ចិន៤១នាក់នាំគ្នាជិះទូកឈើចូលស្រុកខ្មែរមកលិចនៅកោះតាងសង្គ្រោះបានខ្លះនៅបាត់ខ្លួន៨នាក់ទៀត!
02-November-2023 / ព័ត៌មានជាតិ
ព្រះសីហនុ៖ លោក គួច ចំរើន អភិបាលខេត្តព្រះសីហនុ បានប្រាប់បណ្ដាញព័ត៌មាន ឲ្យដឹងថា គិតត្រឹមរសៀលថ្ងៃទី២៤ ខែកញ្ញា ឆ្នាំ២០២២នេះ ជនរងគ្រោះ(ជនជាតិចិន)ដែលជួបហេតុការណ៍លិចទូកកណ្ដាលផ្ទៃសមុទ្រជិតកោះតាង ចំនួន៣៣នាក់ត្រូវបានជួយសង្គ្រោះ ប៉ុន្ដែអកុសលក្នុងមានចំនួន៣នាក់បានស្លាប់បាត់បង់ជីវិត។ ដោយឡែក នៅសល់ចំនួន៨នាក់ទៀត កំពុងបន្ដស្វែងរកនៅឡើយ។ ក្នុងចំណោមជនរងគ្រោះទាំង៣៣នាក់នោះ កម្ពុជាជួយសង្គ្រោះបាន២៤នាក់ និងវៀតណាមជួយសង្គ្រោះបាន៩នាក់។
លោក គួច ចំរើន បានថ្លែងយ៉ាងដូច្នេះថា «គិតមកដល់ម៉ោងនេះ កម្ពុជាយើងជួយសង្គ្រោះចំនួន២១នាក់ និងសាកសព៣សព សរុបចំនួន២៤នាក់។ វៀតណាមជួយសង្គ្រោះបាន៩នាក់ សរុប៣៣នាក់ នៅសល់៨នាក់ទៀត ដែលកំពុងស្វែងរក»។គួរជម្រាបថា ហេតុការណ៍លិចទូកដែលផ្ទុកមនុស្សចំនួន៤១នាក់នេះ បានកើតមានឡើងនៅវេលាម៉ោងប្រមាណ១០ព្រឹក ថ្ងៃទី២២ ខែកញ្ញា ឆ្នាំ២០២២ ក្រោយទទួលបានព័ត៌មាននេះ កម្លាំងសមត្ថកិច្ចជំនាញលើផ្ទៃទឹក បានរួមដៃគ្នាចេញជួយអន្ដរាគមន៍សង្គ្រោះភ្លាមៗ។
ក្រោយពីបានធ្វើការសាកសួរទៅលើឈ្មោះ CHENGUI SHENG ភេទប្រុស មកពីខេត្តហ្វូចៀន ប្រទេសចិន ជាតំណាងជនរងគ្រោះ បានប្រាប់ថា នៅលើទូកមានជនជាតិចិនសរុបចំនួន ៤១នាក់ ស្រី០៣នាក់។ឈ្មោះCHENGui Sheng ជនជាតិចិនភេទប្រុស ជនរងគ្រោះដែលបានលិចទូកនោះបានប្រាប់សមត្ថកិច្ចថា ទូកនេះបានធ្វើដំណើរចេញពីប្រទេសចិន(កំពង់ផែក្វាង ចូវ) តាមរយៈកប៉ាលលឿន០១គ្រឿង នៅថ្ងៃទី១១ខែកញ្ញាឆ្នាំ២០២២ រួចបានសាងមកទូកឈើ០១គ្រឿង នៅអំឡុងថ្ងៃទី១៧ ខែកញ្ញាឆ្នាំ២០២២នៅសមុទ្រអន្តរជាតិជាមួយតៃកុងទូកជនជាតិខ្មែរចំនួន០២នាក់ និងបានបន្តនៅលើទូកឈើនោះរហូតដល់ថ្ងៃទី២២ខែកញ្ញាឆ្នាំ២០២២ ទូកឈើនោះខូចក៏ចាប់ផ្តើមលិចបន្តិចម្តងៗ ទើបមានទូកនេសាទ១គ្រឿងប្រភេទទូកអូសពណ៌បៃតង មានមនុស្សចំនួន០៦នាក់ បានមកទទួលយកតៃកុងខ្មែរ០២នាក់នោះចេញទៅបាត់ ដោយទុកតែអ្នកធ្វើដំណើរនៅលើទូក ក្រោយមកទូកនេះក៏បានលិចបាត់នេះនៅកណ្តាលសមុទ្រ ។
លោកឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក នៃអគ្គស្នងការដ្ឋាននគរបាលជាតិ ធ្វើឡើងនៅព្រឹកថ្ងៃទី២៤ ខែកញ្ញា ឆ្នាំ២០២២ ក្នុងឱកាសលោកដឹកនាំកិច្ចប្រជុំដើម្បីជំរុញអនុវត្តផែនការការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ក្នុងឱកាសប្រារព្ធពិធីបុណ្យកាន់បិណ្ឌ-បុណ្យភ្ជុំបិណ្ឌប្រពៃណីជាតិខ្មែរ ឆ្នាំ២០២២បានជំរុញដល់ក្រុមល្បាតដើម្បីស្វែងរកជនរងគ្រោះដែលបានបាត់ខ្លួន ចំនួន៨នាក់ផ្សេងទៀត នៅអង្គភាពបង្ក្រាបបទល្មើសលើកផ្ទៃសមុទ្រ ខេត្តព្រះសីហនុ។
សម្រាប់ការជួយសង្គ្រោះនេះ នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ បានប្រគល់ថវិកាផ្ទាល់ខ្លួនចំនួន ៨,០០០,០០០រៀល ផ្ដល់ជូនកងកម្លាំង របស់អង្គភាពបង្ក្រាបលើផ្ទៃសមុទ្រ និងវរសេនាតូចនគរបាលការពារព្រំដែនទឹកលេខ២៤០ (មួយអង្គភាព ទទួលបាន៤,០០០,០០០រៀល) ដែលបានខិតខំប្រឹងប្រែងជួយសង្គ្រោះជនរងគ្រោះដែលបានជួបឧបទ្ទវហេតុ។ទោះបីយ៉ាងណារឿងលិចទូកដឹកចិននេះរដ្ឋបាលខេត្តព្រះសីហនុពុំទាន់បានបញ្ជាក់ថា ជនជាតិចិន ដែលធ្វើដំណើរតាមផ្លូវទឹកឆ្លងដែនចូលកម្ពុជាបែបនេះ មានគោលបំណងអ្វី និងមានលិខិតឆ្លងដែនត្រឹមត្រូវឬអត់នៅឡើយទេក្នុងពេលដែលមានសាធារណជនមួយចំនួនសង្ស័យថា ជនជាតិចិនដែលជួបគ្រោះថ្នាក់លិចទូកនេះ ទំនងចាញ់បោកមេខ្យល់ ដែលល្បួងពួកគេឱ្យមកធ្វើការខុសច្បាប់នៅខេត្តព្រះសីហនុ។
