កម្ពុជាត្រូវបានដកចេញពីប្រទេសប្រផេះរឿងលាងលុយសម្តេចសខេងនឹងធ្វើការបូកសរុបរកចំណុចខ្លាំងខ្សោយ!
27-March-2024 / សេដ្ឋកិច្ច
ព្រៃវែង៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លើកឡើងថាការដកកម្ពុជាចេញពីបញ្ជីប្រផេះពាក់ព័ន្ធនឹងការលាងលុយ កខ្វក់គឺជោគជ័យមួយទៀតបន្ទាប់ពីជោគជ័យដែលកម្ពុជាធ្វើជាម្ចាស់ផ្ទះលើកិច្ចប្រជុំកំពូលអាស៊ាននិងកិច្ចប្រជុំអាយប៉ា។
ករណីយ៍នេះសម្តេចក្រឡាហោមបានឲ្យដឹងនៅព្រឹកថ្ងៃទី២៥ ខែកុម្ភ: ឆ្នាំ២០២៣ ខណ:អញ្ជើញជាអធិបតីភាពក្នុងពិធីប្រារព្ធខួប ៣០ ឆ្នាំនៃការបង្កើតសាកលវិទ្យាល័យជាតិជាស៊ីមកំចាយមារ និងពិធី បញ្ចុះបឋមសិលាសាងសង់អគារវិទ្យាស្ថានអភិវឌ្ឍន៍សហគ្រិនភាព និងបណ្ដុះបណ្ដាល ធុរកិច្ចនៃមជ្ឈមណ្ឌលជាតិអប់រំ និងបណ្ដុះបណ្តាល ជា ស៊ីម កំចាយមារ ខេត្តព្រៃវែងថាកម្ពុជាកំពុងតែធ្វើការបូកសរុបបទពិសោធ និងដាក់ចេញនូវវិធានការដើម្បីការពារការសម្រេចចិត្តដែលពាក់ព័ន្ធអំពើលាងលុយកខ្វក់ ក្រុមការងារហិរញ្ញវត្ថុ ហៅកាត់ថា (FATF) មានមូលដ្ឋាននៅទីក្រុងប៉ារីស។
សូមបញ្ជាក់ថាអង្គការឃ្លាំមើលការលាងលុយ និងឧក្រិដ្ឋកម្មហិរញ្ញវត្ថុអន្តរជាតិ(FATF) ដែលមានមូលដ្ឋាននៅទីក្រុងប៉ារីស បានប្រកាសដកប្រទេសកម្ពុជាចេញពី បញ្ជីប្រផេះ នៃក្រុមប្រទេសដែលមានហានិភ័យខាងលាងលុយកខ្វក់ ជាផ្លូវការ នៅល្ងាចថ្ងៃទី២៤ ខែកុម្ភៈ ឆ្នាំ២០២៣។ អង្គការនេះបានដាក់កម្ពុជាឲ្យស្ថិតក្នុង បញ្ជីប្រផេះ នៃក្រុមប្រទេសដែលមានហានិភ័យខាងលាងលុយកខ្វក់ រយៈពេល៤ឆ្នាំជាប់ៗគ្នា ចាប់តាំងពីឆ្នាំ២០១៩ មក។
នៅក្នុងសេចក្តីប្រកាស បានបញ្ជាក់ថា យុត្តាធិការក្រោមការបង្កើនការត្រួតពិនិត្យ កំពុងដំណើរការយ៉ាងសកម្មជាមួយ FATF ដើម្បីដោះស្រាយការខ្វះខាតខាងយុទ្ធសាស្ត្រ នៅក្នុងរដ្ឋាភិបាលរបស់ពួកគេ ក្នុងការប្រយុទ្ធប្រឆាំងនឹងការលាងលុយ ហិរញ្ញប្បទានភេរវកម្ម និងហិរញ្ញប្បទានដែលចូលរួមចំណែកដល់ការរីកសាយអាវុធនុយក្លេអ៊ែរ។ ប្រទេសថ្មីៗដែលស្ថិតនៅក្រោមកម្មវត្ថុនៃការបង្កើនការត្រួតពិនិត្យ រួមមានអាហ្វ្រិកខាងត្បូង និងនីហ្សេរីយ៉ា។ ប្រទេសម៉ារ៉ុក និងកម្ពុជា លែងជាកម្មវត្ថុនៃការត្រួតពិនិត្យបន្ថែមទៀតដោយ FATF ទៀតហើយ។
ការសម្រេចដកកម្ពុជាចេញពី បញ្ជីប្រផេះ នៃក្រុមប្រទេសដែលមានហានិភ័យខាងលាងលុយកខ្វក់នេះ បានធ្វើឡើងនៅក្នុងមហាសន្និបាត FATF នៅថ្ងៃទី២៤ ខែកុម្ភៈ ឆ្នាំ២០២៣ នៅទីក្រុងប៉ារីស ប្រទេសបារាំង និងត្រូវបានរៀបចំសន្និសីទកាសែតប្រកាសជាផ្លូវការ នៅម៉ោង១០យប់ ម៉ោងនៅប្រទេសកម្ពុជា។ ការប្រកាសដកចេញពីបញ្ជីប្រផេះជាផ្លូវការនេះ បានធ្វើឡើងបន្ទាប់ពីមានសេចក្តីសម្រេចចិត្តរបស់ក្រុមការងារ ICRG របស់ FATF ក្នុងការដកកម្ពុជាពីបញ្ជីប្រផេះ នាថ្ងៃទី២០ ខែកុម្ភៈ ឆ្នាំ២០២៣។
ក្នុងកិច្ចប្រជុំ ICRG នាថ្ងៃទី២០ ខែកុម្ភៈ ឆ្នាំ២០២២ មិនមានសមាជិកណាជំទាស់ការដកកម្ពុជាចេញពីបញ្ជីប្រផេះនោះទេ។ ផ្ទុយទៅវិញកម្ពុជាទទួលបានការគាំទ្រពីសមាជិករបស់ FATF ចំនួន១៨ រួមមានស្ថាប័នអន្តរជាតិ២គឺ APG និង EU Commission និងប្រទេសសមាជិកចំនួន១៦ទៀត ដូចជា អូស្ត្រាលី ដាណឺម៉ាក ហ្វាំងឡង់ ឥណ្ឌា អាមេរិក អាល្លឺម៉ង់ ចិន រុស្ស៉ី អ៉ីតាលី ជប៉ុន ម៉ាឡេស៊ី នូវែលហ្សេឡង់ ព័រទុយហ្កាល់ អង់គ្លេស កូរ៉េខាងត្បូង និងសិង្ហបុរីជាដើម។សូមបញ្ជាក់ថាក្នុងឱកាសទទយលជួបប្រតិភូFATFកាលពីពេលថ្មីៗនេះសម្តេចសខេងបានអះអាងពីការប្តេជ្ញាចិត្តរបសរាជរដ្ឋាភិបាលក្នុងទប់ស្កាត់និងប្រឆាំងសកម្មភាពលាងលុយកខ្វក់នៅកម្ពុជា៕
