សម្តេចតេជោប្រកាសចាកចេញពីតំណែងនៅថ្ងៃទី២២ សីហា ឆ្នាំ២០២៣ ដើម្បីប្រគល់ជូនឯកឧត្តម ហ៊ុន ម៉ាណែតធ្វើជានាយករដ្ឋមន្ត្រីបន្ត!
ភ្នំពេញ៖ បន្ទាប់ពីបានចូលគាល់រាយការណ៍ថ្វាយព្រះមហាក្សត្រនាពេលព្រឹកនៅពេលរសៀលសម្ដេចតេជោ ហ៊ុន សែន ប្រកាសថា នឹងមិនបន្តតំណែងជានាយករដ្ឋមន្ត្រីនោះទេ ហើយលោកបណ្ឌិត ហ៊ុន ម៉ាណែត នឹងក្លាយជានាយករដ្ឋមន្ត្រីនៅថ្ងៃទី២២ ខែសីហា ឆ្នាំ២០២៣ខាងមុខ។
តាមរយៈសេចក្តីថ្លែងការណ៍ជាសាធារណៈនារសៀលថ្ងៃទី២៦កក្កដាសម្តេចតេជោ ហ៊ុន សែន បានមានប្រសាសន៍ពីមូលហេតុថា៖ ប្រសិនបើខ្ញុំបន្តរយៈពេលមួយឆ្នាំ ឬ ពីរឆ្នាំ ទើបចេញពីតំណែង សភាពការណ៍ នឹងមានការអស្ថិរភាពក្នុងមួយរយៈកាល ដូច្នេះ មានការចាំបាច់ណាស់ ដើម្បីឲ្យគណៈរដ្ឋមន្ត្រីថ្មីមួយដែលសុទ្ធតែភាគច្រើនជាមនុស្សវ័យក្មេងទទួលបាន នូវកិច្ចការដែលពួកគេត្រូវទទួលខុសត្រូវសម្រាប់ទៅថ្ងៃអនាគត។”
សម្តេចតេជោ ហ៊ុន សែន បានថ្លែងថា ការលាឈប់ពីតំណែងជានាយករដ្ឋមន្ត្រី គឺជាការលះបង់ដ៏ធំ ដើម្បីធានាសេចក្តីសុខសាន្តរបស់ជាតិ។សម្តេចតេជោ ហ៊ុន សែន បានថ្លែងថា ការលាឈប់នេះ គឺជាការអនុវត្តន៍តាមព្រះរាជគំរូរបស់ព្រះបរមរតនកោដ្ឋ នរោត្តម សីហនុ ក្នុងការផ្ទេរព្រះរាជបល្ល័ង្ក។
សម្រាប់នីតិវិធីសម្តេចតេជោ ហ៊ុន សែន បានបញ្ជាក់ថា “ហ៊ុន ម៉ាណែត ទីមួយ គឺគណបក្សបានតែងតាំងជាបេក្ខជននាយករដ្ឋមន្ត្រីរួចហើយ នឹងត្រូវក្លាយជានាយករដ្ឋមន្ត្រី នៅប៉ុន្មានសប្តាហ៍ខាងមុខ។ ទីពីរ ហ៊ុន ម៉ាណែត ជាអ្នកតំណាងរាស្ត្ររួចស្រេចទៅហើយ។ ពិតមែនតែពេលនេះគេមិនទាន់មានសុពលភាពជាតំណាងរាស្ត្រ ដោយសារតែអ្នកជាប់ឆ្នោតទាំងអស់ មិនទាន់បានកោះប្រជុំដោយព្រះមហាក្សត្រ។ ទីបី ព្រះមហាក្សត្រកាលពីព្រឹកមិញនេះ ក៏ទទួលយក នូវសំណើរពីប្រធានគណបក្សដែលមានអាសនៈច្រើនជាងគេនៅក្នុងរដ្ឋសភា ដើម្បី នឹងចេញព្រះរាជក្រឹត្យតែងតាំងនាយករដ្ឋមន្ត្រីគឺ បណ្ឌិត ហ៊ុន ម៉ាណែត។”
