ក្នុងពេលដែលណាតូជម្រុញការផ្តលអាវុធលោក ហ្សេលេនស្គីថា៖រុស្ស៉ីត្រូវតែបញ្ឈប់សង្គ្រាម ទើបពិភពលោកអាចដោះស្រាយវិបត្តិសកលផ្សេងៗទៀត
02-November-2023 / ព័ត៌មានអន្តរជាតិ
ញូវយ៉ក៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានទទូចឱ្យមេដឹកនាំពិភពលោកទាំងអស់ដែលកំពុងជួបជុំគ្នា នៅឯមហាសន្និបាតអង្គការសហប្រជាជាតិ(ក្នុងទីក្រុងញូវយ៉ក) ឱ្យរួបរួមគ្នាប្រឆាំងនឹងសង្គ្រាមឈ្លានពានរបស់រុស្ស៉ី ហើយថារុស្ស៉ីត្រូវតែបញ្ឈប់សង្គ្រាម ទើបពិភពលោកអាចផ្ដោតអារម្មណ៍ដោះស្រាយលើបញ្ហានានាដែលពិភពលោកកំពុងប្រឈម។
ទីភ្នាក់ងារសារព័ត៌មាន AFP នៅថ្ងៃពុធ ទី២០ ខែកញ្ញា ឆ្នាំ២០២៣បានផ្សាយឲ្យដឹងថា៖លោក ហ្សេលេនស្គី ទទួលបានការអបអរសាទរយ៉ាងខ្លាំង នៅពេលឡើងថ្លែងសុន្ទរកថានៅឯមហាសន្និបាត UN ក្នុងទីក្រុងញូវយ៉ក ដែលជាការបង្ហាញខ្លួនដោយផ្ទាល់ជាលើកដំបូងចាប់តាំងពីរុស្ស៉ីឈ្លានពានប្រទេសរបស់លោកកាលពីខែកុម្ភៈ ឆ្នាំ២០២២មក។លោក ហ្សេលេនស្គី បានគូសបញ្ជាក់ក្នុងសន្តរកថាថា «អ៊ុយក្រែនកំពុងធ្វើអ្វីៗគ្រប់យ៉ាង ដើម្បី ធានាឱ្យបានថា នៅបន្ទាប់ពីការឈ្លានពានរបស់រុស្ស៉ី វានឹងមិនមានប្រទេសណាមួយផ្សេងនៅលើពិភពលោកហ៊ានវាយប្រហារលើ ប្រទេសដទៃទៀតនោះទេ...យើងត្រូវតែបញ្ឈប់សង្គ្រាមឈ្លានពានរបស់រុស្ស៉ី។ យើងត្រូវតែរួមគ្នាធ្វើសកម្មភាពដើម្បីបំបាក់ ជនឈ្លានពាន ដើម្បីងាកទៅផ្តោតអារម្មណ៍លើសមត្ថភាព និងថាមពលរបស់យើង ដើម្បីដោះស្រាយបញ្ហាប្រឈមទាំងឡាយ»។
អគ្គលេខាធិការអង្គការណាតូ (NATO) លោក ជេនស៍ ស្តូលធិនបឺគ (Jens Stoltenberg) ដែលចូលរួមមហាសន្និបាតអង្គការសហប្រជាជាតិដែរបាននិយាយនៅថ្ងៃអង្គារ នេះផងដែរថា អ៊ុយក្រែន ត្រូវការជាបន្ទាន់នូវប្រព័ន្ធការពារដែនអាកាស រួមទាំងគ្រាប់រំសេវ គ្រឿងបន្លាស់ និងការថែទាំសម្រាប់ប្រព័ន្ធការពារដែលយោធាអ៊ុយក្រែន មានរួចហើយ។ ទីភ្នាក់ងារសារព័ត៌មាន AFP នៅថ្ងៃពុធ ទី២០ ខែកញ្ញា ឆ្នាំ២០២៣ផ្សាយថា៖លោក ស្តូលធិនបឺគ បាននិយាយថា សង្គ្រាមដែលឥឡូវនេះឈានចូលដល់ឆ្នាំទី២ គឺជាសង្គ្រាមនៃការបំផ្លិចបំផ្លាញ ប៉ុន្តែក្នុងប្រតិបត្តិការវាយបក ចាប់តាំងពីខែមិថុនាមក អ៊ុយក្រែនបានដណ្តើមយកមកវិញនូវទឹកដីខ្លះដែលរុស្ស៉ីកាន់កាប់។
