អាមេរិកប្រកាសពីការផ្តល់ប្រពន្ធការពារដែនអាកាសប៉ាទ្រីយូតដល់អ៊ុក្រែននិងសន្យាជួយរហូតចប់
27-March-2024 / ព័ត៌មានអន្តរជាតិ
អាមេរិក៖ សហរដ្ឋអាមេរិក នៅថ្ងៃពុធសប្ដាហ៍នេះបានទទួលស្គាល់ជាផ្លូវការហើយថាខ្លួននឹងបញ្ជូនប្រព័ន្ធខែលប្រឆាំងមីស៊ីល ប៉ាទ្រីយ៉ូត (Patriot) ឱ្យអ៊ុយក្រែន ដើម្បី ទប់ទល់នឹងការទម្លាក់គ្រាប់បែក និងការវាយប្រហារតាមផ្លូវអាកាសពីសំណាក់រុស្ស៉ី។ ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២២ ខែធ្នូ ឆ្នាំ២០២២បានឲ្យដឹងថា៖ប្រព័ន្ធខែលប្រឆាំងមីស៊ីលប៉ាទ្រីយ៉ូត (Patriot) នឹងត្រូវផ្ដល់ឱ្យអ៊ុយក្រែន នៅក្រោមកញ្ចប់ជំនួយយោធា ១.៨៥ពាន់លានដុល្លារ ដែលត្រូវបានប្រកាសចំពេល ប្រធានាធិបតីអ៊ុយក្រែន លោក ហ្សេលេនស្គី បំពេញទស្សនកិច្ចនៅសហរដ្ឋអាមេរិក ដែលជាទស្សនកិច្ចលើកដំបូងរបស់លោកនៅក្រៅប្រទេសចាប់តាំងពីសង្គ្រាម ផ្ទុះឡើងកាលពីថ្ងៃទី២៤ ខែកុម្ភៈមក។
ថ្លែងនៅក្នុងសន្និសីទសារព័ត៌មានរួមគ្នាជាមួយលោក ហ្សេលេនស្គី នៅឯសេតវិមាន លោកប្រធានាធិបតីអាមេរិក ចូ បៃដិន ក៏បានបញ្ជាក់បន្ថែមដែរថាសហរដ្ឋអាមេរិក នឹងបណ្ដុះបណ្ដាលទាហានអ៊ុយក្រែន ពីរបៀបប្រើប្រាស់ប្រព័ន្ធខែលប្រឆាំងមីស៊ីលប៉ាទ្រីយ៉ូត (Patriot) ដែលនឹងត្រូវចំណាយពេលវេលាមួយចំនួន។ ប៉ុន្តែ លោក បៃដិន នៅតែសង្កត់ធ្ងន់ថាប្រព័ន្ធខែលប្រឆាំងមីស៊ីលនេះត្រូវផ្ដល់ឱ្យអ៊ុយក្រែន ដើម្បីការពារខ្លួនប្រឆាំងនឹងការឈ្លានពានរបស់រុស្ស៉ីតែប៉ុណ្ណោះ។
រឿងជំនួយកាំច្រួចប៉ាទ្រីយូតនេះឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក លោក អាណាតូលី អាន់តូនូវ (Anatoly Antonov) បាននិយាយនៅថ្ងៃពុធសប្តាហ៍នេះថា សកម្មភាពបង្កហេតុរបស់សហរដ្ឋអាមេរិក នៅអ៊ុយក្រែននឹងនាំឲ្យមានការកើនឡើង ជាលំដាប់ដោយចៀសមិនរួច នូវផលវិបាកដែលអាចមិនអាចទាយទុកជាមុនបាន។ នេះបើយោងតាមការចុះផ្សាយដោយ សារព័ត៌មានរុស្ស៉ី TASS នៅថ្ងៃព្រហស្បតិ៍ ទី២២ ខែធ្នូ ឆ្នាំ២០២២។លោក អាន់តូនូ បានគូសបញ្ជាក់ថា «ទោះបីជាមានការព្រមានរបស់យើងក្តី ប្រព័ន្ធការពារដែនអាកាស Patriot នឹងត្រូវបញ្ជូនទៅទីក្រុងកៀវ ប៉ុន្តែអ៊ុយក្រែនមិនមានអ្នកឯកទេស ដើម្បីធ្វើការលើប្រព័ន្ធអាវុធទាំងនេះទេ ដូច្នេះតើអ្នកទាំងនោះអាចជាអ្នកឯកទេសអាមេរិក ឬជាពលរដ្ឋនៃប្រទេសណាតូផ្សេងទៀត? សព្វាវុធកំពុងត្រូវបានបំផ្លាញ ជាប្រព័ន្ធដោយយោធារបស់យើង។ ខ្ញុំគិតថាអ្នករាល់គ្នាយល់យ៉ាងច្បាស់ អំពីជោគវាសនានៃបុគ្គលិករបស់ខ្លួន ចំពោះការប្រឈមមុខនៅលើទឹកដីអ៊ុយក្រែន»។ឯកអគ្គរដ្ឋទូតរុស្ស៉ីប្រចាំសហរដ្ឋអាមេរិករូបនេះ បានបន្ថែមថា «ខ្ញុំចង់បញ្ជាក់ថា យើងបានព្យាយាមម្តងហើយម្តងទៀត ហើយនៅតែព្យាយាមអំពាវនាវដោយសុភវិនិច្ឆ័យនៅគ្រប់កម្រិត។ ការពិភាក្សាអំពីការផ្គត់ផ្គង់មីស៊ីល ATACMS និងដ្រូនរយៈចម្ងាយឆ្ងាយ UAVs ដល់ប្រជាជនអ៊ុយក្រែន គឺជាការរំខានយ៉ាងខ្លាំង»។
