អគ្គលេខាធិកាណាតូទៅដល់ក្រុងគៀវបន្ទាប់ពីអាវុធជំនួយទៅដល់ផងដែរ
03-April-2024 / ព័ត៌មានអន្តរជាតិ
អ៊ុយក្រេន៖ ប្រព័ន្ធផ្សព្វផ្សាយក្នុងស្រុករបស់អ៊ុយក្រែន ព្រមទាំងមន្ត្រីអង្គការណាតូ (NATO) បានឲ្យដឹងថា ប្រមុខអង្គការ NATO លោក ជែន ស្តូលថិនបឺគ (Jens Stoltenberg) បានមកដល់ទីក្រុងកៀវនៅថ្ងៃព្រហស្បតិ៍នេះ ដោយមិនបានប្រកាសឱ្យដឹងជាមុនឡើយ ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២០ ខែមេសា ឆ្នាំ២០២៣។
សារព័ត៌មានអ៊ុយក្រែន Kyiv Independent បានចុះផ្សាយរូបភាពមួយចំនួន បង្ហាញពីសកម្មភាពលោក ស្តូលថិនបឺគ នៅទីក្រុងកៀវ ខណៈមន្ត្រីណាតូម្នាក់ក៏បានបញ្ជាក់ដែរថា លោកអគ្គលេខាធិការណាតូ ពិតជាកំពុងស្ថិតនៅក្នុងប្រទេសអ៊ុយក្រែនមែនហើយព័ត៌មានបន្ថែមនឹងត្រូវបញ្ចេញក្នុងពេលឆាប់ៗ។ សូមបញ្ជាក់ថាក្រុមមន្ត្រីក៏ដូចជាមេដឹកនាំលោកខាងលិចជាច្រើន ដែលបានមកទស្សនកិច្ចនៅអ៊ុយក្រែន គឺមិនបានប្រកាសជាសាធារណៈ ឱ្យដឹងជាមុនអំពីគម្រោងធ្វើដំណើររបស់ពួកគេឡើយ ដោយសារហេតុផលសន្តិសុខ។
គួរបញ្ជាក់ថា វត្តមានរបស់លោក ស្តូលថិនបឺគ នៅអ៊ុយក្រែន នាពេលនេះ គឺកើតមានឡើង ស្របពេលដែលសង្គ្រាមឈ្លានពានរបស់រុស្ស៉ី បានអូសបន្លាយរយៈពេល១៤ខែ ខណៈ NATO ធ្លាប់បានប្តេជ្ញាថានឹងបន្តការគាំទ្រ ដរាបណាអ៊ុយក្រែននៅប្រយុទ្ធតទល់ការឈ្លានពានរបស់រុស្ស៉ី។ ក្នុងខែមេសានេះ លោក ស្តូលថិនបឺគ ក៏បានអញ្ជើញប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ឱ្យចូលរួមកិច្ចប្រជុំកំពូល NATO មួយ នៅខែកក្កដា ខាងមុខ ថែមទៀតផង។វត្តមានលោក ជែន ស្តូលថិនបឺគ (Jens Stoltenberg)បានកើតឡើងបន្ទាប់ពីមានសេចក្តីរាយការណ៍ថាជំនួយអាវុធសំខាន់ៗជាច្រើនបានទៅដល់អ៊ុយក្រែនហើយ។
មន្ទីរបញ្ចកោណបានប្រាប់កម្មវិធី The War Zone របស់វេបសាយ The Drive កាលពីថ្ងៃអង្គារទី១៨មេសាថា រថពាសដែកប្រយុទ្ធ M2 Bradley ដែលបានសន្យាជាមួយអ៊ុយក្រែនក្នុងខែមករា បានទៅដល់ប្រទេសនេះហើយ។លោកវរសេនីយ៍ទោ ឆាលី ឌីត (Charlie Dietz) អ្នកនាំពាក្យមន្ទីរបញ្ចកោណបានប្រាប់ The War Zone ថា “ពិតហើយ យើងអាចបញ្ជាក់បានថា រថពាសដែក Bradleyបានមកដល់ហើយ។ ការបញ្ជាក់ជាផ្លូវការបានកើតឡើងបន្ទាប់ពីក្រសួងការពារជាតិអ៊ុយក្រែនបានបង្ហោះរូបភាព Bradley កាលពីថ្ងៃចន្ទ ដែលលាបពណ៌ប៉ារ៉ាបន្លំរបស់ប្រទេសនេះ”។
