អាមេរិកប្រកាសជួយផងលក់អាវុធផងឲ្យអ៊ុយក្រែន
21-September-2026 / ព័ត៌មានអន្តរជាតិ
អ៊ុយក្រែន៖រដ្ឋមន្ត្រីក្រសួងការបរទេសអាម៉េរិកលោកអ៊ែនថូនី ប្លីងកិនក្នុងអំឡុងពេលលោកនិងរដ្ឋមន្ត្រីការពារជាតិឡយ អូស្ទីន បានធ្វើទស្សនកិច្ចមកជួបប្រធានាធិបតីអ៊ុយក្រែននៅទីក្រុងគៀវកាលពីថ្ងៃអាទិត្យទី២៤មេសាដែលជាដំណើរទស្សនកិច្ចរបស់មន្ត្រីជាន់ខ្ពស់អាម៉េរិកលើកដំបូងនៅអ៊ុយក្រែនចាប់តាំងពីរុស្ស៊ីចូលឈ្លានពានប្រទេសក្បែរខាងខ្លួនកាលពីចុងខែកុម្ភៈនិយាយថា រុស្ស៊ីនឹងបរាជ័យក្នុងការសំរេចគោលដៅនៃសង្គ្រាមរបស់ខ្លួន ហើយ«អ៊ុយក្រែននឹងទទួលជោគជ័យ»។
រដ្ឋមន្ត្រីអាម៉េរិកទាំងពីររូបបានប្រាប់ប្រធានាធិបតីអ៊ុយក្រែនលោកហ្សេលេនស្គីនិងទីប្រឹក្សារបស់គាត់ថា អាម៉េរិកនឹងផ្តល់ជំនួយជាង៣០០លានដុល្លារទៀត នៅក្នុងហិរញ្ញប្បទានយោធាបរទេស ហើយបានអនុម័តការលក់គ្រាប់រំសេវតំលៃ១៦៥លានដុល្លារដល់អ៊ុយក្រែន។លោកប្លីងកិន បានប្រាប់អ្នកយកព័ត៌មាននៅក្បែរព្រំដែនប៉ូឡូញ-អ៊ុយក្រែនកាលពីថ្ងៃចន្ទទី២៥មេសាថា « យើងមានឳកាសបង្ហាញការគាំទ្រមាំទាំដោយផ្ទាល់របស់យើងសំរាប់រដ្ឋាភិបាលនិងប្រជាជនអ៊ុយក្រែន។តាមការវិនិច្ឆយរបស់យើង នេះជាពេលសំខាន់មួយដើម្បីមកទៅទីនោះនិងជួបពិភក្សាទល់មុខគ្នាអោយលម្អិត»។
លោករដ្ឋមន្ត្រីការបរទេសអាមេរិកបានសរសើរ«សេចក្តីក្លាហាននិងភាពជាអ្នកដឹកនាំដ៏ពិសេសហើយនឹងជោគជ័យដែលអ្នកបានវាយរុញច្រានការឈ្លានពានរបស់រុស្ស៊ី»និងថាអ្នកការទូតអាម៉េរិកកំពុលវិលមកកាន់អ៊ុយក្រែនដើម្បីរៀបចំស្ថានកុងស៊ុលនៅទីក្រុងល្វីវក្បែរប៉ូឡូញឡើងវិញមុនបន្តទៅធ្វើដូចគ្នានៅទីក្រុងគៀវ។ឯលោកអូស្ទីនបាននិយាយថា ចម្លើយតបរបស់លោកហ្សេលេនស្គីចំពោះជំនួយនេះគឺការអោយតំលៃខ្ពស់បំផុតចំពោះអ្វីដែលត្រូវបានផ្តល់អោយ តែ«លោកគិតថា ពួកគេចង់ឈ្នះហើយយើងក៏គិតថាយើងចង់ជួយពួកគេអោយឈ្នះ។តាមពិត ពិភពលោកត្រូវបានញ៉ាំងទឹកចិត្តដោយអ៊ុយក្រែននៅក្នុងសង្គ្រាមនេះ ។អាម៉េរិកនឹងបន្តគាំទ្រ។អ្វីដែលអ្នកបានធ្វើនៅក្នុងការវាយរុញច្រានកងកម្លាំងរុស្ស៊ីនៅទីក្រុងគៀវពិសេសណាស់»។
