គ្រាន់តែថតរូបបែបសិល្បៈនៅរូបសំណាកសេះសមុទ្របាញ់ទឹកត្រូវហៅឲ្យមកស្នងការដ្ឋាននគរបាលខេត្តកំពតតែចុងក្រោយអភិបាលខេត្តមិនយកទោស!
18-April-2024 / ព័ត៌មានជាតិ
កំពត៖ មានអ្នកប្រើប្រាស់បណ្ដាញសង្គមហ្វេសប៊ុកជាច្រើនបានចេញមកប្រតិកម្ម និងធ្វើការរិះគន់ចំពោះយុវជនម្នាក់ដែលបង្ហោះថតរូបថត(ដែលម្ចាសខ្លួនថាជារូបបែបសិល្បៈ)នៅកន្លែងរូបសំណាកសេះសមុទ្របាញ់ទឹក ស្ថិតនៅក្រុងកំពត ខេត្តកំពត ដោយពួគេចោទថាជាបង្ហាញការមិនឱ្យតម្លៃ និងមាក់ងាយចំពោះសមិទ្ធិផលរបស់ថ្នាក់ដឹកនាំខេត្តកំពត ដែលកំពុងតែមានភាពល្បីល្បាញរហូតដល់បរទេស។
ក្រោយពីមានការប្រតិកម្មលើទង្វើខាងលើនេះ នៅព្រឹកថ្ងៃទី២៥ ខែមេសា ឆ្នាំ២០២៤ ស្នងការដ្ឋាននគរបាលខេត្តកំពតបានបង្ហោះសារលើបណ្តាញសង្គមហ្វេសបុកផ្លូវការរបស់ខ្លួនថា “ស្នងការដ្ឋាននគរបាលខេត្តកំពត សូមអញ្ជើញលោក SantaKH ឈ្មោះប្រើប្រាស់ក្នុង Facebook មកស្នងការដ្ឋាននៅវេលាថ្ងៃស្អែក 26.04.24 ដើម្បីពិភាក្សារការងារចាំបាច់មួយចំនួន” ក្នុងន័យឱ្យចូលខ្លួនមកបំភ្លឺចំពោះការប្រើប្រាស់កាយវិការថតរូបមិនសមរម្យនៅកន្លែងរូបសំណាកសេះសមុទ្របាញ់ទឹកកាលពីពេលថ្មីៗកន្លងទៅនេះ។
ក្រោយបង្ហោះសារអញ្ជើញជាសាធារណៈលើផេកផ្លូវការរបស់ស្នងការដ្ឋាននគរបាលខេត្តកំពត ប្រមាណជិតមួយម៉ោងរួចមក អ្នកបង្កើតមាតិការូបនោះបានឆ្លើយតបជាមួយនឹងសមត្ថកិច្ច ដោយសន្យាថានឹងចូលខ្លួនមកបំភ្លឺនៅស្នងការដ្ឋាននគរបាលខេត្តកំពត នាល្ងាចថ្ងៃទី២៥ ខែមេសា ឆ្នាំ២០២៤ ដោយមិនចាំថ្ងៃស្អែកនោះទេ នេះបើតាមការបង្ហោះសាររបស់ស្នងការដ្ឋាននៅលើបណ្តាញសង្គមផ្លូវការរបស់ខ្លួន។
