ធនាគាជាតិកម្ពុជាបាននិងកំពុងជម្រុញការកាត់បន្ថយចាយលុយដុល្លារក្នុងស្រុកខ្មែរ
04-September-2023 / សេដ្ឋកិច្ច
ភ្នំពេញ៖ លោកស្រី ជា សិរី អគ្គទេសាភិបាលរងធនាគាជាតិក្នុងឱកាសខួប៤៣ឆ្នាំនៃការដាក់ឲ្យប្រើប្រាស់ប្រាក់រៀល(២០មីនា ១៩៨០-២០មីនា ២០២៣)ប្រកាសពីការលើកកំពស់ការធ្វើលុយរៀលូបនីយ៍កម្មដើម្បីទប់ទល់ការប៉ះទង្គិះពីឥទ្ធីពលខាងក្រៅ។លោកស្រី ជា សិរី បានបញ្ជាក់ថា ការប្រើប្រាស់ប្រាក់រៀលកាន់តែច្រើន នឹងផ្តល់លទ្ធភាពដល់ធនាគារជាតិនៃកម្ពុជា ក្នុងការអនុវត្តនយោបាយរូបិយវត្ថុ និងអត្រាប្តូរប្រាក់ កាន់តែប្រសិទ្ធភាព ជាពិសេស ការកំណត់អត្រាការប្រាក់គោល និងការផ្តល់សាច់ប្រាក់បន្ថែមដល់សេដ្ឋកិច្ច ដែលអាចមាន ឥទ្ធិពលទៅលើអត្រាការប្រាក់ទីផ្សារ ការវិនិយោគ និងផលិត កម្ម និងឈានទៅជំរុញការបង្កើតការងារធ្វើ និងបង្កើនប្រាក់ចំណូលរបស់ប្រជាពលរដ្ឋ។
លោកស្រីបណ្ឌិត ជា សិរី បានថ្លែងថា នៅថ្ងៃនេះកាលពី ៤៣ឆ្នាំមុន ប្រាក់រៀលត្រូវបានដាក់ឱ្យចរាចរឡើងវិញជាផ្លូវការ នឹងទទួលបានការសាទរខ្លាំងពីសំណាក់ប្រជាពលរដ្ឋគ្រប់រូប ដោយសារប្រជាជនអាច ប្រើប្រាស់ក្រដាសប្រាក់ជំនួសឱ្យការប្រើប្រាស់អង្ករ ឬមាស សម្រាប់ប្រតិបត្តិការដោះដូរ ប្រចាំថ្ងៃ។លោកស្រីបណ្ឌិត បានថ្លែងរំលឹកថា ប្រព័ន្ធរូបិយវត្ថុ ត្រូវបានលុបបំបាត់ចោលទាំងស្រុង នៅក្នុងរបបប្រល័យពូជសាសន៍ ប៉ុល ពត ដែលបានធ្វើឱ្យប្រទេសកម្ពុជាដើរថយក្រោយទៅរកសង្គមទាសភាព សោកនាដកម្ម និងការបំផ្លាញរាល់សមិទ្ធផលសេដ្ឋកិច្ច និងសង្គមជាតិទាំងអស់។ ក្រោយថ្ងៃរំដោះ ៧ មករា ឆ្នាំ១៩៧៩ រដ្ឋាភិបាលត្រូវកសាង សេដ្ឋកិច្ច និងសង្គមឡើងវិញពីបាតដៃទទេលើគ្រប់វិស័យ ហើយការងារចម្បងមួយក្នុង ចំណោមការងារអាទិភាពនានានៅពេលនោះ គឺការបោះផ្សាយប្រាក់រៀលឡើងវិញ ដើម្បីសម្រួលដល់ប្រតិបត្តិការដោះដូរទំនិញនិងសេវានៅក្នុងសេដ្ឋកិច្ច។
លោកស្រីអគ្គទេសាភិបាលរងធនានាគាដែលកើតក្រោយឆ្នាំ៧៩បាននិយាយថាការហូរចូលប្រាក់ដុល្លារអាម៉េរិកយ៉ាងច្រើនសន្ធឹកសន្ធាប់មកក្នុងសេច្ចកិច្ចកម្ពុជានៅឆ្នាំ១៩៩២-១៩៩៣ តាមរយៈអាជ្ញាធរ បណ្ដោះអាសន្នអង្គការសហប្រជាប្រចាំនៅកម្ពុជា (UNTAC) ដើម្បីរៀបចំការបោះឆ្នោត ជាលើកដំបូង បានធ្វើឱ្យប្រជាជន ក៏ដូចជាវិស័យឯកជន ទទួលយក និងប្រើប្រាស់ប្រាក់ ដុល្លារអាម៉េរិកដោយផ្ទាល់យ៉ាងឆាប់រហ័ស ដែលជាចំណុចចាប់ផ្ដើមដុល្លារូបនីយកម្មនៅ កម្ពុជារហូតដល់បច្ចុប្បន្ន។
