រដ្ឋមន្ត្រីក្រសួងសាធារណការ និងដឹកជញ្ជូន និងអ្នកឧកញ៉ា គិត ម៉េងត្រូវ ធ្វើការចរចារលើគម្រោងផ្លូវដែក ឱ្យបានឆាប់យ៉ាងយូរចុងឆ្នាំនេះ
16-April-2026 / សេដ្ឋកិច្ច
ភ្នំពេញ៖ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី១៤ ខែតុលា ឆ្នាំ២០២៤នេះបានថ្លែងបញ្ជាក់ថា រាជរដ្ឋាភិបាលកំពុងតែចរចារធ្វើបន្ថែមទៀតទៅលើប្រព័ន្ធហេដ្ឋារចនាសម្ព័ន្ធផ្លូវហាយវ៉េ និងផ្លូវដែក ដើម្បីបម្រើឲ្យវិស័យដឹកបញ្ជូនទន្ទឹមគ្នានោះសម្តេចបានណែនាំឱ្យរដ្ឋមន្ត្រីក្រសួងសាធារណការ និងដឹកជញ្ជូន និងអ្នកឧកញ៉ា គិត ម៉េង ធ្វើការចរចារឱ្យបានចេញជាកាចុះអនុស្សរណៈយោគយល់គ្នាយ៉ាងយូរត្រឹមចុងឆ្នាំនេះ ដើម្បីធ្វើការពង្រឹងផ្លូវដែកបន្ថែម បើមិនដូច្នេះទេសម្តេចនឹងដកគម្រោងវិញ!។
ថ្លែងក្នុងពិធីអបអរសាទរខួប២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្មពិភពលោក (WTO) សម្ដេចបវរធិបតី ហ៊ុន ម៉ាណែត បានឲ្យដឹងថា រាជរដ្ឋាភិបាល កំពុងកសាងហេដ្ឋារចនាសម្ព័ន្ធដែលជំរុញកំណើនសេដ្ឋកិច្ច និងពាណិជ្ជកម្ម។ ជាក់ស្ដែង, រាជរដ្ឋាភិបាលបានដាក់ឱ្យប្រើប្រាស់ជាផ្លូវ ការនូវកំពង់ផែពហុបំណងកំពត និងចាប់ផ្ដើមបើកការដ្ឋានសាងសង់ព្រែកជីកហ្វូណន តេជោ ដែលនឹងកាត់បន្ថយរយៈពេល, ចម្ងាយ និងតម្លៃនៃការដឹកជញ្ជូន, បង្កើតតំបន់ពាណិជ្ជកម្ម និងមជ្ឈមណ្ឌលភស្តុភារកម្ម, និងអភិវឌ្ឍផែរណបថ្មីៗជាច្រើន។
សម្ដេចបវរធិបតី ហ៊ុន ម៉ាណែត «យើងកំពុងតែចរចាដើម្បីធ្វើបន្ថែមទៅលើប្រព័ន្ធហេដ្ឋារចនាសម្ព័ន្ធផ្លូវហាយវ៉េ ហើយក្រៅពីនោះគឺប្រព័ន្ធផ្លូវដែក ដែលជាក់ស្តែងនៅពេលនេះយើងមានផ្លូវដែកមួយចំហៀងពី ជើងទៅត្បូង ដែលខ្ញុំបានឱ្យគោលការណ៍រួចហើយដល់ក្រសួងពាក់ព័ន្ធ ជាមួយក្រុមហ៊ុន ដើម្បីធ្វើយ៉ាងណាចរចារឱ្យបានចេញជាការចុះអនុស្សរណៈយោគយល់គ្នា (MoU) ឱ្យបានយ៉ាងយូរនៅចុងឆ្នាំនេះ ពីព្រោះបញ្ហាផ្លូវដែកនេះបានកកស្ទះគាំងរាប់ឆ្នាំមកហើយ ដោយយើងត្រូវពង្រឹងនិងមិនអាចទុកតទៅទៀតបានទេ»។
