អ៊ុយក្រែនប្រកាសពីជោគជ័យការពារដែនអាកាសបារាំងកម្ពុជាអំពាវរុស្ស៊ីបញ្ឈប់ការវាយប្រហារតាមអាកាស
27-March-2024 / ព័ត៌មានអន្តរជាតិ
អ៊ុយក្រែន៖ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹងថានាថ្ងៃពុធនេះ ប្រព័ន្ធការពារអាកាសនៅរដ្ឋធានីកៀវ បានបាញ់ទម្លាក់យន្តហោះដ្រូនរុស្ស៉ីចំនួន១៣គ្រឿង ដែលទីក្រុងមូស្គូបានបើកការវាយប្រហារជាថ្មីទៀត តាមដែនអាកាស។ ទីភ្នាក់ងារព័ត៌មាន AFP នៅថ្ងៃពុធ ទី១៤ ខែធ្នូ ឆ្នាំ២០២២បានឲ្យដឹងថាលោក ហ្សេលេនស្គី បាននិយាយក្នុងឃ្លីបវីដេអូមួយថា រុស្ស៉ីបានចាប់ផ្តើមកាលពីព្រឹកមិញនេះ ជាមួយយន្តហោះដ្រូនសាហ៉ីដ (Shahed) ចំនួន១៣គ្រឿង ប៉ុន្តែដ្រូនទាំង១៣គ្រឿងនោះ ត្រូវបានបាញ់ទម្លាក់ចោលទាំងអស់ ដោយប្រព័ន្ធការពារដែនអាកាសរបស់អ៊ុយក្រែននៅទីក្រុងកៀវ។ ដ្រូន Shahed នេះ គឺសំដៅលើដ្រូនអត្តឃាតផលិតដោយអ៉ីរ៉ង់ ដែលរុស្ស៉ីរងការចោទប្រកាន់ថា បានប្រើប្រាស់ក្នុងការវាយប្រហារលើ គោលដៅនានានៅអ៊ុយក្រែន។
ដូចគ្នាដែរលោក វីតាលី គ្លីតឆ្កូ (Vitali Klitschko) អភិបាលទីក្រុងកៀវ បានប្រាប់ថា ប្រព័ន្ធការពារដែនអាកាសរបស់ទីក្រុង បាញ់ស្កាត់ដ្រូន Shahed បាន១០គ្រឿង និងមានហេតុការណ៍ផ្ទុះមួយចំនួន ក្នុងសង្កាត់សេវឆេនគីវស្គី (Shevchenkivskyi) ដែលស្ថិតនៅកណ្តាលរដ្ឋធានីកៀវ។ បើតាមលោក គ្លីតឆ្កូ អគាររដ្ឋបាលចំនួនពីរខ្នង ក៏បានរងការខូចខាតផងដែរ ប៉ុន្តែមិនមានព័ត៌មានអំពីមនុស្សរងរបួស ឬបាត់បង់ជីវិតឡើយ។ទាក់ទងនិងការវាយប្រហារតាមអាកាសនេះដែរលោក អេម៉ានុយអែល ម៉ាក្រុង ប្រធានាធិបតីបារាំង បានលើកឡើងថា ប្រទេសបារាំង រួមជាមួយប្រទេសកម្ពុជា អំពាវនាវឱ្យរុស្ស៉ីបញ្ឈប់ការវាយប្រហារតាម ផ្លូវអាកាសរបស់ខ្លួន និងការវាយប្រហារលើប្រជាជនស៊ីវិល ព្រមទាំងហេដ្ឋារចនាសម្ព័ន្ធនានាជាបន្ទាន់។
