រដ្ឋមន្ត្រីមហាផ្ទៃ ប្រាប់អាជ្ញាធរខេត្តជាប់ព្រំដែនជាមួយថៃ ត្រៀមរៀបចំ និងបម្រុងទុកនូវផែនការទទួលនិងជម្លៀសប្រជាពលរដ្ឋដែលត្រឡប់ចូលក្នុងប្រទេសវិញ
ភ្នំពេញ៖ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទែ បានប្រាប់ទៅអភិបាលនៃគណៈអភិបាលខេត្តជាប់ព្រំដែនថៃ ត្រូវត្រៀមរៀបចំ និងបម្រុងទុករួចជាមុននូវផែនការជម្លៀសប្រជាពលរដ្ឋដែលត្រឡប់ចូលមកក្នុងប្រទេសវិញ និងអ្នករស់នៅតំបន់ព្រំដែន ក្នុងករណីមានការប៉ះទង្គិចគ្នាដោយកម្លាំងប្រដាប់អាវុធ ដែលអាចកើតឡើងជាយថាហេតុ ឬមានការបិទច្រកទ្វារព្រំដែន។សេចក្តីណែនាំក៏បាន តម្រូវឲ្យ រៀបចំទីជម្រកសុវត្ថិភាពបណ្តោះអាសន្ន មធ្យោបាយដឹកជញ្ជូន ជំនួយសង្គ្រោះ ស្បៀងអាហារ ថ្នាំសង្កូវ ទឹកស្អាត និងអគ្គិសនី ជាដើម។
តាមសេចក្ដីណែនាំរបស់ក្រសួង នៅល្ងាចថ្ងៃទី១០ ខែមិថុនា ឆ្នាំ២០២៥ផ្ញេីជូន អាជ្ញាធរខេត្តជាប់ព្រំដែនជាមួយថៃ ដែលមាន ៣ទំព័រ និង៩ចំណុចសំខាន់ៗរួមមាន ឱ្យការពារអធិបតេយ្យជាតិ បូរណភាពទឹកដី សន្ដិសុខ សុវត្ថិភាព សណ្ដាប់ធ្នាប់ របៀបរៀបរយសាធារណៈ និងប្រក្រតីភាពនៅតាមបណ្ដោយព្រំដែនកម្ពុជា និងថៃ។ក្នុងស្ថានការណ៍មិនច្បាស់លាស់នៅតាមបន្ទាត់ព្រំដែនខ្មែរ-ថៃពេលនេះ ក្រសួងមហាផ្ទៃបានតម្រូវឱ្យអភិបាលខេត្តជាប់ព្រំដែនជាមួយថៃត្រូវណែនាំកងកម្លាំងដែលឈរជើងនៅតាមបណ្តោយព្រំដែនបន្តតាមដាន ទប់ស្កាត់ និងកត់ត្រារាល់សកម្មភាពគឃ្លើនជាឯតោភាគីរបស់ថៃដែលនាំឱ្យប្រែប្រួលស្ថានការណ៍តំបន់ព្រំដែនដែលមានចែងនៅក្នុងអនុស្សរណៈនៃការយោគយល់គ្នាឆ្នាំ ២០០០។ ទោះយ៉ាងណា និងបើតាមក្រសួងមហាផ្ទៃ កងកម្លាំង និងអាជ្ញាធរខ្មែរទាំងអស់ត្រូវរក្សាទំនាក់ទំនងជាមួយកងកម្លាំងថៃ ក្នុងការរកដំណោះស្រាយដោយសន្តិវិធី និងការអត់ធ្មត់ខ្ពស់បំផុត។
គួររម្លឹកថា ក្រោយព្រឹត្តិការណ៍ថ្ងៃទី២៨ ខែឧសភា ឆ្នាំ២០២៥ ដែលទាហានថៃបានចូលបើកការបាញ់ប្រហារលើលេណដ្ឋានកងទ័ពកម្ពុជាបណ្តាលឱ្យស្លាប់ទាហានខ្មែរម្នាក់យ៉ាងអណោចអាធ័មនៅតំបន់មុំបី ខេត្តព្រះវិហារមក ជម្លោះព្រំដែនកម្ពុជា ថៃបានឡើងកម្តៅ និងឈានដល់ការបិទ ឬផ្លាស់ប្តូរពេលវេលាចេញចូលឆ្លងកាត់ព្រំដែន នៅតាមទីស្នាក់ការត្រួតពិនិត្យច្រកទ្វារព្រំដែនមួយចំនួនជាឯកតោភាគីពីភាគីថៃចាប់ពីថ្ងៃទី៧មិថុនា ដោយគ្មានការជូនដំណឹងផ្លូវការមកភាគីកម្ពុជាឡើយ។
បន្ទាប់មក ក្នុងថ្ងៃទី៨ មិថុនា អាជ្ញាធររាជរដ្ឋាភិបាលកម្ពុជានិងថៃបានសម្រេចព្រមព្រៀងកែសម្រួលកម្លាំងកងទ័ពនៅតំបន់មុំបីដែលមានជម្លោះ ក្រោមហេតុផលបញ្ជៀសការប៉ះទង្គិចគ្នាដោយបង្ហូរឈាមក្នុងទ្រង់ទ្រាយធំ។ សម្រាប់ការសម្រុបសម្រួលគ្នាលើកការឈរជើងយោធានេះរដ្ឋាភិបាលកម្ពុជាបានបញ្ជាក់ថា ទោះមានការកែសម្រួលកម្លាំងទ័ពនៅព្រំដែនថៃក៏កម្ពុជានៅតែបន្តប្តឹងទៅតុលាការយុត្តិធម៌អន្តរជាតិ ICJ និងគ្មានការកែសម្រួលបន្ទាត់ព្រំដែនអ្វីទាំងអស់។
នៅយប់ថ្ងៃទី១០ មិថុនានេះ លោកនាយករដ្ឋមន្ត្រី ហ៊ុន ម៉ាណែត បានសម្រេចបង្កើតគណៈកម្មការរៀបចំឯកសារដើម្បីប្តឹងទៅតុលាការយុត្តិធម៌អន្តរជាតិ (ICJ) លើករណីតំបន់រសើប ទាំង ៤ គឺតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី។ បើតាមសេចក្តីសម្រេចចុះថ្ងៃទី ៦ ខែមិថុនា លោក ប្រាក់ សុខុន រដ្ឋមន្ត្រីក្រសួងការបរទេស គឺជាប្រធានគណៈកម្មការនេះដែលមានអនុប្រធាន ៥រូប និងសមាជិក៩រូប.។ដូច្នោះពីពេលនេះរហូតដល់ថ្ងៃទី១៤មិថុនាដែលកម្ពុជាទទួលធ្វើជាម្ចាស់ផ្ទះនៃកិច្ចប្រជុំគណកម្មការចំរុះព្រុំដែនកម្ពុជាថៃ(JBC)មិនដឹងថាកើតបានដែឬអត់នោះទេ?ព្រោះថាកម្ពុជានិងថៃមានជំហរខុសគ្នាលើរបៀបវារៈកិច្ចប្រជុំ។តាមការសន្និដ្ឋានប្រសិនបើប្រជុំមិនត្រុវគ្នាទំនាស់ព្រុំដែនកម្ពុជាថៃនឹងឡើងកម្តៅជាមិនខាន។