សម្ដេចបវរធិបតី ហ៊ុន ម៉ាណែត បានបន្ថែមថា ទៅថ្ងៃខាងមុខយើងអាចពិនិត្យលទ្ធភាពរឿងផ្លូវដែកពីភ្នំពេញ ទៅទិសខាងកើតបន្ថែមទៀតដើម្បីភ្ជាប់ ពីព្រោះផ្លូវដែកនេះវាបានជួយច្រើនក្នុងការដឹកជញ្ជូន និងកាត់បន្ថយការចំណាយ។សម្ដេចបវរធិបតី ហ៊ុន ម៉ាណែត បានបញ្ជាក់ទៀតថា ផ្លូវទឹកយើងមានហើយ យើងនឹងបន្តភ្ជាប់ព្រែកជីកពីផ្លូវសមុទ្រ មកផ្លូវទន្លេ ដែលមកដល់ពេលនេ រាជរដ្ឋាភិបាលកំពុងតែរកអ្នកស្តារទន្លេនៅផ្នែកខាងលើ ខណៈដែលនៅខាងខេត្តកំពង់ចាម ខេត្តក្រចេះ នៅមានខ្សាច់ច្រើន យើងត្រូវការអ្នកស្តារទន្លេ ដើម្បីឱ្យផ្លូវទឹកកាន់តែងាយស្រួល។
ទាក់ទងរឿងនេះសម្ដេចបវរធិបតី ហ៊ុន ម៉ាណែត ក៏បានស្នើឱ្យអ្នកឧកញ្ញ៉ា គិត ម៉េង និងលោក ប៉េង ពោធិ៍នា រដ្ឋមន្ត្រីក្រសួងសារធាណការ និងដឹកជញ្ជូន ធ្វើយ៉ាងចរចារចុះអនុស្សរណៈយោគយល់គ្នា រឿងផ្លូវដែកនេ ឱ្យបានចប់នៅចុងឆ្នាំនេះ ដើម្បីចាប់ផ្លូវធ្វើការងារពង្រឹងផ្លូវដែកនេះ, ទោះបីវាមិនល្អឥតខ្ចោះក៏ដោយ សំខាន់ឱ្យបានដំណើរការគឺចាប់ផ្តើមធ្វើ ហើយចាំធ្វើការពង្រឹងបន្ថែមទៀតជាគោលការណ៍។គេមិនដឹងថាតើក្រុមហ៊ុនប្រទេសណាដែលសម្តេចឲ្យលោកឧកញ៉ាគិតម៉េងនិងរដ្ឋមន្ត្រីក្រសួងសាធារណការដឹកជញ្ជូនចរចាឲ្យសម្រេចបានអនុស្សារណៈនោះទេតែភាគច្រើនគេធ្លាប់ដឹងថាមកពីប្រទេសចិន។តែបើចឹងមែនគេក៏សង្ស័យថាចិនដែលកំពុងមានបញ្ហាសេដ្ឋកិច្ចអាចនឹងមិនចេញលុយសម្រាប់រកសីជាមួយកម្ពុជាក៏ថាបានជាក់ស្តែងដូចជាព្រែកជីកហ្វូណនគ្មានលុយចិននោះទេ។
ទោះបីយ៉ាងណាសម្ដេចបវរធិបតី ហ៊ុន ម៉ាណែត បានឲ្យដឹងថា សម្រាប់ថវិកាក្នុងការជួសជុលផ្លូវដែកនេះយើងមានមួយចំនួនហើយ សម្រាប់សិក្សាលើផ្លូវដែកនេះ ប៉ុន្តែត្រូវធ្វើការសិក្សាឱ្យបានរួចរាល់ ដើម្បីកុំឱ្យចាយលុយអត់មានប្រយោជន៍, សម្តេចអះអាងថា សម្រាប់ការជួសជុលផ្លូវដែកនេះ ចិនបានផ្តល់ឱ្យថវិកាប្រមាណ ៣០០លានយន់ ជាជំនួយឥតសំណងសម្រាប់ផ្លូវដែកនេះ ដូចនេះយើងត្រូវធ្វើយ៉ាងណាដើម្បីឱ្យផ្លូវដែកកាន់តែល្អប្រសើរ។សម្ដេចបវរធិបតី ហ៊ុន ម៉ាណែត បានបង្ហើបដែរថា នៅថ្ងៃណាមួយសម្តេចនឹងទៅជិះរថភ្លើង ដោយមិនប្រាប់ជាមុនដើម្បីពិនិត្យជាក់ស្តែងតែម្តង។ ផ្លូវដែកនេះគឺជារឿងមួយសំខាន់ ក្នុងការដឹកជញ្ជូនមនុស្ស និងការដឹកជញ្ជូនទំនិញ គឺកាត់បន្ថយការចំណាយ និងពេលវេលាបានច្រើន។
សូមបញ្ចាក់ថាកាលពីឆ្នាំ២០២៣ក្នុងឱកាសសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ ពីព្រែកក្តាមរហូតដល់ខេត្តបាត់ដំបង ជាមួយនឹងការបើកការដ្ឋានសាងសង់ផ្លូវ ពីសិរីសោភ័ណទៅកាន់ប៉ោយប៉ែត នាព្រឹកថ្ងៃទី២២ ខែវិច្ឆិកាសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងឲ្យដឹងថា ទៅថ្ងៃអនាគត កម្ពុជានឹងសាងសង់ផ្លូវដែកមួយខ្សែទៀត ដោយនឹងតភ្ជាប់ពីរាជធានីភ្នំពេញ ខេត្តកំពង់ចាម ខេត្តកំពង់ធំ ខេត្តសៀមរាប និងខេត្តបន្ទាយមានជ័យ ដើម្បីជំរុញការដឹកជញ្ជូនកាន់តែច្រើន និងកាត់បន្ថយថ្លៃដឹកជញ្ជូនទំនិញ។
សម្តេចមហាបវរធិបតី ហ៊ុន ម៉ាណែត បានថ្លែងថា ក្រៅពីផ្លូវថ្នល់យើងនឹងពង្រឹងផ្លូវដែកបន្ថែមទៀត ចំពោះផ្លូវដែកដែលនឹងត្រូវធ្វើ អទិភាពសំខាន់បំផុតគឺត្រូវពង្រឹងផ្លូវដែកខាងជើង និងខាងត្បូង។ ខ្សែផ្លូវដែកមានចំនួន២ខ្សែ ដោយខ្សែទី១ស្ថិតនៅខាងជើងចាប់ពីប៉ោយប៉ែតកាត់ទៅភ្នំពេញ ពោសាត់ធ៍ បាត់ដឹង និងបាត់ដំបង ចំណែកខ្សែខាងត្បូង ចាប់ពីភ្នំពេញ តាកែវ កំពត និងខេត្តព្រះសីហនុ។
សម្ដេចមហាបវរធិបតី បានមានប្រសាសន៍បញ្ជាក់ថា «គម្រោងធ្វើផ្លូវដែកចាំបាច់ត្រូវតែធ្វើ តាមគម្រោង នឹងធ្វើភ្ជាប់ពីខាងកើតទន្លេភ្ជាប់ពីប៉ោយប៉ែត សៀមរាប ភ្នំពេញ ចំណែកផ្លូវរថភ្លើងល្បឿនលឿន នឹងរៀបចំតាមក្រោយនាពេលខាងមុខ ចំពោះពេលនេះត្រូវពង្រឹងអ្វីដែលមានស្រាប់ មិនចំណាយច្រើន លឿន និងបម្រើទៅលើការដឹកជញ្ជូន ពិសេសដឹកជញ្ជូនទំនិញ ព្រមទាំងកាត់បន្ថយថ្លៃដឹកទំនិញ»។
