មានការវាយប្រយុទ្ធគ្នាជាថ្មីនៅតំបន់ព្រំដែនថៃ-មីយ៉ាន់ម៉ាបន្ទាប់ការអំពាវនាវរដ្ឋមន្ត្រីការបរទេសអាស៊ាន
09-July-2024 / ព័ត៌មានអន្តរជាតិ
ប្រទេសមីយ៉ាន់ម៉ា៖ មានការប៉ះទង្គិចគ្នាដោយប្រដាប់អាវុធរវាងកងកម្លាំងរបបសឹកមីយ៉ាន់ម៉ា នឹងក្រុមប្រដាប់អាវុធជនជាតិភាគតិចបានផ្ទុះឡើងសាជាថ្មីនៅក្បែរទីក្រុងដ៏សំខាន់មួយ ស្ថិតនៅជាប់ព្រំដែនថៃ នៅថ្ងៃសៅរ៍ ទី២០ ខែមេសានេះ ក្រោយពីស្ងប់ស្ងាត់បានមួយសប្ដាហ៍។សារព័ត៌មាន AFP បានផ្សាយឲ្យដឹងថាការវាយប្រយុទ្ធគ្នាបានផ្ទុះឡើងនៅជុំវិញទីក្រុង Myawaddy របស់មីយ៉ាន់ម៉ា ស្ថិតនៅជាប់ព្រំដែនថៃ កាលពីដើមខែមេសានេះ ហើយកងកម្លាំងរបបសឹកបានដកថយចេញពីទីក្រុងនេះ។
រដ្ឋមន្ត្រីការបរទេសអាស៊ានកាលពីថ្ងៃសុក្រកន្លងទៅបានចេញសេចក្ដីថ្លែងការណ៍មួយអំពាវនាវឲ្យភាគីទាំងអស់បញ្ឈប់ជាបន្ទាន់នូវអំពើហិង្សា និងអនុវត្តការអត់ធ្មត់ជាអតិបរមានៅតាមតំបន់ព្រំដែននៃប្រទេសមីយ៉ាន់ម៉ា ។ គេហទំព័រ The Diplomat កាលពីថ្ងៃទី១៩ ខែមេសាកន្លងទៅបានឲ្យដឹងថា៖ សេចក្តីថ្លែងការណ៍បានសម្តែងក្ដីព្រួយបារម្ភយ៉ាងខ្លាំងចំពោះការកើនឡើងនៃអំពើហិង្សានាពេលថ្មីៗនេះនៅក្នុងប្រទេសមីយ៉ាន់ម៉ា ជាពិសេសនៅទីក្រុង Myawaddy ក្នុងរដ្ឋ Kayin និងក្នុងរដ្ឋ Rakhine ដែលមនុស្សរាប់ពាន់នាក់កំពុងស្វែងរកកន្លែងជ្រកកោន បន្ទាប់ពីផ្ទះសម្បែងរបស់ពួកគេរងការបំផ្លិចបំផ្លាញ ។ ដើម្បីបញ្ចៀសផលវិបាកផ្នែកមនុស្សធម៌បន្ថែមទៀតពីការកើនឡើងនៃជម្លោះក្នុងទម្រង់ណាមួយ អាស៊ានអំពាវនាវឲ្យភាគីទាំងអស់បញ្ឈប់ជាបន្ទាន់នូវអំពើហិង្សា និងអនុវត្តការអត់ធ្មត់ជាអតិបរមា រក្សាគោលការណ៍មនុស្សធម៌អន្តរជាតិ ជាពិសេសចាត់វិធានការចាំបាច់ទាំងអស់ដើម្បីកាត់បន្ថយភាពតានតឹង និងធានាការការពារសុវត្ថិភាពរបស់ជនស៊ីវិល ។
ស្របពេលជាមួយគ្នានេះ រដ្ឋមន្ត្រីការប្រទេសអាស៊ានក៏បានអំពាវនាវឲ្យចាត់វិធានការជាបន្ទាន់ ដើម្បីកាត់បន្ថយផលប៉ះពាល់នៃជម្លោះលើជនស៊ីវិល រួមទាំងការបង្កើតបរិយាកាសសុវត្ថិភាព និងអំណោយផល ដើម្បីធានាដល់ការផ្តល់ជំនួយមនុស្សធម៌ទាន់ពេលវេលា និងប្រកបដោយសុវត្ថិភាព ។សេចក្តីថ្លែងការណ៍បានសម្តែងការគាំទ្រចំពោះកិច្ចខិតខំប្រឹងប្រែងជាបន្តបន្ទាប់របស់មជ្ឈមណ្ឌលអាស៊ានដើម្បីសម្របសម្រួលជំនួយមនុស្សធម៌ និងគ្រប់គ្រងគ្រោះមហន្តរាយ (AHA Centre) ក៏ដូចជាគំនិតផ្តួចផ្តើមមនុស្សធម៌ឆ្លងព្រំដែនដោយប្រទេសថៃ ស្របតាមកិច្ចព្រមព្រៀងឯកច្ឆ័ន្ទ ៥ ចំណុច ខណៈសេចក្ដីថ្លែងការណ៍នោះក៏បានគូសបញ្ជាក់ពីការសម្របសម្រួលជាមួយឡាវ ដែលជាប្រធានអាស៊ានឆ្នាំ ២០២៤ តាមរយៈបេសកជនពិសេសរបស់ខ្លួនប្រចាំប្រទេសមីយ៉ាន់ម៉ា ។
លើសពីនេះទៀត រដ្ឋមន្ត្រីការបរទេសអាស៊ានក៏បានអំពាវនាវឲ្យមានការសម្របសម្រួលលើសកម្មភាពជំនួយមនុស្សធម៌ និងជំរុញកិច្ចសន្ទនាថ្នាក់ជាតិទ្រង់ទ្រាយធំ សំដៅសម្រេចបាននូវដំណោះស្រាយនយោបាយដ៏យូរអង្វែង និងទូលំទូលាយនៅក្នុងប្រទេសមីយ៉ាន់ម៉ា ។អំឡុងការប៉ះទង្គិចគ្នាកាលពីដើមខែ ទាហានរបបសឹកមួយចំនួនបានរត់ទៅជ្រកកោននៅក្រោមស្ពានមួយ ដែលតភ្ជាប់ទីក្រុង Myadwaddy ទៅកាន់ទីក្រុង Mae Sot របស់ថៃ។ នេះបើតាមក្រុមប្រដាប់អាវុធជនជាតិភាគតិច ។ អ្នកនាំពាក្យទព័ព្រៃ Karen National Union (KNU) ម្នាក់បានបញ្ជាក់ប្រាប់ AFP ថា កងកម្លាំងរបស់ខ្លួនកំពុងវាយប្រយុទ្ធគ្នាជាមួយកងកម្លាំងរបបសឹកក្នុងទីក្រុង Myawaddy ពិតមែន តែមិនបានបញ្ជាក់អ្វីលម្អិតឡើយ។ រហូតដល់ព្រឹកថ្ងៃសៅរ៍នេះ អង្គភាពយោធាថៃមួយឈរជើងនៅជាប់ព្រំដែនមីយ៉ាន់ម៉ាបានអះអាងថា ការវាយប្រយុទ្ធគ្នាកំពុងកើតឡើង ដោយកងកម្លាំងមួយក្រុមកំពុងវាយប្រហារលើកងកម្លាំងរបបសឹកដែលកំពុងជ្រកកោននៅក្រោមស្ពាន។
គួរបញ្ជាក់ថា Myawaddy គឺជាទីក្រុងពាណិជ្ជកម្មដ៏សំខាន់មួយសម្រាប់របបសឹកមីយ៉ាន់ម៉ា ដែលមានទំហំពាណិជ្ជកម្ម ១.១ពាន់លានដុល្លារឆ្លងកាត់ក្នុងរយៈពេល១២ខែ គិតត្រឹមខែមេសានេះ។
គួរបញ្ជាក់ថា មីយ៉ាន់ម៉ាធ្លាក់ក្នុងភាពចលាចល ចាប់តាំងពីយោធាបានធ្វើរដ្ឋប្រហារដណ្ដើមអំណាចពីរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីខែកុម្ភៈ ឆ្នាំ២០២១ មកម្ល៉េះ ដោយប្រែក្លាយប្រទេសប្រកាន់លទ្ធិប្រជាធិបតេយ្យអស់រយៈពេលមួយទសវត្សរ៍មួយនេះ ទៅជាការគ្រប់គ្រងដោយរបបយោធា ហើយថែមទាំងប្រើកម្លាំងបង្ក្រាបលើប្រជាជនស្លូតត្រង់ឲ្យស្លាប់បាត់បង់ជីវិតប្រមាណ ៣,២០០ នាក់ផងដែរ ៕
