វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 658 នាក់
ម្សិលមិញ 4563 នាក់
សរុប 14168034 នាក់
ភ្នំពេញ៖ នារសៀលថ្ងៃទី៤មេសាថ្លែងក្នុងពិធីបិទសន្និបាតរបស់ក្រសួងមុខងារសាធារណៈ សម្តេចធិបតីនាយករដ្ឋមន្ត្រីនៃកម្ពុជា បានលើកឡើងថា រាជរដ្ឋាភិបាលមានភាពចាំបាច់ ក្នុងការបន្ដកំណែទម្រង់ស្ថាប័ន និងអភិបាលកិច្ច ឲ្យសម្រេចបាននូវរដ្ឋបាលសាធារណៈមួយដែលមានសមត្ថភាពខ្ពស់ ខ្លាំង វៃឆ្លាត ហើយបំពេញការងារនៅក្នុងជីវភាពប្រព័ន្ធតួអង្គតែមួយ ដោយធានាបានប្រសិទ្ធភាពខ្ពស់ នៅក្នុងគ្រប់ទិដ្ឋភាពទាំងអស់ នៃកិច្ចសហប្រតិបត្តិការរបស់ខ្លួនទាំងការដឹកនាំ ការសម្របសម្រួល ការត្រួតពិនិត្យ និងការវាយតម្លៃ នៅលើការអនុវត្តគោលនយោបាយយុទ្ធសាស្ដ្រ នៅក្នុងបរិការនៃការវិវត្ត ប្រែប្រួលយ៉ាងឆាប់រហ័ស នៅក្នុងសភាពការណ៍សង្គម សេដ្ឋកិច្ច នៅទូទាំងប្រទេសជាដើម។
ដើម្បីសម្រេចកិច្ចការនេះសម្តេចធិបតី បានបញ្ជាក់ថា កិច្ចការខាងលើនេះ គឺក្រសួងមុខងារសាធារណៈ ដើរតួនាទីសំខាន់បំផុតក្នុងការគាំទ្រដល់ការងារបំពេញមុខងាររបស់ក្រសួង ស្ថាប័នទាំងថ្នាក់ជាតិ និងថ្នាក់ ក្រោមជាតិ ជាពិសេសនោះគឺការធ្វើកំណែទម្រង់រដ្ឋបាលសាធារណៈ ដែលជាកិច្ចការអាទិភាពបំផុតរបស់ រាជរដ្ឋាភិបាលអាណត្តិទី៧នេះ។«អ្វីដែលយើងចង់បាន គឺរដ្ឋបាលសាធារណៈមួយដែលរឹងមាំ ដែលបត់បែន ប្រសិទ្ធភាពក្នុងការបំពេញភារកិច្ចជូនជាតិ ទាំងថ្នាក់ជាតិ និងថ្នាក់ក្រោមជាតិ។ អ៊ីចឹងអ្វីដែលយើងត្រូវឯកភាពគ្នាធ្វើ ហើយយើងក៏ឯកគ្នាដែរ គឺយើងត្រូវតែធ្វើ ប៉ុន្ដែធ្វើនៅពេលណា?។ មានទស្សនៈលើកឡើងមកថា យើងធ្វើជំហានពេលនេះ កន្លែងនោះចាំតិច។ ការធ្វើកំណែទម្រង់ មិនមែនធ្វើពេលនេះ ឬពេលឆ្នាំក្រោយនោះទេ គឺធ្វើត្រូវជាប់ជាប្រចាំ យើងបានធ្វើជាប់ជាប្រចាំហើយ»។ នេះជាប្រសាសន៍របស់សម្ដេចនាយករដ្ឋមន្ដ្រី។ សម្ដេចមហាបវរធិបតី ហ៊ុន ម៉ាណែត លើកឡើងថា ក្រសួងមុខងារសាធារណៈ ដើរតួនាទីយ៉ាងសំខាន់ក្នុងការគាំទ្រដល់ការបំពេញមុខងាររបស់គ្រប់ក្រសួង ស្ថាប័ន និងរដ្ឋបាលថ្នាក់ក្រោមជាតិ ក៏ដូចជាការគាំទ្រដល់ការដ្ឋាន កែទម្រង់សំខាន់ៗរបស់រាជរដ្ឋាភិបាល។
ទាក់ទងគម្រោងកំណែទម្រង់នេះដែរសម្តេចធិបតី ហ៊ុន ម៉ាណែត បានប្រកាសដំឡើងឋានៈជូនប្រធានមន្ទីរជំនាញនីមួយ ដែលចំណុះឲ្យរដ្ឋបាលរាជធានី-ខេត្ត ឲ្យស្មើនឹងប្រធាននាយកដ្ឋានដើម្បីជាការលើកទឹកចិត្ត
