គ្រាប់ដឹកពីកោះកុងមកផ្ទុះនៅ ក្នុងទីបញ្ជាការយោធភូមិភាគទី៣ ខេត្តកំពង់ស្ពឺ ស្លាប់២០របួសជាច្រើនមិនទាន់ដឹងពីមូលហេតុ
07-November-2024 / សន្តិសុខសង្គម
កំពង់ស្ពឺ៖ តាមរូបភាពវីដេអូពីបណ្តាញសង្គម គេឮសំឡេងផ្ទុះគ្រាប់ ជាច្រើននាទី ផ្ទុះបន្តកន្ទុយគ្នា ឮកងរំពង នៅម៉ោងប្រមាណជា ៤:៤៤នាទី ថ្ងៃទី២៧ ខែមេសា ឆ្នាំ២០២៤បង្កឲ្យមានការភ្ញាក់ផ្អើលដល់ពលរដ្ឋ ក្នុងខេត្តកំពង់ស្ពឺ។ ហេតុការណ៍ផ្ទុះនេះ ត្រូវបានគេដឹងថាកើតឡើងនៅត្រង់ទីតាំងឃ្លាំងគ្រាប់បច្ចេទេស របស់ យោធភូមិភាគទី៣ស្ថិតក្នុងភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ បណ្តាលឲ្យ កងកម្លាំងយោធា ចំនួន ២០ នាក់បាត់បង់ជីវិត។
ក្នុងចំណោមមរណជនទាំងនោះ មាន៥នាក់ ជានាយទាហាន នៅទីបញ្ជាការយោធភូមិភាគទី៣ ដោយផ្ទាល់ ហើយ យោធិនស្លាប់ ១៥ នាក់ទៀត ជាក្រុមទាហានមកពីខេត្តកោះកុង។ បើតាមលិខិតឧទ្ទេសនាម របស់តំបន់ប្រតិបត្តិការសឹករងកោះកុង, ពួកគេទាំង១៥នាក់ ដែលមកពីកោះកុងនេះ មានកម្រិតស័ក្តិ ចាប់ពីពលបាលទោ នាយចំណង់ អនុសេនីយ៍ត្រី រហូតដល់ វរសេនីយ៍ទោ។ យោធិនទាំងនេះ បានទទួលបញ្ជាបេសកកម្ម ឲ្យចូលរួមដឹកគ្រឿងសព្វាវុធនិងគ្រាប់រំសេវ តាមឡានទាហាន ចំនួន ៥ គ្រឿង ដោយត្រូវធ្វើដំណើរចេញមកពីខេត្តកោះកុង មកប្រគល់អាវុធនិងគ្រាប់ជូនទីបញ្ជាការដ្ឋានយោធភូមិភាគ ទី៣ ក្នុងខេត្តកំពង់ស្ពឺ។
បើយោងរបាយការណ៍បឋម របស់កងទ័ពជើងគោក ដែលផ្សព្វផ្សាយតាមបណ្តាញសង្គម, ក្នុងចំណោមឡានទាហានដឹកអាវុធទាំង ៥គ្រឿង មកពីខេត្តកោះកុងមាន១គ្រឿង ត្រូវផ្ទុះឆេះទាំងស្រុង ទាំងរថយន្តនិងទាំងគ្រាប់, ឡាន១គ្រឿងទៀត ខូចខាតធ្ងន់ធ្ងរ ក៏ប៉ុន្តែ គ្រឿងសព្វាវុធ ពុំខូចខាតទេ។ ចំណែក ឡាន ៣ គ្រឿងទៀត នៅមិនទាន់បានដាក់អាវុធចុះនៅឡើយ។ នេះបើតាមរបាយការណ៍ដំបូងរបស់ ឧត្តមសេនីយ៍ឯក យឿន សុខុន។ មន្ត្រីយោធារូបនេះបានឲ្យដឹងដែរថា នៅទីបញ្ជាការភូមិភាគទី៣ មានអគារ ៤ ខ្នងត្រូវឆេះខូចខាតធ្ងន់ធ្ងរ។ ក្នុងចំណោមនោះ មាន ៣ អគារ ជាឃ្លាំងផ្ទុកគ្រាប់ ដែលត្រូវផ្ទុះឆេះខូចខាតទាំងស្រុង ហើយអគារ ១ ខ្នងទៀត ជាកន្លែងស្នាក់នៅ។
