នាយករដ្ឋមន្ត្រីកម្ពុជាសម្តេចធិបតីអបអរបុណ្យរ៉ាម៉ាដាន់ប្រធានាធិបតីតួគីរិះគន់
03-April-2024 / ទេសចរណ៏និងវប្បធម៌
ភ្នំពេញ៖សម្តេចមហាបវរធិបតី ហ៊ុន ម៉ាណែត ៖ តាងនាមរាជរដ្ឋាភិបាលនៃព្រះរាជាណាចក្រកម្ពុជា នីតិកាលទី៧ នៃរដ្ឋសភា ខ្ញុំ និងភរិយា សូមអបអរសាទរ និងសូមជូននូវពរជ័យ សិរីសួស្ដី សុភមង្គល ជូនដល់បងប្អូនសាសនិកខ្មែរឥស្លាម នៅក្នុង និង ក្រៅប្រទេសកម្ពុជា។ ខ្ញុំ និងភរិយា សូមអបអរសាទរ និងសូមជូននូវពរជ័យ សិរីសួស្ដី សុភមង្គល ជូនដល់បងប្អូនសាសនិកខ្មែរឥស្លាម នៅក្នុង និង ក្រៅប្រទេសកម្ពុជា រួមទាំងបងប្អូនសាសនិកឥស្លាមនៅទូទាំងពិភពលោក ដែលនឹងចូលបួសខែរ៉ម៉ាឌន ខែពិសិដ្ឋក្នុងសាសនាឥស្លាម ដែលនៅប្រទេសកម្ពុជា យើងនឹងចាប់ផ្ដើមនៅថ្ងៃអង្គារ ទី១ ខែរ៉ម៉ាឌន ឆ្នាំ ១៤៤៥ មូហាំម៉ាត់សករាជ ត្រូវនឹងថ្ងៃ ៣កើត ខែផល្គុន ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី ១២ ខែមីនា ឆ្នាំ២០២៤។
សម្តេចធិបតីបានថ្លែងតាមរយៈសារថា៖ខ្ញុំសូមផ្ញើជូននូវក្តីនឹករឭក និងអរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមបន្តថែរក្សាសុខសន្តិភាព សុខដុមនីយកម្មជាតិសាសន៍ និងសាសនា ហើយមានជំនឿជឿជាក់លើការដឹកនាំរបស់ខ្ញុំ, របស់សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្ត្រី និង របស់គណបក្សប្រជាជនកម្ពុជា តាំងពីដើមតរៀងមក រួមជាមួយនឹងប្រជាជនកម្ពុជា។សម្តេចធិបតីបានឲ្យដឹងថា៖នៅថ្ងៃទី២១ ខែមីនា ឆ្នាំ២០២៤ខាងមុខនេះ រាជរដ្ឋាភិបាល នឹងរៀបចំពិធីពិសាអាហារស្រាយបួសខែរ៉ម៉ាឌន នៃសាសនាឥស្លាមកម្ពុជា លើកទី៨ នៅរាជធានីភ្នំពេញ ដែលនឹងមានអ្នកចូលរួមជាភ្ញៀវជាតិ និងអន្តរជាតិប្រមាណ ៦ ២០០នាក់ ។ឆ្នាំនេះក៏មានមិត្តភក្ដិបរទេសនឹងមកចូលរួមទាំងនៅក្នុង និងក្រៅប្រទេសប្រមាណជាង ៤០០នាក់ មកពី ៣៩ ជាតិសាសន៍ ជាពិសេសមានតំណាងឯកឧត្ដមអគ្គលេខាធិការអង្គការសហប្រតិបត្តិការឥស្លាម (OIC), ឯកឧត្ដម Wan Muhamadnoor Matha ប្រធានរដ្ឋសភា នៃព្រះរាជាណាចក្រថៃ និង អតីត-ថ្នាក់ដឹកនាំជាន់ខ្ពស់នៃបណ្ដាប្រទេសជិតខាងមកចូលរួមជាច្រើនផងដែរ ។
