ទាហានឈុតខ្មៅថៃដើរល្បាតតាមព្រំដែនក្នុងដីខ្មែរយ៉ាងគឃ្លើន តែទាហានខ្មែរបែរជាហាមពលរដ្ឋខ្មែរកុំបង្ហោះព័ត៌មានឬ Videos ស្តីពីសកម្មភាពរបស់ទាហានថៃទៅវិញ !?
10-April-2024 / ព័ត៌មានជាតិ
ខេត្តឧត្តរមានជ័យ: កាលពីព្រឹកថ្ងៃទី ១៧ ខែមេសា ឆ្នាំ២០២៤ ក្រុមទាហានឈុតខ្មៅមានចំនួន ១២នាក់ ប្រដាប់ដោយអាវុធវែង ម៉ាក អឹមសី(M16) កាន់គ្រប់ដៃបាននាំគ្នាលួចដើរឆ្លងព្រំដែនល្បាតក្នុងទឹកដីខ្មែរយ៉ាងគឃ្លើន នៅ ក្នុងភូមិសាស្ត្រ ស្រុកសំរោង ខេត្តឧត្តរមានជ័យ ។ ប្រភពព័ត៌មានពីប្រជាពលរដ្ឋខ្មែរជាម្ចាស់ចំការស្វាយចន្ទី បានរាយ ការណ៍ ប្រាប់អ្នកយកព័ត៌មាន របស់អង្គភាព គេហទំព័រ មាតុភូមិ www.mea tophoum.com ប្រចាំខេត្តឧត្តរមានជ័យ នៅព្រឹកថ្ងៃទី១៨ មេសា ឆ្នាំ ២០២៤ អោយដឹងថា : ពិតជាមានករណីទាហានថៃបាននាំគ្នាដើរកាត់ចំការស្វាយចន្ទីរ របស់ពួកគាត់មែន កាលពីថ្ងៃទី ១៧ ខែមេសា ឆ្នាំ២០២៤ ពួកទានថៃទាំងនោះស្ពាយកាំភ្លើងវែង ម៉ាក អឹមសី គ្រប់ៗគ្នា ដើរកាត់ចំការស្វាយចន្ទីដែលជាកម្មសិទ្ធិរបស់ពួកគាត់ ។
ប្រជាពលរដ្ឋម្ចាស់ចំការបានបញ្ជាក់ប្រាប់ថា: នេះមិនមែនជា ករណីលើកទី១ទេ ព្រោះជាញឹក ញាប់ គេឃើញកងទាហានឈុតខ្មៅថៃតែងតែដើរល្បាត ក្នុងដែន ដីខ្មែរ និងដើរកាត់ចំការស្វាយចន្ឋីរបស់ពួកគាត់ ជួនថ្ងៃខ្លះកង ទាហានថៃទាំងនោះយកថ្នាំ ឬឧបករណ៍មកស្វានខួងចាក់ថ្នាំបណ្តាលអោយស្វាយចន្ទីងាប់រាប់ពាន់ដើម ដោយមិនមានអាជ្ញាធរ ឬសមត្ថកិច្ចថ្នាក់ណា ចុះមកជួយដោះស្រាយបញ្ហាជូនពួកគាត់ទេ ។ បន្ថែមពីលើសេចក្តីរាយការណ៍នេះ ក៏មានអាខោន facebookមួយ មានឈ្មោះថា Chantha Sun បានបង្ហោះ Videos ស្តីពីសកម្មភាពទាហាន ឈុតខ្មៅសៀមដើរកាត់ចំការស្វាយចន្ទីនៅក្នុងទឹកដីខ្មែរ នៅក្នុងចំណុចមុខភ្នំគីង្គក់ ក្នុងភូមិរឹតចំបុី បើបងប្អូនបានឃើញហើយជួយស៊ែរអោយថ្នាក់លើឃើញផង ។ បន្ទាប់ពីបែកធ្លាយ Videos ព័ត៌មានស្តីពី សកម្មភាពទាហានឈុតខ្មៅថៃដើរល្បាតរំលោភបំពានលើអធិបតេយ្យភាពបូរណភាពទឹកដីខ្មែរបែបនេះ នៅព្រឹកថ្ងៃទី១៨ ខែ មេសា ឆ្នាំ ២០២៤ កងទាហានការពារព្រំដែនគោករបស់ខ្មែរដឹកនាំដោយលោក ឃួន ភារម្យ មេបញ្ជាការ វរ: ៤០២ បានដឹកនាំកងកម្លាំងចំនួន១២នាក់ និងមន្ត្រីប៉ូលីសការពារព្រំដែនចំនួន៤នាក់ បានចុះទៅពិនិត្យមើលនិងសាកសួរព័ត៌មានប្រជាពលរដ្ឋម្ចាស់ចំការស្វាយ ចន្ទីស្ថិតនៅចំណុចដែលទាហានឈុតខ្មៅថៃដើរឆ្លងកាត់ដើរល្បាតក្នុងទឹកដីខ្មែរយ៉ាងគឃ្លើននោះ តើពួកថៃ ចូលមកតាមផ្លូវណា ច្រកណា ? ។
ប៉ុន្តែ អ្វីដែលជាប្រការគួរអោយហួសចិត្តគឺ មេទាហាខ្មែរដែលដឹកនាំកម្លាំងចុះទៅបែរជាហាមប្រាមប្រជាពលរដ្ឋខ្មែរម្ចាស់ចំការស្វាយចន្ទី មិនអោយបង្ហោះVideos ឬបញ្ចេញព័ត៌មានពីសកម្មភាពរបស់ទាហានថៃនេះតាមបណ្តាញ facebook ឬប្រាប់អ្នកកាសែតអោយផ្សាយឡើយ ដោយគេប្រាប់ថា : តំបន់ នេះជាតំបន់ស បើមានព័ត៌មាន ឬ មាន ទាហានថៃដើរល្បាតលើកក្រោយៗទៀត ផ្តលព័ត៌មានទៅគាត់ ( មេទាហានខ្មែរ) ប្រចាំទិស នៅតំបន់នោះ ។ តែប្រជាពលរដ្ឋអះអាងប្រាប់អ្នកកាសែតថា ចំការស្វាយចន្ទីនេះជាដីកម្មសិទ្ធិរបស់គាត់ដោយ មានការដឹងឮ និងទទួលស្គាល់ពីអាជ្ញារធភូមិ-ឃុំ ត្រឹមត្រូវ ហើយបានធ្វើចំការ អាស្រ័យផលយូរឆ្នាំមកហើយគឺពិតជាដីរបស់ខ្មែរសុទ្ធសាធ ។ ដូច្នេះ បងប្អូន ប្រជាពលរដ្ឋ ម្ចាស់ចំការស្វាយចន្ទីរនៅតាមខ្សែបន្ទាត់ព្រំដែនក្នុងភូមិសាស្ត្ររបស់ស្រុកសំរោង ខេត្តឧត្តរមានជ័យ បានទទូចសុំអង្វរដល់ថ្នាក់ដឹកនាំ គ្រប់ជាន់ថ្នាក់ ពិសេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឯឧត្តម នាយឧត្តម សេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ មេត្តាយកចិត្តទុកដាក់ និងជួយការពារដីចំការស្វាយចន្ទីររបស់ពួកកាត់ផង ព្រោះជាដែនដីរបស់ខ្មែរសុទ្ធសាធ ៕ ដោយ: ស៊ុន សុផល - ទឺ ពិទូ Tel:012953824/016953222
