ប្រធានាធិបតីតៃវ៉ាន់ ៖ ពលរដ្ឋតៃវ៉ាន់គឺជាអ្នកសម្រេចចិត្តក្នុងកិច្ចការភ្ជាប់ទំនាក់ទំនងជាមួយប្រទេសចិន
15-March-2026 / ព័ត៌មានអន្តរជាតិ
តៃវ៉ាន់៖ ជាការឆ្លើយតបនឹងការលើកឡើងថ្មីៗរបស់មេដឹកនាំចិន លោកប្រធានាធិបតី ស៊ីជីនពីង ដែលបាននិយាយថា ការបង្រួបបង្រួមគ្នារវាងកោះតៃវ៉ាន់ជាមួយនឹងមាតុភូមិកំណើតចិនដីគោក គឺជារឿងមួយដែលមិនអាចចៀសផុតបានឡើយសម្រាប់ថ្ងៃអនាគត ប្រធានាធិបតីតៃវ៉ាន់ លោកស្រី Tsai Ing-wen បានលើកឡើងកាលពីដើមសប្តាហ៍នេះថា មានតែពលរដ្ឋតៃវ៉ាន់តែមួយគត់ជាអ្នកមានសិទ្ធិសម្រេចលើកិច្ចការទំនាក់ទំនងរវាងកោះតៃវ៉ាន់និងប្រទេសចិន ហើយសន្តិភាពរវាងរដ្ឋាភិបាលទីក្រុងតៃប៉ិនិងរបបទីក្រុងប៉េកាំងត្រូវតែផ្អែកលើ “សិទ្ធិសេរីភាព និងសេចក្តីថ្លៃថ្នូរ”។
លោកស្រីបានបន្តបញ្ជាក់ទៀតថា គោលការណ៍លទ្ធិប្រជាធិបតេយ្យគឺជាមាគ៌ាសន្តិភាពដ៏សំខាន់តែមួយគត់សម្រាប់ធានាកិច្ចទំនាក់ទំនងយូរអង្វែងរវាងកោះតៃវ៉ាន់និងប្រទេសចិន ។ស្របពេលការបោះឆ្នោតនៅលើកោះតៃវ៉ាន់កាន់តែខិតជិតចូលមកដល់នោះ ទំនាក់ទំនងលើវិស័យសេដ្ឋកិច្ចរវាងតៃវ៉ាន់និងប្រទេសចិនហាក់បន្តធ្លាក់ចុះខ្លាំងគួរឱ្យកត់សម្គាល់ បន្ទាប់ពីប្រទេសចិនបានប្រកាសបញ្ចប់ការអនុគ្រោះពន្ធគយទៅលើប្រភេទផលិតផលសារធាតុគីមីសំខាន់ៗមួយចំនួនពីកោះតៃវ៉ាន់ រួមទាំងបានព្រមាននឹងបន្តវិធានការរឹតបន្តឹងស្រដៀងគ្នានេះបន្ថែមទៀតចំពោះប្រភេទទំនិញផ្សេងៗ ដើម្បីជាការឆ្លើយតបនឹងគោលនយោបាយប្រឆាំងចិនរបស់មេដឹកនាំតៃវ៉ាន់សព្វថ្ងៃ ។លោកស្រី Tsai Ing-wen បានជំរុញឱ្យបណ្តាក្រុមហ៊ុនរបស់តៃវ៉ាន់ត្រូវងាកទៅលើទីផ្សាពិភពលោកដទៃទៀតដើម្បីបង្កើនការនាំចេញរបស់ខ្លួន។
ពាក់ព័ន្ធទៅនឹងស្ថានការណ៍ទំនាក់ទំនងរវាងកោះតៃវ៉ាន់និងប្រទេសចិននេះដែរ រដ្ឋាភិបាលទីក្រុងប៉េកាំងធ្លាប់បានប្រកាសចាត់ទុកការបោះឆ្នោតនៅតៃវ៉ាន់ដែលនឹងត្រូវធើ្វឡើងនៅថ្ងៃទី ១៣ ខែមករា ថាជាជម្រើសរវាង ”សង្គ្រាមនិងសន្តិភាព” ដោយបន្តច្រានចោលការស្នើជួបពិភាក្សាដើម្បីស្វែងរកកិច្ចសម្របសម្រួលស្ថានការណ៍ជាមួយរដ្ឋាភិបាលរបស់លោកស្រី Tsai Ing-wen និងចាត់ទុកក្រុមអ្នកនយោបាយរបស់លោកស្រីថាជា ”ក្រុមផ្ដាច់ខ្លួន”.។ក្នុងសុន្ទរកថាអបអរឆ្នាំថ្មី ប្រធានាធិបតី ស៊ី ជីនពីង ព្រមានថា ចិននិងតៃវ៉ាន់អាចនឹងរួបរួមគ្នាបានយ៉ាងជាក់ច្បាស់។ លោក ស៊ី ជីនពីង បានប្រកាសទៀតថា ពលរដ្ឋទាំងពីរខាងត្រូវតែភ្ជាប់គ្នាដោយគោលដៅតែមួយ និង ចែករំលែកភាពត្រចះត្រចង់ក្រោមវាសនាជាតិចិនតែមួយ។
