អាមេរិកប្រើដ្រូន សម្លាប់មេបញ្ជាការក្រុម Kataib Hezbollahក្នុងទីក្រុងបាកដាដ
11-February-2026 / ព័ត៌មានអន្តរជាតិ
ប្រទេសអ៊ីរ៉ាក់៖ មេបញ្ជាការម្នាក់របស់ក្រុម Kataib Hezbollah ជាចលនាប្រដាប់អាវុធមួយគាំទ្រដោយអ៉ីរ៉ង់ នៅក្នុងប្រទេសអ៉ីរ៉ាក់ និងដែលមន្ទីរបញ្ចកោណ ចោទថាជាអ្នកនៅពីក្រោយការវាយប្រហារលើកងទ័ពអាមេរិក ត្រូវបានសម្លាប់ ក្នុងការវាយប្រហារតាមផ្លូវអាកាសមួយរបស់សហរដ្ឋអាមេរិក កាលពីថ្ងៃពុធ ទី៧ ខែកុម្ភៈ។
ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៨ ខែកុម្ភៈ ឆ្នាំ២០២៤បានផ្សាយឲ្យដឹងថា៖យោធាអាមេរិក បានគូសបញ្ជាក់នៅក្នុងសេចក្ដីថ្លែងការណ៍មួយដូច្នេះថា «កងកម្លាំងអាមេរិកបានដឹកនាំការវាយប្រហារតាមផ្លូវអាកាសមួយតែម្នាក់ឯង នៅក្នុងប្រទេសអ៉ីរ៉ាក់ ជាការសងសឹកទៅនឹងការវាយប្រហារលើកងទ័ពអាមេរិក ដោយបានសម្លាប់មេបញ្ជាការម្នាក់របស់ក្រុម Kataib Hezbollah ដែល ទទួលខុសត្រូវលើការដឹកនាំផែនការ និងចូលរួមក្នុងការវាយប្រហារលើកងកម្លាំងអាមេរិក នៅក្នុងតំបន់»។ យោធាអាមេរិកមិនបានបញ្ជាក់ពីឈ្មោះរបស់ មេបញ្ជាការរូបនោះឡើយ ដោយគ្រាន់តែបន្ថែមថាមិនមានជនស៊ីវិលស្លាប់ ឬរងរបួសក្នុងការវាយប្រហាររបស់ខ្លួនទេ។
ប៉ុន្តែ ប្រភពផ្នែកសន្តិសុខ២រូបក្នុងលក្ខខណ្ឌមិនបញ្ចេញឈ្មោះបានឱ្យដឹងថាមេបញ្ជាការក្រុម Kataib Hezbollah ឈ្មោះ Abu Baqir al-Saadi ដែលស្ថិតនៅក្នុងចំណោមមនុស្ស៣នាក់ ត្រូវបានសម្លាប់ នៅក្នុងការវាយប្រហារដោយយន្ដហោះដ្រូនលើរថយន្ដមួយគ្រឿង នៅភាគខាងកើតទីក្រុងបាកដាដ។ ទោះបីយ៉ាងណាករណីយ៍នេះបើតាមទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី៨ ខែកុម្ភៈ ឆ្នាំ២០២៤ជ្ញាធរអ៊ីរ៉ាក់បានចោទប្រកាន់ថា ក្រុមយោធាចម្រុះដឹកនាំដោយសហរដ្ឋអាមេរិក គឺជាកត្តាបង្កអស្ថិរភាព នៅក្នុងប្រទេសមជ្ឈិមបូព៌ាមួយនេះ បន្ទាប់ពីទីក្រុងវ៉ាស៉ីនតោន បានបើកការវាយប្រហារក្នុងទឹកដីអ៉ីរ៉ាក់ លើក្រុមចលនាប្រដាប់អាវុធដែលគាំទ្រដោយអ៉ីរ៉ង់។
អ្នកនាំពាក្យយោធាអ៉ីរ៉ាក់ លោក Yahya Rasool បានលើកឡើងនាថ្ងៃព្រហស្បតិ៍នេះថា ក្រុមយោធាចម្រុះអន្តរជាតិដឹកនាំដោយអាមេរិក បានក្លាយជាកត្តាបង្កអស្ថិរភាពមួយ នៅប្រទេសអ៉ីរ៉ាក់ និងកំពុងធ្វើឱ្យអ៉ីរ៉ាក់ស្ថិតក្នុងហានិភ័យ នៃការជាប់ជំពាក់ជំពិនក្នុងវដ្តនៃជម្លោះ។សូមបញ្ជាក់ដែរថាអាមេរិកទទួលបានជោគជ័យជាបន្តបន្ទាប់ក្នុងការសងសឹកលើគូសត្រូវដោយប្រើដ្រូនដែលជាដឹងថាមានតម្លៃប្រហែលជាង២០០លានដុល្លារអាមេរិក។ជាក់ស្តែងកាលពីឆ្នាំ២០២០នៅក្នុងបរទេសអ៊ីរ៉ាកដដែលលោកឧត្ដមសេនីយ៍ កាស្សេម សូឡៃមេនី (Qassem Soleimani) ដែលជាប្រមុខកងអង្គភាពពិសេស (Quds