លោកថាក់ស៊ីនប្រកាសចូលស្រុកវិញខែកក្កដាបន្ទាប់ពីការបោះឆ្នោតដែលរំបឹងថាគណបក្សភឿថៃនាំមុខ
27-March-2024 / ព័ត៌មានអន្តរជាតិ
ថៃ៖ អតីតនាយករដ្ឋមន្ត្រីថៃ លោកថាក់ស៊ីនស៊ីណាវ៉ាត្រា ដែលបានរត់និរទេសខ្លួនទៅនៅទីក្រុងឌូបៃ ជិត២ទសវត្សរ៍កាលពីថ្ងៃអង្គគារ៍ទី៩ឧសភាបានប្រកាសតាមបណ្តាញសង្គមទ្វីទរ័ថា លោកគ្រោងចង់វិលត្រលប់ទៅរស់នៅប្រទេសថៃវិញ ដើម្បីទៅមើលថែចៅ ព្រោះថានៅថ្ងៃទី២៦កក្កដា ខាងមុខ លោកនឹងមានអាយុ ៧៤ឆ្នាំ។ អតីតនាយករដ្ឋមន្ត្រីថៃដែលត្រូវក្រុមយោធាធ្វើរដ្ឋប្រហារទម្លាក់ពីតំណែងនៅឆ្នាំ២០០៦ មុននឹងរត់ភៀសខ្លួនទៅនៅបរទេស នៅបានអះអាងថា លោកត្រៀមខ្លួនដើម្បីតទល់ នៅចំពោះមុខតុលាការថៃ ដែលធ្លាប់បានកាត់ទោសកំបាំងមុខ ឲ្យលោកជាប់ពន្ធនាគារ ២ឆ្នាំ ក្នុងសំណុំរឿងរំលោភអំណាច។ ការចោទប្រកាន់ដែលលោកថាក់ស៊ីនធ្លាប់បានបដិសេធទាត់ចោល។
ការប្រកាសរបស់លោកថាក់ស៊ីន ដែលជាអ្នកនយោបាយដ៏មានឥទ្ធិពល និងបន្តមានប្រជាប្រិយភាព នៅក្នុងចំណោមប្រជាជនថៃ គឺជាសារជំរុញលើកទឹកចិត្តឲ្យគេទៅបោះឆ្នោតគាំទ្រគណបក្សភឿថៃ នៅថ្ងៃទី១៤ឧសភាខាងមុខ។ការស្ទង់មតិនៅប៉ុន្មានថ្ងៃមកនេះបានបង្ហាញថា គណបក្សភឿថៃ គណបក្សប្រឆាំងធំជាងគេ ដែលដឹកនាំដោយកូនស្រីរបស់លោកថាក់ស៊ីន នៅតែនាំមុខគេ នៅក្នុងលទ្ធផលឆ្នោត ចំណែកគណបក្សថ្មីរបស់លោកនាយករដ្ឋមន្ត្រីផុតអាណត្តិ ប្រាយុទ្ធ ចាន់អូចា ឈ្មោះ រួបរួមជាតិថៃ ស្ថិតនៅចំណាត់ថ្នាក់ទី៣ ក្រោយគណបក្សMove Forward ដែលកំពុងឡើងកូដប្រជាប្រិយក្នុងចំណោមយុវជនថៃ ដែលស្រេកឃ្លាន ទាមទារឲ្យមានការផ្លាស់ប្តូរនៅប្រទេសថៃ។
ដំណឹងស្តីពីគម្រោងវិលត្រលប់របស់លោកថាក់ស៊ីនអាចជួយជំរុញសំឡេងគាំទ្រគណបក្សភឿថៃកើនឡើងមួយកម្រិត ប៉ុន្តែ ជាមួយគ្នានោះ វាក៏អាចជាដើមហេតុទាក់ទាញឲ្យមានបាតុកម្មប្រឆាំងរបស់ក្រុមអាវលឿង ដែលជាអ្នករាជានិយម អ្នករស់នៅទីក្រុង។ បាតុកម្មកងទ័ពអាចប្រើជាលេស ដើម្បីធ្វើរដ្ឋប្រហារទម្លាក់រាល់អនាគតរដ្ឋាភិបាលណាដែលមានពាក់ព័ន្ធជាមួយគ្រួសារថាក់ស៊ីន។ ប៉ុន្តែ នៅក្នុងសារនយោបាយទៅកាន់អ្នកគាំទ្រ លោកស្រី ភែថងថាន កូនស្រីរបស់លោកថាក់ស៊ីន ដែលមានវោហាស័ព្ទ និងមានប្រជាប្រិយភាពមិនចាញ់ឪពុកបានបង្ហាញសុទិដ្ឋិនិយមថា ទំនងគ្មានរដ្ឋប្រហារសាជាថ្មី ក្នុងករណីគណបក្សភឿថៃ ទទួលជ័យជំនះ នៅក្នុងការបោះឆ្នោតលើកនេះ។
