ចិននិងរុស្ស៊ីមានសត្រូវរួមគឺអាមេរិកនិងអឺរ៉ុបខាងលិចង៊ុក្រេនគ្មានតម្លៃទេ
03-April-2024 / ព័ត៌មានអន្តរជាតិ
ចិន៖ទស្សនកិច្ចកិច្ចប្រធានាធិបតីចិន លោកស៊ី ជីនពីងទៅកាន់ទីក្រុងមូស្គូ ប្រទេសរុស្ស៊ី បង្កឲ្យមានការចាប់អារម្មណ៍យ៉ាងខ្លាំងពីសហគមន៍អន្តរជាតិ ពិសេសគឺអាមេរិកនិងប្រទេសលោកខាងលិច ។ប្រធានាធិបតីចិនលោក Xi Jinping បានចាប់ផ្តើមជើងហោះហើរនៅទីក្រុងមូស្គូនៅថ្ងៃទី ២០ខែមីនា (ម៉ោងនៅទីក្រុងមូស្គូ) ។
ដំណើរទស្សនកិច្ចផ្លូវរដ្ឋរបស់លោក Xi Jinping ទៅកាន់រុស្ស៊ីមានរយៈពេលបីថ្ងៃ។ ក្នុងអំឡុងពេលនៃកិច្ចប្រជុំនេះ គេរំពឹងថា លោកប្រធានាធិបតី Xi Jinping និងប្រធានាធិបតីរុស្ស៊ី លោក Vladimir Putin នឹងពិភាក្សាអំពីកិច្ចសហប្រតិបត្តិការជាយុទ្ធសាស្ត្រលើវិស័យថាមពលនិងយោធា ព្រមទាំងកិច្ចសហប្រតិបត្តិការយុទ្ធសាស្ត្រ។លោក ស៊ី ជីនពីង បាននិយាយថា លោកសប្បាយចិត្តដែលបានត្រឡប់ទៅរុស្ស៊ីវិញ បន្ទាប់ពីចុះចតនៅអាកាសយានដ្ឋាន Vnukovo ។ លោកបានសង្កត់ធ្ងន់លើសារៈសំខាន់នៃទំនាក់ទំនងដ៏រឹងមាំរវាងទីក្រុងប៉េកាំង នឹងទីក្រុងមូស្គូ មិនត្រឹមតែសម្រាប់ជាប្រយោជន៍នៃប្រទេសទាំងពីរប៉ុណ្ណោះទេ ថែមទាំងសម្រាប់សហគមន៍អន្តរជាតិកាន់តែទូលំទូលាយផងដែរ។
មេដឹកនាំចិនបានសង្កត់ធ្ងន់ថា រួមជាមួយរុស្ស៊ី ប្រទេសរបស់លោកត្រៀមខ្លួនជាស្រេចដើម្បី “ការពារយ៉ាងម៉ឺងម៉ាត់នូវសណ្តាប់ធ្នាប់អន្តរជាតិដែលផ្តោតលើអង្គការសហប្រជាជាតិ”។ប្រទេសទាំងពីរនឹងខិតខំ “ប្រកាន់ខ្ជាប់នូវសណ្តាប់ធ្នាប់ពហុប៉ូលពិតប្រាកដ និងបណ្តុះពិភពលោកពហុប៉ូលជាមួយនឹងទំនាក់ទំនងអន្តរជាតិតាមបែបប្រជាធិបតេយ្យ ដើម្បីលើកទឹកចិត្តដល់ការអភិវឌ្ឍកិច្ចការពិភពលោក ស្របតាមទិសដៅសមធម៌ និងសមហេតុផលជាងនេះ”។ប្រធានាធិបតីចិន Xi Jinping នឹងជួបក្រៅផ្លូវការជាមួយប្រធានាធិបតីរុស្ស៊ី Vladimir Putin ដើម្បីពិភាក្សាអំពី “បញ្ហាសំខាន់ៗ និងរសើប” នេះបើយោងតាមជំនួយការប្រធានាធិបតីរុស្ស៊ី Yury Ushakov ។ការពិភាក្សានឹងប្រព្រឹត្តទៅនៅថ្ងៃទី ២១ ខែមីនា ដែលក្នុងនោះមេដឹកនាំចិនគ្រោងនឹងជួបជាមួយនាយករដ្ឋមន្ត្រីរុស្ស៊ី Mikhail Mishustin ។ ជម្លោះរវាងរុស្ស៊ីនឹងអ៊ុយក្រែនត្រូវបានគេរំពឹងថានឹងក្លាយជាផ្នែកធំនៃរបៀបវារៈនៃជំនួបកំពូលរុស្ស៊ីនិងចិន។ ជំនួបដែលថ្នាក់ដឹកនាំទាំង២ អះអាងថា នឹងប្រកាសអំពី “ចំណងសម្ព័ន្ធភាពយុទ្ធសាស្ត្រដ៏រឹងមាំបំផុត”។
គួររំលឹកថា តាំងតែពីរុស្ស៊ីបានលើកទ័ពធ្វើសង្គ្រាមឈ្លានពាននៅអ៊ុយក្រែន ចិនបានរក្សាជំហរស្ងាត់ស្ងៀមបំផុត ដោយមិនបានថ្កោលទោសរុស្ស៊ី ហើយអះអាងថាខ្លួននៅអព្យាក្រិត្យ។ សម្រាប់ ទស្សនកិច្ចរបស់លោកស៊ី ជីនពីន នៅម៉ូស្គូនាពេលនេះ ត្រូវបានគេមើលឃើញថា គឺវាបញ្ជាក់ពីជំហគាំទ្ររុស្ស៊ី ពីសំណាក់ប៉េកាំង នៅក្នុងបរិបទដែលរុស្ស៊ីកំពុងប្រឹងធ្វើសង្គ្រាមប្រឆាំងនឹងអាមេរិក ក៏ដូចជាសម្ព័ន្ធមិត្តលោកខាងលិចទាំងមូល។លោក តេមួ អ៊ូម៉ារ៉ូវ (Temur Umarov) អ្នកជំនាញទំនាក់ទំនង ចិន-រុស្ស៊ី នៅមូលនិធិ Carnegie ដើម្បីសន្តិភាពអន្តរជាតិ បានវិភាគថា គឺជំហប្រឆាំងនឹងអាមេរិក ក៏ដូចជាប្រឆាំងសម្ព័ន្ធមិត្តលោកខាងលិច ដូចគ្នារបស់ចិននិងរុស្ស៊ី ដែលធ្វើឲ្យមេដឹកនាំទាំង២នេះ ខិតចូលកៀកគ្នា ខ្លាំងបែបនេះ។
“ដំណើរទស្សនកិច្ចរបស់លោកស៊ី ជីនពីងទៅម៉ូស្គូ វាគឺជាការបញ្ជាក់ប្រាប់លោកពូទីន ថាចិនមិនបានបែរខ្នងដាក់រុស្ស៊ីនោះឡើយ ព្រោះថារុស្ស៊ីនៅតែមានតម្លៃសំខាន់សម្រាប់ចិន នៅក្នុងបរិបទយុទ្ធសាស្ត្រ ដែលចិនត្រូវប្រឈមជាមួយអាមេរិក។ ចិនឃើញតម្លៃរបស់រុស្ស៊ី ព្រោះថារុស្ស៊ីហ៊ានជាងខ្លួន រុស្ស៊ីធ្វើបានច្រើនជាងខ្លួន ដោយសុខចិត្តយកស្ថិរភាពសេដ្ឋកិច្ច ព្រមទាំងនយោបាយការបរទេស ទៅបូជា ដើម្បីធ្វើយ៉ាងណា ឲ្យតែអាចប្រឈមជាមួយអាមេរិក និងក្រុមប្រទេសលោកខាងលិចបាន។ ចំណុចតែមួយ និងដ៏សំខាន់បំផុត ដែលចិនគាំទ្រ ពេញចិត្តលើរុស្ស៊ី គឺមិនមែនរឿងរុស្ស៊ីក្លាហាន ហ៊ានវាយប្រហារអ៊ុយក្រែននោះទេ តែគឺចិនពេញចិត្តរុស្ស៊ី ដែលមានចិត្តសឿង ហានប្រយុទ្ធតតាំងជាមួយអាមេរិក និងសម្ព័ន្ធមិត្តអូតង់។ នេះហើយ ដែលគឺជាចំណុចតែមួយគត់ ដែលធ្វើឲ្យចិន និងរុស្ស៊ី ខិតចូលកៀកគ្នាខ្លាំងនៅពេលនេះ។
