វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4822 នាក់
ម្សិលមិញ 5378 នាក់
សរុប 14084115 នាក់
ឥណ្ឌាប៉ាគិស្ថាន៖សហរដ្ឋអាមេរិក នៅថ្ងៃពុធទី៧សីហា បានគាំទ្រឲ្យមានកិច្ចពិភាក្សាគ្នាដោយផ្ទាល់ រវាងប្រទេសឥណ្ឌា និងប្រទេសប៉ាគីស្ថាន ស្តីពីតំបន់មានជម្លោះ កាស្មៀរ និងបានស្នើរក្សាភាពស្ងប់ស្ងាត់ និងភាពអំណត់ ។ មន្ត្រីនាំពាក្យក្រសួងការបរទេស សហរដ្ឋអាមេរិក ថា “យើងបន្តធ្វើការគាំទ្រឲ្យមានការពិភាក្សាគ្នាដោយផ្ទាល់ រវាងប្រទេសឥណ្ឌានិងប្រទេសប៉ាគីស្ថាន ស្តីពីតំបន់កាស្មៀរ និងបញ្ហាដ៏គួរឲ្យព្រួយបារម្ភផ្សេងៗដទៃទៀត”។
សូមបញ្ចាក់ថាស្ថានភាពរវាងឥណ្ឌា នឹងប៉ាគីស្ថានកាន់តែតានតឹង ខ្លាំងឡើង ក្រោយពេលឥណ្ឌាដកសិទ្ធិស្វ័យភាពដែនដីកាស្មៀរ ហើយបញ្ជូនទាហានរាប់ពាន់នាក់ទៅកាន់ទីនោះ រីឯប៉ាគីស្ថាន ប្រកាសបណ្តេញទូតឥណ្ឌា និងកោះហៅទូតរបស់ខ្លួនពីទីក្រុងញូវដេលី, បន្ថយទំនាក់ទំនង និងផ្អាកពាណិជ្ជកម្មជាមួយឥណ្ឌា ។នៅថ្ងៃចន្ទទី៥សីហា ដើមសប្តាហ៍នេះ នាយករដ្ឋមន្ត្រីឥណ្ឌា បានចេញក្រឹត្យប្រកាសលុបចោលលក្ខន្តិកៈពិសេសតំបន់ Jammu និងកាស្មៀរ ហើយដកស្វ័យភាពគ្រប់គ្រងតំបន់កាស្មៀរ មកដាក់ក្រោមការត្រួតត្រារបស់រដ្ឋបាលសហព័ន្ធឥណ្ឌាវិញ។ សេចក្តីសម្រេចនេះ ធ្វើឱ្យប៉ាគីស្ថានក្តៅស្លឹកត្រចៀកជាខ្លាំង។
ជាប្រតិកម្មឆ្លើយតបយ៉ាងក្តៅនិងជាបន្ទាន់ ប៉ាគីស្ថាន បានកាត់ផ្តាច់ទំនាក់ទំនងពាណិជ្ជកម្មទ្វេភាគជាមួយឥណ្ឌា។ ហើយក្រៅពីផ្តាច់ចំណងសេដ្ឋកិច្ច, ប៉ាគីស្ថាន ថែមទាំងដាច់ផ្តាច់ចំណងទូតថែមទៀតនៅថ្ងៃទី៨សីហា ដោយដេញឯកអគ្គរដ្ឋទូតឥណ្ឌាឱ្យចេញពីក្រុងអ៊ីស្លាម៉ាបាដ ហើយកោះហៅឯកអគ្គរដ្ឋទូតរបស់ខ្លួនប្រចាំនៅក្រុងញូវដេលី ឱ្យត្រឡប់ចូលស្រុកវិញ។ ពលរដ្ឋប៉ាគីស្ថានមួយចំនួន បានធ្វើបាតុកម្មមិនសប្បាយចិត្ត ហើយដុតទង់ជាតិឥណ្ឌាចោលថែមទៀតផង។
