រឿងកូរ៉េខាងជើងបាញ់មីស៊ីលរំលងប្រទេសជប៉ុនអាមេរិកកូរ៉េខាងត្បូងជប៉ុនឯកភាពគ្នាត្រៀមឆ្លើយតបតែកម្ពុជាអំពាវនាវឲ្យមកចរចារ៦ភាគីវិញ
21-September-2026 / ព័ត៌មានអន្តរជាតិ
កូរ៉េខាងជើង៖ ទីប្រឹក្សាសន្តិសុខជាតិអាមេរិក លោក ជេក ស៊ូលីវ៉ាន់ (Jake Sullivan) បានជួបពិភាក្សាដាច់ដោយឡែកជាមួយសមភាគីកូរ៉េខាងត្បូង និងជប៉ុន អំពីការបាញ់មីស៉ីលរបស់កូរ៉េខាងជើង។ទីភ្នាក់ងារសារព័ត៌មាន AFP នៅថ្ងៃអង្គារ ទី៤ ខែតុលា ឆ្នាំ២០២២បានដកស្រង់សម្តីអ្នកនាំពាក្យសន្តិសុខជាតិ លោកស្រី អេឌ្រីយែន វ៉ាតសុន (Adrienne Watson) មកផ្សាយថា ក្នុងកិច្ចពិភាក្សាទាំងពីរខាងលើនេះ លោក ស៊ូលីវ៉ាន់ បានពិគ្រោះយោបល់លើការឆ្លើយតបរួមគ្នា និងជាអន្តរជាតិដ៏សមស្របហើយរឹងមាំ។
លោកទីប្រឹក្សាសន្តិសុខជាតិ ក៏បានបញ្ជាក់ពីការប្តេជ្ញាចិត្តរបស់សហរដ្ឋអាមេរិក ចំពោះការការពារប្រទេសជប៉ុន និងកូរ៉េខាងត្បូង ផងដែរ។ដោយឡែកលោកនាយរដ្ឋមន្ត្រីជប៉ុន លោក គីស៊ីដា ហ្វូមីអុ នៅថ្ងៃអង្គារនេះបានថ្កោលទោសកូរ៉េខាងជើងយ៉ាងខ្លាំង ចំពោះការបាញ់មីស៊ីលផ្លោងមួយគ្រាប់ហោះរំលង ប្រទេសជប៉ុនដោយជំរុញអាជ្ញាធរព្រមានប្រជាជននៅក្នុងតំបន់រត់រកកន្លែងមាន សុវត្ថិភាព និងបានផ្អាកប្រតិបត្តិការស្ថានីយរថភ្លើងនៅប៉ែកខាងជើងនៃប្រទេស ដោយចាត់ទុកថាការបាញ់មីស៊ីលនេះជា «អាកប្បកិរិយាហិង្សា»។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី៤ ខែតុលា ឆ្នាំ២០២២។
ថ្លែងប្រាប់អ្នកសារព័ត៌មាន លោក គីស៊ីដា ចាត់ទុកថាការបាញ់មីស៊ីលនេះជា «អាកប្បកិរិយាហិង្សា» ជាមួយការគូសបញ្ជាក់ដូច្នេះថា «មីស៊ីលផ្លោងមួយគ្រាប់ត្រូវបានគេជឿជាក់ថាបានហោះរំលងប្រទេសរបស់យើង និងបានធ្លាក់ចូលក្នុង មហាសមុទ្រប៉ាស៊ីហ្វិក។ នេះជាអាកប្បកិរិយាហិង្សា បន្ទាប់ពីការធ្វើតេស្ដមីស៊ីលផ្លោងជាបន្តបន្ទាប់ ហើយយើងពិតជាថ្កោលទោសយ៉ាងខ្លាំងចំពោះទង្វើមួយ នេះ»។រដ្ឋមន្ត្រីការពារជាតិជប៉ុន លោក យ៉ាស៊ុកាហ្សូ ហាម៉ាដា (Yasukazu Hamada) បាននិយាយថាជប៉ុននឹងពិចារណា ក៏ដូចជាត្រួតពិនិត្យលើជម្រើសទាំងអស់ក្នុងនោះរួមមានទាំងសមត្ថភាពវាយបកជាដើម។ ដោយឡែក ប្រធានាធិបតីកូរ៉េខាងត្បូង ក៏បានព្រមានចាត់វិធានការឆ្លើយតបយ៉ាងម៉ឺងម៉ាត់ ចំពោះការបាញ់មីស៊ីលរបស់កូរ៉េខាងជើងនេះផងដែរ.។
