លោកស៊ីជីងពីងជាប់ជាលេខាបក្សកុំមុយនិស្តចិនអាណត្តិទី៣ដោយកម្ចាត់ចេញអ្នកមានប្រីយ៍ភាពនិងចង់ជម្ទាស់
21-September-2026 / ព័ត៌មានអន្តរជាតិ
ប្រទេសចិន៖កាលពីថ្ងៃអាទិត្យទី២៣តុលា គណៈកម្មការមជ្ឈិមបក្សកុំមុយនិស្តចិនថ្មីដែលមាន២០៥រូប បានបោះឆ្នោតជ្រើសតាំង និងបង្ហាញសមាជិកគណៈកម្មាធិការអចិន្ត្រៃយ៍នៃការិយាល័យនយោបាយបក្ស ទាំង៧រូបដែលជាមេដឹកនាំកំពូល។ លោក ស៊ីជីនពីង នៅបន្តជាអគ្គលេខាបក្ស៥ឆ្នាំបន្ថែមទៀត ដែលនាំឲ្យ លោក ស៊ីជីនពីង នឹងក្លាយជាប្រធានាធិបតីអាណត្តិទីបី នៅខែមីនា ២០២៣។
សមាជិកអចិន្ត្រៃយ៍ដ៏មានអំណាចកំពូលដែលជាមនុស្សស្មោះជាមួយលោកស៊ីជីងពីងរួមមាន៖ទីមួយ លោក លី ជាំង Li Qiang អគ្គលេខាបក្សប្រចាំក្រុងសៀងហៃ ដែលចម្រូងចម្រាសខ្លាំងក្នុងចំណាត់ការប្រឆាំងកូវីដ តែស្និទ្ធនឹងលោកស៊ីជីងពីង ទំនងនឹងទទួលតួនាទីជានាយករដ្ឋមន្ត្រីបន្តពីលោក លី កឺឈាំង ដែលជាមនុស្សមានប្រីយ៍ភាពតែតរុវដេញចេញពីគណសមាជិកគណកម្មធិការមជ្ឈឹម។ បន្ទាប់មកគឺ Zhao Leji យុទ្ធប្រឆាំងនឹងអំពើពុករលួយដែលជួយពង្រឹងអំណាចលោកស៊ីដោយកម្ចាត់មន្ត្រីមួយចំនួនក្រោមរូបភាពពុករលួយ និង លោក Wang Huning ទទួលបន្ទុកផ្នែកមនោគមវិជ្ជាបក្ស។ ទាំងពីររូបនេះជាសមាជិកចាស់ដែលបន្តអាណត្តិថ្មី។ ចំណែក លោក សែ ជី Cai Qi អគ្គលេខាបក្សក្រុងប៉េកាំង Ding Xuexiang នាយកការិយាល័យមជ្ឈិមបក្សនិងការិយាល័យប្រធានាធិបតី (ដៃស្តាំរបស់លោកស៊ីជីនពីង) ព្រមទាំងលោក លី ស៊ី (Li Xi)អគ្គលេខាបក្សខេត្តក្វាងទុង ជាសមាជិកអចិន្ត្រៃយ៍ថ្មីដែលមកជំនួយអ្នកចេញទៅនិវត្តន៍។
សូមបញ្ជាក់ដែរថាមុននឹងមានកោះបោះឆ្នោតជ្រើសតាំងសមាជិកថ្មីនៃគណៈកម្មាធិការមជ្ឈឹមបក្ស ព្រមទាំងបោះឆ្នោតលើខ្លឹមសារធម្មនុញ្ញថ្មីរបស់បក្សកុម្មុយនីស្តចិន។ប្បតិ្តហេតុមួយបានកើនឡើងមុនពេលបន្តិច ដែលអង្គមហាសន្និបាតលើកទី២០របស់បក្សកុម្មុយនីស្តចិនអ្នកកាសែតរបស់ទីភ្នាក់ងារព័ត៌មានបារាំង AFPបានថតបាន គឺគេឃើញមានបុគ្គលិកម្នាក់ មកឱននិយាយជាមួយលោកហ៊ូ ជីនតាវអាយុ៧៩ឆ្នាំជាសមាជិកការិយាល័យបក្សនិងជាអតីតលេខាបក្សនិងប្រធានាធិបតីចិនដោយចាប់បង្ខំឲ្យគាត់ក្រោកចេញពីអង្គសន្និបាទ ទោះជាលោកហ៊ូ ជីនតាវ មិនចង់ព្រមធ្វើតាមក៏ដោយ។ លោកហ៊ូ ជីនតាវ បានបង្ហាញអាកប្បកិរិយា ប្រឹងរើបំរាស់ មិនចង់ដើរចេញទៅតាមការបង្ខំរបស់គេទេ។