រដ្ឋមន្ត្រីក្រសួងការបរទេសឥណ្ឌា បានលើកឡើង នៅថ្ងៃព្រហស្បតិ៍ ទី៨សីហា ថាព្រឹត្តិការណ៍ទាំងឡាយដែលកើតឡើងនៅតំបន់កាស្មៀរ គឺវាស្របតាមរដ្ឋធម្មនុញ្ញឥណ្ឌា ចែងពីឯករាជជាតិ ត្រង់ មាត្រា៣៧០ ហើយនេះ គឺជាកិច្ចការផ្ទៃក្នុងរបស់ឥណ្ឌាសុទ្ធសាធ។ បន្ថែមលើអំណះអំណាងនេះ នាយករដ្ឋមន្ត្រីឥណ្ឌា នរិន្ទ្រា ម៉ូឌី នឹងថ្លែងសារបំភ្លឺបញ្ជាក់ជាថ្មីម្តងទៀតទៅកាន់ប្រជាជាតិ ជុំវិញសេចក្តីសម្រេចចិត្តរបស់រដ្ឋាភិបាលឥណ្ឌា ដែលទាញយកតំបន់កាស្មៀរមកគ្រប់គ្រង។
តំបន់កាស្មៀនៅខាងប៉ែកគ្រប់គ្រងដោយឥណ្ឌា បានបិទច្រកចេញចូល ចាប់តាំងពីថ្ងៃចន្ទ មកម្លេះ បន្ទាប់ពីរដ្ឋាភិបាលទីក្រុង ញូដេលី លុបចោលលក្ខខន្តិកៈ ពិសេសដែលផ្ដល់សិទ្ធិស្វ័យភាពមួយចំនួនដល់តំបន់មួយនេះ ។ បន្ថែមពីលើនេះ បណ្ដាញសេវាទូរស័ព្ទ និងអ៊ិនធឺណែត ក៏ត្រូវបានកាត់ផ្ដាច់ផងដែរចាប់តាំងពីល្ងាចថ្ងៃអាទិត្យមក ហើយកងទ័ពឥណ្ឌារាប់រយនាក់ត្រូវបានដាក់ពង្រាយនៅតាមដងផ្លូវ ។
គួរជ្រាបថា អស់៥ថ្ងៃមកហើយ ដែលពលរដ្ឋនៅតំបន់កាស្មៀរត្រូវនៅឯកាពីពិភពលោក។ ប្រព័ន្ធទាក់ទងគ្នា ទូរទស្សន៍ ទូរសព្ទ អ៊ិនធឺរណែត វ៉ាយហ្វាយ ត្រូវរដ្ឋាភិបាលឥណ្ឌាកាត់ផ្តាច់មួយរយៈ ក្រោមហេតុផលទប់ទល់កុំឱ្យចលាចល។ ការធ្វើដំណើរត្រូវហាមឃាត់ និងរឹតត្បិតយកតែមែនទែន។ ប៉ូលីស និងយោធាឥណ្ឌា ត្រូវដាក់ពង្រាយយាមល្បាតយ៉ាងតឹងតែង។ ក្នុងរយៈពេល៤-៥ថ្ងៃនេះ អាជ្ញាធរឥណ្ឌា បានចាប់ឃាត់ខ្លួនមនុស្ស ជាង៥០០រយនាក់ ដែលបើតាមដំណឹងពីកាសែតក្នុងស្រុក បញ្ជាក់ថា អ្នកទាំងនោះ មានភាគច្រើនផង ជាអ្នកនយោបាយ តំណាងរាស្ត្រ និងគ្រូបង្រៀនជាដើម។
ដើម្បីរឹតបន្តឹងសន្តិសុខ រដ្ឋអំណាចឥណ្ឌា បានដាស់តឿនឱ្យក្រុមហ៊ុនអាកាសចរណ៍ស៊ីវិល ដែលជិះកាត់ផ្ទៃអាកាសរបស់ឥណ្ឌានិងប៉ាគីស្ថាន ត្រូវបង្កើនការប្រុងប្រយ័ត្នខ្ពស់ ដ្បិតថា យន្តហោះ អាចជាផ្ទាំងស៊ីបនៃអំពើភេរវកម្មផង។ឥណ្ឌានិងប៉ាគីស្ថាន បានអះអាងថា ទីកដីកាស្មៀរ ស្ថិតនៅក្នុងការគ្រប់គ្រងរៀងៗខ្លួន ។ ប្រទេសទាំងពីរសុទ្ធតែមានអាវុធបរមាណូ ធ្លាប់បានវាយប្រហារគ្នា៣លើកមកហើយ ក្នុងនោះ សង្គ្រាម២លើក ពាក់ព័ន្ធជម្លោះទឹកដី ។ សហរដ្ឋអាមេរិកបានជំរុញប្រទេសទាំងពីរឲ្យអត់ធ្មត់ ៕