ស្លាប់ខ្ទង់រយនិងរបួសខ្ទង់ម៉ឺននាក់ ដោយរញ្ជួយដីនៅវេណេស៊ុយអេឡាបណ្តាប្រទេសប្រកាសជំនួយ

ប្រទេសវ៉េណេហ្សុយអេឡា៖សារព័ត៌មាន AFP កាលពីថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦ ប្រធានាធិបតីស្តីទីវ៉េណេស៊ុយអេឡា លោកស្រី Delcy Rodriguez បាននិយាយថា គ្រោះរញ្ជួយដីកម្រិតធ្ងន់ ដែលវាយប្រហារប្រទេសអាមេរិកឡាទីនមួយនេះដែលពត៍មានដំបូង បានផ្តាច់ជីវិតមនុស្សយ៉ាងហោច ៣២នាក់ ហើយបង្កឱ្យរបួសច្រើនជាង៧០០នាក់ផ្សេងទៀត។បច្ចុប្បន្នតួលេខស្លាប់កើនដល់ជាង១រយរបួសខ្ទង់ពាន់។ 

យោងតាមការស្ទង់ភូគព្ភសាស្ត្រអាមេរិក(USGS)ការរញ្ជួយដីដំបូងមានកម្រិត ៧,២ រ៉ិចទ័រ ប៉ុន្មានវិនាទីក្រោយមកមានការរញ្ជួយដីកម្រិត ៧,៥ រ៉ិចទ័រដ៏ខ្លាំងក្លាជាងនេះមួយទៀតបានកើតឡើង ដោយការរញ្ជួយទាំងពីរបានកើតឡើងនៅជិតផ្ទៃខាងលើ ដែលធ្វើឱ្យការបំផ្លិចបំផ្លាញកាន់តែធ្ងន់ធ្ងរ។

ការរញ្ជួយដីបានវាយប្រហារនៅម៉ោង១៨:៤នាទីម៉ោងក្នុងស្រុកកាលពីថ្ងៃពុធសប្ដាហ៍នេះ និងស្របពេលជាថ្ងៃឈប់សម្រាកជាតិនៅវ៉េណេស៊ុយអេឡា មានន័យថាមនុស្សកាន់តែច្រើននៅផ្ទះជាងថ្ងៃធ្វើការធម្មតា។ការរញ្ជួយដីទាំងពីរលើកនេះមានលក្ខណៈរាក់ លើកទីមួយមានចំណុចកណ្តាលនៅជម្រៅ២០,៣ គីឡូម៉ែត្រក្រោមផ្ទៃខាងលើ និងលើកទីពីរមានជម្រៅ១០ គីឡូម៉ែត្រ នេះបើយោងតាម USGS។

លោក Jorge Rodríguez ប្រធានរដ្ឋសភាវ៉េណេស៊ុយអេឡា បានរាយការណ៍កាលពីថ្ងៃព្រហស្បតិ៍ថា ចំនួនអ្នកស្លាប់បានកើនឡើង បន្ទាប់ពីប្រធានាធិបតីស្តីទីរបស់ប្រទេសនេះ គឺលោកស្រី Delcy Rodríguez បានប្រកាសពីស្ថានភាពគ្រាអាសន្ន។ប្រទេសជាច្រើនបានសន្យាថានឹងជួយដល់កិច្ចខិតខំប្រឹងប្រែងជួយសង្គ្រោះ ដោយសហរដ្ឋអាមេរិកបានសន្យាផ្តល់ជំនួយចំនួន១៥០ លានដុល្លារ.

តាមការផ្សាយរបស់ BBC នៅថ្ងៃសុក្រ ទី២៦ ខែមិថុនា ឆ្នាំ២០២៦ ប្រទេសអេស្ប៉ាញ អ៊ីតាលី ឆែក  បារាំង អាល្លឺម៉ង់ លុចសំបួរ ហូឡង់ និងព័រទុយហ្គាល់ សុទ្ធតែប្រកាស បញ្ជូនក្រុមស្វែងរក និងជួយសង្គ្រោះទៅ វ៉េណេស៊ុយអេឡា។ ប្រទេសម៉ិកស៊ិក ដោយលោកស្រី Claudia Sheinbaum ក៏បានប្រកាសពីការផ្តល់ជំនួយ ជាក្រុមអ្នកជួយសង្គ្រោះ និងបុគ្គលិកសុខាភិបាលផងដែរ។

ចំណែក ប្រទេសកូឡុំប៊ី, អភិបាលក្រុង Bogotá លោក Carlos Galán និយាយថា លោកកំពុងបញ្ជូនក្រុមស្វែងរក និងជួយសង្គ្រោះជំនាញ ពីនាយកដ្ឋានពន្លត់អគ្គិភ័យនៃទីក្រុងរបស់លោក រួមជាមួយ Dastan ដែលជាសត្វសុនខហិតក្លិន ទទួលបានការបណ្តុះបណ្តាល ក្នុងការស្វែងរកមនុស្សជាប់ក្រោមគំនរអគារ។បុរីវ៉ាទីកង់ក៏ បានឲ្យដឹងថា សម្តេចប៉ាប Leo បានផ្ញើកញ្ចប់ជំនួយបន្ទាន់ដំបូង មានទឹកប្រាក់ ១០០ ០០០ អឺរ៉ូ ឬ ៨៦ ២០០ ផោន ហើយត្រៀមជួយបន្ថែមទៀត ជាបន្តបន្ទាប់។

ស្ថាប័នអន្តរជាតិមួយចំនួន ក៏ចូលរួមផងដែរ ដោយក្នុងនោះ ប្រមុខអង្គការសុខភាពពិភពលោក (WHO) លោក Tedros Adhanom Ghebreyesus បញ្ជាក់ថា ក្រុមការងារ WHO កំពុងទាក់ទងយ៉ាងជិតស្និទ្ធ ជាមួយក្រុមឆ្លើយតបគ្រោះមហន្តរាយ និងត្រៀមលក្ខណៈជាស្រេច ក្នុងការបញ្ជូនបុគ្គលិកបន្ថែម ព្រមទាំងការផ្គត់ផ្គង់វេជ្ជសាស្ត្រនានា។សហរដ្ឋអាមេរិក ក៏ប្រកាសបញ្ជូនក្រុមឆ្លើយតបបន្ទាន់ ទៅវ៉េណេស៊ុយអេឡា ដែរ ដោយផ្ដោតសំខាន់លើការស្វែងរក និងការចូលទៅជួយសង្គ្រោះ អ្នកដែលនៅរស់រានមានជីវិត។