សូមបញ្ជាក់ថា៖សមាជិកនៃគណៈកម្មាធិការពិនិត្យដំណើរគោចររបស់ព្រះចន្ទដើម្បីប្រកាសអំពីថ្ងៃប្រារព្ធពិធីបុណ្យតមអាហារនៃប្រទេសអារ៉ាប៊ីសាអូឌីត បានប្រកាសកាលពីថ្ងៃអាទិត្យចុងសប្តាហ៍នេះថា ខែពិសិដ្ឋនៃពិធីបុណ្យតមអាហារ ឬពិធីបុណ្យរ៉ាម៉ាដាន នឹងចាប់ផ្តើមនៅថ្ងៃចន្ទនាប្រទេសអារ៉ាប៊ីសាអូឌីត បន្ទាប់ពីសង្កេតឃើញអំពីដំណើរគោចររបស់ព្រះចន្ទដែលបញ្ជាក់អំពីការមកដល់នៃពិធីបុណ្យតមអាហារនៅក្នុងសាសនាឥស្លាមសម្រាប់ប្រជាជនមូស្លីម ១.៨ ពាន់លាននាក់នៅទូទាំងពិភពលោក ។
ពេលវេលានៃពិធីបុណ្យតមអាហារ ឬពិធីបុណ្យរ៉ាម៉ាដាន អាចប្រែប្រួលនៅតាមប្រទេសផ្សេងៗគ្នា អាស្រ័យលើការមើលឃើញអំពីដំណើរគោចររបស់ព្រះចន្ទ ដែលជាដំណើរចាប់ផ្តើមនៃខែពិសិដ្ឋនៅក្នុងប្រតិទិនចន្ទគតិរបស់សាសនាឥស្លាម។ ក្នុងអំឡុងខែរ៉ាម៉ាដាន អ្នកកាន់សាសនាឥស្លាមតមអាហារ និងទឹកតាំងពីព្រលឹមដល់ព្រលប់។ ឥស្លាមសាសនិកញ៉ាំ សូហ៊ូ (Suhur) ជាអាហារមុនពេលព្រឹកព្រលឹម មុនពេលញ៉ាំអ៊ីហ្វតា (Iftar) ដែលជាអាហារសម្រាប់ពេលល្ងាច ។ រ៉ាម៉ាដាន គឺជាពិធីបុណ្យនៅក្នុងខែទី ៩ នៃប្រតិទិនឥស្លាម។ ខែដ៏ពិសិដ្ឋនេះ ពាក់ព័ន្ធនឹងការតមអាហារយ៉ាងខ្ជាប់ខ្ជួនក្នុងរយៈពេលមួយខែ។ អំឡុងពិធីបុណ្យនេះ ឥស្លាមសាសនិកតែងតែញ៉ាំអាហារសម្រន់មុនថ្ងៃរះ និងញ៉ាំអាហារពេលល្ងាចក្រោយថ្ងៃលិច ។
ទាក់ទងនិងទិវាបុណ្យរ៉ាម៉ាដាន ប្រធានាធិបតីតួកគី លោក Tayyip Erdogan បាននិយាយថា បណ្តាប្រទេសកាន់សាសនាឥស្លាមធំៗ ធ្វើការមិនគ្រប់គ្រាន់ទេ ដើម្បីបញ្ឈប់ការសម្លាប់អាយុជីវិតជនស៉ីវិលប៉ាឡេស្ទីន ពីសំណាក់កងទ័ពអ៉ីស្រាអែលនៅតំបន់ហ្គាហ្សា ខណៈដែលសង្គ្រាមឈានចូលដល់ ខែទី ៦ហើយ។ សារព័ត៌មានរុស្ស៉ី RT នៅថ្ងៃចន្ទ ទី១១ ខែមីនា ឆ្នាំ ២០២៤បានឲ្យដឹងថា៖ថ្លែងក្នុងព្រឹត្តិការណ៍មួយ នៅទីក្រុងអ៉ីស្តង់ប៊ុល លោក Erdogan បញ្ជាក់ថា «យើងទាំងអស់គ្នាជាសាក្សីរួម ដើម្បីឱ្យសេចក្តីថ្លែងការណ៍ ជាសាកល ស្តីពីសិទ្ធិមនុស្សលេចចេញជារូបរាងឡើង ដោយលើកឡើងអំពីសិទ្ធិរស់នៅសម្រាប់កុមារ ស្ត្រី និងជនស៉ីវិលស្លូតត្រង់ប៉ាឡេស្ទីន»។ លោក Erdogan បានបន្ថែមថា «សង្គ្រាមនៅតំបន់មជ្ឈិមបូព៌ា បង្ហាញឱ្យយើងឃើញថា ពិភពឥស្លាមនៅតែមានចំណុចខ្វះខាតខ្លាំង ជាពិសេសទាក់ទងនឹងការរួបរួមគ្នា នៅពេលព្យាយាមដាក់សម្ពាធលើអ៉ីស្រាអែល ឱ្យបញ្ចប់សង្គ្រាមនៅតំបន់ហ្គាហ្សា»។
