រដ្ឋាភិបាលយោធាមីយ៉ាន់ម៉ា ព្រមានដាក់ពន្ធនាគារ អ្នកដែលបង្ហាញការគាំទ្រក្រុមឧទ្ទាម នៅលើបណ្តាញសង្គមបន្ទាប់ពីបាញ់រះសម្លាប់កុមារ
27-March-2024 / ព័ត៌មានអន្តរជាតិ
ប្រទេសមីយ៉ានម៉ា៖ រដ្ឋាបាលយោធាមីយ៉ាន់ម៉ានៅថ្ងៃអង្គារនេះ បានប្រកាសព្រមានប្រជាជនដែលផ្តល់កម្លាំងចិត្តគាំទ្រដល់ «ចលនាក្រុមភេរវករ» នឹងត្រូវចាប់ដាក់ពន្ធនាគាររហូតដល់១០ឆ្នាំ សម្រាប់ការចុច Like ឬ Share មាតិការបស់ក្រុមឧទ្ទាម នៅលើបណ្តាញទំនាក់ទំនងសង្គម។ ទីភ្នាក់ងារសារព័ត៌មាន Reuters នៅថ្ងៃអង្គារ ទី២០ ខែកញ្ញា ឆ្នាំ២០២២បានឲ្យដឹងថា៖រដ្ឋមន្ត្រីព័ត៌មាននិងជាអ្នកនាំពាក្យនៃរបបយោធា លោក ហ្សរ មីន ទីន (Zaw Min Tin) បានលើកឡើងថា «ក្រុមភេរវករ» កំពុងតែព្យាយាមស្វែងរក ការឧបត្ថម្ភដើម្បីយកសម្លាប់ជីវិតជនស្លូតត្រង់ នៅក្នុងយុទ្ធនាការរបស់ពួកគេ សំដៅធ្វើឱ្យប្រទេសជួបអស្ថិរភាព ដូច្នេះហើយការផ្តល់ការគាំទ្រដល់ពួកគេ នឹងត្រូវទទួលរងចំណាត់ការយ៉ាងម៉ឺងម៉ាត់។
លោក ហ្សរ មីន ទីន បាននិយាយថា ការគាំទ្រផ្តល់កម្លាំងចិត្តលើបណ្តាញសង្គម ចំពោះរដ្ឋាភិបាលស្រមោល NUG ឬមួយក៏ចំពោះ កងកម្លាំងប្រដាប់អាវុធ PDF របស់រដ្ឋាភិបាលនេះ អាចនាំទៅរកទោសជាប់ពន្ធនាគាររយៈពេលចាប់ពី ៣ឆ្នាំដល់១០ឆ្នាំ ហើយនឹងធ្ងន់ធ្ងរជាងនេះទៅទៀត សម្រាប់អ្នកដែលហ៊ានផ្តល់ជំនួយជាថវិកា ក្នុងតិចតួចប៉ុនណាក៏ដោយ។ក្រៅពីការបង្ហាញភាពផ្តាច់ការនេះដែរបើយោងតាមអង្គការយូនីសែហ្វបានឲ្យដសឹងថា មានកុមារចំនួន១១នាក់បានស្លាប់ នៅក្នុងហេតុការណ៍វាយប្រហារបាញ់រះតាមឧត្ថម្ភាគចក្រ ពីលើអាកាសមួយ បង្កឡើងដោយកងទ័ពភូមា ពីលើសាលារៀនមួយកន្លែងស្ថិតនៅភាគខាងជើង។ ការវាយប្រហារបានកើតឡើង កាលពីថ្ងៃទី១៦កញ្ញា នៅខេត្ត Sagaing មិនឆ្ងាយប៉ុន្មានពីក្រុងម៉ានដាឡេ។ ក្រៅពីនេះទៀត កុមារយ៉ាងហោច១៥នាក់បានបាត់ខ្លួន ហើយអង្គការយូនីសែហ្វ បានអំពាវនាវ ឲ្យដោះលែងពួកគេវិញជាបន្ទាន់ និងដោយសុវត្ថិភាពបំផុត។
