អាជ្ញាធរឥណ្ឌាសម្រុកចូល៖ការិយាល័យរបស់ទូរទស្សន៍អង់គ្លេស BBCបន្ទាប់ពីផ្សាយរឿងអាស្រូវនាយករដ្ឋមន្ត្រី
21-September-2026 / ព័ត៌មានអន្តរជាតិ
ប្រទេសឥណ្ឌា៖ការិយាល័យរបស់ទូរទស្សន៍អង់គ្លេស BBC ជាប់ក្នុងសំណាញ់ស៊ើបអង្កេតរបស់អាជ្ញាធរពន្ធដារឥណ្ឌា។ នៅថ្ងៃអង្គារទី ១៤កុម្ភៈ មន្ត្រីពន្ធដារឥណ្ឌាបានចុះទៅឆែកឆេរ ការិយាល័យរបស់ទូរទស្សន៍BBC នៅក្នុងទីក្រុងញូវដេលី និងទីក្រុងប៊ុមបៃ។ ការចុះឆែកឆេរ ធ្វើឡើងនៅប៉ុន្មានសប្តាហ៍ក្រោយ ដែលទូរទស្សន៍អង់គ្លេសបញ្ចាំងផ្សាយ ភាពយន្តឯកសារដែលនិយាយពីតួនាទីរបស់លោកនាយករដ្ឋមន្ត្រី ណារិនដ្រា ម៉ូឌី នៅក្នុងជម្លោះសាសនាដ៏ហិង្សា នៅ ឆ្នាំ ២០០២ ដែលបានសម្លាប់មនុស្សយ៉ាងហោច ១០០០នាក់។
នៅក្នុងសេចក្តីថ្លែងការណ៍ ប្រព័ន្ធផ្សព្វផ្សាយអង់គ្លេសBBC បាននិយាយថា អាជ្ញាធរពន្ធដារឥណ្ឌាបានចូលឆែកឆេរ និងបិទខ្ទប់ការចេញចូល ក្នុងការិយាល័យនិពន្ធរបស់ BBC នៅទីក្រុងញូវដេលី និងក្រុងប៊ុមបៃ កាលពីថ្ងៃ អង្គារ។ នៅពេលក្រុមទូរទស្សន៍ត្រូវរើកន្លែងផ្សាយ បណ្តោះអាសន្ន ទៅនៅអគារជិតខាង BBC អះអាងសហការពេញទំហឹងជាមួយអាជ្ញាធរឥណ្ឌា ដោយសង្ឃឹមថា ការស៊ើបអង្កេតនឹងអាចបិទបញ្ចប់ ក្នុងពេលដ៏ឆាប់។បុគ្គលិកម្នាក់របស់ BBCបាននិយាយប្រាប់អ្នកកាសែតថា មន្ត្រីឥណ្ឌាបានរឹបអូសយកទូរស័ព្ទទាំងអស់ និងបានបញ្ជាហាមមិនឲ្យគេចាកចេញពីទីស្នាក់ការរបស់ BBC។
មន្ត្រីពន្ធដារឥណ្ឌាម្នាក់ ដែលសុំមិនបញ្ចេញឈ្មោះបានប្រាប់ទីភ្នាក់ងារអង់គ្លេស Reuters ថា រដ្ឋាភិបាលកំពុងបើកដំណើរការស៊ើបអង្កេត នៅក្នុងការិយាល័យ BBC។ក្រសួងការបរទេសអង់គ្លេសប្រកាសថា ក្រសួងតាមដានជាប់ជានិច្ចករណីស៊ើបអង្កេតរបស់អាជ្ញាធរឥណ្ឌា នៅក្នុងការិយាល័យនិពន្ធរបស់ BBC នៅទីក្រុងញូវដេលី និងប៊ុមបៃ។ គណបក្សប្រឆាំងឥណ្ឌា និងអង្គការការពារសិទ្ធិមនុស្សអន្តរជាតិបានចេញមុខថ្កោលទោស សកម្មភាពចុះឆែកឆេរការិយាល័យរបស់ BBC នៅឥណ្ឌា។ នេះបើតាមការចុះផ្សាយរបស់Reuters។
