ចិនមិនទាន់អនុញ្ញាតិឲ្យប្រតិភូអង្គការសុខភាពពិភពលោកWHOចូលស្រាវជ្រាវករណីយ៍កូវិត!
08-January-2021 / ព័ត៌មានអន្តរជាតិ
ចិន៖រដ្ឋាភិបាលទីក្រុងប៉េកាំង បានប្រកាសថា ការបញ្ជូនអ្នកជំនាញរបស់WHO មកកាន់ប្រទេសចិនដើម្បីស្រាវជ្រាវពីប្រភពកូវីដ នៅតែពន្យារពេលបើទោះបីបានឡើងផែនការជាយូរមកហើយក្តី ។ រយៈពេលជាង១ឆ្នាំកន្លងមក ចាប់តាំងពីការផ្ទុះកូវីដ-១៩ ក្រុមជំនាញរបស់WHO គ្រោងទៅកាន់ប្រទេសចិនក្នុងសប្តាហ៍នេះដើម្បីស្រាវជ្រាវពីប្រភព។
អ្នកនាំពាក្យក្រសួងការបរទេសចិន បានបញ្ជាក់នៅថ្ងៃទី៦ខែមករាថា ភាគីទាំងពីរកំពុងតែពិភាក្សាគ្នាស្តីពីពេលវេលាឱ្យច្បាស់លាស់ និងការរៀបចំឲ្យដំណើរការស្រាវជ្រាវ បានល្អ។អ្នកនាំពាក្យក្រសួងការបរទេសចិន លោកស្រីHua Chunying បានបញ្ជាក់ថា «បញ្ហាស្រាវជ្រាវពីប្រភពកូវីដ-១៩ គឺពិតជាស្មុគស្មាញយ៉ាងខ្លាំង។ ដើម្បីធានាដល់ក្រុមស្រាវជ្រាវនៅក្នុងប្រទេសចិនបានរលូន យើងចាំបាច់ត្រូវតែរៀបចំឲ្យបានល្អបំផុត»។ លោកស្រីបន្តទៀតថា រដ្ឋាភិបាលចិននឹងខិតខំអស់ពីសមត្ថភាព ផ្តល់លក្ខណៈងាយស្រួលដល់ក្រុមជំនាញមកប្រទេសចិន។
ការបកស្រាយរបស់ចិនក្រោយពេលប្រធានWHOលោកAdhanom Ghebreyesus និយាយទៅកាន់អ្នកសារព័ត៌មានថា លោកពិតជាខកចិត្តដែលចិនមិនទាន់អនុញ្ញាតឲ្យក្រុមអ្នកជំនាញទៅកាន់ប្រទេសរបស់ខ្លួនធ្វើការស្រាវជ្រាវ។លោក Tedros Adhanom Ghebreyesus អគ្គនាយកអង្គការសុខភាពពិភពលោក (WHO) នៅថ្ងៃទី៥ មករា ឆ្នាំ២០២១ បានប្រាប់អ្នកកាសែតក្នុងសន្និសីទសារព័ត៌មានអនឡាញ ថា៖«ថ្ងៃនេះ យើងដឹងថា មន្ត្រីចិន មិនទាន់សម្រេចការអនុញ្ញាតចាំបាច់ដើម្បីឲ្យក្រុមអ្នកជំនាញចូលប្រទេសចិនឡើយ»។ លោកTedros រំឭកអាជ្ញាធរចិនថា បេសកកម្មស្រាវជ្រាវរបស់អ្នកជំនាញ ជាអាទិភាពរបស់WHO ។
បើតាមគម្រោងបេសកកម្មស្រាវជ្រាវរកប្រភពជំងឺកូវីដ-១៩ នឹងដឹកនាំដោយលោក Peter Ben Embarek អ្នកជំនាញផ្នែកជំងឺឆ្លងពីសត្វរបស់WHO ។ លោក Ben Embarek ធ្លាប់បានទៅទស្សនកិច្ចនៅចិនក្នុងខែកក្កដា ឆ្នាំ២០២០ ដើម្បីស្រាវជ្រាវដំណាក់កាលដំបូងពីជំងឺនេះ។ប្រធានផ្នែកកិច្ចការអាសន្នរបស់ WHO លោក Mike Ryan បាននិយាយថា អ្នកជំនាញចំនួន២រូប បានធ្វើដំណើរទៅកាន់ប្រទេសចិនហើយប៉ុន្តែមិនទាន់ទៅដល់នៅឡើយ។ លោកបន្តថា មន្ត្រីមួយរូប បានត្រឡប់មកវិញនិងមួយរូបទៀតកំពុងជាប់នៅប្រទេសទីបី។ លោកRyan សង្ឃឹមថា បញ្ហាដែលកើតឡើងគ្រាន់តែជារឿងភ័ស្តុភារ និងការិយាធិបតេយ្យដែលអាចនឹងដោះស្រាយបានយ៉ាងរហ័ស។
សូមរម្លឹកថា មួយឆ្នាំក្រោយជំងឺកូវីដ-១៩ បានផ្ទុះឡើងនៅក្រុងវូហានរដ្ឋាភិបាលចិន យល់ព្រមឲ្យអ្នកជំនាញអន្តរជាតិចូលទៅកាន់ប្រទេសខ្លួនដើម្បីស៊ើបអង្កេតពីប្រភពនៃជំងឺរាតត្បាតនេះ។ ក្រុមការងារដែលមានអ្នកជំនាញចំនួន១០រូប ត្រូវបានរំពឹងថានឹងទៅដល់ចិន នាដើមខែមករាឆ្នាំ២០២១នេះ។ ប៉ុន្តែមកដល់ពេលនេះ ក្រុមស្រាវជ្រាវអន្តរជាតិ មិនទាន់ជាន់ទឹកដីចិននៅឡើយទេ។
នៅថ្ងៃទី២ខែមករា លោក វ៉ាង យី ប្រមុខការទូតចិន អះអាងថា ការសិក្សាជាច្រើនបង្ហាញថា កូវីដ-១៩ ផ្ទុះឡើងនៅតំបន់ជាច្រើននៅជុំវិញពិភពលោក។ ឯសារព័ត៌មានរដ្ឋចិនធ្លាប់លើកឡើងថា ជំងឺកូវីដ-១៩ មានប្រភពក្រៅទឹកដីចិនហើយចូលមកទឹកដីខ្លួនតាមរយៈអាហារដែលនាំចូល ឬអត្តពលិកបរទេសដែលចូលរួមកីឡាយោធានៅក្រុងវូហានក្នុងខែតុលា ឆ្នាំ២០១៩ ក៏ថាបាន។
គួរបញ្ជាក់ថា អាជ្ញាធរចិន បានជូនដំណឹងទៅ WHO ស្តីពីជំងឺផ្លូវដង្ហើមប្រភេទថ្មី នៅថ្ងៃទី៣១ ធ្នូ ឆ្នាំ២០១៩ ក្រោយមានករណីផ្ទុះជំងឺមិនធ្លាប់មាននេះក្នុងក្រុងវូហាន។ តាំងពីពេលនោះមក អាមេរិកបានចោទប្រកាន់ចិនថាលាក់បាំងពីការផ្ទុះជំងឺឆ្លងនេះ និងក៏បានទាមទារផងដែរឲ្យWHO ស៊ើបអង្កេតដោយមានតម្លាភាពចំពោះការផ្ទុះឡើងនេះ។
