វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1313 នាក់
ម្សិលមិញ 5020 នាក់
សរុប 14116760 នាក់
ខេត្តព្រះសីហនុ៖ទីតាំងរបងសំណង់ដែលសង់រំលោភឆ្នេរអូរឈើទាល ត្រូវបានអាជ្ញាធរខេត្តវាយកម្ទេចចោលជាស្ថាពរហើយ ក្រោយរងការរិះគន់ និងមានការផ្សព្វផ្សាយពីបណ្ដាញសារព័ត៌មាន។អភិបាលរងខេត្ត និងជាអ្នកនាំពាក្យសាលាខេត្តព្រះសីហនុ លោក ឡុង ឌីម៉ង់ បញ្ជាក់នៅថ្ងៃទី៩ ខែកុម្ភៈ ឆ្នាំ២០២៣នេះថា អាជ្ញាធរខេត្តបានទទួលគោលការណ៍ពីសម្តេចនាយករដ្ឋមន្ត្រី ហ៊ុន សែន ឱ្យសម្របសម្រួលជាមួយម្ចាស់កម្មសិទ្ធិដីនៅតំបន់ឆ្នេរអូរឈើទាល ហើយក៏ឈានទៅដល់ការវាយកម្ទេចរបងដែលសង់លើតំបន់ឆ្នេរនោះ កាលពីយប់ថ្ងៃទី៨ ខែកុម្ភៈនេះ អស់ហើយ។នៅត្រង់ថាតើនឹងត្រូវដកហូតដីនៅតំបន់ឆ្នេរមកឱ្យរដ្ឋគ្រប់គ្រងវិញ ឬត្រូវបន្តបែបណាទៀត គឺត្រូវរង់ចាំមើលបន្តទៅមុខទៀតសិន។
លោកបញ្ជាក់ថា៖ «ដូចខ្ញុំបានជម្រាបខាងដើមអ៊ីចឹង ថាគោលការណ៍ណែនាំដែលយើងបានមក គឺយើងបានត្រឹមសម្របសម្រួលជាមួយម្ចាស់ ក្នុងការវាយរបងប៉ែកខាងសមុទ្រចេញ។ យើងអត់មានការណែនាំថាត្រូវដកមកវិញ ដកអី យើងមិនមែនជាអ្នកដកទេ។ ដូចខ្ញុំតែងតែបញ្ជាក់អ៊ីចឹងថា ដែនសមត្ថកិច្ចរបស់រដ្ឋបាលខេត្តមិនមានសិទ្ធិក្នុងការដកហូតដីដែលមានបណ្ណកម្មសិទ្ធិបានទេ។ អ្នកដកហូតបាន មានតែរាជរដ្ឋាភិបាល មានតែសាលក្រមតុលាការអីអ៊ីចឹងទៅណា »។
បើពិនិត្យដោយផ្ទាល់ឃើញថា របងដែលរៀបចំស្ទើរដូចជាជញ្ជាំងផ្ទះថ្មមួយទៅហើយនេះ មានគម្លាតពីទឹកសមុទ្រប្រមាណ ១២ម៉ែត្រ នៅពេលទឹកនាច ហើយនៅពេលទឹកជោរវិញ ចម្ងាយពីរបងទៅទឹកសមុទ្រចន្លោះប្រហែលពី ៤ ៥ម៉ែត្រប៉ុណ្ណោះតែគ្មានអ្នកណាដឹងថាទីតាំងនេះអស់លោកណាជាម្ចាស់កម្មសិទ្ធនោះទេ ។ កាលពីថ្ងៃទី២ ខែកុម្ភៈ ឡុង ឌីម៉ង់ អភិបាលរងខេត្ត និងជាអ្នកនាំពាក្យសាលាខេត្តព្រះសីហនុ បានបដិសេធជាមួយកាសែតថាក្នុងនាមរដ្ឋបាលខេត្ត មិនអាចផ្តល់ការអត្ថាធិប្បាយជុំវិញកិច្ចការសម្ងាត់ ថាតើអ្នកណាជាម្ចាស់កម្មសិទ្ធិនេះបានទេ ព្រោះនាំឱ្យប៉ះពាល់ទៅដល់សិទ្ធិឯកជនរបស់នីតិបុគ្គល៖ «ដីហ្នឹងដីមានបណ្ណកម្មសិទ្ធិរួចហើយ។ នៅក្នុងបណ្ណកម្មសិទ្ធិ ដូចជាក្រុមហ៊ុន។ ខ្ញុំបញ្ជាក់ជូនអត់កើត ព្រោះបណ្ណកម្មសិទ្ធិ គេអត់ឱ្យយើងបញ្ចេញឈ្មោះជាសាធារណៈទេ»។
