរីភាពការបញ្ចេញមតិ និងសេរីភាពសារព័ត៌មាននេះហើយដែលចាំបាច់ដែលកម្ពុជា ត្រូវបានរបាយការណ៍មួយដែលឆ្លុះបញ្ចាំងពីគ្រប់មជ្ឈដ្ឋានទាំងអស់»។
លោករដ្ឋមន្ត្រីក្រសួងព័ត៌មាន បានដោយគូសបញ្ជាក់ថាការសិក្សាស្តីពីស្ថានភាពសេរីភាពសារព័ត៌មាននេះត្រូវបានរៀបចំធ្វើឡើងដោយកម្ពុជាខ្លួនឯងផ្ទាល់ ដែលជាសក្ខីភាពមួយបង្ហាញភាពជាម្ចាស់របស់កម្ពុជាលើវិស័យព័ត៌មាន និងការផ្ដល់ការយកចិត្តទុកដាក់ខ្ពស់ចំពោះវិស័យនេះជាអាទិភាពមួយរបស់រាជរដ្ឋាភិបាលកម្ពុជាអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដោយបានពូនជ្រុំនូវរាល់សមិទ្ធផល និងស្នាដៃដឹកនាំក្នុងអាណត្តិមុនៗសម្រាប់វិស័យ ព័ត៌មានរបស់ សម្តេចតេជោ ហ៊ុន សែន អតីតនាយករដ្ឋមន្ត្រី ដែលបច្ចុប្បន្នជា ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ។
លោក នេត្រ ភក្ត្រា បានបន្ថែមថា ផ្អែកលើលទ្ធផលនៃការសិក្សាដដែលនេះ អ្នកសារព័ត៌មានចំនួន ៩៥% ក្នុងចំណោមអ្នកចូលរួមឆ្លើយក្នុងការស្ទង់មតិទាំងអស់ បានឯកភាពថាភាពសម្បូណ៌បែបនៃប្រព័ន្ធផ្សព្វផ្សាយនៅកម្ពុជាបច្ចុប្បន្ន គឺជាការចូលរួមលើកកម្ពស់សេរីភាពសារព័ត៌មាន និងសេរីភាពនៃការបញ្ចេញមតិ ខណៈអ្នកសារព័ត៌មានចំនួន ៧៩,៨% បានអះអាងថា ខ្លួនមានសេរីភាពពេញលេញក្នុងការប្រកបអាជីពជាអ្នកសារព័ត៌មាន ដោយមានភាពងាយស្រួល និងសុវត្ថិភាពក្នុងការប្រមូលព័ត៌មានពីប្រភពផ្សេងៗសម្រាប់ការសរសេរ ផលិត និងផ្សព្វផ្សាយព័ត៌មានរបស់ខ្លួនដោយសេរី។
ក្នុងចំណោមអ្នកចូលរួមការស្ទង់មតិសរុបមនុស្សចំនួន ៩៩,៧% បានផ្តល់សារៈសំខាន់ក្នុងការគោរពក្រមសីលធម៌វិជ្ជាជីវៈរបស់អ្នកសារព័ត៌មានខណៈមនុស្សចំនួន ៩២,១% គាំទ្រឱ្យមានការអនុវត្តតាមនីតិវិធីច្បាប់ចំពោះអ្នកសារព័ត៌មានដែលប្រព្រឹត្តខុសវិជ្ជាជីវៈ ហើយ៩៩,៤% បានគាំទ្រការបណ្តុះបណ្តាលដល់អ្នកសារព័ត៌មានដើម្បីពង្រឹងគុណភាពវិជ្ជាជីវៈ។នេះជាលទ្ធផលនៃការស្ទង់មតិថ្មីមួយ ដែលក្រសួងព័ត៌មានបានរៀបចំឡើងក្នុងក្របខណ្ឌនៃការសិក្សាស្តីពីស្ថានភាពសេរីភាពសារព័ត៌មាននៅកម្ពុជា ។
សេរីភាពសារព័ត៌មាន ជាកាតាលីករមួយដ៏ចាំបាច់សម្រាប់ការអភិវឌ្ឍសង្គមសេដ្ឋកិច្ចរបស់កម្ពុជាសេរីភាពនេះ ត្រូវបានធានាដោយរដ្ឋធម្មនុញ្ញនៃព្រះរាជាណាចក្រកម្ពុជា ច្បាប់ស្តីពីរបបសារព័ត៌មានកម្ពុជា និងលិខិតបទដ្ឋានគតិយុត្តជាធរមានផ្សេងទៀត។ ដូច្នេះ ក្នុងក្របខណ្ឌនៃការលើកកម្ពស់តម្លៃសង្គមប្រជាធិបតេយ្យនៅកម្ពុជា ការវាស់វែងស្ថានភាពសេរីភាពសារព័ត៌មានបច្ចុប្បន្ននៅកម្ពុជាមានសារៈសំខាន់ណាស់ ដើម្បីឆ្លុះបញ្ចាំងអំពីលំហសេរីភាពនៃប្រព័ន្ធផ្សព្វផ្សាយសិទ្ធិនៃការទទួលព័ត៌មាន តួនាទីរបស់សារព័ត៌មានវិជ្ជាជីវៈក្នុងការផ្តល់ចំណេះដឹង និងព័ត៌មានពិ និងជឿទុកចិត្តបានសម្រាប់ជាប្រយោជន៍ដល់ប្រជាជន អ្នកដឹកនាំ និងសង្គមជាតិទាំងមូល ក្នុងការធ្វើសេចក្តីសម្រេចចិត្ត និងរួមគ្នាកម្លាំងដើម្បីធានាកំណើនសេដ្ឋកិច្ច និងការអភិវឌ្ឍប្រកបដោយចីរភាព។
សម្រាប់ការសិក្សានេះ ក្រុមការងារនៃក្រសួងព័ត៌មានបានប្រើវិធីសាស្ត្រចម្រុះ គឺវិធីសាស្ត្រគុណវិស័យ និងវិធីសាស្តបរិមាណវិស័យ តាមរយៈទី១៖ ការអនុវត្តការស្ទាបស្ទង់មតិក្នុងចំណោមអ្នកសារព័ត៌មានសរុបចំនួន ៣៤១នាក់ តាមបណ្ដារាជធានី-ខេត្តទាំង២៥ ទូទាំងប្រទេស, ទី២៖ ការស្រាវជ្រាវឯកសារដែលមានស្រាប់ (Desk Review) រាប់បញ្ចូលទាំងរដ្ឋធម្មនុញ្ញនៃព្រះរាជាណាចក្រកម្ពុជា ច្បាប់ និងលិខិតបទដ្ឋានគតិយុត្តជាធរមាន សេចក្តីប្រកាសជាសកលស្ដីពីសិទ្ធិមនុស្សកតិកាសញ្ញា និងអនុសញ្ញាទាំងឡាយទាក់ទងទៅនឹងសិទ្ធិមនុស្ស, និងទី៣៖ និងការសម្ភាសន៍ជាមួយឥស្សរជន និងបុគ្គលសំខាន់ៗក្នុងវិស័យព័ត៌មាន.។
សម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា បានរកឃើញពីស្ថានភាពសេរីភាពសារព័ត៌មាននៅតែមិនទាន់ល្អប្រសើរ ហើយកាលពីឆ្នាំ ២០២៣។ អង្គការអ្នករាយការណ៍គ្មានព្រំដែនបានដាក់ចំណាត់ថ្នាក់កម្ពុជានៅលេខរៀងទី១៤៧ក្នុងចំណោម១៨០ប្រទេសដែលសេរីភាពសារព័ត៌មានដុនដាប។