ឧប្បតិ្តហេតុនេះ គឺជារឿងកម្រ និងគួរឲ្យភ្ជាក់ផ្អើលខ្លាំងណាស់ ព្រោះថាតាមធម្មតា មហាសន្និបាតបក្សកុម្មុយនីស្តចិន គឺមានការរៀបចំប្រូតូកូលតឹងតែងខ្លាំងណាស់ មិនដែលមានរឿងអ្វីចម្លែកដែលគេមិនបានគ្រោងទុក អាចកើតឡើងបានឡើយ។ គ្មានការបញ្ជាក់ព័ត៌មានណាមួយពីអ្នករៀបចំអង្គសន្និបាតទេ ហើយបណ្តាញព័ត៌មានក្នុងស្រុកចិន ក៏មិនបាននិយាយអ្វីទាំងអស់ ទាក់ទិននឹងឧប្បត្តិហេតុនេះ។ ជាងនេះទៀត នៅលើបណ្តាញ Weibo របស់ចិនវិញ គឺគេបិទព័ត៌មានទាំងស្រុងតែម្តងឲ្យតែពាក់ព័ន្ធនឹងលោកហ៊ូ ជីនតាវ។ក្រោយមកទើបមានទីភ្នាក់ងារសារព័ត៌មានចិន Xinhua បាននិយាយនៅក្នុងបណ្ដាញ Twitter កាលពីល្ងាចថ្ងៃសៅរ៍ថា “លោក ហ៊ូ ជីនតាវ បានអញ្ជើញឲ្យចូលរួមក្នុងសម័យប្រជុំបិទនៃសមាជជាតិលើកទី ២០ របស់គណបក្ស ទោះបីជាគាត់ទើបតែជាសះស្បើយពីជំងឺនាពេលថ្មីៗនេះក៏ដោយ” ។
ដោយឡែក Twitter មួយទៀតបាននិយាយថា “នៅពេលលោក ហ៊ូ ជីនតាវ មានអារម្មណ៍មិនស្រួលក្នុងអំឡុងពេលប្រជុំនោះ បុគ្គលិករបស់លោកបានអមគាត់ទៅបន្ទប់មួយនៅក្បែរកន្លែងប្រជុំដើម្បីឲ្យលោកសម្រាក ខណៈរហូតមកដល់ពេលនេះ លោក ហ៊ូ ជីនតាវ មានសុខភាពប្រសើរជាងមុនហើយ” ។មិនដឹងថា តើលោក ហ៊ូ ជីនតាវ ដែលមានវ័យ៧៩ឆ្នាំ ចាស់ជរាទ្រុឌទ្រោមនោះ ត្រូវគេក្រៀកចេញដោយសារបញ្ហាសុខភាព ឬមួយក៏ជារឿងផ្សេង? វាអាចដែរ ដែលគាត់អាចរំខានដល់អង្គសន្និបាត តាមរយៈការបោះឆ្នោតជំទាស់ ដែលអាចធ្វើឲ្យខូចដល់ទំនៀមទំលាប់ របស់មហាសន្និបាតបក្សកុម្មុយនីស្តចិន ដែលតែងតែបោះឆ្នោតគាំទ្រជាឯកច្ឆ័ន្ទ១០០%។
ថ្ងៃចុងក្រោយនៃមហាសន្និបាទនេះ សមាជិកបក្សទាំង២៣០០នាក់ ដែលមានវត្តមាន បានបោះឆ្នោតជាឯកច្ឆ័ន្ទតែងតែងគណៈកម្មាធិការមជ្ឈឹមបក្សថ្មី ដែលមានសមាជិកទាំងអស់២០៥នាក់។ យោងតាមតារាងឈ្មោះ ដែលទីភ្នាក់ងារព័ត៌មានចិនផ្លូវការចិនបានចុះផ្សាយ គឺមានឥស្សរជន៤នាក់ ដែលលែងមានឈ្មោះជាសមាជិកនៃគណៈកម្មាធិការមជ្ឈឹមបក្សតទៅទៀតហើយ។ ក្នុងនោះ គឺលោក លី កឺឈាំង នាយករដ្ឋមន្ត្រីបច្ចុប្បន្ន ដែលត្រូវឲ្យឈប់ព្រោះដល់អាយុចូលនិវត្តន៍។