អ្នកនាំពាក្យរបស់គណបក្សកាន់អំណាចBJP របស់លោកនាយករដ្ឋមន្ត្រី ណារិនដ្រា ម៉ូឌីបាននិយាយប្រាប់អ្នកកាសែត កាលពីថ្ងៃអង្គារថា ការងាររបស់មន្ត្រីពន្ធដារ នៅការិយាល័យ BBCធ្វើឡើងទៅតាមច្បាប់ និងថា ទូរទស្សន៍ BBCបានផ្សព្វផ្សាយការឃោសនាប្រឆាំងឥណ្ឌា។ សកម្មភាពចុះឆែកឆេរការិយាល័យ BBC នៅឥណ្ឌា ធ្វើឡើងនៅប៉ុន្មានសប្តាហ៍ក្រោយដែល រដ្ឋាភិបាលរិះគន់ទូរទស្សន៍អង់គ្លេស ដែលបានចាក់ផ្សាយភាពយន្តឯកសារ និយាយពីតួនាទីរបស់លោកនាយករដ្ឋមន្ត្រី ណារិនដ្រា ម៉ូឌី នៅក្នុងរលកហិង្សា ឆ្នាំ ២០០២ដែលបានសម្លាប់មនុស្ស យ៉ាងតិច ១ពាន់នាក់។
ភាពយន្តឯកសាររបស់ BBC ដែលចែកជា២វគ្គ ដកស្រង់ខ្លឹមសារ ក្នុងឯកសារសម្ងាត់របស់ក្រសួងការបរទេសអង់គ្លេស ដែលថា លោកណារិនដ្រា ម៉ូឌី ដែលនៅធ្វើជាប្រមុខដឹកនាំរដ្ឋ Gujarat នៅឆ្នាំ២០០២ បានបញ្ជាឲ្យប៉ូលិសបិទភ្នែក មិនអន្តរាគមន៍ក្នុងជម្លោះដ៏ហិង្សា ដែលបង្កឡើងដោយក្រុមសាសនាហិណ្ឌូ ទៅលើក្រុមអ្នកកាន់សាសនាអ៊ីស្លាម ដែលមានចំនួនភាគតិចនៅឥណ្ឌា។ របាយការណ៍របស់ក្រសួងការបរទេសអង់គ្លេស នាសម័យនោះ បានចេញសេចក្តីសន្និដ្ឋានថា ពិតជាមានយុទ្ធនាការបោសសម្អាតជាតិពិន្ធុ និង ការបើកឲ្យមានបរិយាកាសនិទណ្ឌភាព ពីសំណាក់មេដឹកនាំរដ្ឋ Gurajat ដែលគ្មានអ្នកណាក្រៅពី លោកណារិនដ្រា ម៉ូឌី ដែលត្រូវតែជាអ្នកទទួលខុសត្រូវដោយផ្ទាល់លើអំពើហិង្សាសម្លាប់មនុស្ស។
ដឹកនាំរដ្ឋGujarat ពីឆ្នាំ ២០០១ រហូតដល់ក្លាយជានាយករដ្ឋមន្ត្រីឥណ្ឌានៅឆ្នាំ ២០១៤ លោកណារិនដ្រា ម៉ូឌីធ្លាប់ត្រូវអាមេរិកហាមមិនឲ្យចូលទឹកដីអាមេរិក មួយរយៈ ដោយសារអំពើហិង្សា នៅGujarat។
នៅឆ្នាំ ២០១៩ គណៈកម្មការស៊ើបអង្កេតឥណ្ឌាធ្លាប់វាយតម្លៃថា គេរកមិនឃើញភស្តុតាងដែលបញ្ជាក់ថា អំពើហិង្សាដែលសម្លាប់ភាគច្រើនអ្នកកាន់សាសនាអ៊ីស្លាម ត្រូវបានជំរុញលើកទឹកចិត្តដោយថ្នាក់ដឹកនាំរដ្ឋ។ តុលាការកំពូលឥណ្ឌាផ្ទាល់ ធ្លាប់បានសម្រេច នៅឆ្នាំ ២០១២ថា លោកណារិនដ្រា ម៉ូឌី គ្មានជាប់ពាក់ព័ន្ធនឹងអំពើហិង្សា នៅរដ្ឋGujarat៕អត្ថបទវិទ្យុបារាំង
