ប្រមុខការទូតកម្ពុជា-ថៃ និងចិន ជួបពិភាក្សាគ្នាក្នុងកិច្ចប្រជុំត្រីភាគី នៅ ប្រទេសចិនដើម្បីដោះស្រាយជម្លោះព្រំដែនសង្ឃឺមថាបានផល

ប្រទេសចិន៖ ក្រោមការសម្របសម្រួលរបស់ភាគីចិន, លោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា នៅព្រឹកថ្ងៃទី២៩ ខែធ្នូ ឆ្នាំ២០២៥នេះ បានចូលរួមកិច្ចប្រជុំត្រីភាគី ជាមួយរដ្ឋមន្រ្តីការបរទេសថៃ និង លោក វ៉ាង យី រដ្ឋមន្រ្តីការបរទេសចិន នៅខេត្តយូណាន ប្រទេសចិន ដើម្បីដោះស្រាយបញ្ហាព្រំដែន។ 

កិច្ចប្រជុំនេះមានគោលបំណងសម្របសម្រួលការផ្លាស់ប្តូរយោបល់ប្រកបដោយការស្ថាបនា និងភាពស្មោះត្រង់ ស្តីពីស្ថានភាពបច្ចុប្បន្នរវាងកម្ពុជានិងថៃ ដើម្បីពង្រឹងការជឿទុកចិត្តគ្នាទៅវិញទៅមក ជំរុញ ការកាត់បន្ថយភាពតានតឹង ក៏ដូចជាស្ដារឡើងវិញនូវសន្តិភាព សន្តិសុខ និងស្ថិរភាព នៅតាមតំបន់ព្រំដែន កម្ពុជា-ថៃ។ នេះបើតាមសេចក្តីប្រកាសរបស់ក្រសួងការបរទេស។

ប្រមុខការទូតកម្ពុជាក្នុងកិច្ចពិភាក្សាទ្វេភាគីជាមួយលោក វ៉ាង យី ដើម្បីពង្រឹងបន្ថែមទៀតនូវកិច្ចសហប្រតិបត្តិការនិងភាពជាដៃគូដ៏រឹងមាំរវាងកម្ពុជានិងចិន ដែលរួមចំណែកដល់សន្តិភាព សន្តិសុខ ស្ថិរភាព និងការអភិវឌ្ឍ ក្នុងតំបន់ និងពិភពលោកទាំងមូលផងដែរ។

កម្ពុជាបានវាយតម្លៃខ្ពស់ចំពោះតួនាទីចិន ក្នុងនាមជាម្ចាស់ផ្ទះ ដែលផ្តល់វេទិកាសម្រាប់កិច្ចសន្ទនា និងការគាំទ្រចំពោះកិច្ចខិតខំប្រឹងប្រែងបង្កើនការយោគយល់គ្នាទៅវិញទៅមក និងចំពោះសន្តិភាពនិងស្ថិរភាព តំបន់។ កម្ពុជាក៏បានបន្តបញ្ជាក់ចំពោះជំហរយ៉ាងមុតមាំក្នុងការដោះស្រាយទំនាស់ និងជម្លោះទាំងឡាយ តាម គ្រប់មធ្យោបាយសន្តិវិធី ការសន្ទនា និងផ្លូវការទូត ស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។

ដោយឡែករដ្ឋមន្ត្រីការបរទេសថៃ លោក Sihasak Phuangketkeow វិញបានអះអាងថា ប្រទេសរបស់លោកនឹងបោះជំហានទៅមុខបន្តទៀត ដោយពង្រឹងទំនាក់ទំនងជាមួយកម្ពុជាតាមរយៈបណ្តាញទ្វេភាគី, កសាងទំនុកចិត្តគ្នាឡើងវិញ, ការពារសន្តិភាព និងភាពសុខសាន្ត នៅតាមព្រំដែននៃប្រទេសទាំងពីរ។ នេះបើតាមការចុះផ្សាយរបស់ទីភ្នាក់ងារព័ត៌មានចិនស៊ិនហួរ នាថ្ងៃទី២៩ ខែធ្នូដែលដកស្រង់ពីជំនួបទ្វេរភាគីជាមួយលោកវ៉ាងយី។