សូមបញ្ជាក់ថាសម្រាប់សង្គ្រាមរុស្ស៊ីអ៊ុយក្រែន ចិនបានស្នើផែនការចំនួន១២ចំណុចដើម្បីចរចារបញ្ចប់សង្គ្រាម តែអ្វីដែលជាការកត់សំគាល់ គឺផែនការចិនមិនបាននិយាយថា ឲ្យរុស្ស៊ីដកទ័ពចេញពីទឹកដីអ៊ុយក្រែននោះទេ។ ចំណុចនេះសំខាន់ខ្លាំងណាស់ សម្រាប់ភាគីអ៊ុយក្រែន។ លោកហ្សេឡេនស្គី បានអះអាងម្តងហើយម្តងទៀត ថាអ៊ុយក្រែន មិនមែនមិនចង់ចរចាជាមួយរុស្ស៊ីទេ តែមុននឹងចរចា គឺរុស្ស៊ីត្រូវដកទ័ពចេញពីទឹកដីអ៊ុយក្រែនជាមួយសិន ដោយរាប់ទាំងតំបន់គ្រីម៉េ។ បើគ្រប់គ្នា អាចលើកទ័ពចូលទៅឈ្លានពានប្រទេសមួយទៀត ប្លន់យកទឹកដីគេមកគ្រប់គ្រង ហើយបានហៅគេចរចានោះ វាដូចជាហួសហេតុពេកណាស់ ហើយគ្មាននរណាសុខចិត្តទទួលយកបានទេ។
ភាគីអាមេរិកវិញ ក៏បានអះអាងដែរ ថាគេមិនមានជំនឿចិត្តបន្តិចណាឡើយ ថាចិនអាចចូលរួមដោះស្រាយបញ្ហាបាន ល្គឹកណាក្នុងផែនការរបស់ចិន មិនបានកំណត់ដាក់កំហិតឲ្យរុស្ស៊ីដកទ័ពថយចេញទៅវិញទេនោះ។ ថ្លែងក្នុងបទសម្ភាសន៍ ឲ្យទូរទស្សន៍ Fox News អ្នកនាំពាក្យសេតវិមានអាមេរិកបានលើកឡើងថា គេមិនអាចទទួលយកបានទេ នូវការអំពាវនាវស្វែងរកសន្តិភាពពីសំណាក់ ពូទីន និងស៊ីជីនពីងនាពេលនេះ ព្រោះថាបើយល់ព្រមចរចាក្នុងពេលឥឡូវនេះ គឺវាមានន័យថា ដូចទទួលស្គាល់ថា ទឹកដីដែលរុស្ស៊ីបានប្លន់ពីអ៊ុយក្រែនទាំងប៉ុន្មាន នឹងត្រូវបានទៅដៃរុស្ស៊ីជាស្ថាពរ។ទំនាក់ទំនងយុទ្ធសាស្ត្ររវាងចិន និងរុស្ស៊ី គឺវាធំខ្លាំងណាស់ ដែលគេមិនជឿថា ចិននឹងដោះដៃចោលរុស្ស៊ី ដោយធ្វើឲ្យរុស្ស៊ីអាម៉ាសមុខនោះឡើយ។ លោក Iouriï Poïta អះអាងថា អ៊ុយក្រែន គ្មានអ្វីសំខាន់សម្រាប់ចិននោះទេ ទាំងផ្នែកសេដ្ឋកិច្ច និងភូមិសាស្ត្រនយោបាយ។ ផ្ទុយទៅវិញគឺរុស្ស៊ីទេ ដែលមានតម្លៃខ្លាំងណាស់ សម្រាប់ចិន ក្នុងការរួមកម្លាំងគ្នា ប្រជែងជាមួយអាមេរិក។ ដូច្នេះ ភាពជាអាជ្ញាកណ្តាលរវាង រុស្ស៊ី និងអ៊ុយក្រែន ដែលចិនខំអះអាងថាចង់ធ្វើនោះ គឺវាជារឿងបោកបញ្ឆោតរួចទៅហើយ។
