ប្រាក់ឈ្នួលកាត់ដេរនៅកម្ពុជាឆ្នាំ២០២៤ឡើង៤ដុល្លារប្រៀបអតិផរណា២កន្លះភាគរយតែបាន ខ្ពស់ជាងប្រទេសចំនួន៥ នៅក្នុងតំបន់
03-April-2024 / សេដ្ឋកិច្ច
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅល្ងាចថ្ងៃទី២៨ ខែកញ្ញា ឆ្នាំ២០២៣នេះ បាន សាទរជាមួយបងប្អូនកម្មករនិយោជិតវិស័យគមកាត់ដេរ សម្លៀកបំពាក់ ស្បែកជើង និងផលិតផល ធ្វើដំណើរដែលទទួលបានប្រាក់ឈ្នួលអប្បបរមាថ្មីសម្រាប់ឆ្នាំ២០២៤ គឺ២០៤ដុល្លារអាមេរិក ក្នុង១ខែ។សម្តេចធិបតី ហ៊ុន ម៉ាណែតដែលជួយអន្តរាគមថែម២ដុល្លារនិយាយថា៖ «ខ្ញុំសូមអបអរសាទរជាមួយបងប្អូនកម្មករនិយោជិតវិស័យកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរដែលទទួលបានប្រាក់ឈ្នួលអប្បបរមាថ្មីសម្រាប់ ឆ្នាំ២០២៤ គឺ២០៤ដុល្លារអាមេរិក ក្នុង ១ខែ។ ទន្ទឹមនឹងការអបអរសាទរដល់បងប្អូនកម្មករនិយោជិត ខ្ញុំសូមអំពាវនាវដល់ម្ចាស់ផ្ទះជួលទាំងអស់ សូមរក្សាថ្លៃជួលដើម្បីរក្សានូវប្រភពចំណូលរបស់ខ្លួនឯងផង ជួយដល់បងប្អូនកម្មករនិយោជិតផង និងជួយរួមចំណែកដល់ការអនុវត្តច្បាប់ស្តីពីភិតិសន្យាពិសេសដែលនៅជាធរមានផង»។
នៅថ្ងៃទី២៨ ខែកញ្ញា ឆ្នាំ២០២៣នេះ រាជរដ្ឋាភិបាលកម្ពុជា ក៏ទើបនឹងសម្រេចដំឡើងប្រាក់ឈ្នួលអប្បបរមាជូនកម្មករ និយោជិតក្នុងវិស័យកាត់ដេរ៤ដុល្លារថែមទៀត ធ្វើឱ្យប្រាក់ឈ្នួលអប្បបរមារបស់កម្មករ និយោជិតនៅឆ្នាំ២០២៤ឡើងដល់ ២០៤ដុល្លារ។ ៤ដុល្លារដែលដំឡើងនេះ ២ដុល្លារ ជាការព្រមព្រៀងរវាងភាគីថៅ និងកម្មករ និយោជិត ហើយ ២ដុល្លារទៀត ជាការបន្ថែមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ប្រាក់ឈ្នួលកម្មករនិយោជិតសម្រាប់ឆ្នាំ២០២៤ ត្រូវបានដំឡើងចំនួន៤ដុល្លារអាម៉េរិក ក្នុងនោះ២ដុល្លារបានពីការពិភាក្សារបស់ក្រុមប្រឹក្សាជាតិប្រាក់ឈ្នួលអប្បបរមា (តាមរយៈការបោះឆ្នោត) និងត្រូវបានសម្ដេចមហាបវរធិបតី ហ៊ុន ម៉ាណែត សម្រេចផ្ដល់ជូនចំនួន២ដុល្លារថែមទៀត។ បានន័យថា ប្រាក់ឈ្នួលអប្បបរមារបស់កម្មករនិយោជិតសម្រាប់ឆ្នាំ២០២៤ នឹងកើនដល់២០៤ដុល្លារក្នុងមួយខែ ហើយនឹងចាប់ផ្ដើមអនុវត្តពីថ្ងៃទី១ ខែមករា ឆ្នាំ២០២៤តទៅ។
លោក ហេង សួរ រដ្ឋមន្ត្រីក្រសួងការងារ និងជាតំណាងភាគីរាជរដ្ឋាភិបាល បានបញ្ជាក់ថា ចំនួន២០៤ដុល្លារអាម៉េរិកនេះ ប្រសិនបើបូកទាំងប្រាក់អត្ថប្រយោជន៍ផ្សេងៗ កម្មករនិយោជិតនឹងទទួលបានជាមធ្យមចាប់ពី ២២១ដុល្លារឡើងទៅ។លោក គឹម ចាន់សំណាង តំណាងភាគីកម្មករ និយោជិត បានថ្លែងថា ភាគីកម្មករនិយោជិតមានការពេញចិត្តចំពោះប្រាក់ឈ្នួលអប្បបរមាចំនួន២០៤ដុល្លារនេះ។ លោកថា «ការដំឡើងប្រាក់ឈ្នួលនេះ គឺចង់តែបានច្រើនជូនកម្មករនិយោជិតនោះទេ ប៉ុន្តែយើងក៏ត្រូវពិនិត្យលើការប្រកួតប្រជែងជាមួយប្រទេសដៃគូនាំចេញដូចគ្នា ព្រោះបើយើងនាំគ្នាទាមទារដំឡើងប្រាក់ឈ្នួលខ្ពស់ពេក អាចប៉ះពាល់ដល់ការប្រកួតប្រជែងរបស់កម្ពុជា»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជាវិញ បានបង្ហោះសារលើទំព័រហ្វេសប៊ុកដែរថា ប្រាក់ឈ្នួលអប្បបរមាសម្រាប់វិស័យកាត់ដេរ ស្បែកជើង និងផលិតផលធ្វើដំណើរសម្រាប់ឆ្នាំ២០២៤ គឺ២០៤ដុល្លារ ខណៈអតិផរណាកើនឡើង២.