Force) នៃកងកម្លាំងឆ្មាំបដិវត្តន៍ អ៊ីរ៉ង រួមជាមួយមនុស្ស ០៦នាក់ផ្សេងទៀតត្រូវបានសម្លាប់ នៅក្នុងការវាយប្រហារតាមផ្លូវអាកាសដឹកនាំដោយសហរដ្ឋអាមេរិក លើក្បួនរថយន្ដមួយ នៅឯអាកាសយានដ្ឋានអន្តរជាតិទីក្រុងបាកដាដ ប្រទេសអ៊ីរ៉ាក់។ នេះបើតាមអ្នកនាំពាក្យកងជីវពលអ៊ីរ៉ាក់ ដកស្រង់ចេញផ្សាយដោយទីភ្នាក់ងារព័ត៌មាន Reuters នៅព្រឹកថ្ងៃសុក្រ ទី០៣ ខែមករា ឆ្នាំ២០២០។
អ្នកនាំពាក្យកងជីវពលនៃកងកម្លាំងចលនាប្រជាជន (Popular Mobilization Forces) គាំទ្រដោយអ៊ីរ៉ង់ គឺជាអ្នកទទួលស្គាល់ព័ត៌មានខាងលើ ជាមួយការគូសបញ្ជាក់ដូច្នេះថា «សហរដ្ឋអាមេរិក និងអ៊ីស្រាអែលគឺជាអ្នកទទួលខុសត្រូវ ចំពោះការស្លាប់របស់លោក Qassem Soleimani និងលោក អាប៊ូ ម៉ាហ៍ឌី អាល់មូហានឌីស (Abu Mahdi al-Muhandis) ដែលជាមេបញ្ជាការរបស់ពួកយើង»។សូមបញ្ជាក់ដែរថាកាលពីឆ្នាំ២០១៦មេក្លោងក្រុមភេរវជន២រូបនៅអាហ្វហ្កានីស្ថាន ត្រូវបានបាញ់់សម្លាប់ដោយយន្តហោះដ្រូនអាមេរិក ដែលមានឈ្មោះហ្វារុក អាល់កាតានី Farouq al-Qahtani និងម្នាក់ទៀតឈ្មោះ ប៊ីឡាល់ អាល់ អ៊ូតាប៊ី Bilal al-Utabi។ ក្រុមភេរវជនអាល់កៃដា ចាត់ទុកជនអាល់ កាតានី ជាមេដឹកនាំលំដាប់ទី១ ហើយអាល់ អ៊ូតាប៊ី ជាមេដឹកនាំលំដាប់ទី២រឺក៏ទី៣។ ប្រតិបត្តិការដ្រូនកំចាត់មេក្លោងក្រុមអាល់កៃដាធំៗទាំង២រូបនេះ បានដំណើរការនៅខែត្រគូណា ភាគខាងជើងអាហ្វហ្កានីស្ថាន ជិតព្រំដែនប៉ាគីស្ថាន។ទោះបីយ៉ាងណាកាលពីឆ្នាំ២០២០ដ្រូនអាមេរិកដែលមានតម្លៃប្រមាណ២០០លានដុល្លារអាមេរិកត្រូវបានកាំជ្រួចប្រទេសអ៊ីរ៉ង់បាញ់ទម្លាក់បានផងដែរ។
គួរបញ្ជាក់ថា ក្រុមយោធាចម្រុះអន្តរជាតិដឹកនាំដោយអាមេរិកនៅប្រទេសអ៊ីរ៉ាក់ ត្រូវបានបង្កើតឡើងដើម្បីប្រយុទ្ធប្រឆាំងក្រុមភេរវករ ISIS។ សហរដ្ឋអាមេរិក មានកងទ័ពចំនួន២,៥០០នាក់ នៅទីនោះ ដើម្បីផ្តល់ប្រឹក្សានិងជួយគាំទ្រកងកម្លាំងអ៉ីរ៉ាក់ ក្នុងការទប់ស្កាត់កុំឱ្យពួក ISIS ពង្រីកខ្លួនឡើងវិញ។ ដោយឡែក ចាប់តាំងពីសង្គ្រាមរវាងអ៊ីស្រាអែលនិងហាម៉ាស បានផ្ទុះឡើងនៅដែនដីប៉ាឡេស្ទីន Gaza Strip នៅខែតុលា ឆ្នាំ២០២៣មក អ៊ីរ៉ាក់និងស៊ីរីបានមើលឃើញការកើនឡើង នៃការវាយប្រហារដាក់គ្នាទៅវិញទៅមក រវាងក្រុមចលនាប្រដាប់អាវុធដែលមានអ៊ីរ៉ង់ជាខ្នងបង្អែក និងកងកម្លាំងអាមេរិកដែលឈរជើងនៅក្នុងតំបន់។ សហរដ្ឋអាមេរិក បានបង្កើនការវាយប្រហារលើក្រុមប្រដាប់អាវុធគាំទ្រដោយអ៉ីរ៉ង់ នៅក្នុងប្រទេសស៊ីរី និងអ៉ីរ៉ាក់ ចាប់តាំងពីសប្ដាហ៍មុនមក ហើយថាវាគ្រាន់តែជាការចាប់ផ្ដើមប៉ុណ្ណោះ ក្នុងការសងសឹកចំពោះការវាយប្រហារដោយយន្ដហោះដ្រូនដែលបានសម្លាប់ទាហានអាមេរិក ៣នាក់ នៅក្នុង ប្រទេសហ្ស៊កដានី៕