លោកអូស្ទីននិងប្លីងកិន បានប្រកាសផ្តល់ហិរញ្ញប្បទានយោធាបរទេសសរុប៧១៣លានដុល្លារសំរាប់អ៊ុយក្រែន សម្ពន្ធមិត្តនិងដៃគូចំនួន១៥ប្រទេស ក្នុងនេះ៣២២លានដុល្លារលៃទុកសំរាប់អ៊ុយក្រែន។លុយនៅសល់នឹងត្រូវបែងចែកក្នុងចំណោមសមាជិកអង្គការណាតូនិងប្រទេសដទៃទៀតដែលបានផ្តល់ជំនួយយោធាដល់អ៊ុយក្រែនចាប់តាំងពីពេលផ្ទុះសង្គ្រាមមក។ជំនួយថ្មីនេះរួមបញ្ចូលទាំងការលក់គ្រាប់រំសេវមិនផលិតនៅអាម៉េរិកតំលៃ១៦៥លានដុល្លារដែលត្រូវគ្នានឹងសព្វាវុធសម័យសូវៀតដែលកងកម្លាំងអ៊ុយក្រែនកំពុងប្រើ។វានឹងនាំអោយជំនួយយោធាអាម៉េរិកសំរាប់អ៊ុយក្រែនឡើងដល់៣,៧ពាន់លានដុល្លារតាំងពីពេលរុស្ស៊ីវាយចូលអ៊ុយក្រែនកាលពីចុងខែកុម្ភៈ។
ប្រតិកម្មចំពោះទស្សនកិច្ចនេះឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក លោក Anatoly Antonov បានថ្លែងប្រាប់ទូរទស្សន៍រដ្ឋក្នុងស្រុកឱ្យដឹងថា រុស្ស៊ីបានព្រមានសហរដ្ឋអាមេរិកពីការបញ្ជូនអាវុធបន្ថែមទៀតទៅកាន់អ៊ុយក្រែន។ទីភ្នាក់ងារសារព័ត៌មាន Reuters បានស្រង់ការលើកឡើងរបស់ឯកអគ្គរដ្ឋទូតរូបនេះ ដែលបានថ្លែងនៅក្នុងបទសម្ភាសន៍ជាមួយប៉ុស្តិ៍ទូរទស្សន៍ Rossiya 24 ថា៖ «យើងបានធ្វើការបញ្ជាក់ពីការមិនអាចទទួលយកបាននៃស្ថានភាពនេះ នៅពេលដែលសហរដ្ឋអាមេរិកបញ្ជូនអាវុធចូលទៅក្នុងប្រទេសអ៊ុយក្រែនជាបន្តបន្ទាប់ ដោយយើងទាមទារឱ្យបញ្ចប់នូវការអនុវត្តសកម្មភាពបែបនេះជាបន្ទាន់»។
លោកទុតរុស្ស៊ីបន្តថា កំណត់ទូតផ្លូវការមួយដែលបង្ហាញពីការព្រួយបារម្ភរបស់រុស្ស៊ី ក៏ត្រូវបានផ្ញើទៅកាន់ទីក្រុងវ៉ាស៊ីនតោនផងដែរ។
កាលពីដើមខែមេសាកន្លងទៅ ប្រធានាធិបតីអាមេរិក លោក ចូ បៃឌិន ក៏បានប្រកាសផ្ដល់ជំនួយយោធាចំនួន៨០០លានដុល្លារបន្ថែមទៀតដល់អ៊ុយក្រែន ដោយពង្រីកវិសាលភាពនៃប្រព័ន្ធនានា ដែលរួមមានកាំភ្លើងធុនធ្ងន់ផងដែរ។ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្គ្រាមមួយដោយប្រធានាធិបតី លោក វ្លាឌីមៀរ ពូទីន។
