អាមេរិកនិងសម្ពន្ធមិត្តនាំគ្នាធើស៊ីតិកតុកដែលកំពង់ល្បីរកលុយបាន
21-September-2026 / ព័ត៌មានអន្តរជាតិ
ចិន៖ បន្ទាប់ពីសេតវិមានរបស់សហរដ្ឋអាម៉េរិក បានប្រកាសផ្តល់រយៈពេល ៣០ថ្ងៃ ឱ្យមន្ត្រីពាក់ព័ន្ធរបស់ខ្លួន ធើ្វការបោសសម្អាតកម្មវិធី TikTok ទាំងស្រុង ចេញពីឧបករណ៍ប្រើប្រាស់ផ្សេងៗរបស់រដ្ឋ នៅថ្ងៃអង្គារសប្តាហ៍នេះ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បានបញ្ចេញមតិរិះគន់សហរដ្ឋអាម៉េរិក ថាកំពុងយកបញ្ហាសន្តិសុខជាតិជាលេសដើម្បីគាបសង្កត់ទៅលើបណ្តាក្រុមហ៊ុនបរទេស ។
លោកស្រីម៉ៅ នីង បានចាត់ទុកវិធានការយ៉ាងតក់ក្រហល់របស់រដ្ឋាភិបាលអាម៉េរិកនៅពេលនេះថាជាការរំលោភបំពានអំណាចដែលនឹងបង្កផលប៉ះពាល់ដល់ដំណើរការប្រកួតប្រជែងដោយភាពសោះត្រង់ និងតម្លាភាព ហើយក៏បានបង្ហាញពីការប្រឆាំងជាដាច់ខាតចំពោះសកម្មភាពរបស់អាម៉េរិក។
នៅក្នុងខ្លឹមសារអនុស្សរណៈណែនាំនៃការិយាល័យគ្រប់គ្រងថវិកាជាតិរបស់សហរដ្ឋអាម៉េរិក បានកំណត់ឱ្យមន្ត្រីសហព័ន្ធទាំងអស់ត្រូវធានាថា មិនឱ្យមានកម្មវិធី TikTok នៅលើឧបករណ៍ប្រើប្រាស់របស់រដ្ឋនោះឡើយ បទបញ្ជារនេះទៀតសោត នឹងត្រូវអនុវត្តទៅលើអាជីវករលក់គ្រឿងអេឡិចត្រូនិកនៅទូទៅប្រទេសផងដែរ។មន្ត្រីសហព័ន្ធទាំងអស់ តម្រូវឱ្យលុបកម្មវិធី TikTok ចេញពីឧបករណ៍របស់ខ្លួនជាកំហិត ក្នុងរយៈពេល ៣០ថ្ងៃ ខណៈដែលដៃគូប្រតិបត្តិករទាំងអស់ នឹងមានរយៈពេល ៩០ថ្ងៃ ជុំវិញការអនុលោមស្របទៅតាមការណែនាំខាងលើ ។
សូមបញ្ជាក់ថាសហរដ្ឋអាមេរិក កាណាដា និងអឺរ៉ុប កំពុងព្រួតដៃគ្នាដាក់ចេញបម្រាមមិនឱ្យប្រើបណ្តាញសង្គមវីដេអូខ្លីៗ Tiktok របស់ចិន ក្រោមហេតុផលទប់ស្កាត់ការគំរាមកំហែងដល់សន្តិសុខជាតិ និងសុវត្ថិភាពទិន្នន័យរបស់ពួកគេ។រដ្ឋបាលលោក ចូ បៃឌិន បានទុកពេលឱ្យភ្នាក់ងារសហព័ន្ធ រយៈពេល៣០ថ្ងៃ គិតចាប់ពីថ្ងៃទី២៨កុម្ភៈ ដើម្បីធានាថា គ្មានកម្មវិធី TikTok នៅលើឧបករណ៍របស់ភ្នាក់ងារសហព័ន្ធណាមួយឡើយ។ វិធានការនេះ គឺដើម្បីធានាសន្តិសុខនូវហេដ្ឋារចនាសម្ព័ន្ធឌីជីថលរបស់ខ្លួន ព្រមទាំងការការពារសុវត្ថិភាព និងឯកជនភាពរបស់ប្រជាជនអាមេរិក។
