ប្រមុខរាជរដ្ឋាភិបាលកម្ពុជាអះអាងថា ក្នុងជម្លោះព្រំដែនរវាងកម្ពុជា និងថែ កម្ពុជាមិនបោះបង់យន្តការទ្វេភាគីនោះឡើយ
21-September-2026 / ផ្សេងៗ
រតនគិរី ៖ ថ្លែងចេញពីទឹកដីតំបន់ភូមិ ភាគឦសាន្តខេត្តរតនគីរី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ពីជំហរបស់កម្ពុជា ដោយប្រើយន្តការ៣ ក្នុងការដោះស្រាយបញ្ហាព្រំដែនកម្ពុជា-ថៃ ទី១,យន្តការបច្ចេកទេស ទី២,តាមផែនទី ទី៣, ប្រើយន្តការអន្តរជាតិ ច្បាប់អន្តរជាតិ ។សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ប្រកាសជំហរយ៉ាងម៉ឺងម៉ាត់ថា កម្ពុជានឹងបញ្ជូនសំណុំរឿងប្រាសាទតាមាន់តូច តាមាន់ធំ តាក្របី និងតំបន់មុំបី ទៅកាន់តុលាការ យុត្តិធម៌អន្តរជាតិ ICJឲ្យខាងតែបាន នាពេលឆាប់ៗខាងមុខនេះ ដើម្បីបញ្ចប់រឿងជាមួយប្រទេសថៃ។
សម្តេចធិបតីបានលើកឡើងបែបនេះនៅព្រឹកថ្ងៃសៅរ៍ ១២កើត ខែជេស្ឋ ឆ្នាំម្សាញ់ សប្ដស័ក ព.ស. ២៥៦៩ ត្រូវនឹងថ្ងៃទី៧ ខែមិថុនា ឆ្នាំ២០២៥នេះ ក្នុងការអញ្ជើញជាអធិបតីសម្ពោធដាក់ឱ្យប្រើ ប្រាស់ជាផ្លូវការនូវសមិទ្ធផលទាំងឡាយក្នុងវិស័យអប់រំនៅខេត្តរតនគិរី ដែលជាមរតករបស់សម្តេចតេជោ ហ៊ុន សែន។ទោះជាយ៉ាងណាសម្តេចមហាបវរធិបតី ហ៊ុន ម៉ាណែត បានបញ្ជាក់យ៉ាងច្បាស់ថា ប្រទេសកម្ពុជា មិនបោះបង់យន្តការទ្វេភាគីនោះឡើយ នៅក្នុងជម្លោះព្រំដែនរវាងកម្ពុជា និងថៃ។ ចំពោះការយកជម្លោះព្រំដែនកម្ពុជា-ថៃ ទៅតុលាការយុត្តិធម៌អន្តរជាតិ ICJ មិនមែនជាការបញ្ឆេះសង្គ្រាមទេ តែជាការរំលត់បញ្ហា។ តុលាការយុត្តិធម៌អន្តរជាតិ ICJ សម្រេចបែបណាកម្ពុជានឹងទទួលយក។
សម្តេចធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលកម្ពុជា បន្តសហការជាមួយភាគីថៃ ដើម្បីជំរុញការវាស់វែងខណ្ឌសីមា ការបោះបង្គោលព្រំដែនរវាងប្រទេសទាំងពីរ ដែលនៅសេសសល់ក្រៅពីចំណុចទាំង៤ ដែលកម្ពុជាបានយកទៅតុលាការយុត្តិធម៌អន្តរជាតិ ICJ ដោយប្រើប្រាស់យន្តការទ្វេភាគីរវាងគណៈកម្មការព្រំដែនចម្រុះ JBC កម្ពុជា-ថៃ។ សម្តេចធិបតី បានបញ្ជាក់ថា៖ «យើងមិនចោលយន្តការទ្វេរភាគីទេ យើងមានយន្តការច្រើនណាស់ទ្វេរភាគី រវាងក្រសួងការបរទេស និងក្រសួងការបរទេស រវាងក្រសួងការពារជាតិ និងក្រសួងការពារជាតិ រវាងភូមិភាគ និងភូមិភាគ យើងបន្តដោះស្រាយហើយរឿងព្រំដែននេះ៨០០គីឡូម៉ែត្រ អីឡូវនេះយើងរកឃើញប្រហែល ២០០ គីឡូ ម៉ែត្រ យើងរកឃើញ៤៤បង្គោល លើ៧៣បង្គោល ហើយនៅសល់រាប់រយគីឡូទៀត ដែលត្រូវកំណត់ខណ្ឌសីមា បោះបង្គោលព្រំដែន»។ ចំពោះទីតាំងដែលបានជាប់គាំង គឺត្រូវស្វែងរកភាគីទី៣ ដើម្បីចូលរួមដោះស្រាយដើម្បីបញ្ហាវិវាទ ខណៈទីតាំងដទៃទៀត ភាគីទាំងពីរ ត្រូវតែបន្តអនុវត្តទៅតាមយន្តការនានា ទៅតាមការឯកភាពគ្នាដែលមានរវាងប្រទេសពីរ។
សម្តេចធិបតី ហ៊ុន ម៉ាណែត ក៏បានសង្កត់ធ្ងន់ថា ចំពោះការដោះស្រាយកំណត់បង្គោលខណ្ឌសីមា រវាងប្រទេសកម្ពុជា និងថៃ គឺភាគីទាំងដោះស្រាយតាមយន្តការបច្ចេកទេស ប្រសិនបើនៅបន្តជាប់គាំងច្បាស់ណាស់ គឺត្រូវតែស្វែងយន្តការអន្តរជាតិ ចូលរួមដោះស្រាយបញ្ជាក់ពីភាពត្រឹមត្រូវ។ ចំពោះការប្ដឹង នេះ គឺដើម្បីពន្លត់កុំឱ្យកម្ពុជា-ថៃ មានបញ្ហាព្រំដែនតំបន់នេះបន្តរ៉ាំរ៉ៃ បញ្ជៀសនូវសង្គ្រាម ហើយលទ្ធផលយ៉ាង។ណាកម្ពុជានឹងទទួលយក។តាមគម្រោង កម្ពុជា-ថៃ នឹងជួបពិភាក្សាគ្នារឿងបញ្ហាព្រំដែននៅថ្ងៃទី១៤ ខែមិថុនា ឆ្នាំ២០២៥ ខាងមុខ ក្នុងរាជធានីភ្នំពេញ ទោះជាយ៉ាងណារដ្ឋាភិបាលកម្ពុជាបញ្ជាក់ថានឹងមិនជជែកបញ្ហាប្រាសាទតាមាន់តូច តាមាន់ធំ តាក្របី និងតំបន់មុំបី ជាមួយថៃនោះទេ។
សម្ដេចធិបតី ហ៊ុន ម៉ាណែត បានបង្ហាញនូវក្ដីសង្ឃឹមថាកិច្ចប្រជុំខាងមុខនឹងចរចាបញ្ហាដែលនៅសេសសល់ពីតំបន់៤ខាងលើ ដោយផ្អែកលើ MOU ឆ្នាំ២០០០ និងសន្និសញ្ញាដែលបានព្រមព្រៀងគ្នាពីមុនមក។បញ្ហាព្រំដែននៅចំណុចប្រាសាទតាមាន់តូច តាមាន់ តាក្របី និងតំបន់មុំ៣ បានក្លាយជាបញ្ហារកាំរកូសរវាងកងទ័ពថៃ និងកម្ពុជាមកជាយូរមកហើយ រហូតមានការឈ្លានពានឆ្មក់ចូលមកបាញ់សម្លាប់ទាហានខ្មែរម្នាក់ កាលពីព្រឹកថ្ងៃទី២៨ ខែឧសភា ដែលធ្វើឱ្យស្ថានការណ៍ព្រំដែនកាន់តែកើនកម្ដៅបន្ថែមទៀត។
ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត ក្នុងសមាជរដ្ឋសភា-ព្រឹទ្ធសភា កាលពីថ្ងៃទី៣ ខែមិថុនាថ្មីៗ បានប្រកាសថាកម្ពុជានឹងបញ្ជូនករណីជម្លោះនៅតំបន់ទាំង៤ ទៅកាន់តុលាការយុត្តិធម៌អន្តរជាតិ ដើម្បីបញ្ចប់បញ្ហាដែលរ៉ាំរ៉ៃនេះ និងត្រូវបានអង្គសមាជបោះឆ្នោតគាំទ្រជាសំឡេងរួមឱ្យបន្តដំណើរការបណ្ដឹងផងដែរ។សម្រាប់ការសម្ពោធសមិទ្ធិផលវិញបើតាមរបាយការណ៍របស់លោក ញ៉ែម សំអឿន អភិបាលខេត្តរតនគិរី បានឱ្យដឹងថា នៅទូទាំងខេត្តនាពេលបច្ចុប្បន្ននេះ មានមត្តេយ្យសិក្សាគ្រប់រូបភាពចំនួន ២២៨កន្លែង, បឋមសិក្សាចំនួន២៣៨, អនុវិទ្យាល័យចំនួន២២, វិទ្យាល័យចំនួន១៨ និងសាលាឯកជនចំនួន៥០៦កន្លែង។ ចំនួនសិស្សសរុប ៦៣.៥២៣នាក់ ស្រី៣១,០២២នាក់ ក្នុងនោះសិស្សជនជាតិដើមភាគតិច ២៧,៤៧៣នាក់ ស្រី ១៣,៤៧៨នាក់ និងបុគ្គលិកអប់រំសរុប ចំនួន ១,៧១៩នាក់ ស្រី ៧៧៩នាក់។
ខេត្តបានរៀបចំគាំទ្រសាលារៀនស្ដង់ដាគំរូសាធារណៈចំនួន ៤០កន្លែង ក្នុងនោះ មត្តេយ្យសិក្សា ១កន្លែង បឋមសិក្សា ២៤កន្លែង និងមធ្យមសិក្សា១៥កន្លែង ព្រមទាំងរៀបចំគាំទ្រការផ្តល់សេវាសាធារណៈគំរូក្នុងវិស័យ អប់រំចំនួន ៣កន្លែងគឺ មត្តេយ្យសិក្សា ១កន្លែង និងវិទ្យាល័យ ២កន្លែង។របាយការណ៍ បានបង្ហាញផងដែរថា គ្រឹះស្ថានសិក្សាសាធារណៈ និងឯកជននៅក្នុងខេត្តរតនគិរី បើធៀប៥ឆ្នាំមុនកើនឡើង ៨២សាលា ចំនួនសិស្សកើនឡើង ៤,១៧០នាក់ ស្រី ១,៩៨១នាក់។
លោកអភិបាលខេត្តរតនគិរី បានឱ្យដឹងថា គិតមកទល់ពេលនេះសំណង់អគារសិក្សាជាអំណោយរបស់សម្តេចតេជោ ហ៊ុន សែន មានចំនួន ៤៨ខ្នង ស្មើនឹង ៣០២បន្ទប់ រួមទាំងហេដ្ឋារចនាសម្ព័ន្ធអប់រំផ្សេងៗទៀត។ ក្នុងនោះសំណង់ហេដ្ឋារចនាសម្ព័ន្ធអប់រំដែលមិនទាន់បានធ្វើពិធីសម្ពោធមាន ២៦កន្លែង និងខ្លោងទ្វារចំនួន ៤កន្លែង រួមមាន៖ អគារសិក្សាចំនួន ១៤កន្លែង ស្មើនឹង ១១០បន្ទប់ អាគារទីចាត់ការចំនួន ៨កន្លែង ស្មើនឹង ៣២បន្ទប់ អគារសយនដ្ឋានចំនួន ៥កន្លែង ស្មើនឹង ៩១បន្ទប់ អគារពិសោធន៍ ចំនួន ១កន្លែង ស្មើនឹង ៥បន្ទប់។