៥ភាគរយ ដែលមិនអាចឆ្លើយតបទៅនឹងការចំណាយសម្រាប់ការរស់នៅរបស់កម្មករបានទេ។ភាគីកម្មករ និយោជិតក៏បានលើកឡើងសំណូមពរចំនួន១៥ចំណុច ក្នុងនោះពាក់ព័ន្ធនឹងការតបណ្ដាញទឹកស្អាត និងអគ្គិសនី គឺនៅមិនទាន់គ្រប់ទីតាំងស្នាក់នៅរបស់កម្មករនិយោជិតនៅឡើយ ព្រមទាំងស្នើឱ្យមានការកំណត់តម្លៃសមរម្យ ដែលអាចជួយកាត់បន្ថយការចំណាយរបស់កម្មករនិយោជិត។
លោក ណាង សុធី តំណាងភាគីនិយោជក (ថៅកែ) បានឱ្យដឹងថា ការដំឡើងប្រាក់ឈ្នួលនេះ ក៏មានការប៉ះពាល់ខ្លះៗដែរ ដូចជាការកើនថ្លៃដើមរបស់ផលិតផលនីមួយៗ ប៉ុន្តែក៏ទទួលបានការសម្របសម្រួលលើការបន្ថយថ្លៃភស្ដុភាកម្មពីសំណាក់រាជរដ្ឋាភិបាលរួចហើយ។លោក ណាង សុធី បានបន្តថា «ការបញ្ជាទិញពីកម្ពុជានៅឆ្នាំ២០២៣ គឺមានការថយចុះក្នុងអត្រា ១៩ភាគរយ បើធៀបនឹងឆ្នាំ២០២២ ខណៈទីផ្សារធំៗសម្រាប់កម្ពុជា មានដូចជាទីផ្សារអឺរ៉ុប សហរដ្ឋអាម៉េរិក និងជប៉ុន»។
លោករដ្ឋមន្ត្រី ហេង សួរ បានបញ្ជាក់ដែរថា «ក្រសួងនឹងធ្វើការជាមួយតួអង្គពាក់ព័ន្ធ ធ្វើយ៉ាងណាជួយកាត់បន្ថយការចំណាយរបស់កម្មករនិយោជិត និងធ្វើការជាមួយអាជ្ញាធរមូលដ្ឋាន ដើម្បីទប់ស្កាត់ការឡើងថ្លៃផ្ទះជួលថ្លៃហួសពេក ដើម្បីធានាប្រាក់ឈ្នួលដែលត្រូវបានដំឡើងនេះគឺនឹងនៅសល់ កុំឱ្យឡើងហើយតែត្រូវយកទៅចំណាយអស់»។ទោះបីយ៉ាងណាបើយោងតាមរបាយការណ៍ពីអង្គការអន្តរជាតិផ្នែកខាងការងារ បានរកឃើញថា កម្ពុជាជាប្រទេសមានប្រាក់ឈ្នួលក្នុងវិស័យកាត់ដេរខ្ពស់ជាងប្រទេសចំនួន៥ផ្សេងទៀតនៅក្នុងតំបន់។
ក្នុងឆ្នាំ២០២៣ នៅកម្ពុជា កម្មករ និយោជិតទទួលបានប្រាក់ឈ្នួលមធ្យមពី ២១៧ដុល្លារ ទៅ២៥៩ដុល្លារក្នុងមួយខែ ដោយមិនទាន់គិតពីប្រាក់ថែមម៉ោង និងប្រាក់អត្ថប្រយោជន៍ផ្សេងៗ រួមទាំងអត្ថប្រយោជន៍ពីបេឡេជាតិរបបសន្តិសុខសង្គម។ ប្រាក់ឈ្នួលនេះ គឺខ្ពស់ជាងប្រទេសវៀតណាម, ស្រីលង្ការ, បង់ក្លាដែស, ឡាវ និងមីយ៉ាន់ម៉ា។របាយការណ៍ពីអង្គការផ្នែកការងារ បានបង្ហាញថា ឆ្នាំ២០២៣ប្រទេសវៀតណាម មានប្រាក់ឈ្នួលចន្លោះពី ១៣៨ដុល្លារ ទៅ១៩៨ដុល្លារ, ប្រទេសស្រីលង្ការ ៣៩ដុល្លារ, ប្រទេសបង់ក្លាដែស ៧៤ដុល្លារ, ប្រទេសឡាវ ៧៥ដុល្លារ និងប្រទេសមីយ៉ាន់ម៉ា ៦៩ដុល្លារ។សូមបញ្ជាក់ថា បច្ចុប្បន្ននេះ កម្ពុជា មានរោងចក្រ សហគ្រាសក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូបមានចំនួន១,៣៣២ និងមានកម្មករ និយោជិតប្រមាណ ៨៤ម៉ឺននាក់ ផ្តល់ចំណូលប្រចាំឆ្នាំជិត ៣ពាន់លានដុល្លារ៕