តាមរយៈបណ្តាញសង្គម Twiter លោក ម៉ាក្រុង បានលើកឡើងដូច្នេះថា៖ «សង្គ្រាមរបស់រុស្ស៉ីនៅក្នុងប្រទេសអ៊ុយក្រែន បានបង្កការឈឺចាប់យ៉ាងសម្បើម។ រួមជាមួយប្រទេសកម្ពុជា យើងអំពាវនាវឱ្យរុស្ស៉ីបញ្ឈប់ការវាយប្រហារតាម ផ្លូវអាកាសរបស់ខ្លួន និងការវាយប្រហារលើប្រជាជនស៊ីវិល ព្រមទាំងហេដ្ឋារចនាសម្ព័ន្ធនានាជាបន្ទាន់។ ប្រទេសដៃគូអន្តរជាតិ ក៏បានចូលរួមជាមួយពួកយើង ដើម្បី អំពាវនាវដូចគ្នានេះដែរ»។
ការប្រកាសរបស់លោកប្រធានាធិបតីបារាំង បន្ទាប់ពីមានជំនួបទ្វេភាគីជាមួយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបំពេញទស្សនកិច្ចនៅប្រទេសបារាំង អំឡុងចូលរួមកិច្ចប្រជុំអាស៊ាន-សហគមន៍អឺរ៉ុប នៅទីក្រុងព្រុចហ្សេល ប្រទេសប៊ែលហ្សិច។
សម្ព័ន្ធមិត្តលោកខាងលិចរបស់អ៊ុយក្រែន នៅថ្ងៃអង្គារសប្តាហ៍នេះ បានសន្យាផ្តល់ថវិកាបន្ថែមចំនួន ១ពាន់លានអឺរ៉ូ ឬស្មើនឹង ១.១ពាន់លានដុល្លារ ជាជំនួយសង្គ្រោះបន្ទាន់ក្នុងរដូវរងា ឆ្លើយតបទៅនឹងការអំពាវនាវពីប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ដើម្បីយកមកទប់ទល់នឹងការវាយប្រហាររបស់រុស្ស៊ី លើបណ្តាញថាមពលរបស់ខ្លួន។ ទីភ្នាក់ងារសារព័ត៌មាន AFP នៅថ្ងៃពុធ ទី១៤ ខែធ្នូ ឆ្នាំ២០២២បានឲ្យដឹងថាប្រធានាធិបតីបារាំង លោក អែមម៉ានុយអែល ម៉ាក្រុង (Emmanuel Macron) បាននិយាយថា ប្រទេសនិងអង្គការអន្តរជាតិចំនួន៧០ បានជួបគ្នាក្នុងទីក្រុងប៉ារីស សម្រាប់កិច្ចប្រជុំមួយដែលមានគោលបំណងធ្វើឲ្យប្រជាជនអ៊ុយក្រែន «ឆ្លងផុតរដូវរងានេះ»។ ថ្លែងតាមរយៈវីដេអូ លោក ហ្សេលេនស្គី បានគូសបញ្ជាក់ថា «ជាការពិតណាស់ វាគឺជាចំនួនដ៏ខ្ពស់ ប៉ុន្តែវានៅតិចជាងតម្លៃ នៃការដាច់ចរន្តអគ្គិសនីរបស់អ៊ុយក្រែន»។ប៉ុន្មានសប្តាហ៍កន្លងមកនេះ កងកម្លាំងរបស់រុស្ស៉ីបានបង្កើន ការវាយប្រហារតាមផ្លូវអាកាសយ៉ាងចាស់ដៃ ដោយប្រើប្រាស់មីស៉ីលនិងដ្រូនមកលើហេដ្ឋារចនាសម្ពន្ធស៉ីវិលៗរបស់អ៊ុយក្រែន ជាពិសេសបណ្តាញផលិតនិងបញ្ជូនថាមពលអគ្គិសនី ដែលជាហេតុបណ្តាលឱ្យ ប្រជាជនអ៊ុយក្រែនរាប់លាននាក់ ត្រូវស្ថិតក្នុងស្ថានភាពដ៏ត្រជាក់ហើយងងឹត អំលុងរដូវរងា៕
