អនុពូទីនទៅប្រទេសចិនក្នុងពេលមេ អ៊ុយក្រែនទៅអាមេរិក
15-March-2026 / ព័ត៌មានអន្តរជាតិ
រុស្ស៊ីអ៊ុក្រែន៖ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានប្រាប់សាធារណជនតាមបណ្តាញសង្គមtwitterយ៉ាងខ្លីថា «លោកអញ្ជើញទៅសហរដ្ឋអាមេរិកដើម្បីពង្រឹងសមត្ថភាពប្រយុទ្ធនិងការពារជាតិអ៊ុយក្រែន»។លេខាធិការសារព័ត៌មានសេតវិមាន Karine Jean-Pierre បានបញ្ជាក់អំពីដំណើរទស្សនកិច្ចនេះ ដោយនិយាយថា លោកប្រធានាធិបតី Biden បានអញ្ជើញ Zelensky ទៅកាន់ទីក្រុងវ៉ាស៊ីនតោន។ លោក Jean-Pierre បាននិយាយថា “ដំណើរទស្សនកិច្ចនេះនឹងបញ្ជាក់ពីការប្តេជ្ញាចិត្តឥតងាករេរបស់អាមេរិកក្នុងការជួយអ៊ុយក្រែនឱ្យបានយូរតាមដែលចាំបាច់ តាមរយៈជំនួយផ្នែកសេដ្ឋកិច្ច មនុស្សធម៌ និងយោធា”។
នេះជាដំណើរទស្សនកិច្ចបរទេសលើកដំបូងរបស់លោក Zelensky ចាប់តាំងពីរុស្ស៊ីបានបើកប្រតិបត្តិការយោធានៅអ៊ុយក្រែនកាលពីចុងខែកុម្ភៈ។ក្នុងចំណោមជំនួយរបស់ប្រទេសបច្ចិមលោក គឺ សហរដ្ឋអាមេរិក ជាអ្នកផ្តល់ជំនួយធំនិងច្រើនខ្លាំងជាងគេ។ ពេលនេះ បើតាមប្រភពព័ត៌មានសុំមិនបញ្ចេញអត្តសញ្ញាពីសំណាក់អ្នកទទួលខុសត្រូវជាន់ខ្ពស់អាមេរិក គឺ រដ្ឋបាលអាមេរិកនឹងផ្តល់ជំនួយ ជិត ២ ពាន់លានដុល្លារ បន្ថែមទៀតដល់អ៊ុយក្រែន ហើយនិងផ្តល់ប្រព័ន្ធបាញ់មីស៊ីល និងគ្រាប់មីស៊ីល Patriot ដ៏មានប្រសិទ្ធិភាពរបស់អាមេរិក ទៀត។ សហរដ្ឋអាមេរិកកម្រនឹងផ្តល់ប្រព័ន្ធខែលការពារមីស៊ីល Patriot ឲ្យទៅប្រទេសណាផ្សេងឡើយ។ អាវុធនេះ គឺជាគ្រឿងច្បាំងការពារខ្លួនដែលអ៊ុយក្រែនទាមទារចង់បានជាយូរណាស់មកហើយ ដើម្បីយកទៅទប់ទល់សង្គ្រាមឈ្លានពាន និងផ្ញាញ់រុស្ស៊ីរបស់លោក វ្ល៉ាឌីមៀរ ពូទីន។ដូច្នេះ ដំណើរទស្សនកិច្ចរបស់ប្រធានាធិបតីអ៊ុយក្រែនទៅសហរដ្ឋអាមេរិក បើគិតពីនិមិត្តរូបវិញ គឺ សំខាន់ខ្លាំងណាស់ ទាំងរូបភាពខាងក្រៅ ទិដ្ឋភាពនយោបាយ និងទិដ្ឋភាពស្មារតីយោធា។ អ្នកនាំពាក្យសេតវិមានប្រធានាធបិតីអាមេរិក បញ្ជាក់បន្ថែមដែរថា សហរដ្ឋអាមេរិកគាំទ្រនិងជួយអ៊ុយក្រែន «យូរតទៅទៀត តាមការចាំបាច់» តាមរយៈការផ្តល់ជំនួយខាងសេដ្ឋកិច្ច មនុស្សធម៌ និងយោធា។
ចំពោះក្រសែភ្នែក រុស្ស៊ី វិញ គឺមិនសំឡឹងឃើញពីផលវិជ្ជមានពីដំណើរទស្សនកិច្ចរបស់លោក ហ្សេឡេនស្គី នៅវ៉ាស៊ីនតោន ទេ។ អ្នកនាំពាក្យវិមានក្រេមឡាំង លោក ឌីមីទ្រី ប៉េស្កូវ បានប្រាប់អ្នកកាសែតនៅរដ្ឋធានីម៉ូស្កូ ថា ការផ្តល់អាវុធទៅអ៊ុយក្រែន ពីសំណាក់មហាអំណាចលោកខាងលិច គឺនឹងនាំឲ្យជម្លោះកាន់តែដុនដាបធ្ងន់ធ្ងរ សង្គ្រាមកាន់តែសាហាវឡើង ហើយនិងគ្មានផលល្អចំពោះអ៊ុយក្រែនបន្តិចណាសោះ។