រដ្ឋមន្ត្រីការបរទេសថៃបានប្រាប់ លោក វ៉ាង យី ថា «យើងមានបំណងសំឡឹងទៅមុខ និងបោះជំហានទៅមុខបន្តទៀត ក្នុងការពង្រឹងទំនាក់ទំនងជាមួយកម្ពុជាតាមរយៈបណ្តាញទ្វេភាគី និងតាមរយៈភាពស្មោះត្រង់, ឈានទៅស្តារការផ្លាស់ប្តូរគ្នាជាបណ្តើរៗ កសាងទំនុកចិត្តគ្នាឡើងវិញ, កែលម្អទំនាក់ទំនងទ្វេភាគី និងការពារសន្តិភាព និងភាពសុខសាន្ត នៅតាមព្រំដែននៃប្រទេសទាំងពីរ ក៏ដូចជាក្នុងតំបន់ផងដែរ»។

លោក Sihasak បានលើកឡើងថា ការប្រើប្រាស់កម្លាំងបាយ មិនមែនជាជម្រើសរបស់ប្រទេសថៃឡើយ នៅពេលមានវិវាទជាមួយប្រទេសជិតខាង ដោយលោកបានបន្ថែមថា ប្រទេសថៃប្តេជ្ញា សម្រេចឱ្យបាននូវបទឈប់បាញ់ប្រកបដោយចីរភាព និងស្វែងរកសន្តិភាពពិតប្រាកដ។

លោក Sihasak បានវាយតម្លៃខ្ពស់ចំពោះកិច្ចប្រឹងប្រែងយ៉ាងសកម្មរបស់ប្រទេសចិន ក្នុងការសម្របសម្រួលជម្លោះរវាងកម្ពុជា និងថៃ តាម «បែបអាស៊ី» ដោយកត់សម្គាល់ថា កិច្ចព្រមព្រៀងឈប់បាញ់ ដែលទើបនឹងចុះហត្ថលេខាថ្មីៗនេះ រវាងកម្ពុជា និងថៃ គឺជាសញ្ញានៃការចាប់ផ្តើមជាថ្មី។

ក្រោយប្រជុំត្រីភាគី ប្រមុខការទូតកម្ពុជា ប្រាក់ សុខុន បានអះអាងថា ទាំងកម្ពុជា និងទាំងភាគីថៃ មិនមានភាគីណាចង់ឱ្យសង្គ្រាមកើតឡើងទៀតទេ។ លោកប្រាក់ សុខុន ថ្លែងបែបនេះ បន្ទាប់ពីបញ្ចប់កិច្ចប្រជុំត្រីភាគីរវាង ចិន កម្ពុជា និងថៃ នៅថ្ងៃទី២៩ ខែធ្នូនេះ។ ក្នុងកិច្ចសម្ភាសដល់ទូរទស្សន៍ជាតិកម្ពុជា លោក ប្រាក់ សុខុន បញ្ជាក់ដូច្នេះ៖« ឆ្លងតាមការពិភាក្សាគ្នា ទាំងទ្វេភាគី និងត្រីភាគី យើងបានឯកភាពគ្នាថា យើងបានសម្រេចសមិទ្ធផលច្រើនហើយ មកដល់ពេលនេះ។

យើងមិនអាចធ្វើឱ្យសភាពការណ៍ត្រឡប់ទៅក្រោយវិញទេ។ បានន័យថា គ្មានអ្នកណាចង់បានសង្គ្រាមឡើងវិញទេ។»។ ភាគីទាំងពីរ ក៏ឯកភាពគ្នាដែរថា ចំណុចដែលសំខាន់នៅចំពោះមុខនេះ គឺធ្វើយ៉ាងណា ធានាធ្វើឱ្យបទឈប់បាញ់នេះឋិតថេរ រឹងមាំ ត្រូវបានគោរព ត្រូវបានអនុវត្ត ដើម្បីបង្កបរិយាកាសអំណោយផលមួយ សម្រាប់ការអនុវត្តនូវកិច្ចព្រមព្រៀងផ្សេងៗទៀត ដែលភាគីទាំងពីរ បានឯកភាពគ្នា។ ឧបនាយករដ្ឋមន្ត្រី បន្ថែមដូច្នេះ។លោកប្រាក់សុខុនក៏បានសម្តែងសុទិដ្ឋនិយមថាក្រោយបទឈប់បាញ់ចូលជាធរមាននៅថ្ងៃទី៣០ធ្នូថ្ងៃត្រង់លោកសង្ឃឹមថាកងទព័កម្ពុជាដែលថៃចាប់ទាំង១៨រូបនឹងអាចត្រូវបានដោះលែង។