សហរដ្ឋអាម៉េរិកបានសន្យាផ្តល់រថពាសដែក Bradleyចំនួន ១១៣ គ្រឿងដល់អ៊ុយក្រែន រួមទាំងកំណែរថពាសដែក M2A2-ODS-SAចំនួន ១០៩ គ្រឿងនិងកំណែរថពាសដែក BFISTចំនួន ៤ គ្រឿង។ក្រៅពីរថក្រោះប្រពន្ធ័ការពារដែនអាកាស Patriotក៏បានទៅដល់ផងដែរ។នេះបើតាម ទំព័រ Twitter របស់ Oleksïi Reznikov រដ្ឋមន្ត្រីការពារជាតិអ៊ុយក្រែន។ លោករដ្ឋមន្ត្រីបានថ្លែងអរគុណផងដែរ ដល់រដ្ឋាភិបាលសហរដ្ឋអាមេរិក អាល្លឺម៉ង់ និងហូឡង់ ដែលបានគោរពការសន្យា ព្រមប្រគល់ប្រព័ន្ធខែលមីស៊ីល Patriot មកឲ្យអ៊ុយក្រែនការពារខ្លួន។
សូមរំលឹកថា ក្នុងពេលទស្សនកិច្ចនៅក្នុងវ៉ាស៊ីនតោន របស់លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី កាលពីពាក់កណ្តាលខែធ្នូ សហរដ្ឋអាមេរិកបានប្រកាសយល់ព្រមប្រគល់ឲ្យអ៊ុយក្រែន
នូវប្រព័ន្ធខែលមីស៊ីល Patriot ដែលជាបច្ចេកវិទ្យាទំនើបបំផុតរបស់ខ្លួន។ ជាកំឡុងពេល ដែលកងទ័ពរុស្ស៊ី បានសំរុក បាញ់ប្លោងមីស៊ីល និងទំលាក់គ្រាប់យ៉ាងដំណំមកលើហេដ្ឋការចនាសម្ព័ន្ធថាមពលរបស់អ៊ុយក្រែន។
លោកហ្សេឡេនស្គី បានថ្លែងអរគុណអាមេរិក នឹងបានអះអាងថាប្រព័ន្ធខែលមីស៊ីល Patriot នេះ គឺអ៊ុយក្រែននឹងយកទៅប្រើដើម្បីតែការពារខ្លួនប៉ុណ្ណោះ ពោលគឺមិនយកទៅវាយប្រហារលើទឹកដីរុស្ស៊ីនោះទេ។ តែភ្លាមៗនោះដែរ លោកពូទីន បានប្រកាសថា រុស្ស៊ីនឹងរកបច្ចេកទេស ឲ្យកាន់តែអស្ចារ្យ ដើម្បីឲ្យមីស៊ីលខ្លួន អាចគេចចេញពីប្រព័ន្ធខែល Patriot។គួរបញ្ជាក់ថា ក្រោយអាមេរិកបើកភ្លើងខៀវ រដ្ឋាភិបាលអាល្លឺម៉ង់វិញ បានប្រកាសនៅថ្ងៃទី៥មករា ប្រគល់ប្រព័ន្ធខែលមីស៊ីល Patriot ១គ្រឿងឲ្យអ៊ុយក្រែន។ ចំណែករដ្ឋាភិបាលហូឡង់ បានប្រកាស នៅថ្ងៃទី២០មករា ប្រគល់ឲ្យអ៊ុយក្រែនចំនួន២គ្រឿង រួមជាមួយគ្រាប់មីស៊ីលដែលប្រើជាមួយប្រព័ន្ធខែលនេះសម្រាប់បាញ់កំទេចមីស៊ីល។
ក្រៅពីគ្រឿងសព្វាវុធខែលមីស៊ីលការពារខ្លួនដ៏ទំនើបនេះ ក្រុមប្រទេសសម្ព័ន្ធមិត្តលោកខាងលិច បានសន្យាជួយជារថពាសដែកជាច្រើនគ្រឿង តួយ៉ាង រថពាសដែកអាល្លឺម៉ង់ Leopard 2 រថពាសដែកអង់គ្លេស Chalenger 2។ ចំណែករថពាសដែកធុនស្រាលរបស់បារាំង AMX-10 ត្រូវបានកងទ័ពអ៊ុយក្រែនប្រកាសនៅថ្ងៃពុធទី១៩មេសា ថាបានចាប់ផ្តើមប្រើប្រាស់ជាផ្លូវការហើយ នៅក្នុងប្រតិបត្តិការប្រមូលព័ត៌មាន និងកំណត់ទីតាំងមូលសាស្ត្រនៅសមរភូមី។ ជំនួយគ្រឿងសព្វាវុធទាំងនេះ ត្រូវបានភាគីរុស្ស៊ីបរិហារថា គឺអូតង់ ដែលមានអាមេរិកជាមេធំ កំពុងតែនាំគ្នាយកដីអ៊ុយក្រែន ដើម្បីធ្វើសង្គ្រាមដោយប្រយោលជាមួយរុស្ស៊ី៕