ទន្ទឹមនឹងគ្នានេះ ការិយាល័យកន្លែងធ្វើការ របស់ទីបញ្ជាការយោធា ក៏ខូចខាតដែរ ជាអាទិ៍ បែកកញ្ចក់ បាក់ទ្វារ ធ្លុះធ្លាយដំបូល ដោយអន្លើ។ប្រភពមន្ត្រីជាន់ខ្ពស់កងទ័ពជើងគោកដដែល, នៅក្បែរៗបន្ទាយយោធាកំពង់ស្ពឺនេះ ផ្ទះសម្បែងរបស់ប្រជាជន ចំនួន ២៥ខ្នង ក៏រងការខូចខាតដែរ។សមត្ថកិច្ចជំនាញមាន កម្លាំងអាវុធហត្ថ នគរបាល និងអង្គភាព៧១១ ដែលត្រៀមបង្ការ បានសម្រុកចូលទៅចំណុចទីតាំងឃ្លាំងស្តុកគ្រាប់នោះ ដើម្បីធ្វើការបាញ់ទឹកសន្ធាប់ឱ្យភ្លើងរលត់។ ស្រប់ពេលនោះដែរភ្លៀងក៏បានបង្អុរធ្លាក់ហាក់ជួយស្រោចស្រព និងបាញ់ពន្លត់ជាមួយសមត្ថកិច្ចផងដែរ ទេីបបានគ្រប់គ្រងស្ថានការណ៍បាន។
បន្ទាប់ពីមានករណី ឧបទ្ទវហេតុផ្ទុះគ្រាប់ នៅយោធភូមិភាគទី៣ ក្នុងខេត្តកំពង់ស្ពឺ កាលពីរសៀលថ្ងៃសៅរ៍ ទី២៧ ខែមេសា ឆ្នាំ២០២៤ ដែលបានបង្កឱ្យយោធិនចំនួន ២០នាក់ បានពលីជីវិត និងយោធិនមួយចំនួនទៀតបានរបួស សម្តេចធិបតី ហ៊ុន ម៉ាណែត នាយករដ្ឋមន្តមរីកម្ពុជា មានក្តីរន្ធត់ក្តុកក្តួលឥតឧបមា ដែលបានទទួលដំណឹងនេះ។សម្តេចធិបតី ហ៊ុន ម៉ាណែត បានលើកឡើងយ៉ាងដូច្នេះថា៖ «ក្នុងនាមរាជរដ្ឋាភិបាល និងក្នុងនាមខ្លួនខ្ញុំផ្ទាល់ ខ្ញុំសូមចូលរួមរំលែកមរណទុក្ខយ៉ាងក្រៀមក្រំបំផុតចំពោះក្រុមគ្រួសារយោធិនពលី និងសម្តែងនូវសមានទុក្ខសោកស្តាយចំពោះអ្នករងរបួស ក្នុងឧបទ្ទវហេតុដ៏សោកសង្រេងនេះ។ ខ្ញុំបានផ្តល់ការណែនាំដល់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ដើម្បីចាត់ចែងជាបន្ទាន់រៀបចំពិធីបុណ្យសពជូនយោធិនដែលបានពលីក្នុងឧបទ្ទវហេតុនេះ ឱ្យបានសមរម្យស័ក្តិសមនឹងពលិកម្មរបស់ពួកគាត់ចំពោះជាតិ និងមាតុភូមិ។ ឯកឧត្តម នាយឧត្តមសេនីយ៍ ទៀ សីហា នឹងធ្វើជាតំណាងរបស់ខ្ញុំដើម្បីចូលរួមគោរពវិញ្ញាណក្ខន្ធ»។
សម្តេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាល នឹងទទួលរ៉ាប់រងទាំងស្រុង លើការចំណាយរៀបចំពិធីបុណ្យសពនេះ។ ជាមួយគ្នានេះ សម្តេចសូមផ្តល់ការឧបត្ថម្ភជាថវិកាជូនគ្រួសារយោធិនពលី ចំនួន ២ ម៉ឺនដុល្លារ ក្នុងមួយគ្រួសារសព ហើយចំពោះយោធិនដែលរងរបួសក្នុងឧបទ្ទវហេតុនេះ ក្នុងម្នាក់ៗចំនួន ២០លានរៀល។សម្តេចធិបតី សូមឧទ្ទិសបួងសួងឱ្យដួងវិញ្ញាណក្ខន្ធរបស់យោធិនពលី បានចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ និងក៏សូមជូនពរយោធិន និងជនរងគ្រោះទាំងអស់ឆាប់បានជាសះស្បេីយ៕មកដល់ពេលនេះគេនៅមិនទាន់ដឹងពីមូលហេតុដែលនាំឲ្យមានការផ្ទុះឆេះគ្រាប់ដែលដឹកជញ្ជូនពីខេត្តកោះកុងមកនោះឡើយ។មិនដឹងថាតើជាឧបទ្ទវហេតុឬក៏ជាំហេតុដេលត្រូវបានគេបង្កឡើង?៕
