ប្រជាជនអ៊ុយក្រែននៅក្រុងគៀវនាំគ្នាធ្វើបុណ្យណូអែលក្រោមដីក្នុងពេលសម្តេចប៉ាបអំពាវនាវឲ្យបញ្ឈប់សង្គ្រាម
03-April-2024 / ព័ត៌មានអន្តរជាតិ
អ៊ុយក្រែន៖ ពលរដ្ឋអ៊ុយក្រែននៅក្នុងរដ្ឋធានីគីវជាច្រើនរយនាក់ បាននាំច្រៀងចម្រៀងបុណ្យណូអ៊ែលនៅក្នុងស្ថានីយរថភ្លើងក្រោមដីដ៏ធំមួយកន្លែងក្នុងទីក្រុង Kyiv កាលពីថ្ងៃអាទិត្យ ទី២៥ ធ្នូកន្លងទៅ ខណៈដែលសម្លេងប្រកាសអាសន្នព្រមានពីការវាយប្រហារតាមផ្លូវអាកាស កំពុងបន្លឺឡើងនៅខាងក្រៅ។
ប្រធានសហគមពលរដ្ឋអ៊ុយក្រែនក្នុងតំបន់មួយរូប បានលើកឡើងឱ្យដឹងថា សម្រាប់ឱកាសពិធីបុណ្យណូអ៊ែលនៅឆ្នាំនេះនៅប្រទេសអ៊ុយក្រែន លោកបានសម្រេចចិត្តរៀបចំការជួបជុំគ្នានៅក្នុងស្ថានីយរថភ្លើងក្រោមដី ដើម្បីបង្ការសុវត្ថិភាពសម្រាប់អ្នកចូលរួម ស្របពេលទាហានរុស្ស៊ីក៏អាចនឹងឆ្លៀតឱកាសមួយនេះសម្រាប់បង្កើនការវាយប្រហាររបស់ខ្លួនមកលើទីក្រុងគីវរបស់អ៊ុយក្រែនផងដែរ ដើម្បីជាការបំបាក់ស្មារតីពលរដ្ឋអ៊ុយក្រែន ទៅតាមយុទ្ធសាស្ត្រដែលរដ្ឋាភិបាលរុស្ស៊ីបានខិតខំព្យាយាមធើ្វឡើងអស់រយៈពេលជាច្រើនខែមកនេះ។លោកបន្ដថា បើទោះបីជាត្រូវប្រឈមទៅនឹងការគំរាមកំហែងផ្នែកសុវត្ថិភាពនិងសន្ដិសុខថាមពលឬពីការវាយប្រហារតាមផ្លូវអាកាសរបស់ទាហានរុស្ស៊ីយ៉ាងណាក៏ដោយ ក៏ពលរដ្ឋអ៊ុយក្រែនក្នុងសហគមទីក្រុងគីវរបស់លោក នៅតែបង្ហាញស្មារតីរឹងមាំ អត់ធ្មត់ និងអង់អាចក្លាហានក្នុងការចូលរួមសម្តែងការអបអរសាទរចំពោះឱកាសពិធីបុណ្យប្រពៃណីជាតិរបស់ខ្លួនយ៉ាងច្រើនកុះករ ដើម្បីជាការបង្ហាញស្មារតីសាមគ្គីជាតិជាធ្លុងមួយនៅចំពោះមុខស្ថានការណ៍ដ៏លំបាកនេះ។
សម្រាប់បរទេសវិញក្នុងពិធីសូត្រធម៌ឆ្លងបុណ្យណូអែល នៅពេលយប់ និងនៅចំពោះមុខគ្រិស្តសាសនិកជនជាង៧ពាន់នាក់ សម្តេចប៉ាបបានបន់ព្រះឱ្យជួយដល់កុមារដែលរស់ក្នុងសង្គ្រាម ក្នុងភាពក្រីក្រ និងភាពអយុត្តិធម៌ ព្រមទាំងបានសម្តែងការសោកស្តាយ នឹងភាពស្រេកឃ្លានអំណាច រហូតជំរុញឱ្យមនុស្សខ្លះ ហ៊ានលេបត្របាក់ប្រទេសជិតខាង ដោយចង់សំដៅលើសង្គ្រាមនៅអ៊ុយក្រែន និងជម្លោះប្រដាប់អាវុធផ្សេងៗទៀត។នៅក្នុងសារជូនពរថ្ងៃណូអែល ដែលផ្សាយបន្តផ្ទាល់ទៅកាន់ពិភពលោកទាំងមូល សម្តេចប៉ាបហ្វ្រង់ស័រ បានលើកឡើងច្រើន ជាថ្មីទៀត អំពីជម្លោះនៅអ៊ុយក្រែន ដែលប្រារព្វជាលើកទីមួយបុណ្យណូអែលក្រោមស្នូរសំឡេងវាយប្រហារឈ្លានពានរបស់រុស្ស៊ី។ សម្តេចប៉ាប បានបរិហារសង្គ្រាមឆ្កួតលីលា និងបានអំពាវនាវបិទបញ្ចប់ស្នូរអាវុធ។ បើតាមសង្ឃដីការបស់សម្តេចប៉ាប គ្រប់សង្គ្រាមសុទ្ធតែបង្កឱ្យភាពអត់ឃ្លាន ហេតុដូច្នេះហើយបានជាសម្តេចសូមទទូចឱ្យពិភពលោក កុំយកអាហារមកធ្វើអាវុធ តែត្រូវប្តេជ្ញាធ្វើគ្រប់យ៉ាង យកចំណីអាហារមកធ្វើឧបករណ៍សាងសន្តិភាព។
ក្នុងពេលដែលពលរដ្ឋកាន់សាសនាគ្រិស្តកំពុងប្រារព្វពិធីបុណ្យកំណើតព្រះយេស៊ូ សង្ឃកាតូលិកប៉ូឡូញបានធ្វើដំណើរទៅអ៊ុយក្រែន ដើម្បីប្រារព្ធពិធីបុណ្យជាមួយពលរដ្ឋអ៊ុយក្រែនជួបសង្គ្រាមផដែរ។ សម្រាប់ទិវាបុណ្យណូអែលនេះ ប្រធានាធិបតីអ៊ុយក្រែន លោក Volodymyr Zelenskiy បានលើកឡើងនៅក្នុងសុន្ទរកថាប្រចាំថ្ងៃមួយទៅកាន់ពលរដ្ឋកាលពីល្ងាចថ្ងៃអាទិត្យ ទី ២៥ ធ្នូកន្លងទៅ ដោយបាននិយាយថា រដ្ឋាភិបាលទីក្រុងម៉ូស្គូកំពុងតែរៀបចំផែនការយុទ្ធសាស្ត្រទ័ពដើម្បីធើ្វយ៉ាងណាឱ្យអ៊ុយក្រែនប្រឈមមុខទៅនឹងស្ថានភាពលំបាក់កាន់តែខ្លាំងថែមទៀត សម្រាប់ជាកាដូនាឱកាសបុណ្យណូអ៊ែល ក៏ដូចជាឱកាសឆ្លងឆ្នាំសកល ២០២២ នាពេលខាងមុខនេះ។
លោក Zelenskiy បានបន្ដទៀតថា ស្ថានការណ៍សង្គ្រាមនឹងអាចកាន់តែអាក្រក់ថែមទៀតសម្រាប់អ៊ុយក្រែននៅក្នុងពេលខ្លីខាងមុខនេះ តែយ៉ាងណាក៏ដោយ ក៍លោកបានបង្ហាញក្តីសង្ឃឹមនិងភាពជឿជាក់ខ្ពស់ទៅលើស្មារតីដ៏អង់អាចក្លាហានរបស់ពលរដ្ឋអ៊ុយក្រែននៅគ្រប់ស្រទាប់វណ្ណៈ ក្នុងការត្រៀមខ្លួនប្រឈមមុខទៅនឹងឈុតឆាកគ្រប់រូបភាពរបស់រុស្ស៊ី។ បន្ថែមលើសពីនេះទៀត លោកក៏បានសម្តែងការគោរពដឹងគុណយ៉ាងស្ញប់ស្ញែងចំពោះវីរភាពកងកម្លាំងយោធាអ៊ុយក្រែន ក្នុងការបន្ដប្រយុទ្ធការពារដែនអធិបតេយ្យភាពរបស់ខ្លួនបានយ៉ាងរឹងមាំនៅតាមទីសមរភូមិ ដើម្បីផ្តល់នូវភាពកក់ក្តៅសម្រាប់ពលរដ្ឋទូទៅក្នុងការរៀបចំប្រារព្ធពិធីបុណ្យណូអ៊ែលឱ្យបានអធិកអធមនៅក្នុងប្រទេស។
ការលើកឡើងរបស់លោកប្រធានាធិបតី Zelenskiy នៅពេលនេះ គឺបានធើ្វឡើងនៅក្រោយពីភាគីប្រទេសរុស្ស៊ីបានជំទាស់ទៅនឹងសំណើរសុំឱ្យមានបទឈប់បាញ់គ្នាជាបណ្ដោះអាសន្ន ដើម្បីផ្តល់ឱកាសសម្រាប់នាយទាហានទាំងសងខាងអាចចូលរួមអបអរសាទរនាឱកាសពិធីបុណ្យណូអ៊ែល ជាពិធីបុណ្យប្រពៃណីដ៏សំខាន់មួយសម្រាប់ពលរដ្ឋដែលប្រកាន់សាសនាគ្រិស្ទនៅក្នុងតំបន់អឺរ៉ុប មិនថាជានិកាយ Orthodox ឬក៏និកាយ Catholic នោះទេ៕ប្រភព៖ Reuters Connect