ប្រធានាធិបតីអាមេរិក លោក Joe Biden បាននិយាយនៅក្នុងការបង្ហាញខ្លួនរួមគ្នា ជាមួយសមភាគីអ៊ុយក្រែនលោក Vladimir Zelensky ក្នុងទីក្រុង វ៉ាស៊ីនតោន នៅថ្ងៃព្រហស្បតិ៍ទី២២ខែធ្នូនេះថា ការផ្តល់ឲ្យទីក្រុងកៀវ នូវសព្វាវុធទាំងអស់ដែលខ្លួនចង់បាន អាចធ្វើឲ្យអង្គការណាតូ បែកបាក់គ្នា។តែ លោក Biden បន្ថែមថា លោកមិនព្រួយបារម្ភថា ការបញ្ជូនមីស៊ីល Patriot ទៅឲ្យអ៊ុយក្រែន អាចបង្កើនភាពតានតឹងជាមួយរុស្ស៊ី ដូចដែលទីក្រុងមូស្គូ បានព្រមាននោះទេ ពីព្រោះវាជាអាវុធការពារ។
លោក Biden និងលោក Zelensky បានឆ្លើយសំណួររបស់អ្នកយកព័ត៌មានចំនួន៤នាក់ បន្ទាប់ពីកិច្ចប្រជុំរបស់មេដឹកនាំទាំង២នៅសេតវិមាន។ សំណួរចុងក្រោយ គឺរបស់អ្នកកាសែតអ៊ុយក្រែនដែលសួរថា ហេតុអ្វីបានជាលោកខាងលិចមិនផ្តល់ឲ្យអ៊ុយក្រែននូវគ្រប់អាវុធ ដែលខ្លួនត្រូវការដើម្បី រំដោះទឹកដីទាំងអស់?លោក Biden ឆ្លើយថា “មែនហើយ”។ បន្ទាប់មក លោកបានចង្អុលបង្ហាញថា សហរដ្ឋអាមេរិក បានប្រគល់ជំនួយសន្តិសុខយ៉ាងច្រើនដល់អ៊ុយក្រែន សូម្បីតែមុនពេលអរិភាពកើនឡើងក្នុងខែកុម្ភៈក៏ដោយ។មេដឹកនាំអាមេរិកបានទទូចថា “យើងបានផ្តល់ឲ្យអ៊ុយក្រែន នូវអ្វីដែលពួកគេត្រូវការ នៅពេលដែលពួកគេត្រូវការដើម្បីការពារខ្លួន។ ការធ្វើបន្ថែមទៀតនឹងមានលទ្ធភាពនៃការបំបែកបំបាក់អង្គការណាតូ, បំបែកបំបាក់ទ្វីបអឺរ៉ុប និងពិភពលោកទាំងមូល”។
លោកបន្តថា លោកបានចំណាយពេលរាប់រយម៉ោង ដើម្បីបញ្ចុះបញ្ចូលដៃគូសហរដ្ឋអាមេរិកនៅជុំវិញពិភពលោក ឲ្យជួយអ៊ុយក្រែន ប៉ុន្តែពួកគេ មិនស្វែងរកសង្គ្រាមលោកលើកទី៣ ដោយប្រយុទ្ធជាមួយរុស្ស៊ីដោយផ្ទាល់នោះទេ។ប្រទេសរុស្ស៊ីបាននិយាយថា ការផ្គត់ផ្គង់ប្រព័ន្ធខែលមីស៊ីល Patriot របស់សហរដ្ឋអាមេរិកដល់អ៊ុយក្រែន ដែលបានប្រកាសក្នុងអំឡុងពេលដំណើរទស្សនកិច្ចរបស់ប្រធានាធិបតីអ៊ុយក្រែន លោក Volodymyr Zelenskyy ទៅកាន់ទីក្រុងវ៉ាស៊ីនតោន នឹងមិនជួយដោះស្រាយជម្លោះ ឬរារាំងប្រទេសរុស្ស៊ីពីការសម្រេចបាននូវគោលដៅរបស់ខ្លួនឡើយ. ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២២ ខែធ្នូ ឆ្នាំ២០២២បានឲ្យដឹងថា៖ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា មិនមានសញ្ញានៃការត្រៀមខ្លួនសម្រាប់កិច្ចចរចាសន្តិភាពក្នុងអំឡុងពេលដំណើរទស្សនកិច្ចរបស់លោកZelenskyy ឡើយ ដែលនេះបានបង្ហាញយ៉ាងច្បាស់ថា សហរដ្ឋអាមេរិកកំពុងធ្វើសង្គ្រាមប្រូកស៊ីជាមួយរុស្ស៊ី។