សូមបញ្ជាក់ថា៖ប្រជាជនតៃវ៉ាន់ប្រជាជនតៃវ៉ាន់មានសិទ្ធិបោះឆ្នោត ១៩.៥លាននាក់ នឹងត្រូវជ្រើសរើសមេដឹកនាំថ្មីរបស់ពួកគេ និងសមាជិកតំណាងរាស្ត្រ នៅពេលដែលពួកគេធ្វើដំណើរទៅកាន់ការិយាល័យបោះឆ្នោត នៅថ្ងៃទី១៣ ខែមករា ឆ្នាំ២០២៤ ហើយលទ្ធផលនៃការបោះឆ្នោតសកលនេះដែរ ត្រូវបានក្រុមអ្នកជំនាញនិយាយថានឹងកំណត់ទិសដៅទំនាក់ទំនងរវាង ត្រើយទាំងសងខាងនៃច្រកសមុទ្រតៃវ៉ាន់ និងរវាងសហរដ្ឋអាមេរិក និងចិន ប៉ុន្មានឆ្នាំទៅមុខទៀត។ ផ្ទុយពីការបោះឆ្នោតកាលពីអាណត្តិមុនដែលផ្តោតលើ ការប្រកួតប្រជែងរវាងបេក្ខជនមកពីគណបក្សធំៗចំនួន២ ការបោះឆ្នោតសកលតៃវ៉ាន់នៅលើនេះគឺជាការប្រកួតប្រជែងរវាងបេក្ខជនមេដឹកនាំ៣រូប ដូចជា៖
លោក Lai Ching-te ឬគេស្គាល់ថា William Lai ជាបេក្ខជនមេដឹកនាំតៃវ៉ាន់មកពីគណបក្សវឌ្ឍនភាពប្រជាធិបតេយ្យ (DPP) ដែលជាបក្សកាន់អំណាច តៃវ៉ាន់សព្វថ្ងៃរបស់លោកស្រី សៃ អ៉ីងវិន។ លោក Hou Yu-ih ជាបេក្ខជនមេដឹកនាំតៃវ៉ាន់មកពីគណបក្ស Kuomintang (KMT) ជាគណបក្សប្រឆាំងធំបំផុត នៅតៃវ៉ាន់។ ចំណែក បេក្ខជនទី៣ គឺលោក Ko Wen-je មកពីគណបក្សប្រជាជនតៃវ៉ាន់ (TPP)។ Kuomintang ជាគណបក្សមានទំនាក់ទំនងជិតស្និទ្ធ ជាមួយចិន រីឯគណបក្សប្រជាជនតៃវ៉ាន់ដែលទើបតែបង្កើតថ្មីបានអះអាងថាខ្លួនមានជំហរនៅកណ្ដាល និងស្វាគមន៍កិច្ចសន្ទនាមួយចំនួនជាមួយ ទីក្រុងប៉េកាំង។នៅតៃវ៉ាន់ សភាមានតែមួយគត់គឺសភាតំណាងរាស្ត្រដែលមាន ១១៣អាសនៈ ហើយសព្វថ្ងៃ គណបក្សវឌ្ឍនភាពប្រជាធិបតេយ្យ ឬ DPP ក្ដាប់លើស ៦០អាសនៈ ខណៈគណបក្ស Kuomintang កាន់កាប់ក្រោម ៤០អាសនៈ។
នៅថ្ងៃបោះឆ្នោតប្រសិនបើគ្មានគណបក្សនយោបាយណាមួយទទួលបានអាសនៈយ៉ាងហោច ៥៧កៅអីទេ នោះមេដឹកនាំតៃវ៉ាន់ថ្មីនឹងត្រូវជួបផលលំបាក ក្នុងការអនុម័តច្បាប់ ឬកញ្ចប់ថវិកានានា។តំណាងរាស្ត្រថ្មីនឹងចាប់ផ្ដើមអាណត្តិរបស់ពួកគេចាប់ពីខែកុម្ភៈតទៅ ដែលនេះមានន័យថាមេដឹកនាំចាំផ្ទះ លោកស្រី សៃ អ៉ីងវិន (មេដឹកនាំតៃវ៉ាន់អាចឈរឈ្មោះបានតែ ២អាណត្តិប៉ុណ្ណោះ និងមួយអាណត្តិមានរយៈពេល៤ឆ្នាំ) នឹងចាំបាច់ត្រូវធ្វើការជាមួយ សភាតំណាងរាស្ត្រថ្មី នៅប៉ុន្មានខែចុងក្រោយនៃអាណត្តិរបស់លោកស្រី។
គួរបញ្ជាក់ថា លទ្ធផលនៃការបោះឆ្នោតសកលតៃវ៉ាន់ ត្រូវបានក្រុមអ្នកជំនាញនិយាយថានឹងកំណត់ទិសដៅទំនាក់ទំនងទាំងរវាងត្រើយទាំងសងខាង ច្រកសមុទ្រតៃវ៉ាន់ និងរវាងសហរដ្ឋអាមេរិក និងតៃវ៉ាន់ នៅប៉ុន្មានឆ្នាំទៅមុខទៀត។ ពោល បើគណបក្ស DPP នៅតែបន្តកាន់អំណាច នោះសហរដ្ឋអាមេរិក អាចនឹងរក្សាបាននូវដៃគូដែលមានឆន្ទៈម្នាក់ក្នុងការកិច្ចប្រឹងប្រែងរបស់ខ្លួនប្រឆាំងនឹងឥទ្ធិពលចិន តែព្រមពេលជាមួយគ្នា នឹងបង្កភាពតានតឹងជាមួយ រដ្ឋាភិបាលរបស់លោក ស៊ី ជីនពីង។ មួយវិញទៀត បើជ័យជម្នះបានទៅលើគណបក្សផ្សេងវិញ នោះវាអាចនឹងនាំទៅរកភាពធូរស្រាល ឬការបន្ធូរបន្ថយ ភាពតានតឹងក្នុងទំនាក់ទំនងជាមួយទីក្រុងប៉េកាំងបានមួយរយៈ។
