ធនាគាជាតិជម្រុញការប្រើប្រាក់យន់កាត់បន្ថយការប្រើលុយដុល្លារ!
21-September-2026 / សេដ្ឋកិច្ច
ភ្នំពេញ៖ធនាគារជាតិនៃកម្ពុជា (NBC) បានប្រកាសអនុញ្ញាតឲ្យមានការធ្វើចរាចរណ៍ប្រាក់យន់ចិនក្នុងការទូទាត់ពាណិជ្ជកម្មនៅកម្ពុជាដែលជាគោលដៅគឺកាត់បន្ថយការប្រើប្រាក់ដុល្លារ ក្នុងស្រុកខ្មែរផងដែរ។
ក្នុងសន្និសីទសារព័ត៌មានមួយកាលពីព្រឹកថ្ងៃទី៣០ តុលា លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា បញ្ជាក់ថា ៖« រាល់ការទូទាត់ពាណិជ្ជកម្មរវាងកម្ពុជា និងចិន យើងទទួល និងលើកទឹកចិត្តដល់ពាណិជ្ជករកម្ពុជាទូទាត់ឱ្យចិនជាលុយយន់ ហើយយើងក៏ចង់ឱ្យខាងចិនទូទាត់ឱ្យពាណិជ្ជករខ្មែរជាលុយរៀលដែរ » ។
បើតាមលោកជំទាវអគ្គនាយក ៖« នេះជាយុទ្ធសាស្ត្រមួយរបស់ធនគារជាតិនៃកម្ពុជាដែលបានដើរតាមគន្លងនិន្នាការអន្តរជាតិ ហើយយើងកំពុងតែជំរុញការប្រើប្រាស់ប្រាក់រៀលដោយប្រយោល»។
លោកជំទាវជា សិរីដែលជាបុត្រីទេសាភិបាលធនាគាជាតិ និយាយការពារថា ៖« ការជំរុញការទូទាត់រូបិយប័ណ្ណចិនក្នុងផ្នែកពាណិជ្ជកម្មនេះមិនមែនមានន័យថា យើងជំរុញឱ្យគេ[ចិន] ដឹកក្រដាសលុយយន់មកប្រើនៅក្នុងប្រទេសកម្ពុជានោះទេ ។ កិច្ចសហការនេះ ខាងធនាគារជាតិនៃកម្ពុជាក៏មិនមែនធ្វើជាមួយភាគចិនដែរ ដោយបច្ចុប្បន្ននេះ នៅក្នុងតំបន់អាស៊ានគេចង់ជំរុញការទូទាត់លុយរូបិយវត្ថុជាតិរៀងៗខ្លួនជាមួយប្រទេសនៅក្នុងតំបន់ ដោយសារប្រទេសក្នុងតំបន់អាស៊ាន មិនចង់ពឹងផ្នែកខ្លាំងតែទៅលើលុយដុល្លារ អឺរ៉ូ ឬលុយផោននោះទេ »។
លោកជំទាវថា ៖« ការធ្វើទូទាត់ពាណិជ្ជកម្មជារូបិយវត្ថុជាតិរៀងខ្លួនៗនេះ គឺជាការឱ្យតម្លៃទៅលើរូបិយវត្ថុជាតិរបស់ខ្លួន និងមិនរំពឹងទៅលើលុយប្រទេសផ្សេងច្រើនពេកខ្លាចនៅពេលលុយប្រទេសទាំងនោះមានបញ្ហាវាអាចធ្វើឱ្យប៉ះពាល់។ ដូចនេះត្រូវតែកាត់បន្ថយការប្រើប្រាស់លុយដុល្លារ ហើយជំរុញការទូទាត់លុយដែលជារូបិយវត្ថុជាតិរៀងខ្លួនៗ »។