សូមជម្រាបថា ប្រទេសកម្ពុជាមានផ្លូវដែកចំនួន២ខ្សែ ដោយខ្សែទី១ ចេញពីភ្នំពេញទៅអូជ្រៅ កាត់រាជធានីភ្នំពេញ កណ្តាល កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យមានប្រវែង ៣៨៥ គូឡូម៉ែត្រ។ចំណែកខ្សែទី២ ចេញពីភ្នំពេញទៅក្រុងព្រះសីហនុកាត់ ភ្នំពេញ កណ្តាល តាកែវ កំពត កែប និងក្រុងព្រះសីហនុ ប្រវែង២៦៦គីឡូម៉ែត្រ។ផ្លូវទាំងពីរនេះកម្ពុជាខ្ចីលុយពីធនាគារអភិវឌ្ឍន៍អាស៊ីជាំង៤រយលានដុល្លារមកជួសជុលហើយប្រគល់ឲ្យក្រុមហ៊ុនឧកញ៉ាគិតម៉េងកាន់កាប់រកលុយសង?។
ពាក់ព័ន្ធនឹងគម្រោងអភិវឌ្ឍន៍ផ្លូវដែកនៅកម្ពុជានេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យកាសែតដឹងនាពេលកន្លងមកថា កម្ពុជា បានសិក្សា និងរៀបចំផែនការរួចរាល់ហើយ។ ផែនការអភិវឌ្ឍន៍ផ្លូវដែកនៅកម្ពុជាចែកចេញជាពីរដំណាក់កាលរួមមាន៖ ដំណាក់កាលមធ្យមពីឆ្នាំ២០២៣ ទៅឆ្នាំ២០២៧ និងរយៈពេលវែងពីឆ្នាំ២០២៨ ទៅឆ្នាំ២០៣៣។បើតាមលោក ប៉េង ពោធិ៍នា ក្នុងរយៈពេលមធ្យមនេះ កម្ពុជាមានគម្រោងអភិវឌ្ឍន៍ផ្លូវដែកចំនួន៣គម្រោង រួមមាន៖ គឺប្រែក្លាយផ្លូវដែកពីរខ្សែបច្ចុប្បន្ន (ភ្នំពេញ-ព្រះសីហនុ, ភ្នំពេញ-ប៉ោយប៉ែត) ឱ្យក្លាយជាផ្លូវដែកអាចបើកបានល្បឿនលឿនជាងពេលបច្ចុប្បន្ន ហើយគម្រោងទី២ និងទី៣ គឺការកសាងផ្លូវរថភ្លើងភ្ជាប់រាជធានីភ្នំពេញ ទៅព្រលានយន្តហោះអន្តរជាតិតេជោ និងតភ្ជាប់ព្រលានយន្តហោះអន្តរជាតិខេត្តសៀមរាប ទៅកាន់ក្រុងសៀមរាប។
ដោយឡែកសម្រាប់រយៈពេលវែងពីឆ្នាំ២០២៨ ទៅឆ្នាំ២០៣៣វិញ កម្ពុជា មានគម្រោងអភិវឌ្ឍន៍ផ្លូវដែកចំនួន៥គម្រោងរួមមាន៖ ការសាងសង់ផ្លូវដែកល្បឿនលឿនភ្នំពេញ-ព្រះសីហនុ និងភ្នំពេញ-ប៉ោយប៉ែត, សាងសង់ផ្លូវដែកល្បឿនលឿនភ្នំពេញ ទៅបាវិត ព្រំដែនវៀតណាម, ភ្នំពេញ ទៅប៉ោយប៉ែត កាត់តាមកំពង់ធំ និងសៀមរាប។ក្រៅពីគម្រោងសាងសង់ផ្លូវដែកល្បឿនលឿនទាំង៤គម្រោងនេះទៅ កម្ពុជា ក៏នឹងសាងសង់ប្រព័ន្ធផ្លូវដែកក្នុងរាជធានីភ្នំពេញ ដើម្បីសម្រួលការធ្វើចរាចរណ៍របស់ប្រជាពលរដ្ឋ ដែលកំពុងមានកំណើនខ្លាំង។ស្តាប់់ទៅពិរោះដែរតែមិនដឹងបានលុយមកពីណា?៕