លោក ស្តូលធិនបឺគ បានបញ្ជាក់ដូច្នេះថា «ប្រសិនបើយើងចង់បញ្ចប់សង្គ្រាម ប្រសិនបើយើងចង់បានសន្តិភាព នោះការបន្តគាំទ្រផ្នែកយោធាអ៊ុយក្រែន គឺជាវិធីដ៏ត្រឹមត្រូវ។ អ៊ុយក្រែន មិនត្រឹមតែត្រូវការប្រព័ន្ធការពារដែនអាកាសថ្មីនោះទេ តែក៏ត្រូវការការថែទាំប្រព័ន្ធការពារដែលមានស្រាប់ រួមទាំងគ្រាប់រំសេវ និងគ្រឿងបន្លាស់ថែមទៀត។ យើងឃើញថាប្រព័ន្ធការពារដែនអាកាសកំពុងជួយសង្គ្រោះជីវិតមនុស្សជារៀងរាល់ថ្ងៃនៅអ៊ុយក្រែន»។ការអត្ថាធិប្បាយលោក ស្តូលធិនបឺគ ធ្វើឡើងបន្ទាប់ពីមន្ត្រីជាន់ខ្ពស់ក្រសួងការបរទេសអាមេរិកនិយាយថា ការពង្រឹងការការពារដែនអាកាស របស់អ៊ុយក្រែន គឺជាគន្លឹះសំខាន់នៅពេលផុតរដូវរងារ។
គួរបញ្ជាក់ថា នៅថ្ងៃអង្គារក្នុងសប្ដាហ៍នេះដែរ ក្រុមមន្ត្រីអ៊ុយក្រែនបាននិយាយថាមនុស្ស ៩នាក់ត្រូវបានសម្លាប់នៅក្នុងការវាយប្រហារ ពីសំណាក់កងកម្លាំងរុស្ស៉ី ក្នុងនោះរួមមានទាំងការវាយប្រហារដោយយន្ដហោះដ្រូនលើឃ្លាំងឧស្សាហកម្មមួយផងដែរ៕យោងតាមប្រភពយោធាអ៊ុយក្រែនបានបញ្ជាក់ឱ្យដឹងទៀតថា យន្តហោះគ្មានមនុស្សបើកបានមកពីភាគខាងត្បូងដោយមានការវាយប្រហារជាច្រើន។ កត្តានេះធ្វើឱ្យកម្លាំងការពារដែនអាកាសអ៊ុយក្រែនផ្ទុកលើសទម្ងន់។ ការវាយប្រហាររួមគ្នាដ៏ធំបានចាប់ផ្តើមនៅល្ងាចថ្ងៃទី18 ខែកញ្ញា។
គោលដៅដំបូងដែលត្រូវបានវាយប្រហារគឺ Krivoy Rog, Kharkiv និង Slavyansk ។អភិបាលក្រុង Kharkiv បានបញ្ជាក់ថា ទីក្រុងនេះ “ត្រូវបានវាយប្រហារម្តងទៀតដោយមីស៊ីលរុស្ស៊ី។ តាមព័ត៌មានបឋម តំបន់កណ្តាលក្រុងត្រូវបានគេវាយប្រហារ»។ ប្រភពក្នុងស្រុកក៏បានបញ្ជាក់ផងដែរថា កាំជ្រួចរបស់រុស្ស៊ីបានវាយប្រហារគោលដៅនៅក្នុងស្រុក Kholodnogorsk ។ រោងចក្រពាសដែកដែលប្រើសម្រាប់ជួសជុល និងរថពាសដែករបស់កងកម្លាំងប្រដាប់អាវុធអ៊ុយក្រែន មានទីតាំងនៅទីនោះ។ កងកម្លាំងរុស្ស៊ីបានវាយប្រហារទីតាំងនេះចំនួនពីរដងក្នុងសប្តាហ៍មុន។ កងកម្លាំងសន្តិសុខអ៊ុយក្រែនបានរាយការណ៍ពីការគំរាមកំហែងនៃការវាយប្រហារមីស៊ីលផ្លោងនៅក្នុងតំបន់ Poltava, Kharkiv, Kirovograd, Dnepropetrovsk, Zaporozhye, តំបន់ Donetsk ។ ក្នុងពេលជាមួយគ្នានេះ ព័ត៌មានអំពីយន្តហោះគ្មានមនុស្សបើក Geranium ឆ្លងកាត់សមុទ្រ Azov ត្រូវបានផ្សព្វផ្សាយតាមអុីនធឺណិត។