ទេសាភិបាលរងធនាគារជាតិនៃកម្ពុជា លោក ស៊ុំ សន្និសីទ បានមានប្រសាសន៍ក្នុងវេទិកាមួយទាក់ទងនឹងការប្រើប្រាស់ប្រាក់យន់កាលពីពេលថ្មីៗនេះថា កន្លងមកធនាគារជាតិនៃកម្ពុជាបានអនុញ្ញាតឲ្យធនាគារចំនួន២ ធ្វើជាធនាគារផាត់ទាត់ប្រាក់យន់ គឺធនាគារBOC និងធនាគារICBC និងធនាគារពាណិជ្ជ ចំនួន១៣ផ្សេងទៀត ធ្វើប្រតិបត្តិការប្រាក់យន់ ។
លោក ស៊ុំ សន្និសីទ បានគាំទ្រការប្រើប្រាស់ប្រាក់យន់នៅកម្ពុជា តាមរយៈប្រព័ន្ឋធនាគារ ដើម្បីសម្រួលពាណិជ្ជកម្មទ្វេភាគី ការវិនិយោគ និងទេសចរណ៍ជាដើម ។
លោក អ៊ិន ចាន់នីនាយកប្រតិបត្តិធនាគារអេស៊ីលីដា បានគាំទ្រការប្រើប្រាស់ប្រាក់យន់នៅកម្ពុជា។លោកបានថ្លែងថា កន្លងមកធនាគារជាតិនៃកម្ពុជា មិនដែលបានហាមឃាត់ការចរាចរ ឬការទូទាត់ប្រាក់យន់នៅកម្ពុជានោះទេ ហេតុនេះ ការចរាចរប្រាក់យន់ មិនមែនជារឿងថ្មីនោះឡើយ ។ ផ្ទុយទៅវិញការដាក់ឲ្យចរាចរប្រាក់យន់កាន់តែទូលំទូលាយ វាផ្តល់នូវផលចំណេញ និងជម្រើសកាន់តែសម្បូរបែបក្នុងការទូទាត់ពាណិជ្ជកម្មនានា ។ ៖« ពីមុនការធ្វើពាណិជ្ជកម្មកម្ពុជា-ចិន ប្រើប្រាស់ជាប្រាក់ដុល្លារ តែពេលនេះអាចប្រើប្រាស់ប្រាក់យន់បានហើយ»។ លោកថា ៖« ការចាយប្រាក់យន់ដើម្បីទិញទំនិញប្រើប្រាស់ ក៏មិនមានការហាមឃាត់ដែរ មានន័យថា អ្នកកាន់ប្រាក់យន់អាចទិញកាហ្វេ និងបង់ប្រាក់សណ្ឋាគារជាដើម »។មានការកត់សម្គាល់ថាក្រៅពីភ្ញៀវទេសចរណ៍ចិនរាប់សែននាក់បានចូលលេងស្រុកខ្មែរវាក៏មានវិនិយោគិនចិនរាប់ពាន់នាក់មករកស៊ីស្រុកខ្មែរចាយលុយរាប់ពាន់លានយន័វាក៏មានកម្មករចិនជាច្រើនផងដែរ។
សូមបញ្ជាក់ដែរថាដោយសារការធ្វើសង្គ្រាមពាណិជ្ជកម្មជាមួយអាមេរិកបានធ្វើឲ្យប្រាក់យន់ចិនមានការធ្លាក់ចុះតម្លៃប្រៀបទាបជាមួយប្រាកដុល្លារអាមេរិកចាប់ពីខែឧសភាកន្លងមកគឺរហូតដល់៦,៩៦ក្នុង១ដុល្លារអាមេរិក។នេះបើតាមសារពតិមានបារាំងអាអែហ្វប៉េ(AFP)បានឲ្យដឹង។ប៉ុន្តែអាជ្ញាធរទីក្រុងប៉េកាំងនឹងទប់ស្គាត់ការចុះថ្លៃបន្តទៀត។ចិនបាននិងកំពុងរកវិធីទប់ថ្វើឲ្យទីផ្សារមានស្ថិរភាព៕
