ការស្ទង់មតិកូនស្រីរបស់លោកថាក់ស៊ីនលេចធ្លោសម្រាប់តំណែងនាយករដ្ឋមន្ត្រីក្នុងពេលប្រាយុទ្ធថាបន្តឈរឈ្មោះទៀត
21-September-2026 / ព័ត៌មានអន្តរជាតិ
ប្រទេសថៃ៖តាមការស្ទង់មតិរបស់វិទ្យាស្ថានជាតិអភិវឌ្ឍន៍របស់ប្រទេសថៃបានប្រកាសឱ្យដឹងថា លោកស្រីប៉ៃតុងតនអ៊ុងអ៊ិង( Paetongtarn “Ung-ing” Shinawatra )កូនស្រីរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា នៅតែជាជម្រើសកំពូលសម្រាប់នាយករដ្ឋមន្ត្រីថៃក្នុងការបោះឆ្នោតនាឆ្នាំ២០២៣។កាសែតបាងកកប៉ុស្តិ៍បានផ្សាយឲ្យដឹងថា ការស្ទង់មតិនេះត្រូវបានធ្វើឡើងពីថ្ងៃទី១៧ ដល់ថ្ងៃទី ២២ ខែធ្នូ តាមរយៈការសម្ភាសន៍តាមទូរស័ព្ទជាមួយមនុស្ស ២០០០ នាក់ដែលមានអាយុចាប់ពី១៨ឆ្នាំឡើងទៅមកពីកម្រិតអប់រំ មុខរបរ និងប្រាក់ចំណូលផ្សេងៗនៅទូទាំងប្រទេសនិងវាស់ស្ទង់កម្រិតគាំទ្ររបស់បេក្ខជនដែលមានសក្តានុពលសម្រាប់នាយករដ្ឋមន្ត្រី និងគណបក្សនយោបាយនៅក្នុងការបោះឆ្នោតសកលនាពេលខាងមុខ។
កូនស្រីរបស់អតីតនាយករដ្ឋមន្ត្រីថាក់ស៊ីន ទទួលបានសំឡេងគាំទ្រ ៣៤% នាំមុខលើនាយករដ្ឋមន្ត្រីកំពុងកាន់អំណាច ប្រាយុទ្ធ ចាន់អូចា ដែលមានសំឡេងគាំទ្រតែ ១៤.០៥% និងលោកស្រី ភីតា លីមចារ៉ុនរ៉ាត់ មេដឹកនាំគណបក្សរីកចម្រើន ១៣.២៥% ។ចំនួនការគាំទ្របច្ចុប្បន្នសម្រាប់លោកស្រីប៉ៃតុងតនស៊ីណាវ៉ាត្រា( Paetongtarn Shinawatra )បានកើនឡើងពី ២២% នៅក្នុងការស្ទង់មតិប្រចាំត្រីមាសដែលបានធ្វើឡើងនៅក្នុងខែកញ្ញាឆ្នាំ២០២២។គណបក្សភឿថៃបានចាប់ផ្តើមយុទ្ធនាការបោះឆ្នោតរបស់ខ្លួនក្នុងខែនេះ ក្នុងគោលបំណងដើម្បីគ្រប់គ្រងរដ្ឋាភិបាលនៅក្នុងការបោះឆ្នោតបន្ទាប់។ គណបក្សភឿថៃបានសន្យាថានឹងដំឡើងប្រាក់ឈ្នួលអប្បបរមាចំនួន 70% នៅចុងបញ្ចប់នៃអាណត្តិរយៈពេល៤ឆ្នាំ និងជំរុញកំណើនសេដ្ឋកិច្ចជាមធ្យម ៥% ជារៀងរាល់ឆ្នាំ ប្រសិនបើខ្លួនឡើងកាន់អំណាច។
យោងតាមក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិរបស់ប្រទេសថៃ ផលិតផលក្នុងស្រុកសរុប (GDP) នៅខែកក្កដា ដល់ខែកញ្ញា បានកើនឡើង 4.5 ភាគរយពីមួយឆ្នាំទៅមួយឆ្នាំ ដោយសារការកើនឡើងនៃវិស័យទេសចរណ៍ និងការប្រើប្រាស់ផ្ទាល់ខ្លួនកើនឡើង។សម្រាប់នាយករដ្ឋមន្ត្រីថៃ លោក ប្រាយុទ្ធ ចាន់អូចាវិញ បានថ្លែងប្រាប់ប្រព័ន្ធផ្សព្វផ្សាយក្នុងស្រុក នៅថ្ងៃសុក្រនេះឱ្យដឹងថា រូបលោកនឹងបន្តឈរឈ្មោះសម្រាប់អាណត្តិក្រោយមួយទៀត ក្នុងការបោះឆ្នោតសកលដែលនឹងត្រូវធ្វើឡើងក្នុងខែឧសភា ឆ្នាំក្រោយ។ទីភ្នាក់ងារសារព័ត៌មាន CNAបានឲ្យដឹងថា៖ថ្លែងប្រាប់អ្នកសារព័ត៌មាននៅខាងក្រៅវិមានរដ្ឋាភិបាល ក្នុងទីក្រុងបាងកក នាយករដ្ឋមន្ត្រីថៃខាងលើនេះបានលើកឡើងថា គណបក្សថៃរួបរួមជាតិ (United Thai Nation Party) ដែលទើបតែបង្កើតឡើងថ្មី បានផ្តល់ការគាំទ្រដល់រូបលោក ក្នុងការក្លាយជាបេក្ខជននាយករដ្ឋមន្ត្រីបន្ទាប់ទៀត នៅក្នុងការបោះឆ្នោតដែលនឹងធ្វើឡើងនៅពេលខាងមុខ។ លោកប្រាយុទ្ធថា៖ «ខ្ញុំសូមធ្វើការបញ្ជាក់ឱ្យបានច្បាស់នៅក្នុងថ្ងៃនេះថា ខ្ញុំបានសម្រេចចិត្តថា ខ្ញុំនឹងចូលរួមប្រកួតប្រជែងក្នុងតំណែងនេះបន្តទៀត»។
ការប្រកាស នេះ បានបង្ហាញឱ្យឃើញយ៉ាងច្បាស់ថា រូបលោកប្រាយុទ្ធក៏នឹងចាកចេញពីគណបក្ស ផាឡាំង ប្រាឆារ៉ាត់ (PPRP) របស់ខ្លួនដែលកំពុងតែកាន់អំណាចនេះផងដែរ។គួរបញ្ជាក់ថា លោក ប្រាយុទ្ធ ចាន់អូចា បានឡើងកាន់តំណែងជាប្រមុខយោធា ក្រោយការធ្វើរដ្ឋប្រហារកាលពីខែសីហា ឆ្នាំ២០១៤ និងត្រូវបានជ្រើសរើសជានាយករដ្ឋមន្ត្រីបន្ទាប់ពីការបោះឆ្នោតសកលឆ្នាំ២០១៩។ការប្តូគណបក្សដើម្បីឈរឈ្មោះបែបនេះមិនទាន់ដឹងថាតើមានការប្រឆាំងជំទាស់បែបណានោះទេ។តែបើលោកអាចឈរបានបន្តទៀតគេជឿថាគណបក្សផ្សេងលំបាកយកឈ្នះព្រោះក្នុងពេលលោកកាន់អំណាចលោកបានកែរដ្ឋធម្មនុញ្ញថៃដោយតែងតាំងសមាជិកព្រិទ្ថសភា២៥០នាក់សម្រាប់ជួយបោះឆ្នោតគាំទ្រលោកនាពេលកន្លងមក៕
