វៀតណាមតែងតាំងស្រី្តជាប្រមុខរដ្ឋស្តីទីបន្ទាប់ពីការលាលែងរបស់លោកលោក វ៉ូ វ៉ាន់ធឿងដែលឡើងបាន១ឆ្នាំ
30-March-2025 / ព័ត៌មានអន្តរជាតិ
វៀតណាម៖ រដ្ឋសភាវៀតណាមរសៀលថ្ងៃទី២១ ខែមីនា ឆ្នាំ២០២៤បាន ប្រកាសតែងតាំងលោកស្រី វ័រ ធិអាញ់សួន (Vo Thi Anh Xuan) ជាប្រមុខរដ្ឋស្តីទី នាវេលា ។ លោក ប៊ុយ វ៉ាន់គឿង (Bui Van Cuong) អគ្គលេខាធិការនៃអគ្គលេខាធិការដ្ឋានរដ្ឋសភាវៀតណាម បានចេញសេចក្តីប្រកាសព័ត៌មានមួយ ដោយបានបញ្ជាក់ថា ក្រោយពេលបិទសម័យប្រជុំវិសាមញ្ញលើកទៅ៦ នៃរដ្ឋសភាវៀតណាមនីតិកាលទី១៥ គណៈកម្មការអចិន្ត្រៃយ៍រដ្ឋសភា បានប្រកាសជូនដំណឹងថា លោកស្រី វ័រ ធិអាញ់សួន អនុប្រធានរដ្ឋវៀតណាម និងត្រូវជ្រើសតាំងជាប្រធានរដ្ឋស្តីទីជំនួសលោក វ៉ូ វ៉ាន់ធឿង (Vo Van Thuong) ជាអតីតប្រធានរដ្ឋដែលត្រូវគណៈកម្មាធិការមជ្ឈិមបក្សកុម្មុយនីស្តវៀតណាម សម្រេចឱ្យលាលែងពីតំណែង។
អ្នកស្រី វ័រ ធិអាញ់សួន ត្រូវចូលកាន់តំណែងជាប្រធានរដ្ឋស្តីទី ចាប់ពីថ្ងៃទី២១ ខែមីនា ឆ្នាំ២០២៤ រហូតដល់រដ្ឋសភាអនុម័តជ្រើសតាំងប្រធានរដ្ឋថ្មី ។អ្នកស្រី វ័រ ធិអាញ់សួន ប្រធានរដ្ឋស្តីទី អាយុ ៥៤ ឆ្នាំ មានស្រុកកំណើតនៅឃុំថៃសឺង ស្រុកទិញបៀន ខេត្តអានយ៉ាង (ជាប់ខេត្តតាកែវ ព្រះរាជាណាចក្រកម្ពុជា) លោកស្រីមានសញ្ញាបត្របណ្ឌិតគ្រប់គ្រងរដ្ឋបាលសាធារណៈ និងមានសញ្ញាបត្រផ្នែកមនុស្សសាស្ត្រគរុកោសល្យគីមីវិទ្យា ។អ្នកស្រីជាសមាជិកបម្រុងនៃគណៈកម្មាធិការមជ្ឈិមបក្សកុម្មុយនីស្តវៀតណាម អាណត្តិទី១១, ១២ និង ទី១៣ និងជាសមាជិកសភា អាណត្តិទី១៤ និងទី១៥ ។ អ្នកស្រីធ្លាប់ធ្វើកិច្ចការរដ្ឋការ និងកាន់តំណែងបក្សខេត្តអាងយ៉ាងនាស្រុកកំណើតរបស់លោកស្រីអស់រយៈពេលជាច្រើនឆ្នាំ ។ការតែងតាំងអ្នកស្រី វ័រ ធិអាញ់សួន
ជា ប្រធានរដ្ឋស្តីទី
បានកើតឡើងបន្ទាប់ លោក វ៉ូ វ៉ាន់ធឿង (Vo Van Thuong) បានលាលែងពីតំណែង ពីតួនាទីប្រមុខរដ្ឋក្រោយបំពេញការងារក្នុងរយៈពេលជាង ១ ឆ្នាំ ។គណបក្សកុម្មុយនិស្តវៀតណាម សរសេរពីមូលហេតុនៅក្នុងសេចក្តីថ្លែងការណ៍មួយថា “លោក វ៉ូ វ៉ាន់ធឿង (Vo Van Thuong) មិនបានបំពេញតួនាទីត្រឹមត្រូវ និងរំលោភបំពានលើលក្ខន្តិករបស់គណបក្សនៅក្នុងនាមជាប្រមុខរដ្ឋ ដូចនេះ លោកបានបន្សល់ទុកនូវសញ្ញាណមិនល្អសម្រាប់កេរ្តិ៍ឈ្មោះរបស់បក្សកុម្មុយនិស្តវៀតណាម” ។