លោកស្រី ជា សិរី បានអះអាងថា ក្រោយកម្ពុជាទទួលបានសុខសន្តិភាពពេញលេញចាប់ពីចុងឆ្នាំ១៩៩៨ ក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រាជរដ្ឋាភិបាលនិងធនាគារជាតិនៃកម្ពុជា បានដាក់ចេញនូវនយោបាយលើកកម្ពស់ ការប្រើប្រាស់ប្រាក់រៀលជាបន្តបន្ទាប់ ដែលបានធ្វើឱ្យទំហំប្រាក់រៀលក្នុងចរាចរណ៍កើនឡើងជាលំដាប់។
ខណៈដែលដុល្លារូបនីយកម្មបានចាក់គ្រឹះយ៉ាងជ្រៅទៅក្នុងសេដ្ឋកិច្ច និងសង្គម ជាពិសេស ក្នុងផ្នត់គំនិតរបស់ប្រជាជន ការជំរុញការប្រើប្រាស់ប្រាក់រៀលឱ្យបានកាន់តែទូលំទូលាយ នឹងបន្តទាមទារឱ្យមានការចូលរួមបន្ថែមទៀតពីគ្រប់មជ្ឈដ្ឋាន។
លោកស្រី ជា សិរី បានសង្កត់ធ្ងន់ថា៖ «ប្រាក់រៀលជារូបិយវត្ថុជាតិរបស់យើងទាំងអស់គ្នា ដូចនេះការចូលរួមប្រើប្រាស់ប្រាក់រៀល ពិតជាបានរូមចំណែកដោយផ្ទាល់ និងប្រយោល ដល់កិច្ចការពារ និងពង្រឹងអធិបតេយ្យសេដ្ឋកិច្ច អត្តសញ្ញាណជាតិ សាមគ្គីភាព និងការរីកចម្រើនសេដ្ឋកិច្ច និងសង្គម»។
លោកស្រី ទេសាភិបាលរង ក៏បានលើកឡើងថា ការប្រើប្រាស់រូបិយវត្ថុជាតិ ក៏អាចជួយធ្វើឱ្យវិស័យក្រៅប្រទេសមាន ភាពប្រសើរ និងធន់ទៅនឹងការប៉ះទង្គិចនានា តាមរយៈការគ្រប់គ្រងលើអត្រាប្ដូរប្រាក់ ដើម្បីលើកកម្ពស់ភាពប្រកួតប្រជែងរបស់ទំនិញនាំចេញ ឬកាត់បន្ថយការនាំចូល ដែលអាចជួយ គណនីចរន្ត និងជញ្ជីងពាណិជ្ជកម្មមានអតិរេក និងគាំទ្រដល់ការគពួនទុនបម្រុងអន្តរជាតិ ឱ្យបានរឹងមាំ។
រាជរដ្ឋាភិបាលអាចកាត់បន្ថយការពឹងផ្អែកលើបំណុលពីបរទេស តាមរយៈការកៀរគរមូលនិធិរូបិយវត្ថុក្នុងស្រុក ដើម្បីគាំទ្រដល់ការផ្តល់ហិរញ្ញប្បទាន សម្រាប់ការកសាងហេដ្ឋារចនាសម្ព័ន្ធ និងគម្រោងអភិវឌ្ឍន៍ផ្សេងៗ។លោកស្រីបណ្ឌិត ជា សិរី បានគូសបញ្ជាក់ទៀតថា ធនាគារជាតិវិនកម្ពុជា នឹងបន្តអនុវត្តនយោ បាយរូបិយវត្ថុ និងវិធានការលើកកម្ពស់ការប្រើប្រាស់ប្រាក់រៀល ដោយផ្អែកលើយន្តការទីផ្សារ ព្រមទាំងពង្រឹងកិច្ចសហការជាមួយនឹងភាគីពាក់ព័ន្ធក្នុងការ អនុវត្តការងារនេះឱ្យកាន់តែមានប្រសិទ្ធភាព។
បច្ចុប្បន្នរាជរដ្ឋាភិបាលកម្ពុជា តាមរយៈធនាគារជាតិនៃកម្ពុជា បាន និងកំពុងដាក់ចេញគោលនយោបាយរូបិយវត្ថុនានា ក្នុងគោលបំណងកាត់បន្ថយ ក៏ដូចជាឈានទៅលុបបំបាត់ដុល្លារូបនីយកម្ម ដែលបច្ចុប្បន្នកំពុងចរាចរនៅលើទីផ្សារកម្ពុជារហូតដល់ជាង ៨០ ខណៈដែលបរិមាណប្រាក់រៀលស្ថិតនៅក្រោម ២០ភាគរយប៉ុណ្ណោះ បើទោះបីជាការប្រើប្រាស់មានកំណើនគួរឲ្យកត់សម្គាល់ជាលំដាប់ជារៀងរាល់ឆ្នាំក៏ដោយ៕