សម្តេចតេជោ ហ៊ុន សែន បញ្ជាក់ថា «ព្រឹកមិញនេះ ក្នុងពេលចូលគាល់ ព្រះមហាក្សត្រទ្រង់ទទួលយល់ព្រមតាមការស្នើសុំរបស់គណបក្សដែលទទួលបានសំឡេងឆ្នោតច្រើនជាងគេ ក្នុងការចេញព្រះរាជក្រឹត្យតែងតាំងបណ្ឌិត ហ៊ុន ម៉ាណែត ជានាយករដ្ឋមន្ដ្រី។”សម្តេចតេជោ ហ៊ុន សែន បានបន្តថា “តាមគម្រោងគណៈកម្មាធិការជាតិរៀបចំការបោះឆ្នោត នឹងប្រកាសលទ្ធផលនៅថ្ងៃទី៥ ខែសីហា ដូច្នេះប្រសិនបើការប្រកាសលទ្ធផលនៅថ្ងៃ៥ ខែសីហានៅ ថ្ងៃចន្ទ ទី៧ ខែសីហា នឹងត្រូវតែងតាំងនាយករដ្ឋមន្ត្រីតែម្ដង ហើយតាមគម្រោង ថ្ងៃទី២១ ខែសីហា ឆ្នាំ២០២៣ នឹងកោះប្រជ៉ំសភាលើកដំបូងក្រោមព្រះរាជាធិបតីភាពរបស់ព្រះមហាក្សត្រ។”
សម្តេចតេជោ ហ៊ុន សែន ឲ្យដឹងថា រដ្ឋសភានីតិកាលទី៧ នឹងកោះប្រជុំលើកដំបូងនៅថ្ងៃទី២១ ខែសីហា ឆ្នាំ២០២៣។នៅល្ងាចថ្ងៃទី២១ ខែសីហា សមាជិកសភាចូលស្បថនៅព្រះបរមរាជវាំង។នៅថ្ងៃទី២២ ខែសីហា សភានឹងបើកកិច្ចប្រជុំក្រោមអធិបតីភាពរបស់ព្រឹទ្ធបុរស ហើយពេលល្ងាចគណៈរដ្ឋមន្ត្រីស្បថចូលកាន់តំណែង។ជាមួយនិងការប្រកាសចាកចេញពីតួនាទីនាយករដ្ឋមន្ត្រី សម្តេចតេជោ ហ៊ុន សែន ក៏បានបញ្ជាក់ថា “ខ្ញុំនឹងទៅឈរឈ្មោះជាសមាជិកព្រឹទ្ធសភា ហើយតាមការគ្រោងទុករបស់គណបក្ស គឺខ្ញុំនឹងក្លាយទៅជាប្រធានព្រឹទ្ធសភាជំនួសសម្ដេច សាយ ឈុំ ដែលគាត់មានអាយុច្រើនហើយចង់ឈប់សម្រាក។”
សម្តេចតេជោ ហ៊ុន សែន ប្រកាសថា “សម្ដេច នឹងកាន់តួនាទីជាប្រធានព្រឹទ្ធសភា ហើយនឹងជួយដល់ព្រះមហាក្សត្រ ក្នុងពេលដែលព្រះអង្គអវត្តមានក្នុងឱកាសណាមួយ ដែលចំណុចនេះ គឺជាការរៀបចំឱ្យការដំណើរការទៅរបស់ប្រទេសកម្ពុជាជាប្រក្រតីភាព។”សម្តេចតេជោ ហ៊ុន សែន បានថ្លែងថា បើរាប់ចាប់ពីថ្ងៃទី១៤ ខែមករា ឆ្នាំ១៩៨៥ រហូតដល់ថ្ងៃទី២២ ខែសីហា ឆ្នាំ២០២៣ ធ្វើជានាយករដ្ឋមន្ត្រី ២០១៤សប្តាហ៍ ស្មើនឹង ២៦៣ខែ ៣៨ឆ្នាំ ៧ខែ ៨ថ្ងៃ។សម្តេចតេជោ ហ៊ុន សែន បានថ្លែងថា បើរាប់ចាប់ពីថ្ងៃទី១៤ ខែមករា ឆ្នាំ១៩៨៥ រហូតដល់ថ្ងៃទី២២ ខែសីហា ឆ្នាំ២០២៣ ធ្វើជានាយករដ្ឋមន្ត្រី ២០១៤សប្តាហ៍ ស្មើនឹង ២៦៣ខែ ៣៨ឆ្នាំ ៧ខែ ៨ថ្ងៃ ស្មើនឹង ១៤០៩៩ថ្ងៃ។បើគិតចាប់ពីថ្ងៃទី៨ ខែមករា ១៩៧៩ ដល់ ២២ ខែសីហា ឆ្នាំ២០២៣ សម្តេចបានបំពេញការងារក្នុងរដ្ឋាភិបាល/រាជរដ្ឋាភិបាល ២៣២៨សប្តាហ៍ ស្មើនឹង ១៦២៩៧ថ្ងៃ, ៥៣៥ខែ, ៤៤ឆ្នាំ ៧ខែ និង៤ថ្ងៃ។សម្តេចតេជោ ហ៊ុន សែន បានបញ្ជាក់ថា បើគិតចាប់ពីថ្ងៃដែលសម្តេចយកជីវិតធ្វើដើមទន់ដើម្បីរំដោះជាតិ ២០ មិថុនា ១៩៧៧ ដល់ថ្ងៃទី២២ ខែសីហា ឆ្នាំ២០២៣ សម្តេចតេជោ បានបំពេញការងារដើម្បីបុព្វហេតុជាតិ ៤៦ឆ្នាំ ២ខែ ២ថ្ងៃ ត្រូវជា ៥៥៤ខែ ត្រូវជា ២៤០៩សប្តាហ៍ ១៩៨៦៤ថ្ងៃ។
សម្តេចតេជោ ហ៊ុន សែន បានថ្លែងថា ក្រោយពេលសម្តេចលាឈប់ពីរាជរដ្ឋាភិបាល សម្តេចនឹងត្រូវព្រះមហាក្សត្រត្រាស់បង្គាប់តែងតាំងជា ប្រធានឧត្តមក្រុមប្រឹក្សាព្រះមហាក្សត្រ។ សម្តេច ហេង សំរិន សម្តេច ស ខេង សម្តេច ទៀ បាញ់និងសម្តេចម៉ែនសំអនក៏នឹងត្រូវត្រាស់បង្គាប់តែងតាំងជាឧត្តមទីប្រឹក្សាផ្ទាល់របស់ព្រះមហាក្សត្រផងដែរ។ទាក់ទងនិងការបាត់បងតួនាទីរដ្ឋមន្ត្រីក្រសួងចាស់ៗសម្ដេចតេជោ ហ៊ុន សែន ក៏បានស្នើសូមរដ្ឋមន្ត្រីទាំងឡាយ ត្រូវតែហ៊ានលះបង់ ដោយសម្តេចបញ្ជាក់ថា៖សម្តេច គឺជាអ្នកលះបង់ធំធេងជាងគេ សូមមានការយោគយល់ ហើយរដ្ឋមន្ត្រីដែលមិនបន្តដំណែងតទៀត យើងអង្គុយនៅក្នុងសភា ជាតំណាងរាស្ត្រ ព្រោះពួកយើងចាស់ៗហើយ។សម្តេចតេជោ ហ៊ុន សែន ក៏បានថ្លែងអរគុណដល់ពលរដ្ឋដែលគាំទ្រ ដែលសន្លឹកឆ្នោតប្រជាជនបោះឆ្នោតឲ្យគណបក្សប្រជាជនកម្ពុជាលើកនេះ គឺជាជំនឿទុកចិត្តលើគណបក្សប្រជាជនកម្ពុជា និងជំនឿទុកចិត្តលើ ហ៊ុន សែន និងជំនឿទុកចិត្តលើអ្នកបន្តវេន គឺ ហ៊ុន ម៉ាណេត។
សម្តេចតេជោ ហ៊ុន សែន ថ្លែងអំណរគុណដល់ក្រុមប្រឆាំង ដែលប្រឹងជេរសម្តេច និងលោក ហ៊ុន ម៉ាណែត រហូតធ្វើឱ្យបក្សប្រជាជនកម្ពុជា ទទួលបានការគាំទ្រពីប្រជាពលរដ្ឋរហូតដល់ទៅជាង ៨២ភាគរយ។
សម្តេចតេជោ ហ៊ុន សែន បានថ្លែងថា មិត្តបរទេសតែងតែបន្ទោសបង្អាប់រាជរដ្ឋាភិបាលតាំងពីឆ្នាំ២០១៨ តែពួកគេនៅតែធ្វើការជាមួយសម្តេច រាប់ទាំងកិច្ចប្រជុំកំពូលអាស៊ានផងដែរ៕
.jpg&h=97&w=146)
.jpg&h=97&w=146)