លោក ហ្សេឡេស្គី មិនស្នាក់នៅវ៉ាស៊ីនតោន យូរទេ។ តាមគម្រោង នៅពេលរសៀលថ្ងៃពុធ ប្រធានាធិបតីអ៊ុយក្រែន ត្រូវជួបពិភាក្សាជាមួយនឹងប្រធានាធិបតី ចូ បៃដិន ពីយុទ្ធសាស្ត្រយោធា និងដំណើរការវិវឌ្ឍនៃសង្គ្រាមនៅសមរភូមិអ៊ុយក្រែន។ នៅពេលល្ងាច លោក ហ្សេឡេស្គី ត្រូវថ្លែងសុន្ទរកថា ចំពោះមុខសភាពេញអង្គ ដែលសមាជិកព្រឹទ្ធសភា និងសមាជិករដ្ឋសភា មកស្តាប់ទាំងអស់គ្នាតែម្តង។នៅតែប៉ុន្មានថ្ងៃទៀតទេ នឹងដាច់ឆ្នាំចាស់ចូលឆ្នាំថ្មី សង្គ្រាមនៅអ៊ុយក្រែន ក៏ឈានចូលឆ្នាំទី២ដែរ។ អ៊ុយក្រែន សុំជំនួយពីសហរដ្ឋអាមេរិក ចំនួន ៤៥ ពាន់លានដុល្លារបន្ថែមទៀត។ ដូច្នេះហើយ ក្នុងការប្រជុំសភា Congrès ល្ងាចនេះ គឺឱកាសសំខាន់ខ្លាំងណាស់ សម្រាប់អនុញ្ញាតឲ្យលោក ហ្សេឡេស្គី បញ្ជុះបញ្ជូល សមាជិកសភាអាមេរិក។
ក្នុងពេលជាមួយគ្នានោះដែរអនុប្រធានក្រុមប្រឹក្សាសន្តិសុខជាតិរុស្ស៊ី លោក Dmitry Medvedev បានធ្វើដំណើរដ៏គួរឱ្យភ្ញាក់ផ្អើលមួយទៅកាន់ប្រទេសចិនកាលពីថ្ងៃទី ២១ ខែធ្នូ ។អតីតប្រធានាធិបតីរុស្ស៊ី លោក Dmitry Medvedevបានជួបពិភាក្សាជាមួយប្រធានាធិបតីចិន Xi Jinping ដែលក្នុងនោះលោកបាននិយាយថា នឹងពិភាក្សាអំពីជម្លោះអ៊ុយក្រែន។តាមទីភ្នាក់ងារសារព័ត៌មាន Reuters បានផ្សាយថា លោក Medvedevបានបង្ហោះវីដេអូមួយនៅលើបណ្តាញ Telegram ផ្ទាល់ខ្លួនរបស់គាត់ ដែលបង្ហាញពីគាត់ជួបលោក Xi ថតរូបជាមួយគ្នា និងជួបជាមួយមន្ត្រីចិននិងរុស្ស៊ីជាច្រើនរូប។
លោក Medvedev បាននិយាយថា លោកនិងលោក Xi បានពិភាក្សាអំពីភាពជាដៃគូយុទ្ធសាស្ត្រ “គ្មានដែនកំណត់” របស់ប្រទេសទាំងពីរ ក៏ដូចជាបញ្ហាអ៊ុយក្រែនផងដែរ។ លោកមិនបានផ្តល់ព័ត៌មានលម្អិតបន្ថែមទេ។ទីភ្នាក់ងារសារព័ត៌មាន RIA Novosti របស់រុស្ស៊ី នៅថ្ងៃទី២១ ខែធ្នូ បានដកស្រង់សេចក្តីថ្លែងការណ៍របស់លេខាធិការដ្ឋានរងនៃក្រុមប្រឹក្សាសន្តិសុខរុស្ស៊ីដែលបាននិយាយថា ក្នុងដំណើរបំពេញទស្សនកិច្ចទៅកាន់ប្រទេសចិន លោក Medvedev បានផ្ញើសារពីប្រធានាធិបតីរុស្ស៊ី លោក Vladimir Putin ទៅកាន់លោក Xi។ នៅក្នុងលិខិតនោះ មេដឹកនាំរុស្ស៊ីបានទទួលស្គាល់កម្រិតនៃកិច្ចសន្ទនា និងកិច្ចសហប្រតិបត្តិការដែលមិនធ្លាប់មានពីមុនមករវាងប្រទេសទាំងពីរ ហើយបានបង្ហាញពីទំនុកចិត្តលើការអភិវឌ្ឍទំនាក់ទំនងទ្វេភាគី និងរវាងបក្សកាន់អំណាចទាំងពីរ។
