វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6423 នាក់
ម្សិលមិញ 5304 នាក់
សរុប 14145949 នាក់
ភ្នំពេញ៖ ប្រជាពលរដ្ឋចំនួន៥៦គ្រួសារ រស់នៅភូមិដូនអុក សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ នៅព្រឹកថ្ងៃទី៣១ ខែឧសភា ឆ្នាំ២០១៨ បាននាំគ្នាមកក្រសួងរៀបចំដែនដីនគរូបនីយកម្ម និងសំណង់ សុំអោយក្រសួងដោះស្រាយករណីសមាគមចិនហុកគៀនខ្ចីដីគាត់កប់ខ្មោចហើយយកទៅលក់អោយបានឆាប់ជូនពួកគាត់ហើយ ខាងក្រសួងបានណាត់ជួបនៅថ្ងៃទី៤ ខែមិថុនា ខាងមុខនេះ។
សូមបញ្ជាក់ថា៖ប្រជាពលរដ្ឋបានដាក់ញ្ញត្តិសុំអន្តរាគមន៍នៅខុទ្ទកាល័យសម្តេចនាយកររដ្ឋមន្ត្រី ហ៊ុន សែន កាលពីថ្ងៃទី០៤ ខែឧសភា ឆ្នាំ២០១៨ ដើម្បីសុំឲ្យសម្តេចតេជោ ហ៊ុន សែន ជួយអន្តរាគមន៍និងផ្តល់ភាពយុត្តិធម៌ដល់ពួកគាត់ ដែលសមាគមចិន ហុក គៀន យកដីម៉ុងខ្មោច (ដីខ្ចីប្រជាពលរដ្ឋយកកប់ខ្មោច)ទៅលក់អោយអ្នកផ្សេង។ ការនាំគ្នាមកសុំអន្តរាគមន៍ពីនេះ គឺបន្ទាប់ពីប្រជាពលរដ្ឋបានដាក់ញ្ញត្តិទៅក្រសួងរៀបចំដែនដីនគរូបនីយកម្ម និងសំណង់ កាលពីថ្ងៃទី២៦ ខែកុម្ភៈ ឆ្នាំ២០១៨ ដែលរហូតមកដល់ពេលនេះ មិនទាន់ឃើញមានដំណោះស្រាយ ទើបពួកគាត់មកសុំអន្តរាគមន៍ទៀត។
ដីដែលមានទំហំ១៣ហិកតា ប្រជាពលរដ្ឋទាំងអស់គ្នាមករស់នៅលើដីនេះ តាំងពីឆ្នាំ១៩៧៩ ដោយប្រកបរបរធ្វើស្រែ និងដាំដំណាំផ្សេង។ លុះក្រោយមកនៅថ្ងៃទី២៦ ខែសីហា ឆ្នាំ១៩៨៧ គឺសមាគមចិន ហុក គៀន បានដាក់ពាក្យស្នើសុំខ្ចីដីទាំងនេះពីប្រជាពលរដ្ឋទាំង៥៦គ្រួសារ ដោយមានអាជ្ញាធរដែនដី់ទទួលស្គាល់ដឹងឮពិតប្រាកដ សម្រាប់យកទៅធ្វើកន្លែងគោរពសក្ការៈបុណ្យប្រពៃណីចិនម្តងៗ ដោយប្រជាពលរដ្ឋយល់ឃើញថា មានមូលហេតុសមរម្យ ក៏បានអនុញ្ញាតអោយសមាគមចិនហុក គៀនខ្ចីប្រើប្រាស់បណ្តោះអាសន្ន។
រហូតមកដល់ឆ្នាំ២០១១ សមាគមចិន ហុក គៀន រកទីតាំងថ្មីបានរុះរើម៉ុងចេញបាត់ទៅ ដោយធ្វើការឈូសឆាយម៉ុងទាំងអស់ចេញ និងរុះរើផ្ទះ លុបអណ្តូងទឹកមួយកន្លែងចោលទៀត ក៏ប្រគល់ដីទាំងនោះមកអោយប្រជាពលរដ្ឋកាន់កាប់វិញ។ ស្រាប់តែឥឡូវមានឈ្មោះ សេង ស៊ីហេង បានចេញមុខអះអាងថា ដីទាំងនេះជាដីរបស់ខ្លួន ជាតំណាងអោយសមាគមចិន ហុក គៀន ទៅវិញ។ ប្រជាពលរដ្ឋទាំង៥៦គ្រួសារ ពុំមានការយល់ព្រមសុខចិត្តអោយឈ្មោះ សេង ស៊ីហេង មករំលោភបំពានដី១៣ហិកតា មកធ្វើជាកម្មសិទ្ធិរបស់ខ្លួនជាដាច់ខាត៕