ទាក់ទងនិងបណ្ហាផ្តលអាវុធនេះដែររដ្ឋមន្ត្រីការពារជាតិអាម៉េរិក លោក ឡយ អូស្ទីន បាននិយាយប្រាប់រដ្ឋមន្ត្រីការពារជាតិ៥០ប្រទេសផ្សេងទៀតកាលពីថ្ងៃអង្គារថា រថក្រោះប្រយុទ្ធ Abrams ដែលផលិតដោយសហរដ្ឋអាម៉េរិក នឹងមកដល់អ៊ុយក្រែនក្នុងពេលឆាប់ៗនេះ ដោយទីបំផុតនឹងនាំយកអាវុធថ្មីដ៏មានអានុភាពទៅកាន់សមរភូមិក្នុងគោលបំណងជួយអ៊ុយក្រែនរុលឆ្ពោះទៅមុខក្នុងការវាយលុកដ៏យឺតរបស់ខ្លួនប្រឆាំងនឹងរុស្ស៊ី។ថ្លែងទៅកាន់រដ្ឋមន្ត្រីការពារជាតិនិងមន្ត្រីកំពូលផ្សេងទៀតចំនួន៥០ នាក់ ដែលបានជួបប្រជុំគ្នានៅទីក្រុងរ៉ាមស្តេន (Ramstein) ប្រទេសអាល្លឺម៉ង់សម្រាប់កិច្ចប្រជុំលើកទី ១៥ នៃអ្វីដែលគេហៅថាក្រុមកិច្ចសន្យាការពារអ៊ុយក្រែន លោកអូស្ទីនក៏បានបញ្ជាក់ជាថ្មីថា សហរដ្ឋអាម៉េរិកនឹងហ្វឹកហ្វឺនអ្នកបើកយន្តហោះរបស់អ៊ុយក្រែនឱ្យចេះបើកយន្តហោះចម្បាំង F-16 ហើយបានជំរុញសម្ពន្ធមិត្តធ្វើចំណាត់ការលឿនជាងមុន ដើម្បីផ្តល់ខែលការពារដែនអាកាស និងផលិតគ្រាប់រំសេវ ដែលកងកម្លាំងអ៊ុយក្រែនត្រូវការយ៉ាងខ្លាំងនៅសមរភូមិ។
លោកអូស្ទីនបាននិយាយថា តម្រូវការសំខាន់របស់អ៊ុយក្រែននៅពេលនេះ គឺខែលការពារដែនអាកាស គ្រាប់រំសេវ គ្រាប់កាំភ្លើងធំ ១៥៥ មិល្លីម៉ែត្រ និងពាសដែកមេកានិច ហើយលោកបានស្នើឱ្យក្រុមទំនាក់ទំនងនេះ “ប្រឹងប្រែងឱ្យបានខ្លាំង”។បើតាម ការប៉ាន់ស្មានរបស់អង់គ្លេសថា ការវាយប្រហាររបស់រុស្ស៊ីលើកំពង់ផែនិងឃ្លាំងស្តុកទុករបស់អ៊ុយក្រែនរហូតមកដល់ពេលនេះបានបំផ្លាញគ្រាប់ធញ្ញជាតិចំនួន ២៨០.០០០ តោន ដែលលោកអូស្ទីននិយាយថាវាគ្រប់គ្រាន់សម្រាប់ចិញ្ចឹមមនុស្ស ១០,៥ លាននាក់សម្រាប់រយៈពេលមួយឆ្នាំ។អ៊ុយក្រែនបានទន្ទឹងរង់ចាំ ចំពោះការមកដល់នៃរថក្រោះ M1 Abrams ចាប់តាំងពីរដ្ឋបាលបៃដិនបានយល់ព្រមក្នុងខែមករាក្នុងការបរិច្ចាគវា ៣១ គ្រឿង ជាពិសេសនៅពេលដែលកងកម្លាំងរបស់អ៊ុយក្រែនចាប់ផ្តើមវាយលុកតំបន់ដែលមានចម្ការមីននិងឧបសគ្គផ្សេងៗទៀត។លោកអូស្ទីនបាននិយាយតែថា ពួកវានឹង “ចូលដល់អ៊ុយក្រែនក្នុងពេលឆាប់ៗនេះ” ដែលស្របជាមួយការប៉ាន់ស្មានរបស់មន្ទីរបញ្ចកោណថា ពួកវានឹងទៅដល់នៅរដូវស្លឹកឈើជ្រុះ៕