គួររំឮកថា លោក ធឿង អាយុ ៥៤ ឆ្នាំមកពីខេត្ត Vinh Long ភាគខាងត្បូងវៀតណាម បានក្លាយជាប្រធានាធិបតីនៅខែមីនា ឆ្នាំ ២០២៣ ពីរខែបន្ទាប់ពីអ្នកកាន់តំណែងមុន គឺលោក ង្វៀន ស៊ាន់ហ្វុក (Nguyen Xuan Phuc) បានលាលែងពីតំណែងដើម្បីទទួលខុសត្រូវក្នុងផ្នែកនយោបាយ ពាក់ព័ន្ធនឹងរឿងអាស្រូវពុករលួយអំឡុងជំងឺរាតត្បាតកូវីដ១៩។ លោក ធឿង ជាប្រធានាធិបតីក្មេងជាងគេបំផុត ចាប់តាំងពីវៀតណាមបានងើបចេញពីសង្គ្រាមនៅពាក់កណ្តាលទសវត្សរ៍ឆ្នាំ ១៩៧០ ។
មានសញ្ញាប័ត្រអនុបណ្ឌិតផ្នែកទស្សនវិជ្ជា លោក Thuong បានចាប់ផ្តើមអាជីពនយោបាយរបស់គាត់ក្នុងតួនាទីជាអ្នកដឹកនាំនៅគណៈកម្មាធិការមជ្ឈិមសហភាពយុវជនទីក្រុងហូជីមិញ រហូតដល់ក្លាយជាលេខាបក្សនៃខេត្ត Quang Ngai ភាគកណ្តាលកាលពីខែសីហា ឆ្នាំ ២០១១ ។បន្ទាប់មកលោកប្រធានក្លាយជាអនុលេខាបក្សអចិន្ត្រៃយ៍នៃទីក្រុងហូជីមិញក្នុងឆ្នាំ ២០១៤ ហើយនៅខែកុម្ភៈ ឆ្នាំ២០១៦ លោកបានក្លាយជាប្រធានគណៈកម្មការព័ត៌មាន និងអប់រំ ខណៈជាបន្តបន្ទាប់មក លោកក្លាយជាសមាជិកអចិន្ត្រៃយ៍នៃលេខាធិការដ្ឋាន ចាប់ពីខែកុម្ភៈឆ្នាំ២០២១ ដល់ខែមីនាឆ្នាំ ២០២៣ ។គួរបញ្ជាក់ថា ក្នុងអំឡុងពេលកាន់តំណែងជាប្រធានាធិបតី លោក Thuong បានធ្វើដំណើរ និងទស្សនកិច្ចជាង ១០ ដងជាមួយថ្នាក់ដឹកនាំអន្តរជាតិ ខណៈក្នុងដំណើរទស្សនកិច្ចរបស់លោកទៅជប៉ុនកាលពីខែវិច្ឆិកាឆ្នាំមុន វៀតណាម និងជប៉ុនបានបង្កើនទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ .។
ការប្រកាសនេះ បានធ្វើឡើងមួយថ្ងៃមុនពេលសភាវៀតណាមជួបប្រជុំសម្រាប់សម័យប្រជុំពិសេសនៅរដ្ឋធានីហាណូយ ដែលទំនងជាអនុម័តលើសេចក្តីសម្រេចរបស់បក្ស។មានការកត់សម្គាល់ថាការលាលែងពីតំណែងរបស់លោក ធឿង បានធ្វើឡើងនៅប៉ុន្មានថ្ងៃ បន្ទាប់ពីសមត្ថកិច្ចវៀតណាម រាយការណ៍ថា កងកម្លាំងបានចាប់ឃាត់ខ្លួនអតីតអភិបាលខេត្តក្វាងង៉ៃ (Quang Ngai) (ភាគកណ្តាលប្រទេសវៀតណាម) ពីបទពុករលួយ ខណៈដែលលោកធឿងជាប្រធានគណបក្សខេត្តនាពេលនោះ ។ប្រភព៖ Reuters/ AP/ VOV/ VN Express
.jpg&h=97&w=146)
.jpg&h=97&w=146)