បន្ទាប់មកទៀត លោក Li Zhanshu ប្រធានសភាប្រជាមានិតចិន លោកឧបនាយករដ្ឋមន្ត្រីបច្ចុប្បន្ន Han Zheng ក៏ត្រូវគេដកចេញដែរ។ ហើយលោក Wang Yang ប្រធានក្រុមប្រឹក្សានយោបាយប្រជាមានិតចិន ក៏លែងមានឈ្មោះក្នុងគណៈកម្មាធិការមជ្ឈឹមបក្សដែរ។ លោក Wang Yang នេះ ត្រូវគេស្គាល់ថាជាមនុស្សមានទំនោរសេរីនិយមខ្លាំងជាគេ ក្នុងចំណោមសមាជិកធំៗរបស់បក្សកុម្មុយនីស្តចិន ហើយកន្លងមកធ្លាប់ត្រូវគេរំពឹងថាប្រហែលជាអាចឡើងមកធ្វើជានាយករដ្ឋមន្ត្រីអាណត្តិថ្មីនេះ។ តែពេលនេះ គឺត្រូវគេដកចេញហើយ។
តាមការគុណគូររបស់ទីភ្នាក់ងារព័ត៌មានបារាំង គឺគណៈកម្មាធិការមជ្ឈឹមបក្សថ្មីនេះ មានសមាជិកចាស់ៗប្រមាណ៦៥%។ ក្នុងមានស្ត្រិតែ១១នាកប៉ុនណោះ។ចំណែកឯការិយាល័យនយោបាយដែលជាស្ថាប័នសម្រេចរបស់ប្រទេស មានសមាជិក២៥រូបវិញ ក៏ត្រូវបានបង្ហាញដែរ តែលើកនេះជាលើកទីមួយ គិតតាំងពី២៥ឆ្នាំ ការិយាល័យគ្មានសមាជិកភេទស្រីម្នាក់សោះ។ សមាជិកស្រីតែម្នាក់គត់របស់ការិយាល័យបានចូលនិវត្តន៍។
ក្រោយពីបញ្ចប់មហាសន្និបាតបក្សកុំមុនិស្តចិនបានបញ្ចេញពត៍មានសេដ្ឋកិច្ចសម្រាប់ត្រីមាសទី៣។តាមទិន្នន័យផ្សព្វផ្សាយដោយការិយាល័យស្ថិតិក្នុងថ្ងៃចន្ទ ទី២៤ តុលា ចិនបានស្គាល់កំណើនសេដ្ឋកិច្ចក្នុងអត្រា ៣,៩% សម្រាប់តីមាសទី៣ ក្រោយពីមានការធ្លាក់ចុះចំនួន ២,៦% នៅត្រីមាសទី២។ គួរបញ្ជាក់ថាតាមធម្មតា ចិនត្រូវផ្សព្វផ្សាយតួលេខកំណើនសេដ្ឋកិច្ចត្រីមាសទី៣ តាំងពីថ្ងៃអង្គារ ទី១៨ តុលាមុនម្ល៉េះ។
កំណើនសេដ្ឋកិច្ចចិនក្នុងត្រីមាសទី៣ បានស្ទុះឡើងដល់ទៅ ៣,៩% ពោលខុសពីការព្យាករណ៍ទុករបស់ក្រុមអ្នកជំនាញទាំង ១២នាក់ដែលថាមានត្រឹមតែ ២,៥%។ ការព្យាករណ៍ក្នុងអត្រា ២,៥% ដោយក្រុមអ្នកជំនាញយល់ថា ចិនបន្តអនុវត្តន៍នយោបាយសូន្យកូវីដដែលបានធ្វើឲ្យប៉ះពាល់យ៉ាងខ្លាំងដល់សកម្មភាពសេដ្ឋកិច្ច។
គួរបញ្ជាក់ថា រវាងត្រីមាសទី១ ត្រីមាសទី២ និងត្រីមាសទី៣ ចិនបានស្គាល់កំណើនសេដ្ឋកិច្ចខុសគ្នាឆ្ងាយ។ នៅត្រីមាសទី ១ កំណើនសេដ្ឋកិច្ចដែលចិនទទួលបានមានដល់ទៅ ៤,៨%។ តែបានធ្លាក់ចុះយ៉ាងគំហុកនៅត្រីមាសទី២ ដោយទទួលបានត្រឹមតែ ០,៤%។ ឥឡូវនេះនៅត្រីមាសទី៣ កំណើនសេដ្ឋកិច្ចបានងើបឡើងវិញក្នុងអត្រា ៣,៩%។ « ចាប់ពីពេលនេះតទៅ សេដ្ឋកិច្ចចិនបានស្គាល់សញ្ញាងើបឡើងវិញហើយ » នេះជាការថ្លែងសាទររបស់អ្នកទទួលខុសត្រូវជាន់ខ្ពស់នៃការិយាល័យស្ថិតិ។
