អង្គការWWF ស្វាគមន៍បទបញ្ជារ សម្ដេចតេជោ រឿងការពារតំបន់អភិរក្សសត្វផ្សោតតាមដងទន្លេមេគង្គដើម្ពិទេសចរណ៍
10-August-2023 / ទេសចរណ៏និងវប្បធម៌
ភ្នំពេញ៖ អង្គការ WWF បានសម្តែងការស្វាគមន៍យ៉ាងខ្លាំងចំពោះប្រសាសន៍របស់សម្ដេចតេជោនាយករដ្ឋមន្ត្រី ហ៊ុន សែន ដែលបានថ្លែងក្នុងពិធីបើកការដ្ឋានសាងសង់ស្ពានឆ្លងទន្លេ នៅក្នុងខេត្តក្រចេះអំពីភាពចាំបាច់នៃការពង្រឹងការការពារដោយពេញលេញ និងតឹងរឹងនូវតំបន់អភិរក្សសត្វផ្សោតតាមដងទន្លេមេគង្គក្នុងប្រទេសកម្ពុជា ដើម្បីធានាថាសត្វផ្សោតដែលនៅសេសសល់ និងត្រីមេពូជ ត្រូវបានការពារពីសកម្មភាពនេសាទខុសច្បាប់។
លោក សេង ទៀក នាយកអង្គការ WWF កម្ពុជា បានមានប្រសាសន៍ថា “អង្គការ WWF សូមអបអរសាទរ និងគាំទ្រអនុសាសន៍របស់សម្ដេចតេជោនាយករដ្ឋមន្ត្រី ស្តីពីការបង្កើតតំបន់អភិរក្សស្នូលអចិន្ត្រៃយ៍ និងតំបន់អភិរក្សស្នូលតាមរដូវកាល ក្នុងតំបន់ដែលមានផ្ទៃក្រឡាប្រវែង ១៨០ គីឡូម៉ែត្រ នៃទន្លេមេគង្គកម្ពុជា។”
លោក សេង ទៀក បានបន្ថែមទៀតថា “អង្គការ WWF បានត្រៀមខ្លួនរួចជាស្រេចក្នុងការសហការជាមួយអាជ្ញាធរពាក់ព័ន្ធ គឺ គណៈកម្មការគ្រប់គ្រង អភិរក្ស អភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ព្រមទាំងរដ្ឋបាលខេត្តក្រចេះ និងរដ្ឋបាលខេត្តស្ទឹងត្រែង ដើម្បីគាំទ្រដល់ការគ្រប់គ្រងប្រកបដោយប្រសិទ្ធភាពនូវថនិកសត្វទឹកសាបជិតផុតពូជបំផុតមួយប្រភេទនេះ និងក្នុងការអនុវត្តនូវប្រសាសន៍ណែនាំរបស់សម្ដេចនាយករដ្ឋមន្ត្រី។”សម្តេចតេជោ ហ៊ុន សែន បានបញ្ជាឲ្យអភិបាលខេត្តក្រចេះ និងអភិបាលខេត្តស្ទឹងត្រែង ត្រូវយកចិត្តទុកដាក់អភិរក្សតំបន់ផ្សោតទន្លេមេគង្គ ដោយដាក់ពោងកំណត់ការពារមិនឲ្យមានអ្នកចូលរំខាន ឬហៅថា តំបន់ស្នូលអចិន្ត្រៃយ៍។
សម្តេច «ប៉ុន្មានថ្ងៃមុននេះឃើញថា មានសត្វផ្សោតទើបតែស្លាប់ »។ «ខ្ញុំសូមដាស់តឿនឲ្យយកចិត្តទុកដាក់ ហើយតំបន់ផ្សោតនេះ ជាតំបន់អភិរក្ស ដោយគ្មានការលើកលែងទេ »។ សម្តេចបន្តថា «យើងអាចលើកលែងខ្លះនៅតំបន់ទន្លេសាប ដោយសារតែប្រជាជនរស់នៅទីនោះយូរហើយ យើងឆ្វៀលដីកាត់ដីជូនពួកគាត់ ក៏ប៉ុន្តែ សម្រាប់ទន្លេមេគង្គដែលសម្បូរទៅដោយសត្វផ្សោត និងត្រីមួយចំនួនដែលជិតផុតពូជនោះ ជាពិសេសគឺផ្សោត ត្រូវរៀបរយឱ្យបានល្អ »។