។ ការប្រកាសនេះបើតាមច្បាប់វាគឺជាការសម្រេចដោយចុងប៊ិចរបស់នាយករដ្ឋមន្ត្រីមិនមែនត្រឹមរដ្ឋមន្ត្រីក្រសួងនានាដូចមុនទេ។បានន័យថារដ្ឋមន្ត្រីក្រសួងនីមួយថយអំណាចមួយកម្រឹតទៀតទៅវិញពីមុនកែសម្រួលនេះថ្នាក់ប្រធានមន្ទីរនិងស្នងការមេបញ្ជាការយោធាខេត្តរាជធានីគឺរដ្ឋមន្ត្រីក្រសួងសាម៉ីជាអ្នកចេញប្រកាសតែងតាំង។បញ្ហានេះសម្ដេចធិបតី បានលើកឡើងថា តួអង្គគន្លឹះក្នុងការអនុវត្តន៍កិច្ចការឲ្យមានប្រសិទ្ធភាព គឺមន្ទីរជំនាញចំណុះរាជធានី-ខេត្ត ដែលជាសេនាធិការ ការទទួលខុសត្រូវខ្ពស់ ត្រូវការការគាំទ្រកាន់តែច្រើន ទី១ សិទ្ធិ ទី២ ធនធាន។ សិទ្ធិយើងបានប្រគល់ទៅហើយ តាមរយៈវិមជ្ឈការ និងវិសហមជ្ឈការ ដោយធ្វើប្រតិភូកម្មសិទ្ធិទៅឲ្យមូលដ្ឋាន។ ចំណែកធនធានមានមួយផ្នែកធំ ក៏បានទម្លាក់ទៅថ្នាក់មូលដ្ឋានដែរ។
«ខ្ញុំគិតថា ដើម្បីជាការលើកទឹកចិត្ត ខ្ញុំបានជជែកជាមួយជំនាញខាងមុខងារសាធារណៈ ដូចអត់មានបញ្ហាទេ បច្ចុប្បន្នប្រធានមន្ទីរមានឋានៈកម្រិតអនុប្រធាននាយកដ្ឋាន ស័ក្តិ៣ ឥឡូវយើងរៀបចំជំរុញឲ្យប្រធានមន្ទីរឡើង ស័ក្តិ៤ ឡើងកម្រិតប្រធាននាយកដ្ឋានតែម្តង»។ នេះជាប្រសាសន៍របស់សម្ដេចធិបតី។ទាក់ទងការជ្រើសរើសមន្ត្រីរាជការវិញសម្តេចធិបតី ហ៊ុន ម៉ាណែត បានថ្លែងថា ការរើសមន្ត្រីថ្មី ទាល់តែបញ្ចប់ការវិភាគ វាយតម្លៃច្បាស់លាស់ ។
សម្តេចធិបតីបានផ្តល់អនុសាសន៍ឲ្យបន្តយកចិត្តទុកដាក់ព្រមទាំងចូលរួមគាំទ្រ និងអនុវត្តឱ្យបានម៉ត់ចត់ក្នុងការកែលម្អការ ជ្រើសរើសមន្ត្រីចូលបម្រើការងារ ក្នុងរដ្ឋបាលសាធារណៈប្រកបដោយគុណាធិបតេយ្យ តម្លាភាព យុត្តិធម៌ បរិយាប័ន្ន និងប្រសិទ្ធភាព តាមរយៈការរៀបចំការប្រឡងប្រជែង ជ្រើសរើសមន្ត្រីរាជការដែលរាជរដ្ឋាភិបាលបានផ្តល់គោលការណ៍អនុញ្ញាត ផ្អែកលើ និយាមនីតិវិធីប្រតិបត្តិសម្រាប់ការប្រឡងប្រជែងជ្រើសរើសមន្ត្រីសម្រាប់ក្រសួង ស្ថាប័ន ដោយធានាឱ្យបានទំនុកចិត្តពីសាធារណជន ពោលគឺ “ជាប់ដោយមោទនៈ ធ្លាក់ដោយ អស់ចិត្ត” ព្រមទាំងជំរុញការរៀបចំ និងការដាក់ឱ្យអនុវត្តលិខិតបទដ្ឋានគតិយុត្តពាក់ព័ន្ធនឹង ការជ្រើសរើស និងគ្រប់គ្រងមន្ត្រីបច្ចេកទេស/មន្ត្រីជំនាញ ដែលធានាឱ្យបាន “ការបំពេញ ឱ្យត្រូវ ថែរក្សាឱ្យនៅ៕