វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6626 នាក់
ម្សិលមិញ 5304 នាក់
សរុប 14146152 នាក់
ខេត្តសៀមរាប៖ ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា បានមានព្រះរាជបណ្ទូលគាំទ្រ និងលើកទឹកចិត្តឱ្យរាជរដ្ឋាភិបាលកម្ពុជា បន្តអភិវឌ្ឍធនធានមនុស្សក្នុងវិស័យអភិរក្ស និងស្រាវជ្រាវបុរាណវិទ្យាតាមគ្រប់រូបភាព និងគ្រប់ទម្រង់ក្រោយកិច្ចសហការជាមួយស្ថាប័នជាតិ និងអន្តរជាតិ ពិសេសប្រទេសជប៉ុន ដែលតែងតែជួយជ្រោមជ្រែងកម្ពុជាក្នុងវិស័យមួយនេះ។
អំឡុងពេលស្តេចយាងសម្ពោធដាក់ឱ្យប្រើប្រាស់ជាផ្លូវការ ស្ពានហាលខាងលិចនៃប្រាសាទអង្គរវត្ត នៅថ្ងៃទី៤ ខែវិច្ឆិកា ឆ្នាំ២០២៣ព្រះករុណា ព្រះបាទ សម្តេច ព្រះបរមនាថ នរោត្ដម សីហមុនី មានព្រះរាជ្យបន្ទូលថា «ខ្ញុំ[..]សូមលើកទឹកចិត្ត និងគាំទ្រ ឱ្យបន្តការអភិវឌ្ឍធនធានមនុស្សក្នុងវិស័យអភិរក្ស និងស្រាវជ្រាវរបស់កម្ពុជា តាមគ្រប់រូបភាព និងគ្រប់ទម្រង់ជាមួយស្ថាប័ននានានៃប្រទេសជប៉ុន ព្រមទាំងជាមួយដៃគូជាតិ និងអន្តរជាតិ ស្របតាមចក្ខុវិស័យនៃយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិថ្មី ស្មារតីនៃចក្ខុវិស័យ១០ឆ្នាំទៅមុខទៀត និងយន្តការអាយស៊ីស៊ី(ICC) អង្គរ-សំបូរព្រៃគុក និងអនុលោមទៅតាមកិត្តិនាមជាប្រទេសកំពុងឈានមុខគេ ក្នុងចំណោមបណ្តាប្រទេសនៅអាស៊ីអាគ្នេយ៍ ក្នុងនាមអង្គរជាទីតាំងបុរាណវិទ្យាដ៏ធំជាងគេរបស់យូណេស្កូ សម្រាប់កិច្ចការបណ្ដុះបណ្តាលធនធានមនុស្ស សម្រាប់វិស័យបេតិកភណ្ឌវប្បធម៌»។
ព្រះករុណា ព្រះមហាក្សត្រនៃព្រះរាជាណាចក្រកម្ពុជា បានចាត់ទុកការប្រារព្ធព្រះរាជពិធីសម្ពោធដាក់ឱ្យប្រើប្រាស់ជាផ្លូវការ «ស្ពានហាលខាងលិចនៃប្រាសាទអង្គរវត្ត» គឺជានិមិត្តរូបដ៏ខ្ពង់ខ្ពស់នៃមហាវីរក្សត្រសម័យអង្គរ ព្រះបាទសូរ្យវរ្ម័នទី២។ ព្រះករុណាបន្តមានព្រះរាជបន្ទូលយ៉ាងដូច្នេះថា៖«ការប្រារព្ធព្រះរាជពិធីសម្ពោធដាក់ឱ្យប្រើប្រាស់ជាផ្លូវការ ស្ពានហាលខាងលិចនៃប្រាសាទអង្គរវត្ត នៅចំពីមុខនៃប្រាសាទអង្គរវត្ត ដែលជាស្នាព្រះហស្ត និងជានិមិត្តរូបដ៏ខ្ពង់ខ្ពស់នៃមហាវីរក្សត្រសម័យអង្គរ ព្រះបាទសូរ្យវរ្ម័នទី២ គឺជាព្រឹត្តិការណ៍ប្រវត្តិសាស្ត្រតម្លៃជាសាកលពិតប្រាកដ»។សូមជម្រាបថា ស្ពានហាលខាងលិចប្រាសាទអង្គរវត្ត បានដាក់សម្ពោធឱ្យប្រើប្រាស់ជាផ្លូវការហើយនៅថ្ងៃទី៤វិច្ឆិកាបន្ទាប់ពីជួសជុលហើយដោយជំនួយជប៉ុន។ ប៉ុន្តែស្ពានហាលនេះ ដាក់ឱ្យប្រើប្រាស់ជាផ្លូវឯកទិសសម្រាប់អ្នកទេសចរប៉ុណ្ណោះ ពោលគឺចាត់ទុកជាផ្លូវដើរចូល ហើយរក្សាស្ពានបណ្ដែតទឹកនៅដដែល ដោយដាក់សម្រាប់ជាផ្លូវសម្រាប់ដើរចេញពីប្រាសាទអង្គរវត្ត៕