គួរបញ្ជាក់ថា យោធាជប៉ុនមិនបានចាត់វិធានការ ឬប្រើប្រព័ន្ធការពារដែនអាកាសបំផ្លាញមីស៊ីលរបស់កូរ៉េខាងជើងឡើយ ដែលជាការបាញ់មីស៊ីលរំលងប្រទេស ជប៉ុន លើកដំបូងបំផុតដោយទីក្រុងព្យុងយ៉ាងចាប់តាំងពីឆ្នាំ២០១៧មក។មីស៊ីលផ្លោងដែលកូរ៉េខាងជើង បានបាញ់សាកល្បងនេះត្រូវបានយោធាជប៉ុនបញ្ជាក់ថាអាចហោះបានចម្ងាយ ៤,៦០០គីឡូម៉ែត្រ ក្នុងរយៈកម្ពស់ ១,០០០ គីឡូម៉ែត្រ។ ចំណែកឯ យោធាកូរ៉េខាងត្បូង ក៏បានឱ្យដឹងដែរថាកូរ៉េខាងជើងពិតជាបានបាញ់មីស៊ីលផ្លោងរយៈចម្ងាយមធ្យម ឬ IRBM មួយគ្រាប់ ដោយ បាញ់ចេញពីខេត្ត ចាហ្កាំង (Jagang) របស់កូរ៉េខាងជើងផងដែរ។
សម្រាប់កម្ពុជាដែលជាប្រធានអាស៊ានប្តូវេនវិញតាមរយៈក្រសួងការបរទេស និងសហប្រតិបត្តិការអន្តរជាតិនៅថ្ងៃទី០៤ ខែតុលា ឆ្នាំ២០២២នេះ បានចេញសេចក្តីថ្លែងការណ៍សម្តែងការព្រួយបារម្ភចំពោះការបាញ់សាកល្បងកាំជ្រួចមីស៊ីលផ្លោងរបស់កូរ៉េខាងជើងនិងបានអំបាវនាវឲ្យវិលទៅរកកិច្ចចរចារ៦ភាគីដើម្បីលុបបំបាត់អាវុធនុយក្លែអែរ។តាមរយៈសេចក្តីថ្លែងការណ៍ ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា សូមសម្តែងការព្រួយបារម្ភចំពោះការបាញ់សាកល្បងកាំជ្រួចមីស៊ីលផ្លោង ដែលធ្វើឡើងដោយសាធារណរដ្ឋប្រជាមានិតប្រជាធិបតេយ្យកូរ៉េ កាលពីថ្ងៃទី០៤ ខែតុលា ឆ្នាំ២០២២ ដែលជាការរំលោភមួយទៀតលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ និងដែលអាចបង្កអោយមានភាពតានតឹង និងគំរាមកំហែងដល់សន្តិភាព និងស្ថិរភាពក្នុងតំបន់។
ក្រសួងការបរទេស និងសហប្រតិបត្តិការអន្តរជាតិ បានអំពាវនាវដល់សាធារណរដ្ឋប្រជា-មានិតប្រជាធិបតេយ្យកូរ៉េ អនុវត្តឱ្យបានពេញលេញនូវរាល់សេចក្តីសម្រេចចិត្តរបស់ក្រុមប្រឹក្សាសន្តិសុអង្គការសហប្រជាជាតិ និងកាតព្វកិច្ចអន្តរជាតិរបស់ខ្លួន ហើយអំពាវនាវឱ្យភាគីពាក់ព័ន្ធទាំងអស់រក្សាភាពអត់ធ្មត់ និងបង្កើតបរិយាកាសអំណោយផលដល់ការបន្តកិច្ចចរចា៦ភាគីឡើងវិញ ដែលអាចនាំមកនូវការរំសាយអាវុធនុយក្លេអ៊ែរនៃឧបទ្វីបកូរ៉េ ដែលពេញលេញ អាចផ្ទៀងផ្ទាត់បាន មិនអាចវិលត្រឡប់ថយក្រោយ និងដោយសន្តិវិធី។