លោក ឡុង ឌីម៉ង់ ត្រូវបានកាសែតក្នុងស្រុកស្រង់សម្ដីមកចុះផ្សាយថា ទីតាំងដីដែលរងការរិះគន់ ជាអតីតទីស្នាក់ការវរៈនគរបាលការពារព្រំដែនទឹក។ ផ្ទៃដីជាង ៨ពាន់ម៉ែត្រការ៉េនេះ (៨ ៤០០) ដែលស្ថិតនៅក្នុងសង្កាត់លេខ៤ ក្រុងព្រះសីហនុនេះ ត្រូវបានរដ្ឋាភិបាលធ្វើអនុបយោគពីដីសាធារណៈរបស់រដ្ឋ មកជាដីឯកជនរបស់រដ្ឋ កាន់កាប់ដោយក្រុមហ៊ុនឯកជនមួយនៅអំឡុងឆ្នាំ២០០៧ ហើយនៅឆ្នាំ២០០៨ រដ្ឋបានចេញបណ្ណកម្មសិទ្ធិស្របច្បាប់ឱ្យទៅនីតិបុគ្គលធ្វើជាម្ចាស់កម្មសិទ្ធិ រហូតដល់ពេលបច្ចុប្បន្ន។ដីនេះ កុំថាឡើយរដ្ឋបាលខេត្ត និងស្ថាប័នដែលពាក់ព័ន្ធ ដែលព្យាយាមលាក់បាំងព័ត៌មានអំពីម្ចាស់កម្មសិទ្ធិ សូម្បីពលរដ្ឋដែលរស់នៅក្នុងខេត្តព្រះសីហនុ ក៏សុទ្ធតែបានអះអាងដូចគ្នាថា ដីនេះមិនដឹងជារបស់អ្នកណានោះទេ។
គេនៅចាំបានថាកាលពីថ្ងៃទី២៥ ខែមករា ឆ្នាំ២០១៩ លោក ជា សុផារ៉ាឧបនាយករដ្ឋមន្ត្រីរដ្ឋមន្ត្រីក្រសួងដែនដីនគរូបនីយ៍កម្មនិងសំណង់ ក្នុងនាមជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ជំរុញឱ្យអាជ្ញាធរខេត្តដែលនៅជាប់ឆ្នេរសមុទ្រ រួមមាន ខេត្តព្រះសីហនុ កំពត កែប និងខេត្តកោះកុង ត្រូវចូលរួមទប់ស្កាត់ការទន្ទ្រានកាន់កាប់ដីសាធារណៈ ដីចំណីឆ្នេរ ដីចំណីដៃសមុទ្រ ស្ទឹង ព្រែក និងផ្លូវទឹកដែលតភ្ជាប់ទៅសមុទ្រ ដូចការកំណត់របស់រដ្ឋាភិបាលលេខ០១ ស្តីពីការអភិវឌ្ឍតំបន់ឆ្នេរសមុទ្រ និងប្លង់សុរិយោដីដែលបានកំណត់ជាធរមាន។
ចំណែកសេចក្តីជូនដំណឹងរបស់រដ្ឋាភិបាលដែលចេញកាលពីដើមខែកុម្ភៈ ឆ្នាំ២០១២ កំណត់ថា ឆ្នេរសមុទ្រត្រូវកំណត់ចាប់ពីខ្សែបន្ទាត់ទឹកជោរខ្ពស់បំផុតនៃទឹកសមុទ្រឡើងមកលើ រហូតដល់ខ្សែបន្ទាត់ហាមឃាត់ការកាន់កាប់ ឬសាងសង់ជាថ្ម ដី ឬខ្សាច់ ដែលបានកំណត់ទុកជាតំបន់សម្រាប់ប្រើប្រាស់ជាសាធារណៈ និងត្រូវចាត់ថ្នាក់ជាដីសាធារណៈរបស់រដ្ឋ។ការកំណត់ថាជាទំហំឆ្នេរសមុទ្រ គឺរាប់សម្រាប់ឆ្នេរជម្រាល ត្រូវកំណត់យ៉ាងតិច ៣០ម៉ែត្រ ចាប់ពីខ្សែបន្ទាត់ទឹកជោរខ្ពស់បំផុត ទៅដល់ដីគោក។ ចំណែកឆ្នេរចោទវិញ ត្រូវកំណត់យ៉ាងតិច ២០ម៉ែត្រ ចាប់ពីចំណុចកំពូលនៃផ្ទៃចោទមកដីគោក។ នៅក្នុងបញ្ញត្តិស្តីពីការអភិវឌ្ឍតំបន់ឆ្នេរសមុទ្រនេះដែរ ដីឆ្នេរសមុទ្រគឺហាមសាងសង់សំណង់រឹង លើកលែងតែការសាងសង់នោះបម្រើឱ្យសេចក្តីត្រូវការសម្រាប់ប្រយោជន៍សាធារណៈ។
ទោះបីយ៉ាងណាបើតាមប្រជាពលរដ្ឋនៅខេត្តព្រះសីហនុនិយាយថា «នៅក្រុងព្រះសីហនុ នៅពេលបច្ចុប្បន្ននេះ ខ្ញុំសង្កេតឃើញថាមានឆ្នេរបីបួនដែលមានសំណង់រឹងនៅលើចំណីឆ្នេរ មានដូចជាឆ្នេរព្រែកត្រែង។ ឆ្នេរព្រែកត្រែង មានផ្នែកខ្លះហ្នឹងត្រូវបានឯកជនគាត់ចាក់ដីទន្ទ្រានយករហូតដល់មាត់សមុទ្រតែម្តង។ មានខ្លះទៀត ដូចជា នៅឆ្នេរម្លប់ជ្រៃ ក៏មានសំណង់រឹងធំ ស្កឹមស្កៃ ហើយដូចជា ឆ្នេរឯករាជ្យ ជាក់ស្តែងហ្នឹង មានផ្នែកខ្លះ! ហើយឆ្នេរអូរឈើទាល យើងឃើញថាទើបតែថ្មីៗនេះ។ ជាក់ស្តែង នៅក្រុងព្រះសីហនុ យើងឃើញថា នៅសល់តែឆ្នេរអូរត្រេះទេ មិនទាន់មានសំណង់រឹងណាក្រៅពីមានកំពង់ផែមួយគេសង់នៅលើសមុទ្រ »៕