យោងតាមវីដេអូមួយ ដែលសមាគមភូមាមួយបានទទួលបាន បានបង្ហាញឲ្យឃើញស្នាមឈាម ប្រឡាក់លើបន្ទះក្តារក្នុងថ្នាក់រៀន ហើយគេឃើញស្ត្រីម្នាក់ជាម្តាយអង្គុយយំសោក នៅក្បែរសាកសពកុមារម្នាក់ ដេកស្លាប់ដោយមានក្រណាត់គ្របពីលើ។ ដោយឡែក កម្លាំងការពារប្រជាជន PDFD ដែលជាក្រុមប្រដាប់អាវុធប្រឆាំងរបបសិក បានអះអាងថា កងទ័ពរបបសិកភូមាបានបាញ់រះ និងបានដុតផ្ទះប្រជាជនជាច្រើនខ្នង។
នៅថ្ងៃអង្គារទី២០កញ្ញានេះ របបសិកភូមា បានបញ្ជាក់ដោយបានទទួលស្គាល់ថា ពិតជាមានអ្នកភូមិស្លាប់ និងរបួសច្រើននាក់ពិតមែន នៅក្នុងប្រតិបត្តិការដែលកងទ័ពបានប្រើឧត្ថម្ភាគចក្រជាច្រើនគ្រឿង ដើម្បីបង្ក្រាបក្រុមឧទ្ទាមប្រដាប់អាវុធ កាលពីថ្ងៃសុក្រកន្លងទៅ នៅខេត្ត Sagaing ។ ក៏ប៉ុន្តែ របបសិកភូមា បានចោទថា គឺក្រុមឧទ្ទាមប្រដាប់អាវុធនៅតំបន់នោះទេ ដែលបានយកភូមិស្រុក និងសាលារៀនធ្វើជាខែល និងបានប្រព្រឹត្តិឧក្រិដ្ឋកម្មសង្គ្រាមនៅទីនោះ។ កងទ័ពភូមាអះអាងទៀតថា ក្នុងប្រតិបត្តិការបង្ក្រាបនេះ ខ្លួនបានរឹបអូសយកបាន នូវគ្រាប់មីន ២៣គ្រាប់ និងគ្រាប់បែកច្នៃ៨គ្រាប់។
ប្រតិកម្មចំពោះករណីវាយប្រហាររបស់កងទ័ពភូមា បណ្តាលឲ្យស្លាប់កុមារជាង១០នាក់នេះ លោក Hassan Noor អគ្គនាយកអង្គការ Save the Children ប្រចាំតំបន់អាស៊ី បានលើកឡើងថា សហគមន៍អន្តរជាតិ ត្រូវតែថ្កោលទោសអំពើនេះ ហើយត្រូវតែប្រឹងប្រែងរួមគ្នា ដើម្បីអាចឈានទៅចាប់អ្នកទទួលខុសត្រូវ មកទទួលទោសឲ្យបាន។ លោកបានអំពាវនាវផងដែរ ឲ្យសមាគមអាស៊ាន ត្រូវតែក្រោកឡើង ឈប់នៅស្ងៀមតទៅទៀត។គួររំលឹកថា គិតចាប់ពីថ្ងៃធ្វើរដ្ឋប្រហារ ខែកុម្ភៈ ឆ្នាំ២០២១មក កងទ័ពភូមា បានបើកប្រតិបត្តិការបង្ក្រាប បង្ហូរឈាមយ៉ាងខ្លាំងដៃបំផុត ទៅលើក្រុមប្រដាប់អាវុធប្រឆាំងនឹងរបបសិក ដោយមិនគិតខ្វល់ ឬការពារអាយុជីវិតជនស៊ីវីលស្លូតត្រង់ឡើយ។ មាន ប្រជាជនស៊ីវីលចំនួនប្រមាណ២៣០០នាក់ ត្រូវបានសម្លាប់ និង១៥០០០នាក់ទៀត ត្រូវគេចាប់ដាក់ឃុំ។ បើតាម អង្គការសហប្រជាជាតិ យ៉ាងហោចណាស់ ប្រជាជនជាង១លាននាក់បានភៀសខ្លួនដោយសារតែប្រតិបត្តិការបង្ក្រាបរបស់របបសិកភូមា នៅក្រោយពេលរដ្ឋប្រហារ៕
