វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4918 នាក់
ម្សិលមិញ 4563 នាក់
សរុប 14172294 នាក់
ចិន៖ នៅថ្ងៃពុធ ទី២០ ខែឧសភា ឆ្នាំ២០២០នេះប្រទេសចិនដីគោក បានប្រកាសថ្កោលទោស និងប្រឆាំងដាច់ខាត ចំពោះការថ្លែងអបអរសាទរ មេដឹកនាំកោះតៃវ៉ាន់លោកស្រី សៃ អ៊ីវិន ដែលស្បថចូលកាន់តំណែងជាប្រធានាថិបតីលើកទី២របស់កោះតៃវ៉ាន់ ដែលត្រូវបានធ្វើឡើងដោយរដ្ឋមន្ត្រីការបរទេសលោក ម៉ៃក៍ ប៉ុមប៉េអូ និងមន្ត្រីអាមេរិកមួយចំនួនទៀត។
ទីភ្នាក់ងារព័ត៌មានចិនស៊ីនហួរបានដកស្រង់សេចក្តីថ្លែងការណ៍ផ្លូវការរបស់ចិន បានបញ្ជាក់យ៉ាងដូច្នេះថា «តៃវ៉ាន់គឺជាផ្នែកមួយនៃទឹកដីចិន ដែលមិនអាចកាត់ផ្តាច់បាន។ ទង្វើរបស់សហរដ្ឋអាមេរិកបានរំលោភបំពាន់យ៉ាងធ្ងន់ធ្ងរ ទៅលើគោលនយោបាយចិនតែមួយ និងលក្ខន្តិកៈរួមគ្នាទាំងបីរវាងប្រទេសចិន និងសហរដ្ឋអាមេរិក, ជ្រៀតជ្រែកយ៉ាងខ្លាំងលើកិច្ចការផ្ទៃក្នុងរបស់ចិន, ធ្វើឱ្យអន្តរាយយ៉ាងធ្ងន់ធ្ងរដល់ការអភិវឌ្ឍ នៃទំនាក់ទំនងរវាងប្រទេសទាំងពីរ និងយោធាទាំងសងខាង ព្រមទាំងបានបំផ្លាញសន្តិភាព និងស្ថិរភាពយ៉ាងខ្លាំងនៅលើច្រកសមុទ្រតៃវ៉ាន់ផងដែរ»។
សេចក្តីថ្លែងការណ៍របស់ចិន បានសង្កត់ធ្ងន់ថា «វាពិតជាការខុសឆ្គងដ៏ធ្ងន់ធ្ងរ និងគ្រោះថ្នាក់ខ្លាំងបំផុត។ យើងសូមប្រឆាំង ចំពោះការធ្វើទំនាក់ទំនងរវាងមន្ត្រី និងយោធាបរទេសទាំងអស់ ជាមួយកោះតៃវ៉ាន់។ យើងនឹងមិនអនុញ្ញាតឲ្យនរណាម្នាក់ ឬអង្គការណាមួយ ឬក៏បក្សនយោបាយណា នៅគ្រប់ពេលវេលា និងគ្រប់ទម្រង់ទាំងអស់ ធ្វើការបំបែកទឹកដីផ្នែកណាមួយ ចេញពីបូរណភាពដែនដីរបស់ចិនជាដាច់ខាត»។
សូមបញ្ជាក់ថាដោយសារការប្រឆាំងពីចិនកោះតៃវ៉ាន់បានបរាជ័យមិនបានចូលរួម នៅក្នុងកិច្ចប្រជុំប្រចាំឆ្នាំរបស់អង្គការសុខភាពពិភពលោក កាលពីដើមសប្តាហ៍នេះតែ រដ្ឋាភិបាលកោះតៃវ៉ាន់ប្តេជ្ញាថា នឹងចូលរួមយ៉ាងសកម្មជាមួយនឹងអង្គការពិភពលោកនានា និងមិនឲ្យប្រទេសចិនមើលងាយទេ ។ នេះជាសារប្តេជ្ញាចិត្ត ត្រូវបានថ្លែងដោយប្រធានាធិបតីកោះតៃវ៉ាន់ លោកស្រី Tsai Ing-wen នៅក្នុងពិធីស្បថចូលកាន់តំណែងអាណត្តិទី២ របស់លោកស្រី នៅថ្ងៃពុធទី២០ឧសភានេះ ។
គណបក្សប្រជាធិបតេយ្យជឿនលឿនរបស់លោកស្រី Tsai បានឈ្នះការបោះឆ្នោតភ្លូកទឹកភ្លូកដី កាលពីខែមករា ដោយសន្យាថា នឹងប្រកាន់ជំហរតឹងរ៉ឹងជាងមុន ជាមួយប្រទេសចិន ។កន្លងមក ចិនបានទាមទារថា កោះតៃវ៉ាន់ជាដែនដីរបស់ចិន ហើយក្រុងប៉េកាំងអាចធ្វើសង្គ្រាមដណ្តើមយកមកវិញបើចាំបាច់ ។ ប៉ុន្តែអ្នកស្រី Tsai ថា តៃវ៉ាន់បានក្លាយទៅជារដ្ឋឯករាជ្យមួយរួចទៅហើយ ដោយប្រើឈ្មោះផ្លូវការថា «សាធារណរដ្ឋចិន» ។នៅពេលនេះទោះជាមិនបានឯករាជ្យនិងចូលជាសមាជិកអង្គការសហប្រជាជាតិ កោះតៃវ៉ាន់ត្រូវការចូលរួមជាមួយអង្គការនានា ដូចជា អង្គការសុខភាពពិភពលោក ដោយសារវិបត្តិនៃការរាតត្បាតជំងឺកូវីដ១៩ ដែលត្រូវគេរកឃើញដំបូងនៅចិនដីគោក ។