វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 777 នាក់
ម្សិលមិញ 3717 នាក់
សរុប 14149110 នាក់
ភ្នំពេញ៖ គម្រោងអភិវឌ្ឍន៏ទំនប់ដូនទ្រី ដែលអាចផ្គត់ផ្គង់ទឹកសម្រាប់ការ ស្រោចស្រពលើផ្ទៃដីស្រូវវស្សាបាន ចំនួន៣៣. ០០០ ហិកតា ផ្ទៃដីស្រូវប្រាំងបានចំនួន ៤.៥០០ ហិកតា ជាប្រភេទទំនប់ធំ សាងសង់ដោយប្រើវិធីសាស្ត្រថ្មី ដូចជាការជីករូងភ្នំ ការជីកថ្មក្នុងលក្ខខ័ណ្ឌភូគ្គពសាស្ត្រ វិធីសាស្ត្រពង្រឹងកែច្នៃបាតគ្រឹះទំនប់ ដែលមានទីតាំងនៅស្រុករុក្ខគីរី ខេត្តបាត់ដំបង គិតរហូតមកដល់ថ្ងៃនេះគឺសាងសង់បានប្រមាណ២៦%ហើយ។
នេះបើតាមលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមដែល បានធ្វើដំណើរអញ្ជើញចុះពិនិត្យ គម្រោងអភិវឌ្ឍន៍ទំនប់ដូនទ្រី មានទីតាំងស្ថិតនៅក្នុងស្រុករុក្ខគីរី ខេត្តបាត់ដំបងបានឲ្យកាសែតដឹង ។ គម្រោងអភិវឌ្ឍន៍ទំនប់ដូនទ្រី មានទីតាំងស្ថិតនៅចម្ងាយប្រមាណ ៩០ គីឡូម៉ែត្រ ភាគពាយ័ព្យពីក្រុងបាត់ដំបងជាគម្រោងមួយកសាងក្រោមហិរញ្ញប្បទានសម្បទានរបស់សាធារណរដ្ឋកូរ៉េ ។
គម្រោងអភិវឌ្ឍន៍ទំនប់ដូនទ្រី គឺជាប្រព័ន្ធធារាសាស្ត្រថ្មីមួយ ជាប្រវត្តិសាស្ត្រសម្រាប់ប្រទេសកម្ពុជា ដែលសំណង់នេះ ជាប្រភេទទំនប់ធំ ដែលការសាងសង់តម្រូវឲ្យប្រើប្រាស់វិធីសាស្ត្រថ្មី មិនដែលអនុវត្តន៏នៅក្នុងប្រទេសកម្ពុជា នាពេលកន្លងមក ដូចជា ការជីករូងក្នុងភ្នំ ការជីកថ្មក្នុងលក្ខខ័ណ្ឌភូគ្គពសាស្ត្រមិនអនុគ្រោះ និងវិធីសាស្ត្រពង្រឹងកែច្នៃបាតគ្រឹះទំនប់ជាដើម ។ គម្រោងនេះ មិនត្រឹមតែផ្តល់ទឹកសម្រាប់បង្កើនផលិតផលកសិកម្មទាំងនៅរដូវវស្សា និងនៅរដូវប្រាំង ប៉ុណ្ណោះទេ ប៉ុន្តែថែមទាំងរួមចំណែកផងដែរ ក្នុងការផ្គត់ផ្គង់ទឹកស្អាត និងកាត់បន្ថយទឹកជំនន់តាមតំបន់មួយចំនួននៅផ្នែកខាងក្រោម ។
រដ្ឋមន្ត្រីក្រសួងធនធានទឹក និង ឧតុនិយម បានឲ្យដឹងទៀតថា ទំនប់ដូនទ្រី ក៏នឹងមានលទ្ធភាពផ្គត់ផ្គង់មួយផ្នែកនូវទឹក សម្រាប់ការស្រោចស្រព ទៅឲ្យគម្រោងនៅផ្នែកខាងក្រោម ដូចជា អនុគម្រោងពោធិកាណាល់ និងអនុគម្រោងរាមគុណ តាមរយៈស្ទឹងដូនទ្រី។នេះគឺជាសមិទ្ធផលទី ២ នៅក្នុងខេត្តបាត់ដំបង ក្រោមហិរញ្ញប្បទានសម្បទានរបស់សាធារណរដ្ឋកូរ៉េ បន្ទាប់ពីគម្រោងអភិវឌ្ឍន៍ទំនប់សាលាតាអន ក្នុងការធានាដល់ការផ្គត់ផ្គង់ទឹកគ្រប់គ្រាន់ សម្រាប់ការបង្កបង្កើនផលស្រូវ ដំណាំគ្រប់ប្រភេទ និងសម្រាប់ការប្រើប្រាស់ប្រចាំថ្ងៃ ដែលជាផ្នែកមួយជួយលើក ស្ទួយដល់ជីវភាពរស់នៅរបស់បងប្អូនប្រជាពលរដ្ឋ តាមរយៈវិស័យទឹកនៅក្នុងបរិបទ នៃការរីករាលដាលនៃជំងឺកូវីដ- ១៩ ។
សូមជម្រាបផងដែរថា ទំនប់ដូនទ្រី បានចាប់ផ្តើមធ្វើការសាងសង់ កាលពីថ្ងៃទី២៥ ខែមិថុនា ឆ្នាំ២០១៨ ហើយគ្រោងនឹងបញ្ចប់នៅក្នុងឆ្នាំ២០២៣ ហើយមកដល់បច្ចុប្បន្ននេះ ការងារសម្រេចបានប្រមាណ ២៦% លើទំហំការងារសរុបរបស់គម្រោង ។