ហ្វីលីពីន រកឃើញអ្នកស្នងតំណែងលោក Duterte ហើយ
01-March-2025 / ព័ត៌មានអន្តរជាតិ
ប្រទេសហ្វីលីពីន៖លោក Ferdinand Marcos Jrដែលគេស្គាល់ថាជាកូនអតីតប្រធានាធិបតីផ្តាច់ការលោកហ្វេឌីណង់ម៉ាកូសត្រូវបានប្រកាសជាបណ្តោះអាសន្នថាជាប់ឆ្នោតនាំមុខជាប្រធានាធិបតីថ្មីរបស់ប្រទេសហ្វីលីពីនជំនួសលោកឌុយតឺតេ។ទន្ទឹមនិងការប្រកាសលទ្ធផលនេះក៏មានបាតុកម្មបានបន្តផ្ទុះឡើងនាថ្ងៃទី១០ ខែឧសភា ដោយមានពលរដ្ឋប្រមាណ៤០០នាក់ ភាគច្រើនជាក្រុមនិស្សិតបានប្រមូលផ្តុំគ្នាធ្វើបាតុកម្មនៅខាងមុខគណៈកម្មាធិការរៀបចំការបោះឆ្នោត ដើម្បីប្រឆាំងលទ្ធផលបោះឆ្នោត ហើយជ័យជម្នះបានទៅលើលោក Ferdinand Marcos Jr ។ គណៈកម្មាធិការរៀបចំការបោះឆ្នោតបានបដិសេធពាក្យបណ្តឹងរបស់ក្រុមផ្សេងៗ ក្នុងនោះមានទាំងក្រុមជនរងគ្រោះក្នុងរបបអតីតប្រធានាធិបតី Ferdinand Marcos Sr ផងដែរ។
ក្រុមសកម្មជន Karapatan ក៏បានអំពាវនាវដល់ពលរដ្ឋហ្វីលីពីន បដិសេធការដឹកនាំរបស់លោក Marcos ។ ជាមួយនឹងសន្លឹកឆ្នោតស្របច្បាប់ជិត ៩៤%ដែលបានរាប់រួចរាល់ លោក Marcos ទទួលបានសន្លឹកឆ្នោតគាំទ្រដល់ទៅជិត៣០លានសន្លឹក គឺច្រើនជាងទ្វេដងគូប្រជែងដែលឈរលំដាប់លេខពីរ ។មានពលរដ្ឋហ្វីលីពីន ប្រមាណ៦៧លាននាក់ ក្នុងនោះមានពលរដ្ឋនៅក្រៅប្រទេស ១,៦លាននាក់បានចុះឈ្មោះបោះឆ្នោតប្រធានាធិបតី និងមន្ត្រីក្នុងតំបន់១៨.១៨០រូប ក្នុងនោះមានអនុប្រធានាធិបតី និងតំណាងរាស្ត្រ១២រូប
ប្រទេសហ្វីលីពីនបានចាប់ផ្ដើមដំណើរការបោះឆ្នោតនៅថ្ងៃចន្ទទី៩ឧសភាដើម្បីជ្រើសរើសប្រធានាធិបតីថ្មី ។បើតាមគណៈកម្មការរៀបចំការបោះឆ្នោតហ្វីលីពីនបានឲ្យដឹងថា មានបេក្ខជន ១០ រូបប្រជែងគ្នាដើម្បីជំនួសតំណែងប្រធានាធិបតីលោក Rodrigo Duterte ដែលផុតអាណត្តិ។ក្នុងនោះតាមការស្ទង់មតិបង្ហាញថា អ្នកនាំមុខគឺលោក Ferdinand Marcos Jr. ដែលជាកូនប្រុសច្បងរបស់មេដឹកនាំផ្តាច់ការលោក Ferdinand Marcos ។
អំឡុងពេលយុទ្ធនាការឃោសនាបោះឆ្នោតលោក Marcos Jr បានសន្យារក្សាគោលនយោបាយរបស់រដ្ឋបាលលោក Duterte ដូចជាការធ្វើឲ្យប្រសើរឡើងនូវហេដ្ឋារចនាសម្ព័ន្ធ និងការបង្ក្រាបគ្រឿងញៀនខុសច្បាប់ជាដើម ។ទន្ទឹមនោះលោក Marcos Jr បាននិងកំពុងគាំទ្រយ៉ាងខ្លាំងក្នុងចំណោមអ្នកបោះឆ្នោតក្មេងៗដែលកើតក្រោយរបបផ្តាច់ការរបស់ឪពុកលោក ក្រោយអះអាងតាមបណ្តាញសង្គមថា ឪពុករបស់លោកបានបង្កើនសេដ្ឋកិច្ចតាមរយៈការអភិវឌ្ឍហេដ្ឋារចនាសម្ព័ន្ធ ។
ចំណែកគូប្រជែងដ៏ខ្លាំងក្លាបំផុតរបស់លោក Marcos Jr នោះគឺអនុប្រធានាធិបតីដែលកំពុងកាន់អំណាចលោកស្រី Leni Robredo ខណៈការបោះឆ្នោតស្ទង់មតិចុងក្រោយបំផុតរបស់ Pulse Asia បានបង្ហាញថា លោក Marcos Jr ទទួលបានសំឡេង ៥៦ ភាគរយ លោកស្រី Leni Robredo ទទួលបានសំឡេងត្រឹម ២៤ ភាគរយប៉ុណ្ណោះ ។ក្នុងខណៈដែលប្រជាពលរដ្ឋហ្វីលីពីនរាប់លាននាក់កំពុងចេញទៅបោះឆ្នោត ជនប្រដាប់អាវុធមួយក្រុមបានបើកការបាញ់រះ ទៅលើការិយាល័យបោះឆ្នោតនៅស្រុក Buluan នៃកោះភាគខាងត្បូងហ្វីលីពីន Mindanao ដែលជាជង្រុកក្រុមប្រដាប់អាវុធនិងក្រុមបះបោរកុម្មុយនិស្តអ៊ីស្លាមជ្រុលនិយម។មានភ្នាក់ងារសន្តិសុខបីនាក់ បានស្លាប់ ភ្នាក់ងារសន្តិសុខទីបួន បានរងរបួស ចំណែកបុគ្គលិកក្នុងសាលារៀនដែលជាក្លាយជាការិយាល័យបោះឆ្នោត រត់គេចនិងលាក់ខ្លួនទាន់។ នេះបើសេចក្តីប្រកាសរបស់អ្នកនាំពាក្យប៉ូលិសខេត្តលោក Roldan Kuntong។កាលពីល្ងាចថ្ងៃអាទិត្យទី ៨ឧសភា មានការដាក់គ្រាប់បំផ្ទុះនៅមុខការិយាល័យបោះឆ្នោតមួយទៀត នៅក្នុងស្រុក Datu Unsay នៃកោះ Mindanao ដដែល បណ្តាលឱ្យមនុស្ស៩នាក់រងរបួស។
