ថៃប្រញាប់ប្រញាល់ជម្លៀសពលរដ្ឋ ក្រោយគ្រាប់បែកមួយគ្រាប់របស់យោធាមីយ៉ាន់ម៉ា ធ្លាក់ចូលក្នុងទឹកដីថៃ

ថៃឡង់ដ៍-មីយ៉ាន់ម៉ា៖ គ្រាប់បែកមួយគ្រាប់របស់មីយ៉ាន់ម៉ា បានធ្លាក់ចូលក្នុងទឹកដីថៃ ដែលបង្ខំឱ្យអាជ្ញាធរថៃត្រូវជម្លៀសពលរដ្ឋខ្លួនទៅកាន់ទីតាំងសុវត្ថិភាពជាបន្ទាន់ ដើម្បីការពារអាយុជីវិតពីឥទ្ធិពលនៃសង្គ្រាមស៊ីវិលមីយ៉ាន់ម៉ា ដែលកំពុងរីករាលដាលដល់សន្តិសុខតាមព្រំដែនថៃ។ 

កាសែតKhaosod Englishថាឲ្យដឹងថា៖យោធាមីយ៉ាន់ម៉ា បានប្រើប្រាស់យន្តហោះចម្បាំងវាយប្រហារតាមអាកាស ដោយទម្លាក់គ្រាប់បែកចំនួន ៩ គ្រាប់ សំដៅលើមន្ទីរពេទ្យ និងសហគមន៍អ្នកស្រុករបស់ក្រុម KNU (សហភាពជាតិការ៉ែន) នៅក្បែរព្រំដែនថៃ ដែលបង្កឱ្យមានការភ័យខ្លាចយ៉ាងខ្លាំងដល់ប្រជាជនដែលរស់នៅតាមព្រំដែន កាលពីថ្ងៃអាទិត្យ ។ទោះជាយ៉ាងណាប្រទេសថៃ មិនបានចាត់វិធានការបកទៅវិញឬឆ្លើយតបអ្វីឡើយ ពោលគឺបានត្រឹមប្រកាសពង្រឹងសន្តិសុខផ្ទៃក្នុងនិងបន្តតាមដានមើលសភាពការណ៍នៃសមរភូមិនៅមីយ៉ាន់ម៉ា ប៉ុណ្ណោះ។

តាមការផ្សាយរបស់ The Nation នៅថ្ងៃអង្គារទី២១ខែមេសាឆ្នាំ២០២៦ ក្រសួងមហាផ្ទៃថៃ បានចេញបញ្ជាបន្ទាន់ឲ្យខេត្តចំនួន៤ជាប់ព្រំដែនមីយ៉ាន់ម៉ា ដូចជា Mae Hong Son, Chiang Mai, Chiang Rai និង Tak ត្រូវមានការប្រុងប្រយ័ត្នខ្ពស់និងឃ្លាំមើលសភាពការណ៍២៤ម៉ោងលើ២៤ម៉ោង ស្របពេលសមរភូមិប្រយុទ្ធនៅប្រទេសជិតខាង កំពុងក្តៅគគុក។ លើសពីនេះ ក្រសួងចេញបញ្ជាឲ្យអង្គភាពពាក់ព័ន្ធទាំងឡាយត្រូវពង្រឹងវិធានការសន្តិសុខ បង្កើនការល្បាត ពិនិត្យច្រកព្រំដែន និងតាមដានបើសិនជាសង្កេតឃើញបុគ្គលសង្ស័យ ជាពិសេសជនបរទេស។