ទោះបីយ៉ាងណាសម្រាប់គណបក្សភឿថៃ ត្រូវបានគេមើលឃើញថាការប្រឈមនៅចំពោះមុខសព្វថ្ងៃ មិនមែនរដ្ឋប្រហារយោធា ប៉ុន្តែ គឺការឡើងកូដ របស់គណបក្សMove Forward “បោះជំហានទៅមុខ” គណបក្សប្រឆាំងមួយទៀត ដែលកំពុងមានប្រជាប្រិយភាពខ្លាំងក្នុងចំណោមយុវជនថៃ ដែលទាមទារចង់ឲ្យមានការផ្លាស់ប្តូរក្នុងសង្គមថៃ។ គណបក្សភឿថៃបារម្ភថា ការបាត់បង់អ្នកគាំទ្រទៅក្នុងដៃរបស់គណបក្សចលនាឆ្ពោះទៅមុខ(Move Forward)ជាឧបសគ្គរារាំងមិនឲ្យគណបក្សភឿថៃអាចសម្រេចគោលដៅ ដែលខ្លួនចង់បាន នោះគឺការទទួលបានអាសនៈ ជាង៣០០អាសនៈនៅរដ្ឋសភា ដែលជាសំឡេងភាគច្រើននៅរដ្ឋសភា។ទោះមានសំឡេងភាគច្រើននៅរដ្ឋសភា ប៉ុន្តែ បេក្ខជននាយករដ្ឋមន្ត្រីរបស់គណបក្សភឿថៃ ដូចជា លោកស្រី ភែថងថាន ដែលជាកូនស្រីរបស់លោកថាក់ស៊ីន មិនប្រាកដថា នឹងទទួលបានការបោះឆ្នោតគាំទ្រពីសភាធ្វើនាយករដ្ឋមន្ត្រីទេ។
រដ្ឋធម្មនុញ្ញឆ្នាំ២០១៧ តាក់តែងដោយរដ្ឋាភិបាលយោធា នៅចាំខ្ទាស់ជើងមិនឲ្យបក្សប្រឆាំងដែលឈ្នះឆ្នោតអាចកាន់តំណែងនាយករដ្ឋមន្ត្រី។ សមាជិកព្រឹទ្ធសភាទាំង២៥០រូប ដែលកើតចេញពីការជ្រើសរើសផ្ទាល់របស់កងទ័ព ទៅតាមរដ្ឋធម្មនុញ្ញថ្មី និងដែលមានសិទ្ធិចូលរួមបោះឆ្នោតជាមួយសមាជិករដ្ឋសភា ប្រាកដជាបោះឆ្នោតគាំទ្រលោកប្រាយុទ្ធ ចាន់អូចា។ ប៉ុន្តែ នាយករដ្ឋមន្ត្រីផុតអាណត្តិអាចត្រូវប្រជែងជាមួយបេក្ខជនសំខាន់មួយរូប គឺ លោក ប្រាវីដ វង្សសូវ៉ាន អតីតឧបនាយករដ្ឋមន្ត្រី និងជារដ្ឋមន្ត្រីការពារជាតិក្នុងរដ្ឋាភិបាលរបស់លោកប្រាយុទ្ធចាន់អូចា។សូមបញ្ជាក់ថា លោកប្រាវីដ វង្សសូវ៉ានដែលជាប្រធានគណបក្សផាឡាំងប្រាឆារ៉ាត់ បក្សកាន់អំណាច ត្រូវបានគណបក្សជ្រើសរើសជាបេក្ខជននាយករដ្ឋមន្ត្រី ចំណែក លោកប្រាយុទ្ធ ចាន់អូចាបានដើរចេញពីគណបក្សផាឡាំងប្រាឆារ៉ាត់ ដែលធ្លាប់គាំទ្រឲ្យលោកក្លាយជានាយករដ្ឋមន្ត្រី នៅក្នុងការបោះឆ្នោតឆ្នាំ ២០១៩ ដើម្បីទៅចូលរួមដឹកនាំគណបក្សរួបរួមជាតិថៃ ដែលទីប្រឹក្សាម្នាក់របស់លោកបានបង្កើតឡើង នៅឆ្នាំ ២០២១។