ទន្ទឹមនឹងនោះដែរ អ្នកបង្កើតមាតិកាលើបណ្តាញសង្គមដែលមានឈ្នោះថា SantaKH ក៏បានបង្ហោះសារសុំទោសជាសាធារណៈលើបណ្តាញសង្គមរបស់ខ្លួន ដោយលើកឡើងថា៖ “ជាដំបូងសូមគោរពដល់ថ្នាក់ដឹកនាំ និងសូមគោរពបងប្អូនខ្មែរយើងទូទាំងប្រទេស ខ្ញុំបាទ ស៊ុំ សារុន (ហៅសាន់តា) សូមចេញមុខដឹងនូវកំហុសឆ្គងដែលបានថតរូបមិនគប្បីជាមួយរូបសំណាកសេះសមុទ្រដោយអចេតនា ខ្ញុំពិតជាសុំទោសបងប្អូនជនរួមជាតិ សុំទោសដែលខ្ញុំថតរូបខ្វះការគិត បង្ហាញកាយវិការមិនល្អ មកពីខ្ញុំពុំសូវមានចំណេះដឹងគិតមិនបានវែងឆ្ងាយ"។
ម្ចាស់បណ្តាញសង្គមមានឈ្មោះថា SantaKH បានលើកឡើងថា ទាក់ទងនឹងរូបភាពបែកធ្លាយ គឺជារូបភាពថតកម្សាន្ត Copy Style តាមគេ និងបានយកមកដាក់ Story លេងនៅម៉ោង ១២យប់ តែ៣នាទី ក៏លុបវិញភ្លាមៗ ព្រោះគិតថារូបមានសកម្មភាពមិនសមរម្យ។ សម្រាប់ការថតរូបនេះ ពិតជាគ្មានគោលបំណងមើលងាយរូបសំណាកសេះសមុទ្រឡើយ កំហុសមួយនេះលោកនឹងចងចាំអស់មួយជីវិត មិនឲ្យមានលើកក្រោយ និងសង្ឃឹមថាជនរួមជាតិអត់អោនឲ្យ។ ទោះបីយ៉ាងណាពេលចូលជួបអភិបាលខេត្តកំពតលោកម៉ៅធនិនបានសម្រេចមិនយកទោសពៃរ៍យុវជនឈ្មោះស៊ុំ សារុន (ហៅសាន់តា)ដែលថតរូបបែបសិល្បៈដោយគ្រាន់តែយកសេះមុទ្ទរបស់លោកអភិបាលខេត្តបញ្ចូលនោះមិនត្រូវបានចៅហ្វាយខេត្តប្រកាន់ទោសពៃរ៍ឡើយ។ បុរសដែលប្រើកាយវិការថតរូបមិនសមរម្យនៅកន្លែងរូបសំណាកសេះសមុទ្របាញ់ទឹកនេះ គឺជាអ្នកបង្កើតមាតិកាបែបកម្សាន្តនៅលើបណ្ដាញទំនាក់ទំនងសង្គមសព្វថ្ងៃ។
សូមបញ្ចាក់ថា រូបសំណាកត្រីសេះសមុទ្របាញ់ទឹកនេះ ត្រូវបានអាជ្ញាធរខេត្តកំពតរៀបចំឡើងក្នុងគោលបំណងដើម្បីបង្កើនភាពទាក់ទាញភ្ញៀវទេសចរនៅក្នុងក្រុងកំពត និងក៏ជាកន្លែងសម្រាប់ថតរូបអនុស្សាវរីយ៍ ស្រូបយកខ្យល់អាកាសបរិសុទ្ធ និងមើលថ្ងៃលិចផងដែរ។ រូបសំណាកតកូនសេះសមុទ្របាញ់ទឹកនេះ នៅតែមានប្រជាប្រិយភាព និងទាក់ទាញភ្ញៀវទេសចរជាតិ អន្តរជាតិឱ្យមកថតរូបអនុស្សាវរីយ៍ និងដើរលងកម្សាន្ត បើទោះបីជាមិនមែនជាថ្ងៃឈប់សម្រាកក៏ដោយ។យ៉ាងណាអាជ្ញាធរមិនបានដាក់ប្រកាសថាហាមថតរូបបែបសិល្បៈអីទេ។ចឹងចាប់ពីពេលនេះតទៅអាជ្ញាធរខេត្តកំពតគួដាក់បំរាមថាហាមថតរូបបែបណាបែបណាទៅកុំចេះតែចាប់ទោសចឹងវាមិនល្អទេ។