សម្តេចតេជោ ហ៊ុន សែន បានបញ្ជាឲ្យចៅហ្វាយខេត្ត តាមដងទន្លេមេគង្គ ធានាមិនឲ្យមានការរំខានដល់សត្វផ្សោតនោះ ដូច្នេះត្រូវរៀបចំតាមអ្នកបច្ចេកទេស។ សម្តេចក៏បានផ្តល់អនុសាសន៍ថា ត្រូវមានតំបន់ស្នូលអចិន្ត្រៃយ៍ ដោយត្រូវកំណត់ ឬដាក់ពោងការពារមិនឲ្យមានអ្នកចូលរំខាន ជាពិសេសអ្នកនេសាទ។សម្តេចតេជោ ហ៊ុន សែន ក៏បានស្នើសុំឲ្យប្រជាពលរដ្ឋ ជួយចូលរួមថែរក្សាតំបន់ផ្សោត ដោយកុំនេសាទខុសច្បាប់ផងដែរ។ទន្ទឹមនិងការដាក់ចេញវិធានការណ៍អភិរក្សត្រីផ្សោតសម្ដេចតេជោ ហ៊ុន សែន ក៏បានប្រកាស «អញ្ជើញប្រជាជនចិនមកកម្ពុជា»ឡើងវិញបន្ទាប់ពីប្រទេសនេះបើកព្រំដែនវិញ ដោយសម្ដេចសង្ឃឹមថានឹងជួយឱ្យកំណើនសេដ្ឋកិច្ចកម្ពុជាងើបឡើងកាន់តែខ្លាំង។
សម្ដេចតេជោថា៖ «អ្នក (ប្រទេសផ្សេង) តឹងតែងជាងមួយចិនក៏តឹងតែងចុះ តែកម្ពុជាស្វាគមន៍ ព្រោះវាផ្ដល់ឱ្យមានអត្ថប្រយោជន៍ដល់កម្ពុជា។ បើទេសចរណ៍ចិនបើកជើងយន្តហោះរាប់សិបជើងក្នុងមួយថ្ងៃ និងធ្វើឱ្យកំណើនសេដ្ឋកិច្ចកម្ពុជា និងរើជាមួយនឹងកសិកម្ម ឧស្សាហកម្ម»។ក្នុងឆ្នាំ២០១៩ មុនមានការផ្ទុះឡើងនៃជំងឺកូវីដ-១៩ កម្ពុជាបានទទួលអ្នកទេសចរណ៍សរុបជាង ៦លាននាក់ ភាគច្រើនគឺអ្នកទេសចរជនជាតិចិន។
សម្ដេចមានប្រសាសន៍ថា, ក្នុងឆ្នាំកន្លងទៅនេះ បើតាមការបញ្ជាក់ពី លោក ថោង ខុន រដ្ឋមន្ត្រីក្រសួងទេសចរណ៍ កម្ពុជាទទួលបានភ្ញៀវទេសចរណ៍ប្រមាណជាង 2 លាននាក់ ដែលសម្ដេចសង្ឃឹមថាក្នុងឆ្នាំ 2023 នេះ កម្ពុជានិងអាចទទួលភ្ញៀវទេសចរណ៍ពី 4 លានទៅ 5 លាននាក់។ ពេលនោះហើយដែលធ្វើឲ្យសេដ្ឋកិច្ចរបស់យើងងើបឡើងវិញ។ សូម្បីតែក្នុងថ្ងៃឆ្លងឆ្នាំ សកល គឺមានភ្ញៀវទេសចរណ៍ប្រមាណជាង 2 លាននាក់ ដែលពួកគាត់បានទៅកំសាន្តនៅតំបន់នានា ។ ការសប្បាយរីករាយ គ្រប់ទីកន្លែងនៅក្នុងប្រទេសកម្ពុជា ក៏អាស្រ័យដោយសារ ប្រទេសយើងមានសន្តិភាព ៕