ចំណែកប្រទេសកាណាដា ក៏បានចាត់វិធានការដូចគ្នាផងដែរ ពោលគឺបានហាមឃាត់នូវការដំឡើង App TikTok នៅក្នុងឧបករណ៍របស់រដ្ឋាភិបាលទាំងអស់ ចាប់ពីថ្ងៃទី១ ខែមីនាតទៅ។ ការសម្រេចចិត្តនេះ បន្ទាប់ពីប្រធានមន្ត្រីព័ត៌មានកាណាដា បានពិនិត្យឃើញថា App បណ្តាញសង្គមនេះ ស្ថិតក្នុងកម្រិតហានិភ័យចំពោះឯកជនភាព និងសន្តិសុខដែលមិនអាចទទួលយកបាន។សភាអឺរ៉ុបឯណោះវិញ បានហាមឃាត់មិនឱ្យមាន TikTok នៅលើទូរសព្ទរបស់មន្ត្រីខ្លួនឡើយ ចាប់ពីថ្ងៃទី២០ ខែមីនាតទៅ ដែលជាការដើរតាមគន្លងផ្លូវរបស់គណៈកម្មការអឺរ៉ុប និងក្រុមប្រឹក្សាអឺរ៉ុប។ វិធានការនេះ ដោយសារបារម្ភថា រដ្ឋាភិបាលចិនអាចនឹងប្រមូលទិន្នន័យអ្នកប្រើប្រាស់ តាមរយៈ App ដែលជារបស់ក្រុមហ៊ុន ByteDance នេះ ខណៈពលរដ្ឋ EU ដែលប្រើ App នេះ មានដល់ ១២៥លាននាក់ឯណោះ។
សូមបញ្ជាក់ថានាយកប្រតិបត្តិរបស់ TikTok បានយល់ព្រមបង្ហាញខ្លួននៅចំពោះមុខគណៈកម្មាធិការសភាអាមេរិកក្នុងខែ មីនា ឆ្នាំ២០២៣ តាមសំណើរបស់សមាជិកសភាមកពីគណបក្សសាធារណរដ្ឋដែលចង់ត្រួតពិនិត្យកម្មវិធីចែករំលែកវីដេអូខ្លីនៅលើបណ្តាញកម្សាន្ត ទិកតុក។អ្នកនាំពាក្យគណៈកម្មាធិការបាននិយាយថា លោក Shou Zi Chew នាយកប្រតិបត្តិ TikTok នឹងបង្ហាញខ្លួននៅចំពោះមុខគណៈកម្មាធិការថាមពលនៅថ្ងៃទី 23 ខែមីនា។ នេះនឹងជាការបង្ហាញខ្លួនរបស់ CEO TikTok ក្នុងសវនាការនៅចំពោះមុខគណៈកម្មាធិការសភាអាមេរិកជាលើកដំបូង ។
អ្នកនាំពាក្យគណៈកម្មាធិការរដ្ឋសភាអាមេរិក បានបញ្ជាក់ថា លោក Shou Zi Chew គឺជាអតីតនិស្សិតបញ្ចប់ការសិក្សានៅសាកលវិទ្យាល័យ Harvard និងជាអ្នកហាត់ការនៅ Facebook នៅ Meta Platforms Inc. យល់ព្រមផ្តល់សក្ខីកម្មដោយស្ម័គ្រចិត្ត ហើយនឹងក្លាយជាសាក្សីតែមួយគត់នៅក្នុងសវនាការ។សវនាការនេះនឹងផ្តល់ឱ្យសមាជិកសភា ជាពិសេសគណបក្សសាធារណរដ្ឋដែលទើបតែទទួលបានសំឡេងភាគច្រើនក្នុងសភាតំណាង ជាឱកាសមួយដើម្បីស្វែងរកការបកស្រាយចំពោះក្តីព្រួយបារម្ភកាន់តែខ្លាំងឡើងអំពីកម្មវិធីចែករំលែកវីដេអូខ្លីលើបណ្តាញសង្គម ។
ការព្រួយបារម្ភរួមមានការចោទប្រកាន់ថាការចែករំលែកទិន្នន័យរបស់អ្នកប្រើប្រាស់អាមេរិកជាមួយប្រទេសចិន ក៏ដូចជាហានិភ័យដែលកម្មវិធីនេះអាចប្រើដើម្បីផ្សព្វផ្សាយឬរៀបចំអ្នកប្រើប្រាស់អាមេរិក។
តំណាង Cathy McMorris Rodgers (R., Wash.) ដែលជាប្រធានគណៈកម្មាធិការ បាននិយាយនៅក្នុងសេចក្តីថ្លែងការណ៍មួយថា “TikTok បានអនុញ្ញាតឱ្យអាជ្ញាធរចិនដោយចេតនានូវលទ្ធភាពចូលប្រើទិន្នន័យអ្នកប្រើប្រាស់របស់សហរដ្ឋអាមេរិក។ ប្រជាជនអាមេរិកសមនឹងដឹងពីរបៀបដែលសកម្មភាពទាំងនេះប៉ះពាល់ដល់ឯកជនភាព និង សុវត្ថិភាពនៃទិន្នន័យផ្ទាល់ខ្លួន និងសកម្មភាពដែល TikTok កំពុងធ្វើដើម្បីរក្សាសុវត្ថិភាព។
